இளையராஜா அவுட் ஜிவி பிரகாஷ் இன்...பாக்கெட் நாவல் படக்குழு அதிகாரப்பூர்வ அறிவிப்பு

ரூ.200 கோடி மோசடி வழக்கில் பிரபல நடிகைக்கு சம்மன்! - நவ.2 இல் ஆஜராக உத்தரவு

விவேக் தங்கராஜ் — Sun, 1 Nov 2026 07:29:22 +0530

பிரபல பாலிவுட் நடிகையும், ஜெயிலர் 2 படத்தில் பாடலுக்கு நடனமாடியவருமான நோரா பதேஹிக்கு ரூ.200 கோடி மோசடி வழக்கில் டெல்லி ரோஸ் அவென்யூ நீதிமன்றம் சம்மன் அனுப்பியுள்ளது.

ரூ.200 கோடி மோசடி வழக்கு

தொழிலதிபர் சுகேஷ் சந்திரசேகர், 2020-21 ஆம் ஆண்டு காலக்கட்டத்தில் சிறையிலிருந்த Ranbaxy மருந்து நிறுவன முன்னாள் உரிமையாளர் சிவிந்தர் மோகன் சிங்கை விடுவிப்பதாக கூறி அவரது மனைவியிடமிருந்து ரூ.200 கோடியை பெற்று மோசடியில் ஈடுபட்டடதாக குற்றம் சாட்டப்பட்டது. இந்நிலையில் இது தொடர்பாக நடைபெற்று வந்த வழக்கு விசாரணையில் நோரா பதேஹியிடம் ஏற்கனவே விசாரணை நடத்தப்பட்டது.

நவ.2 இல் ஆஜராக உத்தரவு

விசாரணை அதிகாரிகளிடம், தனக்கு சுகேஷ் சந்திரசேகருடன் அவரது மனைவி லீனா மரியா பால் மூலமாகவே தொடர்பு ஏற்பட்டதாகவும், தொழில் ரீதியிலான சந்திப்பு மற்றும் உரையாடல்கள் மட்டுமே நடைபெற்றதாகவும்
நோரா பதேஹி தெரிவித்ததாக கூறப்படுகிறது. இந்நிலையில் நோரா பதேஹியை சாட்சியாக பட்டியலிட்டுள்ள டெல்லி ரோஸ் அவென்யூ நீதிமன்றம் வருகிற 2-ஆம் தேதியன்று அவர் ஆஜராகவும் உத்தரவிட்டுள்ளது.

நவம்பர் முதல் ஜனவரி வரை வரிசைகட்டும் தமிழ்ப் படங்கள்.. ரிலீஸுக்குத் தயாராகும் 20 படங்கள்!

ராகேஷ் தாரா — Sat, 31 Oct 2026 19:08:22 +0530

தமிழ் சினிமாவில் ஒவ்வொரு வாரமும் வெளியாகும் திரைப்படங்களின் எண்ணிக்கை அதிகரித்து வரும் நிலையில், 2026 நவம்பர் மாதம் முதல் 2027 ஜனவரி வரை பல முக்கியமான படங்கள் திரையரங்குகளில் வெளியாகத் தயாராகி வருகின்றன. அருள்நிதி, தனுஷ், விஜய் சேதுபதி, அஜித் உள்ளிட்ட நடிகர்களின் படங்களும் இந்தப் பட்டியலில் இடம்பெற்றுள்ளன.

தமிழ் சினிமா வர்த்தக வழிகாட்டி வெளியிட்டுள்ள பட்டியலின்படி, நவம்பர் முதல் ஜனவரி வரை வெளியாகத் திட்டமிடப்பட்டுள்ள படங்களின் விவரங்களைப் பார்க்கலாம்.

நவம்பர் 6

நவம்பர் மாதத்தின் முதல் வாரத்தில் சூர்யா நடிப்பில் உருவாகியுள்ள 'SCENE' திரைப்படம் வெளியாகத் திட்டமிடப்பட்டுள்ளது. ஜீத்து மாதவன் இயக்கியுள்ள இப்படத்தை 2D மற்றும் ஜகாரம் ஸ்டுடியோஸ் தயாரித்துள்ளது. இதே நாளில் நயன்தாரா நடிப்பில் உருவாகியுள்ள 'மூக்குத்தி அம்மன் 2' திரைப்படமும் வெளியாக உள்ளது. சுந்தர் சி இயக்கியுள்ள இப்படம் பக்தி மற்றும் நகைச்சுவை கலந்த கதையாக உருவாகியுள்ளது.

நவம்பர் 13

இரண்டாவது வாரத்தில் அர்ஜுன் தாஸ் நடிப்பில் 'ஜான் டோ' திரைப்படமும், வெற்றி நடிப்பில் 'பிளாக் கோல்டு' திரைப்படமும் வெளியாகத் திட்டமிடப்பட்டுள்ளன. 'ஜான் டோ' படத்தை மதிமிதா இயக்கியுள்ளார். 'பிளாக் கோல்டு' படத்தை அருண் குமார் இயக்கியுள்ளார்.

நவம்பர் 20

இந்த வாரம் மூன்று திரைப்படங்கள் வெளியாக உள்ளன. தனுஷ் மற்றும் மம்மூட்டி இணைந்து நடித்துள்ள 'ஓம்' திரைப்படத்தை ராஜ்குமார் பெரியசாமி இயக்கியுள்ளார். விஜய் ஆண்டனி நடிப்பில் உருவாகியுள்ள 'அப்பா குட்டி' படத்தை மூ. மாறன் இயக்கியுள்ளார். கீர்த்தி சுரேஷ் மற்றும் மிஸ்கின் நடிப்பில் உருவாகியுள்ள 'சத்யவான் சாவித்திரி' திரைப்படத்தையும் இந்த வாரம் எதிர்பார்க்கலாம்.

நவம்பர் 27

மாதத்தின் கடைசி வாரத்தில் முகேன் ராவ், ப்ரீத்தி அஸ்ரானி நடிப்பில் 'நிறம்' திரைப்படமும், ராஷ்மிகா மந்தனா நடிப்பில் 'மையா' திரைப்படமும் வெளியாகத் திட்டமிடப்பட்டுள்ளன.

டிசம்பர் 4

டிசம்பர் மாதத்தின் முதல் வாரத்தில் மூன்று படங்கள் வெளியாக உள்ளன. மாணிக்கண்டன் நடிப்பில் சந்தோஷ் குமார் இயக்கியுள்ள 'மக்கள் காவலன்', விஜய் சேதுபதி நடிப்பில் மிஷ்கின் இயக்கியுள்ள 'டிரெயின்' மற்றும் ஆர்யா நடிப்பில் உருவாகியுள்ள 'ஹலோ காதல்' ஆகிய படங்கள் வெளியாகத் திட்டமிடப்பட்டுள்ளன.

டிசம்பர் 18

சந்தானம் நடிப்பில் செல்வின் ராஜ் சேவியர் இயக்கியுள்ள 'லவ் பைட்' திரைப்படம் டிசம்பர் 18ஆம் தேதி வெளியாக உள்ளது.

டிசம்பர் 24

கிறிஸ்துமஸ் பண்டிகையை முன்னிட்டு ஜீவா நடிப்பில் 'தகப்பன்' திரைப்படமும், பாசில் ஜோசப், எல்.கே. அக்ஷய் குமார் நடிப்பில் 'ராவாடி' திரைப்படமும் வெளியாகத் திட்டமிடப்பட்டுள்ளன.

ஜனவரி 14

2027 பொங்கல் வெளியீட்டுக்கான பட்டியலில் விஷால் நடிப்பில் சுந்தர் சி இயக்கியுள்ள 'புருஷன்' திரைப்படமும், விஜய் சேதுபதி நடிப்பில் மணிரத்னம் இயக்கியுள்ள 'இஞ்சி வெல்லம்' திரைப்படமும் இடம்பெற்றுள்ளன. தற்போது இந்த வரிசையில் பா ரஞ்சித் இயக்கியுள்ள சைன்ஸ் ஃபிக்‌ஷன் திரைப்படமான வேட்டுவம் படமும் இணைந்துள்ளது

வெளியீட்டுத் தேதி இன்னும் அறிவிக்கப்படாத படங்கள்

இவற்றைத் தவிர, வெளியீட்டுத் தேதி இன்னும் உறுதிசெய்யப்படாத பத்து திரைப்படங்களும் பட்டியலில் இடம்பெற்றுள்ளன. விஷ்ணு விஷால் நடிப்பில் 'இரண்டு வானம்', ரவி மோகன் நடிப்பில் 'கராத்தே பாபு', பிரபுதேவா நடிப்பில் 'மூன்வாக்', அருள்நிதி நடிப்பில் 'டிமான்டி காலனி 3', அருள்நிதி நடிப்பில் 'மை டியர் சிஸ்டர்', சித்தார்த் நடிப்பில் 'ரோடி அண்ட் கோ', அஜித் நடிப்பில் 'கிளாடியேட்டர்ஸ்', அருள்நிதி நடிப்பில் 'வேட்ட சாமி' மற்றும் பரத் நடிப்பில் 'மிஸ்டர் பாரத்' ஆகியவை இந்தப் பட்டியலில் உள்ளன.

இந்தப் பட்டியலில் இடம்பெற்றுள்ள வெளியீட்டுத் தேதிகள் அனைத்தும் தற்காலிகமானவை. தயாரிப்பாளர்கள் அறிவித்துள்ள தேதிகளின் அடிப்படையில் இந்தப் பட்டியல் தயாரிக்கப்பட்டுள்ளதால், படங்களின் வெளியீட்டுத் தேதிகளில் மாற்றங்கள் ஏற்படலாம். மேலும், வாரத்திற்கு நான்கு படங்களுக்கு மேல் வெளியானால் ரசிகர்களின் கவனம் பிரிந்துவிடும் என்பதால், வெளியீட்டுத் தேதியைத் தேர்வு செய்யும்போது தயாரிப்பாளர்கள் கவனமாகச் செயல்பட வேண்டும் என்றும் தமிழ் சினிமா வர்த்தக வழிகாட்டி குறிப்பிட்டுள்ளது.

ப்ரைம் வீடியோ டிஜிட்டல் தளத்தில் தமிழில் வெளியாகி இருக்கும் 'ஜிக்ரிஸ்'

ராகேஷ் தாரா — Sat, 31 Oct 2026 18:53:14 +0530

தெலுங்கு OTT-யில் வெளியாகி மாபெரும் வெற்றி பெற்ற 'ஜிக்ரிஸ்' திரைப்படம், இப்போது அமேசான் பிரைம் வீடியோவில் தமிழ், இந்தி, மலையாளம், கன்னடம் ஆகிய இந்திய மொழிகளில் பிரபலமாகி வருகிறது.

நான்கு நண்பர்களின் மறக்க முடியாத சாலைப் பயணம்

இயக்குநர் ஹரிஷ் ரெட்டி உப்பலா இயக்கிய 'ஜிக்ரிஸ்' ...ஒரு திரைப்படம் மட்டுமல்ல; அது நட்பின் கொண்டாட்டம். சிறுவயது நண்பர்களான கார்த்திக், பிரவீன், வினய் மற்றும் பிரசாந்த் ஆகிய நால்வரும் எந்தத் திட்டமிடலும் இல்லாமல் கோவாவிற்கு ஒரு சாலைப் பயணத்தை மேற்கொள்கின்றனர். ஆனால், அவர்களிடம் பணமோ, கைபேசியோ, ஜிபிஎஸ்ஸோ இல்லை; அவர்களிடம் இருப்பது ஒரு பழைய மாருதி 800 கார் மட்டுமே!

நகைச்சுவையுடன் தொடங்கும் இந்தப் பயணம், பல திருப்பங்களுடன் ஒரு ரோலர் கோஸ்டர் சவாரியாக மாறி, இறுதிக் காட்சிகளில் மனதை உருக்கும் உணர்ச்சிபூர்வமான அனுபவத்தைத் தருகிறது.

மாநில விருது பெற்ற நடிப்பு மற்றும் விமர்சனப் பாராட்டு

'ஜிக்ரிஸ்' தெலுங்கு ஓடிடி தளங்களில் வெளியானபோது பார்வையாளர்களிடமிருந்து பெரும் வரவேற்பைப் பெற்றது. அதன் வெற்றிக்கு முக்கிய காரணம், எந்தவித செயற்கைத்தனமும் இல்லாத அதன் இயல்பான நகைச்சுவையே. படத்தின் சிறப்பான கதையும், நடிப்பும் மாநில அளவில் அங்கீகரிக்கப்பட்டுள்ளன. இப்படத்தில் கதாநாயகனாக நடித்த கிருஷ்ணா புருகுலா, தனது சிறப்பான நடிப்பிற்காக மதிப்புமிக்க தெலங்கானா கத்தார் திரைப்பட விருது - சிறந்த நகைச்சுவையாளர் விருதை வென்றார். கார்த்திக் கதாபாத்திரத்தில் அவரது நகைச்சுவை மற்றும் உணர்ச்சிப்பூர்வமான நடிப்பு அனைவராலும் பாராட்டப்பட்டது.

இப்போது தமிழ், இந்தி, கன்னடம் மற்றும் மலையாளத்தில்!

நல்ல கதைகளுக்கு எல்லைகள் இல்லை என்பதை நிரூபிக்கும் வகையில், 'ஜிக்ரிஸ்' இப்போது அமேசான் பிரைம் வீடியோவில் தமிழ், இந்தி, கன்னடம் மற்றும் மலையாளத்தில் ஒளிபரப்பாகிறது. இந்த வார இறுதியில் உங்கள் நண்பர்கள் மற்றும் குடும்பத்தினருடன் கண்டு மகிழ, 'ஜிக்ரிஸ்' திரைப்படத்தை இப்போதே அமேசான் பிரைம் வீடியோவில் பாருங்கள்!

தெய்வ அருள்மனத்தோடு 'வேட்ட சாமி' படத்தின் 'சாமி அழைப்பு' லிரிக்கல் வீடியோ வெளியானது!

ராகேஷ் தாரா — Sat, 31 Oct 2026 18:48:46 +0530

தென் தமிழகத்தின் திருவிழாக்களையும் மக்களின் பண்பாட்டையும் தன் காந்தக் குரலினாலும் வில்லுப்பாட்டு இசையினாலும் கட்டிப்போட்ட கிராமத்துக் கலைஞர் மாதவி, முதன்முறையாகத் திரைத்துறையில் பின்னணிப் பாடகியாக அடியெடுத்து வைத்துள்ளார்!

'பம்பர்' படப்புகழ் எம். செல்வக்குமார் இயக்கத்தில், அருள்நிதி மற்றும் அமீர் இணைந்து நடிக்கும் ‘வேட்ட சாமி’ திரைப்படத்தின் முதல் பாடலான ‘சாமி அழைப்பு’ லிரிக்கல் வீடியோ (அக்டோபர் 30) வெளியாகி, பக்தியையும் கிராமத்து உணர்வுகளையும் நேசிக்கும் ரசிகர்களிடையே பெரும் வரவேற்பைப் பெற்று வருகிறது.

வில்லுப்பாட்டு கலையின் மூலம் பல்லாயிரக்கணக்கான மக்களின் அன்பு பெற்ற வில்லிசைக் கலைஞர் மாதவி, முதன்முறையாகச் சினிமாவில் பாடியுள்ள இந்த ஆன்மீகப் பாடல், கிராமத்துக் கோவில் திருவிழாவின் மெய்சிலிர்க்க வைக்கும் தெய்வீக அதிர்வை அப்படியே உங்கள் கண்முன்னே கொண்டுவந்து நிறுத்தும்!

இசையமைப்பாளர் ஜிப்ரானின் பாரம்பரியமிக்க நாட்டுப்புற இசையில் உருவாகியுள்ள 7 பாடல்களில், இந்தப் பாடல் திருவிழா மேளதாளங்கள் மற்றும் தெய்வ வழிபாட்டின் உச்சக்கட்ட அனுபவத்தைத் தருகிறது. ‘தாய் கிழவி’, ‘ஜாலியோ ஜிம்கானா’ பாடல்கள் மூலம் கவனம்பெற்ற பாடலாசிரியர் மு.ஜெகன் கவிராஜ், ‘வீரம் பாயும் நெல்லையிலே...’ எனத் தொடங்கும் இந்தப் பாடலின் கம்பீரமான வரிகளை எழுதியுள்ளார்.

7 MILES PER SECOND Productions சார்பில் சாமுவேல் மேத்யூ தயாரிக்கும் இத்திரைப்படத்தில் அருள்நிதி - அமீர் கூட்டணியுடன் இயக்குநர் தமிழ், விஜி சந்திரசேகர், 'ஆடுகளம்' நரேன், அர்ஜெய், OAK சுந்தர், மதுசூதனன், மைனா நந்தினி, கவிதா பாரதி மற்றும் நந்தினி எனப் பலரும் நடித்துள்ளனர்.

-ஆர்.டி.ராஜசேகரின் ஒளிப்பதிவு & ரூபனின் படத்தொகுப்புடன் தென் தமிழகத்தின் பண்பாடு, வீரம் மற்றும் ஆழமான தெய்வ நம்பிக்கையை அச்சு அசலாகக் காட்சிப்படுத்தியுள்ளது படக்குழு. பாடல்களின் உரிமையை PRIME9 MUSIC நிறுவனம் கைப்பற்றியுள்ளது.

போஸ்ட் புரொடக்‌ஷன் பணிகள் விறுவிறுப்பாக நடைபெற்று வரும் நிலையில், வரும் டிசம்பர் மாதம் ‘வேட்ட சாமி’ திரையரங்குகளில் வெளியாகவுள்ளது. ஊர் திருவிழாவின் அசல் பரவசத்தையும், வில்லிசை மாதவியின் கம்பீரமான குரலையும் முதன்முறையாகத் திரையில் அனுபவிக்கத் தயாராகுங்கள்!

https://youtu.be/LABmSOxaJqw?si=nyGlSUltOd866mfk

30 நிமிட கூடுதல் காட்சிகளுடன் ‘ஜெயிலர் 2’.. ஓடிடியில் வெளியாகும் அன்கட் வெர்ஷன்!

ராகேஷ் தாரா — Sat, 31 Oct 2026 15:25:59 +0530

ரஜினிகாந்த் நடிப்பில் வெளியான ‘ஜெயிலர் 2’ திரைப்படத்தின் அன்கட் வெர்ஷனை ஓடிடியில் வெளியிடுவதற்கான பேச்சுவார்த்தை நடைபெற்று வருகிறது. திரையரங்குகளில் வெளியான பதிப்பைவிட சுமார் 30 நிமிடங்கள் கூடுதல் காட்சிகள் இடம்பெறும் வகையில் புதிய பதிப்பு தயாராக இருப்பதாக வெளியாகியுள்ள தகவல் ரசிகர்களின் கவனத்தை ஈர்த்துள்ளது. மோகன்லால், ஹிருத்திக் ரோஷன், சந்தானம் ஆகியோரின் கூடுதல் காட்சிகள் இதில் இடம்பெறும் என தகவல்கள் வெளியாகியுள்ளன.

800 கோடியை நெருங்கும் ஜெயிலர் 2

நெல்சன் ரஜினி கூட்டணியில் உருவான ‘ஜெயிலர் 2’ திரைப்படம் அக்டோபர் 15ஆம் தேதி திரையரங்குகளில் வெளியானது. வெளியான 16 நாட்களில் ‘ஜெயிலர் 2’ உலகளவில் ரூ.776.95 கோடி வசூலித்துள்ளது. இந்தியாவில் ரூ.509.45 கோடியும், வெளிநாடுகளில் ரூ.267.50 கோடியும் வசூல் செய்துள்ளது. தமிழ்நாட்டில் மட்டும் ஜெயிலர் 2 திரைப்படம் ரூ200 கோடி வசூலை கடந்துள்ளது.

ஓடிட்யில் வெளியாகும் அன்கட் வர்ஷன்

ஜெயிலர் 2 படத்தில் படத்தில் பல்வேறு நடிகர்கள் சிறப்புத் தோற்றத்தில் நடித்துள்ளார்கள். மோகன்லால் , ஷிவராஜ்குமார் , ஹ்ரித்திக் ரோஷன் , சந்தானம் , விஜய் சேதுபதி ஆகிய பெரும் நடிகர்கள் பட்டாளம் இப்படத்தில் உள்ளனர். ஆனால் ரசிகர்கள் எதிர்பார்ப்பிற்கு மாறாக இந்த நடிகர்களின் ஒரு சில காட்சிகள் மட்டுமே படத்தில் இடம்பெற்றன. குறிப்பாக, மோகன்லாலின் மேத்யூ கதாபாத்திரத்துக்கான காட்சிகள் குறைவாக இருந்தது மலையாள ரசிகர்களிடையே அதிருப்தியை ஏற்படுத்தியது.

இதேபோல், இரண்டாம் பாதியில் சந்தானம் மற்றும் விஜய் சேதுபதி ஆகிய இருவரது காட்சிகள் படமாக்கப்பட்டு படத்தில் இடம்பெறாதது ரசிகர்களிடையே ஏமாற்றத்தை ஏற்படுத்தியது.

இந்த நிலையில் , சுமார் 30 நிமிட கூடுதல் காட்சிகளுடன் ஜெயிலர் 2 படத்தின் அன்கட் வெர்ஷன் ஓடிடியில் வெளியாகும் என்ற தகவல் வெளியாகியுள்ளது. மோகன்லால் , ஹ்ரித்திக் ரோஷன் ,சந்தானம் விஜய் சேதுபதி ஆகியோரது 30 நிமிட காட்சிகள் கூடுதலாக இணைக்கப்பட்டு படம் ஓடிடியில் வெளியாகும் என தகவல் வெளியாகியுள்ளது. இதனால் ரசிகர்கள் உற்சாகமடைந்துள்ளனர்.

1000 கோடி கனவு பலிக்குமா ?

மூன்றாவது வாரத்தில் திரையரங்கில் வெற்றிகரமாக ஓடிக்கொண்டிருக்கும் ஜெயிலர் 2 800 கோடி வசூலை நெருங்குகிறது. அதிக வசூல் செய்த தமிழ் திரைப்படமாக ஜெயிலர் 2 சாதனை படைத்துள்ளது . ஆனால் படம் 1000 கோடி வசூல் செய்வதற்கான சாத்தியங்கள் குறைவாகவே உள்ளன. தீபாவளி பண்டிகை வரை ஜெயிலர் 2 படத்திற்கு திரையரங்கில் நல்ல வரவேற்பு இருக்கும் என்று எதிர்பார்க்கப்படுகிறது. இதனால் தமிழ் சினிமாவின் முதல் 1000 கோடி வசூல் செய்த படமாக ஜெயிலர் 2 படம் அமையுமா என்கிற ரசிகர்களின் விருப்பம் நீடிக்கும் .

டிக்கெட் விலை உயர்வு...சிறப்புக் காட்சி அனுமதி..முதலவர் விஜய்க்கு திரையரங்க உரிமையாளர்கள் 9 கோரிக்கைகள்

ராகேஷ் தாரா — Sat, 31 Oct 2026 14:55:20 +0530

தமிழகத்தில் திரையரங்குகளை நடத்துவதில் பல்வேறு நடைமுறை மற்றும் பொருளாதார சிக்கல்கள் இருப்பதாகத் திரையரங்க உரிமையாளர்கள் தொடர்ந்து தெரிவித்து வருகின்றனர். குறிப்பாக, டிக்கெட் விலையை உயர்த்த முடியாத நிலை, பராமரிப்புச் செலவுகள் மற்றும் திரையரங்குகளுக்கான கட்டுப்பாடுகள் ஆகியவை அவர்களின் முக்கிய பிரச்சினைகளாக உள்ளன. இந்தச் சூழலில், தமிழக முதல்வர் விஜய்யைச் சந்தித்துள்ள தமிழ்நாடு திரையரங்க உரிமையாளர்கள் சங்கத்தினர், தங்களது கோரிக்கைகளை அரசிடம் சமர்ப்பித்துள்ளனர்.

விஜய்யிடம் 9 கோரிக்கைகளை வைத்த திரையரங்க உரிமையாளர்கள்

அவர்கள் முன்வைத்துள்ள முக்கிய கோரிக்கைகளில் அதிகபட்ச டிக்கெட் விலையை உயர்த்துவது முதன்மையானதாக உள்ளது. தற்போது ₹150-ஆக உள்ள அதிகபட்ச டிக்கெட் விலையை, பொருந்தக்கூடிய வரிகள் மற்றும் பராமரிப்புக் கட்டணங்கள் நீங்கலாக ₹250-ஆக உயர்த்த வேண்டும் எனக் கேட்டுள்ளனர். மேலும், ஒவ்வொரு இரண்டு ஆண்டுகளுக்கும் டிக்கெட் விலையில் தானாகவே 10 சதவீத உயர்வை அறிமுகப்படுத்த வேண்டும் என்றும் வலியுறுத்தியுள்ளனர்.

ஒரு டிக்கெட்டுக்கான திரையரங்கு பராமரிப்புக் கட்டணத்தை (TMC) ₹6-லிருந்து ₹10-ஆக உயர்த்த வேண்டும் என்பதும் அவர்களின் கோரிக்கையாகும்.

இதுதவிர, தகுதியுள்ள திரையரங்குகளை குறு, சிறு மற்றும் நடுத்தர நிறுவனங்களாக (MSME) அங்கீகரித்து சலுகை மின்சாரக் கட்டணம் வழங்க வேண்டும் எனக் கேட்டுள்ளனர். டிஜிட்டல் புரொஜெக்ஷன் பயன்படுத்தும் திரையரங்குகளுக்கு உரிமம் பெற்ற புரொஜெக்டர் ஆபரேட்டர்கள் கட்டாயம் இருக்க வேண்டும் என்ற விதியை நீக்க வேண்டும் என்றும் தெரிவித்துள்ளனர்.

ஏற்கெனவே செயல்பட்டு வரும் திரையரங்கு வளாகங்களில் கூடுதல் திரைகளை அமைப்பதற்கான அனுமதிகளை எளிமைப்படுத்த வேண்டும். சி-படிவ (C-Form) சினிமா உரிமப் புதுப்பிப்பின் செல்லுபடிக் காலத்தை ஐந்து ஆண்டுகளாக நீட்டிக்க வேண்டும் என்றும் கோரியுள்ளனர்.

மேலும், CBFC சான்றிதழ் தேவையில்லாத நேரடி விளையாட்டுப் போட்டிகள், இசை நிகழ்ச்சிகள், கலாச்சார நிகழ்வுகள் உள்ளிட்ட திரைப்படம் அல்லாத நிகழ்ச்சிகளைத் திரையிட அனுமதிக்க வேண்டும் என வலியுறுத்தியுள்ளனர்.

தற்போது காலை 9 மணி முதல் அதிகாலை 2 மணி வரை உள்ள திரையரங்குகளின் செயல்பாட்டு நேரத்தை, காலை 6 மணி முதல் அதிகாலை 2 மணி வரை மாற்ற வேண்டும் என்றும் கேட்டுள்ளனர். அதேநேரத்தில், ஒரு நாளைக்கு ஐந்து காட்சிகள் என்ற உச்சவரம்பைத் தொடர்ந்து தக்கவைக்க வேண்டும் எனவும் கோரிக்கை வைத்துள்ளனர்.

இந்தக் கோரிக்கைகள் மீது தமிழக அரசு எத்தகைய நடவடிக்கை எடுக்கப்போகிறது என்பது திரையரங்க உரிமையாளர்கள் மற்றும் திரையுலகினர் ஆவலோடு எதிர்பார்த்து காத்திருக்கிறார்கள்.

தளுக்கு புளுக்கு தக்காளி... இன்ஸ்டாகிராமில் ஆதிக்கம் செலுத்தும் ஏஐ காய்கறி கேரக்டர்கள்! நெட்டிசன்கள் ஜாலி!

சுகுமாறன் — Sat, 31 Oct 2026 11:28:07 +0530

ஃபேஸ்புக், ட்விட்டர், இன்ஸ்டாகிராம் ஆகிய சமூக வலைதளங்கள் பயனுள்ள பல தகவல்களை பகிர்வதற்கு பயன்படுவது மட்டுமின்றி நம்மை சிரிக்கவைப்பதற்கும் பல கேளிக்கையான தகவல்களையும் பகிர்வதற்கும் பயன்பட்டு வருகிறது.

தளுக்கு புளுக்கு தக்காளி:

இணைய உலகத்திற்கு கிடைத்த புதிய வரமாக பார்க்கப்படுவது ஏஐ தொழில்நுட்பம். இந்த ஏஐ தொழில்நுட்பத்தைப் பயன்படுத்தி பல்வேறு வீடியோக்கள் உருவாக்கப்பட்டு அவை இணையத்தை கலக்கி வருகின்றன. இன்றைய காலகட்டத்தில் இளைஞர்கள் உள்பட பொதுமக்கள் அதிகம் பயன்படுத்தும் சமூக வலைதளமாக இருப்பது இன்ஸ்டாகிராம்.

இந்த இன்ஸ்டாகிராமில் ட்ரெண்டிங் ஆவதற்காகவே பலரும் பல வீடியோக்களை உருவாக்கி பகிர்ந்து வருகின்றனர். குறிப்பாக, தற்போது ஏஐ-யில் உருவாகும் வீடியோக்களே அதிகளவு இன்ஸ்டாகிராமில் ஆதிக்கம் செலுத்தி வருகின்றனர். அப்படி, இன்ஸ்டாகிராமில் ஆதிக்கம் செலுத்தி வரும் வீடியோவாக உருவெடுத்துள்ள தளுக்கு புளுக்கு தக்காளி.

நெட்டிசன்கள் வரவேற்பு:

காய்கறிகளையும், பழங்களையும் மனிதர்கள் போல உருவகப்படுத்தி மனிதர்களிடையே நடக்கும் குடும்ப சண்டைகள் போல சித்தரிக்கப்பட்டு இன்ஸ்டாகிராமில் இந்த தொடர் அசத்தி வருகிறது. தளுக்கு புளுக்கு தக்காளி, தேங்காய் தேனாண்டாள், மாங்கா மஞ்சுளா, மேனா மினிக்கி பெர்ரி என அதன் கதாபாத்திரங்கள் பெயர்கள் மிகப்பெரிய அளவில் நெட்டிசன்கள் இடையே வரவேற்பைப் பெற்றுள்ளது.

கணவனை குடும்ப வறுமைக்காக பணக்கார பெண்ணிற்கு திருமணம் செய்து வைக்கும் முதல் மனைவி என்ற இரட்டை ரோஜா படத்தின் கதையை மையமாக உருவாகியுள்ள இந்த இணைய வெப்சீரிஸ் கதைக்கு தொடர்ந்து நல்ல வரவேற்பு நெட்டிசன்கள் இடையே கிடைத்து வருகிறது.

இன்ஸ்டாகிராமில் ஆதிக்கம்:

சமீபகாலமாக இன்ஸ்டாகிராமில் ஏஐ வீடியோக்கள் மிகப்பெரிய அளவில் வரவேற்பை பெற்று வருகிறது. பொழுதுபோக்கிற்காக மட்டுமின்றி வர்த்தக உள்ளிட்ட முக்கிய நிர்வாக பணிகளுக்கும் ஏஐ தொழில்நுட்பத்தை பயன்படுத்தி வீடியோக்கள் உருவாக்கப்பட்டு வருகிறது. தற்போதே திரைப்படத் துறையில் ஏஐ ஆதிக்கம் செலுத்தி வரும் நிலையில், எதிர்காலங்களில் ஏஐ திரையுலகில் ஆதிக்கம் செலுத்தும் என்று எதிர்பார்க்கப்படுகிறது.

இணையத்தில் கலக்கல்:

கடந்த சில நாட்களுக்கு முன்பு இணையத்தில் விலங்குகள் எல்லாம் தங்கள் பெயரைக் கூறி பாட்டு பாடி ஆடுவது போன்ற இணையத்தைக் கலக்கியது. மேலும், மனிதர்கள் ஒவ்வொரு விலங்கையும் எப்படி நடத்துவோமாே? அதேபோல மனிதர்களை அந்த விலங்குகள் நடத்தினால் எப்படி இருக்கும்? என்று சித்தரித்து ஏஐ வீடியோக்கள் வெளியானது. இதுவும் இணையத்தில் மிகப்பெரிய அளவில் வரவேற்பை பெற்றது. ஏஐ வீடியோக்கள் எந்தளவு வரவேற்பை பெற்று வருகிறதோ, அதே அளவு ஏஐ வீடியோக்கள் உண்மையா? போலியா? என்ற சந்தேகப்படும் அளவிற்கு தத்ரூபமாக வெளியாகியும் வருகிறது.

Karthigai Deepam: இதயத்துடன் வரும் கார்த்திக்.. ஆம்புலன்ஸ் டிரைவர் செய்த சதி! சாமுண்டீஸ்வரி உயிர் பிழைப்பாரா?

சுகுமாறன் — Sat, 31 Oct 2026 10:35:31 +0530

ஜீ தமிழ் தொலைக்காட்சியில் திங்கள் முதல் சனி வரை இரவு 9 மணிக்கு கார்த்திகை தீபம் சீரியல் ஒளிபரப்பாகி வருகிறது. அடுத்தடுத்து பல பரபரப்பான திருப்பங்கள் அரங்கேறி வருகின்றன. சாமுண்டீஸ்வரியின் உயிரைக் காப்பாற்ற கார்த்திக் போராடி வரும் நிலையில், அவரைத் தடுக்க சந்திரகலா போடும் சதிகள் கதையை இன்னும் விறுவிறுப்பாக்கியுள்ளன.

புறப்பட்ட கார்த்திக்:

அருணின் உடல் உறுப்புகளைத் தானமாகக் கொடுக்க முடிவு செய்ததைத் தொடர்ந்து, அவருடைய இதயத்தைச் சாமுண்டீஸ்வரிக்குப் பொருத்தி அவரது உயிரைக் காப்பாற்ற கார்த்திக் கிளம்புகிறார். இதயத்தைச் சரியான நேரத்தில் மருத்துவமனைக்குக் கொண்டு சேர்க்க வேண்டும் என்பதால், ஆம்புலன்ஸில் பதற்றத்துடன் பயணிக்கிறார்.

டிரைவருக்கு மிரட்டல்:

இதற்கிடையில், இந்த விஷயம் சந்திரகலாவுக்குத் தெரிய வருகிறது. உடனே தன்னுடைய ஆளான மதுவை வைத்து, ஆம்புலன்ஸ் டிரைவர் ரமேஷுக்குப் போன் செய்து மிரட்டுகிறார்.

“எந்தக் காரணத்தைக் கொண்டும் ஆம்புலன்ஸ் சரியான நேரத்துக்கு மருத்துவமனைக்குப் போய்ச் சேரக் கூடாது. ஏதாவது காரணத்தைச் சொல்லி வண்டியைத் தாமதப்படுத்து. இல்லையென்றால் உன் குடும்பத்தையே கொன்றுவிடுவேன்” என்று மது எச்சரிக்கிறான்.

மனமுருகி பிரார்த்தனை:

இதைக் கேட்டு பயந்துபோகும் ரமேஷ், கார்த்திக்கை எப்படியாவது தாமதப்படுத்த வேண்டும் என்று திட்டம் போடுகிறான். மறுபக்கம், சாமுண்டீஸ்வரியின் இதய அறுவை சிகிச்சை நல்லபடியாக முடிய வேண்டும் என்பதற்காக ரேவதி, ரோகிணி, பரமேஸ்வரி, சுவாதி ஆகியோர் கோயிலில் விளக்குப் பூஜை செய்து மனமுருகிப் பிரார்த்தனை செய்கின்றனர்.

அதே நேரத்தில், மருத்துவமனையில் அறுவை சிகிச்சை அறைக்கு வெளியே ராஜராஜன் உள்ளிட்ட குடும்பத்தினர் கார்த்திக்கின் வருகைக்காகப் பதற்றத்துடன் காத்திருக்கின்றனர்.
தன்னுடைய திட்டப்படி, ஆம்புலன்ஸில் ஏதோ பழுது ஏற்பட்டுவிட்டதாகச் சொல்லி ரமேஷ் வண்டியை நிறுத்துகிறான். இதனால் சந்தேகமடையும் கார்த்திக், “வேறு ஆம்புலன்ஸை ஏற்பாடு செய்யலாமா?” என்று கேட்கிறார்.

தப்பியோடிய டிரைவர்:

ஆனால், “இன்னும் இரண்டு நிமிஷத்தில் சரி செய்துவிடலாம்” என்று சொல்லி ரமேஷ் சமாளிக்கிறான். இதற்கிடையில், கார்த்திக் தன் மீது சந்தேகப்படுவதைப் பற்றி சந்திரகலாவிடம் தெரிவித்து, இனி என்ன செய்வது என்று கேட்கிறான்.

அதற்கு சந்திரகலா, “யாரும் இல்லாத ஒரு இடத்துக்கு வண்டியைக் கொண்டு போய் நிறுத்திவிட்டு, அங்கிருந்து தப்பிச்சிடு” என்று ஐடியா கொடுக்கிறாள். அவள் சொன்னபடியே, ஆள் நடமாட்டமே இல்லாத ஒதுக்குப்புறமான இடத்துக்கு ஆம்புலன்ஸைக் கொண்டு செல்லும் ரமேஷ், திடீரென வண்டியை நிறுத்திவிட்டு சாவியையும் எடுத்துக்கொண்டு அங்கிருந்து ஓடிவிடுகிறான்.

வண்டியை ஸ்டார்ட் செய்த கார்த்திக்:

டிரைவர் ஓடுவதைப் பார்த்த கார்த்திக், இதற்குப் பின்னால் ஏதோ சதி இருப்பதைப் புரிந்துகொள்கிறார். ஆம்புலன்ஸின் சாவியும் இல்லை, டிரைவரும் இல்லை. இப்படியொரு இக்கட்டான சூழ்நிலையிலும் கார்த்திக் கொஞ்சம்கூட மனம் தளரவில்லை.

உடனே ஒரு மெக்கானிக்குக்குப் போன் செய்து நடந்த விஷயத்தைச் சொல்கிறார். அவர் கூறும் வழிமுறையின்படி, சாவி இல்லாமலேயே வயரிங் மூலம் ஆம்புலன்ஸை ஸ்டார்ட் செய்து, தானே வண்டியை ஓட்டத் தொடங்குகிறார்.

தடுப்பாளா சந்திரகலா?

இதையெல்லாம் தூரத்திலிருந்து பார்த்த ரமேஷ் அதிர்ச்சியடைந்து, உடனே சந்திரகலாவுக்குப் போன் செய்து விஷயத்தைச் சொல்கிறான்.

கார்த்திக் சாவி இல்லாமலேயே ஆம்புலன்ஸை ஸ்டார்ட் செய்துவிட்டார் என்று ரமேஷ் கூற, அதிர்ச்சியுடன் சிந்திக்கத் தொடங்குகிறாள் சந்திரகலா. இப்படிப் பரபரப்பான சூழ்நிலையில் அடுத்ததாக நடக்க போவது என்ன என்பது குறித்து அறிய கார்த்திகை தீபம் சீரியலை உங்கள் ஜீ தமிழ் தொலைக்காட்சியில் காணத்தவறாதீர்கள்.

தொழிலதிபர் சண்முகப்பிரியா உதயநிதி ஸ்டாலின் படத்தில் பணியாற்றியுள்ளாரா! அதிர்ச்சி பின்னணி

ராகேஷ் தாரா — Fri, 30 Oct 2026 19:07:02 +0530

தனியார் பள்ளிகளுக்கு அங்கீகாரம் பெற்றுத் தருவதாகக் கூறி சுமார் நூறு கோடி ரூபாய் வசூலிக்கப்பட்டதாக அளிக்கப்பட்ட புகாரின் அடிப்படையில் சென்னை மத்திய குற்றப்பிரிவு போலீசார், முன்னாள் அமைச்சர் அன்பில் மகேஷை கைது செய்துள்ளனர். இந்த வழக்கின் விசாரணையில் பெண் தொழில்முனைவோரான சண்முகப்பிரியாவின் பெயரும் இடம்பெற்றுள்ளது. இதையடுத்து, சென்னை பெருங்குடி மற்றும் நீலாங்கரையில் உள்ள அவருக்குச் சொந்தமான இடங்களில் அக்டோபர் 28ஆம் தேதி போலீசார் சோதனை நடத்தினர்.

அப்போது ஆவணங்கள், வங்கிப் பரிவர்த்தனை விவரங்கள் மற்றும் மின்னணு சாதனங்கள் ஆய்வுக்கு எடுத்துக்கொள்ளப்பட்டன. இந்தச் சோதனை, வழக்கில் கூறப்படும் பணம் எந்த வழிகளில் பரிமாறப்பட்டது, அதில் வேறு நபர்களுக்கு தொடர்பு உள்ளதா என்பதை கண்டறியும் விசாரணையின் ஒரு பகுதியாக மேற்கொள்ளப்பட்டது. வணிக நடவடிக்கைகள், வங்கிக் கணக்குகள், சொத்து விவரங்கள் ஆகியவற்றையும் அதிகாரிகள் ஆய்வு செய்தனர்.

உதயநிதி ஸ்டாலின் படத்தில் ஆடை வடிவமைப்பாளர்

இந்த விசாரணை செய்திகளுக்கு மத்தியில், சண்முகப்பிரியா திரைப்படத் துறையிலும் பணியாற்றியவர் என்ற தகவல் தற்போது வெளிவந்துள்ளது. உதயநிதி ஸ்டாலின் கதாநாயகனாக நடித்த ‘ஏஞ்சல்’ திரைப்படத்தில் அவர் ஆடை வடிவமைப்பாளராகப் பணியாற்றியுள்ளார். இதற்காக அவருக்கு ரூ25 லட்சம் சம்ப்ளமாக வழங்கப்பட்டதாகவும் தகவல்கள் வெளியாகியுள்ளன. கே.எஸ். அதியமான் இயக்கிய இப்படத்தில் ஆனந்தி, பாயல் ராஜ்புத் உள்ளிட்டோர் நடித்துள்ளனர். ஓ.எஸ்.டி. பிலிம்ஸ் சார்பில் ராமசரவணன் தயாரித்த இப்படத்தின் படப்பிடிப்பு 2018ஆம் ஆண்டு தொடங்கியது. படத்தின் பெரும்பகுதி படமாக்கப்பட்டிருந்தாலும், மீதமுள்ள பணிகள் நிறைவடையவில்லை.

‘ஏஞ்சல்’ திரைப்படத்தின் படப்பிடிப்புக்காக படக்குழுவினர் ஃபிஜி தீவுக்குச் சென்றுள்ளனர். அங்கு ஏழு நாட்கள் மட்டுமே படப்பிடிப்பு நடைபெற்றதாகக் கூறப்படுகிறது. இந்தப் படப்பிடிப்பில் உதயநிதி ஸ்டாலின், ஆனந்தி உள்ளிட்ட படக்குழுவினர் பங்கேற்றுள்ளனர். பின்னர் படத்தின் எஞ்சிய காட்சிகள் படமாக்கப்படாமல் திட்டம் பாதியில் நிறுத்தப்பட்டது.

படப்பிடிப்பை முடித்துக் கொடுக்கவில்லை என்றும், இதனால் ஏற்பட்ட இழப்புக்கு இழப்பீடு வழங்க வேண்டும் என்றும் தயாரிப்பாளர் ராமசரவணன் உதயநிதிக்கு எதிராக வழக்கு தொடர்ந்தார். படத்திற்காக 13 கோடி ரூபாய் செலவிட்டதாகவும், இன்னும் எட்டு நாட்கள் படப்பிடிப்பு தேவைப்படுவதாகவும் அவர் தனது மனுவில் குறிப்பிட்டிருந்தார். 25 கோடி ரூபாய் இழப்பீடு கோரிய அந்த வழக்கில், 2025 பிப்ரவரியில் உதயநிதி பதிலளிக்க சென்னை உயர் நீதிமன்றம் உத்தரவிட்டது.

தற்போது மாஜி அமைச்சர் அன்பில் மகேஷ் விவகாரத்தில் சண்முகப்பிரியா சம்பந்தபட்டுள்ள நிலையில் அவர் உதயநிதி ஸ்டாலின் படத்தின் பணியாற்றிய இந்த தகவலும் பேசுபொருளாகியுள்ளது.

இளையராஜா அவுட் ஜிவி பிரகாஷ் இன்...பாக்கெட் நாவல் படக்குழு அதிகாரப்பூர்வ அறிவிப்பு

ராகேஷ் தாரா — Fri, 30 Oct 2026 17:21:57 +0530

தியாகராஜா குமாரராஜா இயக்கத்தில் விஜய் சேதுபதி நடித்து வரும் புதிய படம் பாக்கெட் நாவல். மாளவிகா மோகணன் , ரக்‌ஷித் ஷெட்டி ஆகியோர் இப்படத்தில் நடித்து வருகிறார்கள். முன்னதாக இளையராஜா இப்படத்தின் இசையமைப்பாளராக அறிவிக்கப்பட்டார். ஆனால் ஒரு சில காரணங்களால் இளையராஜா இப்படத்தில் இருந்து விலகியதாகவும் ஜிவி பிரகாஷ் அவருக்கு பதிலாக இசையமைக்க இருப்பதாகவும் தகவல்கள் வெளியாகின. தற்போது இதனை படக்குழு அதிகாரப்பூர்வமாக அறிவித்துள்ளது. ஜிவி பிரகாஷ் படத்தில் இணைந்துள்ளதை சிறிய பாடல் ப்ரோமோ ஒன்றை வெளியிட்டு அறிவிப்பு வெளியிட்டுள்ளது பாக்கெட் நாவல் படக்குழு

View this post on Instagram

A post shared by TDKF (@tylerdurdenandkinofist)

இளையராஜா அவுட் ஜிவி பிரகாஷ் இன்...பாக்கெட் நாவல் படக்குழு அதிகாரப்பூர்வ அறிவிப்பு

ரூ.200 கோடி மோசடி வழக்கில் பிரபல நடிகைக்கு சம்மன்! - நவ.2 இல் ஆஜராக உத்தரவு

ரூ.200 கோடி மோசடி வழக்கு

நவ.2 இல் ஆஜராக உத்தரவு

நவம்பர் முதல் ஜனவரி வரை வரிசைகட்டும் தமிழ்ப் படங்கள்.. ரிலீஸுக்குத் தயாராகும் 20 படங்கள்!

நவம்பர் 6

நவம்பர் 13

நவம்பர் 20

நவம்பர் 27

டிசம்பர் 4

டிசம்பர் 18

டிசம்பர் 24

ஜனவரி 14

வெளியீட்டுத் தேதி இன்னும் அறிவிக்கப்படாத படங்கள்

ப்ரைம் வீடியோ டிஜிட்டல் தளத்தில் தமிழில் வெளியாகி இருக்கும் 'ஜிக்ரிஸ்'

*தெய்வ அருள்மனத்தோடு 'வேட்ட சாமி' படத்தின் 'சாமி அழைப்பு' லிரிக்கல் வீடியோ வெளியானது!*

30 நிமிட கூடுதல் காட்சிகளுடன் ‘ஜெயிலர் 2’.. ஓடிடியில் வெளியாகும் அன்கட் வெர்ஷன்!

800 கோடியை நெருங்கும் ஜெயிலர் 2

ஓடிட்யில் வெளியாகும் அன்கட் வர்ஷன்

1000 கோடி கனவு பலிக்குமா ?

டிக்கெட் விலை உயர்வு...சிறப்புக் காட்சி அனுமதி..முதலவர் விஜய்க்கு திரையரங்க உரிமையாளர்கள் 9 கோரிக்கைகள்

விஜய்யிடம் 9 கோரிக்கைகளை வைத்த திரையரங்க உரிமையாளர்கள்

தளுக்கு புளுக்கு தக்காளி... இன்ஸ்டாகிராமில் ஆதிக்கம் செலுத்தும் ஏஐ காய்கறி கேரக்டர்கள்! நெட்டிசன்கள் ஜாலி!

தளுக்கு புளுக்கு தக்காளி:

நெட்டிசன்கள் வரவேற்பு:

Karthigai Deepam: இதயத்துடன் வரும் கார்த்திக்.. ஆம்புலன்ஸ் டிரைவர் செய்த சதி! சாமுண்டீஸ்வரி உயிர் பிழைப்பாரா?

புறப்பட்ட கார்த்திக்:

டிரைவருக்கு மிரட்டல்:

மனமுருகி பிரார்த்தனை:

தப்பியோடிய டிரைவர்:

வண்டியை ஸ்டார்ட் செய்த கார்த்திக்:

தடுப்பாளா சந்திரகலா?

தொழிலதிபர் சண்முகப்பிரியா உதயநிதி ஸ்டாலின் படத்தில் பணியாற்றியுள்ளாரா! அதிர்ச்சி பின்னணி

உதயநிதி ஸ்டாலின் படத்தில் ஆடை வடிவமைப்பாளர்

இளையராஜா அவுட் ஜிவி பிரகாஷ் இன்...பாக்கெட் நாவல் படக்குழு அதிகாரப்பூர்வ அறிவிப்பு

தெய்வ அருள்மனத்தோடு 'வேட்ட சாமி' படத்தின் 'சாமி அழைப்பு' லிரிக்கல் வீடியோ வெளியானது!