அப்பாவுடன் மோதும் மகன்...ஒரே நாளில் வெளியாகும் படங்கள்...

விஜய்க்கு புஸ்ஸி ஆனந்த் போல் சிவகார்த்திகேயனுக்கு இவரா? யார் இந்த மோகன்தாஸ்

ராகேஷ் தாரா — Wed, 7 Oct 2026 16:37:13 +0530

நடிகர் சிவகார்த்திகேயன் சமீபத்தில் தனது நற்பனி இயக்க நிர்வாகிகளை சந்தித்து பேசியது பரபரப்பான பேசுபொருளாகியுள்ளது. இந்த நிகழ்வில் சிவகார்த்திகேயன் சிவகார்த்திகேயன் நற்பனி மன்ற மாநில தலைவர் மோகன்தாஸ் குறித்து மிக உணர்வுப்பூர்வமாக பேசினார். முதல்வர் விஜயின் திரை பயணம் முதல் அரசியல் பயணம் வரை புஸ்ஸி ஆனந்த் இருந்ததை போல சிவகார்த்திகேயனுக்கு மோகன்தாஸ் இருந்து வருவதாக ரசிகர்கள் கூறி வருகிறார்கள்.

சட்டமன்ற தேர்தலில் விஜயின் மிகப்பெரிய வெற்றியைத் தொடர்ந்து தமிழ் திரையுலகை சேர்ந்த பல்வேறு நடிகர்கள் தங்களது எதிர்கால அரசியல் வருகைக்கான அடித்தளத்தை அமைக்கத் தொடங்கிவிட்டார்கள். தனுஷ் , சூர்யா , சிவகார்த்திகேயன் ஆகிய நடிகர்கள் தங்களது நற்பனி மன்றங்களை வலுப்படுத்தும் செயல்களில் இறங்கியுள்ளார்கள். கடந்த அக்டோபர் 3 ஆம் தேதி சிவகார்த்திகேயன் தமிழ்நாடு முழுவதும் உள்ள சிவகார்த்திகேயன் நற்பனி மன்ற நிர்வாகிகளை சென்னையில் சந்தித்து பேசினார். இந்த நிகழ்வில் சிவகார்த்திகேயன் பாராட்டிய மோகன்தாஸ் என்பவரின் மீது தான் அனைவரது கவனமும் தற்போது குவிந்துள்ளது

மோகன்தாஸ் குறித்து சிவகார்த்திகேயன்

சிவகார்த்திகேயன் பேசுகையில் "நீங்க இப்ப இத்தனை பேர் இங்க இருக்கீங்க. ஒவ்வொரு முறையும் உங்களை சந்திக்கும் பொழுதும், நீங்க செய்யற நல்ல விஷயங்களை பார்க்கும் பொழுதும் எனக்கு தோன்றியது. இது வெறும் ஒரு விளையாட்டான நற்பனி மன்றமாக மட்டும் இருந்துவிடக் கூடாது என்கிற பயம் எனக்கு இருந்தது. இந்த நற்பனி மன்றத்தை யாரை வைத்து இயக்குவது என்கிற கேள்வி இருந்தது. அந்த மாதிரியான நேரத்தில் தான் உங்களையும் என்னையும் இணைக்கும் அந்த நபர் ரொம்ப முக்கியமானவராக இருக்கனும் அப்படி எனக்கு என் வாழ்க்கையில, நம்ம வாழ்க்கையில கிடைச்சிருக்கிற வரம் மோகன்தாஸ் அண்ணன்.

ஒன்பது ஆண்டுகளாக இந்த நற்பனி மன்றத்தை அதிகாரப்பூர்வமாக நடத்திட்டு வரோம். இன்னைய தேதி வரைக்கும் ஒரு நாள் கூட, “எனக்காக இதை செஞ்சு கொடுங்க, என் பையனுக்காக இதை செஞ்சு கொடுங்க”ன்னு மோகன் தாஸ் அண்ணன் கேட்டதில்லை. “நம்ம தம்பிகளுக்காக இதை பண்ணணும்” என்றுதான் எப்போதும் கேட்டிருக்கிறார்" என்று கூறினார்.

புஸ்ஸி ஆனந்த் போல் மோகன்தாஸ்

மோகன்தாஸ் குறித்து சிவகார்த்திகேயன் பேசியதைத் தொடர்ந்து ரசிகர்கள் பலர் மோகன்தாஸை அமைசர் என் ஆனந்த் அவர்களுடன் ஓப்பிட்டு வருகிறார்கள். தற்போது தமிழ்நாடு முதல்வராக பதவி வகிக்கும் விஜயின் திரை வாழ்க்கையிலும் சரி அரசியலிலும் சரி விஜயுடன் கடந்த 28 ஆண்டுகளாக பயணித்து வருபவர் அமைச்சர் என் ஆனந்த். எதிர்காலத்தில் சிவகார்த்திகேயன் அரசியலுக்கு வருகையில் அமைச்சர் ஆனந்த் போல் மோகன்தாஸ் முக்கிய பொறுப்பில் இருப்பார் என ரசிகர்கள் கூறி வருகிறார்கள்.

"யாரையும் எதிர்க்க இதை செய்யல" SK சூசகம்

ABP NADU — Wed, 7 Oct 2026 16:24:36 +0530

Sivakarthikeyan Speech | "யாரையும் எதிர்க்க இதை செய்யல" SK சூசகம்

"ஒரு ஒரு நாளும் நற்பணி ரொம்ப பெருமையா இருக்கு"

ABP NADU — Wed, 7 Oct 2026 16:21:35 +0530

Sivakarthikeyan Speech | "ஒரு ஒரு நாளும் நற்பணி ரொம்ப பெருமையா இருக்கு"

”எம்.ஜி.ஆர், கேப்டன் வழியில் யாரும் நமக்கு எதிரியில்ல” ஓப்பனாக சொன்ன SK

ABP NADU — Wed, 7 Oct 2026 16:18:28 +0530

Sivakarthikeyan speech |”எம்.ஜி.ஆர், கேப்டன் வழியில் யாரும் நமக்கு எதிரியில்ல” ஓப்பனாக சொன்ன SK

"நான் PEOPLE MADE மக்களுக்கு திருப்பிச் செய்யணும்" CM விஜய் பாணியில் SK

ABP NADU — Wed, 7 Oct 2026 16:15:36 +0530

Sivakarthikeyan Speech | "நான் PEOPLE MADE மக்களுக்கு திருப்பிச் செய்யணும்" CM விஜய் பாணியில் SK

”இந்த சீசனோட கடைசி ரேஸ்.. எல்லாரும் சப்போர்ட் பண்ணுங்க” REQUEST வைத்த AK

ABP NADU — Wed, 7 Oct 2026 16:12:41 +0530

Ajith Kumar Last Ride | ”இந்த சீசனோட கடைசி ரேஸ்.. எல்லாரும் சப்போர்ட் பண்ணுங்க” REQUEST வைத்த AK

ஜெயிலர் 2 படத்திலிருந்து 100 நிமிட ஃபுட்டேஜ் நீக்கப்பட்டதா? வெளியான அதிர்ச்சி தகவல்

ராகேஷ் தாரா — Wed, 7 Oct 2026 15:35:35 +0530

ரஜினிகாந்த் நடிப்பில் நெல்சன் திலீப்குமார் இயக்கியுள்ள ‘ஜெயிலர் 2’ திரைப்படம் அக்டோபர் 15-ம் தேதி திரையரங்குகளில் வெளியாக உள்ளது. படத்தின் டிரெய்லர் சமீபத்தில் வெளியாகி ரசிகர்களிடையே கவனத்தைப் பெற்ற நிலையில், தற்போது படத்தின் ரன் டைம் தொடர்பாக வெளியாகியுள்ள தகவல் சமூக வலைதளங்களில் பேசுபொருளாகியுள்ளது.

‘ஜெயிலர் 2’ படத்துக்கான சென்சார் பணிகள் சமீபத்தில் நிறைவடைந்துள்ளன. படத்துக்கு யு/ஏ 16+ சான்றிதழ் வழங்கப்பட்டுள்ளதாகவும், படத்தின் இறுதி ரன் டைம் 165 நிமிடங்கள், அதாவது 2 மணி நேரம் 45 நிமிடங்கள் எனவும் தகவல் வெளியாகியுள்ளது.

100 நிமிட காட்சிகள் நீக்கம்

இந்த நிலையில், ‘ஜெயிலர் 2’ படத்துக்காக படமாக்கப்பட்ட மொத்த ஃபுட்டேஜில் இருந்து சுமார் 100 நிமிடங்கள் நீக்கப்பட்டுள்ளதாக தற்போது ஒரு தகவல் வெளியாகியுள்ளது. சுமார் 2 மணி நேரம் 45 நிமிடங்கள் கொண்ட பதிப்பில் இருந்து ஏராளமான காட்சிகள் வெட்டப்பட்டதாகவும், மீதமுள்ள காட்சிகளுடன் படத்தை வெளியிட இருப்பதாகவும் கூறப்படுகிறது.

பொதுவாக ஒரு திரைப்படத்தின் இறுதிக்கட்ட எடிட்டிங்கில் கதையின் வேகம் மற்றும் திரைக்கதையின் தேவைக்கு ஏற்ப சில காட்சிகள் நீக்கப்படுவது வழக்கம். ஆனால் சுமார் 100 நிமிட ஃபுட்டேஜ் நீக்கப்பட்டதாக வெளியாகியுள்ள தகவல் தற்போது ரசிகர்கள் மத்தியில் ஆச்சரியத்தை ஏற்படுத்தியுள்ளது.

விஜய் சேதுபதி காட்சிகள் இருக்குமா?

‘ஜெயிலர் 2’ படத்தில் ரஜினிகாந்துடன் எஸ்.ஜே. சூர்யா, வித்யா பாலன், சூரஜ் வெஞ்சாரமூடு, மிர்னா, ரம்யா கிருஷ்ணன், மிதுன் சக்ரவர்த்தி உள்ளிட்ட பலர் முக்கிய கதாபாத்திரங்களில் நடித்துள்ளனர். மோகன்லால், சிவராஜ்குமார் உள்ளிட்டோரும் இடம்பெற்றுள்ளனர். இவர்களுடம் விஜய் சேதுபதியும் படத்தில் ஒரு சிறு கேமியோ ரோலில் நடித்திருந்தார். ஆனால் நேரம் கருதி இந்த காட்சிகள் படத்தில் இருந்து நீக்கப்பட்டதாக தகவல்கள் வெளியாகின. தற்போது நீக்கப்பட்ட 100 நிமிடங்களில் விஜய் சேதுபதியின் காட்சிகளும் அடக்கமா என்கிற கேள்வி எழுந்துள்ளது. விஜய் சேதுபதியின் காட்சிகள் நீக்கப்பட்டது குறித்து படக்குழுவினர் இதுவரை எந்த விளக்கமும் அளிக்கவில்லை.

இவ்வளவு பெரிய நட்சத்திரப் பட்டாளம் இடம்பெறும் படத்தில் கூடுதல் காட்சிகள் படமாக்கப்பட்டு பின்னர் எடிட்டிங்கில் நீக்கப்பட்டதா அல்லது ரன் டைமை கட்டுக்குள் வைக்க வேறு காரணங்களால் இந்த முடிவு எடுக்கப்பட்டதா என்பது அதிகாரப்பூர்வமாகத் தெரியவில்லை. தற்போது உறுதி செய்யப்பட்ட தகவலின்படி, ‘ஜெயிலர் 2’ படத்தின் இறுதி ரன் டைம் 2 மணி நேரம் 45 நிமிடங்கள்.

ஆதரவு கேட்ட நடிகர் அஜித்...வீடியோ வெளியிட்டு வேண்டுகோள்...

யோகேஷ் குமார் — Wed, 7 Oct 2026 14:58:06 +0530

நடிகரும், கார் பந்தய வீரருமான அஜித்குமார் தனது ரசிகர்களிடம் ஆதரவு கேட்டு வெளியிட்டுள்ள வீடியோ ஒன்று சமூக வலைதளங்களில் வேகமாக பரவி வருகிறது.

கார் பந்தயத்தில் ஆர்வம்

தமிழ் சினிமாவின் முன்னணி நடிகர்களில் ஒருவராக திகழும் அஜித் குமார், கடந்த சில ஆண்டுகளாக கார் பந்தயத்தில் அதிக ஆர்வம் காட்டி வருகிறார். தனது இளமை பருவத்தில் இருந்தே கார் ரேஸிங்கில் நாட்டம் கொண்ட அஜித், படங்களில் நடிப்பதோடு கார் பந்தயங்களிலும் அவ்வப்போது பங்கேற்று வந்தார். இதற்கிடயே கடந்த ஆண்டு அஜித் ரெட் ஆண்ட் கார் ரேஸிங் என்ற அணியையும் அவர் உருவாக்கினார். இந்த அணி பல்வேறு பந்தயங்களில் பங்கேற்று வெற்றிகளையும் பெற்று வருகிறது.

தொடர் போட்டிகள்

கடந்த செப்டம்பர் 12 மற்றும் 20ஆம் தேதிகளில் லண்டன் மற்றும் ஸ்பெயினில் நடைபெற்ற கார் பந்தய போட்டிகளில் அஜித் குமாரின் அணி சிறப்பாக செயல்பட்டது. குறிப்பாக லண்டனில் நடைபெற்ற போட்டியைக் காண நேரில் சென்ற முதலமைச்சர் விஜய், தனது நண்பர் அஜித் குமாரின் அணிக்கு உற்சாக ஆதரவளித்தார். தொடர்ந்து, இருவரும் ஒன்றாக சேர்ந்து எடுத்துக் கொண்ட புகைப்படங்கள் சமூக வலைதளங்களில் வைரலாகி அனைவரின் கவனத்தையும் பெற்றது.

போர்ச்சுகல் போட்டி

அடுத்தபடியாக அஜித் குமாரின் அணி வருகிற 9 மற்றும் 10ஆம் தேதிகளில் போர்ச்சுகலில் நடைபெறவுள்ள கார் பந்தய போட்டியில் பங்கேற்கிறது. முன்னதாக, ஸ்பெயினில் நடைபெற்ற போட்டியில் அந்த அணி 3ஆம் இடம் பிடித்திருந்தது குறிப்பிடத்தக்கது.

அஜித் வெளியிட்ட வீடியோ

இந்த நிலையில் போர்ச்சுகல் போட்டியில் பங்கேற்பது தொடர்பாக அஜித் குமார் வீடியோ ஒன்றை வெளியிட்டுள்ளார். அதில் அவர் கூறியிருப்பதாவது, “நான் அஜித் குமார். வருகிற 9 மற்றும் 10ஆம் தேதிகளில் போர்ச்சுகலில் நடைபெறும் கார் பந்தயத்தில் நமது அணி பங்கேற்கிறது. நீங்கள் அனைவரும் அதற்கு ஆதரவு அளிக்க வேண்டும்” இவ்வாறு கூறியுள்ளார்.

அஜித் குமார் 64

இதற்கிடையே நடிகர் அஜித் குமார் டேர் டெவில் என்ற தனது 64-வது படத்தில் நடிக்கவுள்ளார். ஆதிக் ரவிச்சந்திரன் இயக்கத்தில் உருவாகும் இப்படத்தை அஜித் குமாரின் மனைவியும், நடிகையுமான ஷாலினி தயாரிக்கிறார். இப்படத்தை அடுத்தாண்டு கோடை விடுமுறைக்கு வெளியிட படக்குழு திட்டமிட்டுள்ளது. முன்னதாக அஜித் - ஆதிக் கூட்டணியில் கடந்தாண்டு வெளியான குட் பேட் அக்லி திரைப்படம் மாபெரும் வெற்றி பெற்றிருந்தது குறிப்பிடத்தக்கது.

‘அன்பில் அவன்’ வெற்றியைக் கொண்டாடிய படக்குழு… நன்றி தெரிவித்து பத்திரிகையாளர்களைச் சந்தித்தனர்

ராகேஷ் தாரா — Wed, 7 Oct 2026 13:49:55 +0530

அன்பில் அவன் படத்தின் வெற்றியைக் கொண்டாடும் வகையில் பத்திரிகை மற்றும் ஊடக நண்பர்களைச் சந்தித்து நன்றி தெரிவித்தனர்.

ஐங்கரன் இன்டர்நேஷனல் மற்றும் ஹேப்பி ஹை பிக்சர்ஸ் இணைந்து தயாரித்த இப்படம் கடந்த அக்டோபர் 2ஆம் தேதி திரையரங்குகளில் வெளியானது. காதல் மற்றும் ஆக்‌ஷன் கலந்த கதைக்களத்தில் உருவான இப்படம் தொடர்ந்து ரசிகர்களிடம் வரவேற்பைப் பெற்று வருகிறது. நிகழ்ச்சியில் இயக்குநர் கார்த்திகேயன், நடிகர்கள் அசோக் செல்வன், ப்ரீத்தி முகுந்தன், கதிர்பாலு, மகா டெல்லி கணேஷ் உள்ளிட்ட படக்குழுவினர் கலந்துகொண்டனர்.

நிகழ்ச்சியில் பேசிய ஹேப்பி ஹை பிக்சர்ஸ் நிறுவனத்தின் நிறுவனர் அபிநயா செல்வம், படத்துக்கு ஆதரவளித்த பத்திரிகையாளர்கள், ஊடக நண்பர்கள் மற்றும் ரசிகர்களுக்கு நன்றி தெரிவித்தார். படம் வெளியான முதல் நாளிலிருந்து கிடைத்த வரவேற்பு மகிழ்ச்சியளிப்பதாகக் கூறிய அவர், ‘அன்பில் அவன்’ திரைப்படத்தை இந்தியில் ரீமேக் செய்வது தொடர்பான பேச்சுவார்த்தைகள் நடைபெற்று வருவதாகவும், தெலுங்கிலும் ரீமேக் செய்யத் திட்டமிட்டுள்ளதாகவும் தெரிவித்தார்.

இயக்குநர் கார்த்திகேயன் பேசுகையில், ரசிகர்கள் படத்துடன் உணர்வுபூர்வமாகத் தொடர்புபடுத்திக்கொண்டு தங்களுடைய அனுபவங்களைப் பகிர்ந்துகொள்வது மகிழ்ச்சியளிப்பதாகக் கூறினார். புதிய இயக்குநராக தனக்கு வாய்ப்பளித்த அசோக் செல்வனுக்கு நன்றி தெரிவித்த அவர், நடிகர்கள் மற்றும் தொழில்நுட்பக் கலைஞர்களின் உழைப்பையும் பாராட்டினார். படத்தின் திரைக்கதையை ரசிகர்கள் பாராட்டுவது மகிழ்ச்சியளிப்பதாகவும் அவர் குறிப்பிட்டார்.

நடிகை ப்ரீத்தி முகுந்தன், படத்தைப் பற்றி பத்திரிகையாளர்கள் எழுதிய விமர்சனங்களுக்கு நன்றி தெரிவித்தார். குறிப்பாக பெண்கள் தங்களது உணர்வுகளைப் பகிர்ந்துகொண்டது மகிழ்ச்சியளிப்பதாகக் கூறிய அவர், இப்படத்தில் நடித்தது தனக்கு பெருமையான அனுபவம் என்றார். ஒரு திரைப்படம் பார்வையாளர்களின் மனதைத் தொட்டு, அவர்களுடைய வாழ்க்கையுடன் தொடர்புபடுத்திக்கொள்ள வைப்பதே பெரிய வெற்றி என்றும் அவர் குறிப்பிட்டார்.

நடிகரும் தயாரிப்பாளருமான அசோக் செல்வன், படத்தை வெற்றிப் படமாக்கிய ரசிகர்களுக்கு நன்றி தெரிவித்தார். கடும் போட்டிகளுக்கு மத்தியில் வெளியானாலும், படம் தற்போது லாபகரமான நிலையை எட்டியிருப்பதாகக் கூறினார். மேலும், இப்படத்தின் மூலம் திறமையான நடிகர்கள் மற்றும் கலைஞர்களுக்கு வாய்ப்பு வழங்க முடிந்தது மகிழ்ச்சியளிப்பதாகவும், திரையரங்கில் இன்னும் பலர் படத்தைப் பார்த்து ஆதரவு அளிக்க வேண்டும் என்றும் கேட்டுக்கொண்டார்.

கலைஞர்கள் பேசியபோது, படத்தின் உருவாக்கத்தில் ஏற்பட்ட அனுபவங்களையும் பகிர்ந்துகொண்டனர். கலை இயக்குநர் மணிகண்டன், காஸ்ட்யூம் டிசைனர் பெனிடா உள்ளிட்ட தொழில்நுட்பக் கலைஞர்கள் தங்களுக்கு வழங்கப்பட்ட வாய்ப்புக்கும் படக்குழுவின் ஒத்துழைப்புக்கும் நன்றி தெரிவித்தனர். கதிர்பாலு, ஆகாஷ் உள்ளிட்ட நடிகர்களும் தங்களது கதாபாத்திரங்களுக்கு கிடைத்த வரவேற்பு குறித்து பேசினர். தயாரிப்புக் குழுவினர், விளம்பரக் குழுவினர் மற்றும் விநியோகஸ்தர்களுக்கும் நிகழ்ச்சியில் நன்றி தெரிவிக்கப்பட்டது. தொடர்ந்து படத்துக்கு கிடைத்து வரும் ஆதரவு, ஒட்டுமொத்த குழுவினருக்கும் அடுத்தடுத்த படைப்புகளில் மேலும் நம்பிக்கையுடன் பயணிக்க உதவும் என்று தெரிவித்தனர்.

அப்பாவுடன் மோதும் மகன்...ஒரே நாளில் வெளியாகும் படங்கள்...

யோகேஷ் குமார் — Wed, 7 Oct 2026 13:39:33 +0530

மலையாள சினிமாவின் முன்னணி நடிகர்களான மம்மூட்டி மற்றும் அவரது மகன் துல்கர் சல்மான் ஆகிய இருவரின் படங்களும் ஒரே தேதியில் வெளியாகிறது.

மம்மூட்டி - துல்கர்

மலையாள சினிமாவின் முன்னணி கதாநாயகர்களாக உள்ள இருவரும் இந்தியளவில் பிரபலமடைந்த நடிகர்களாக திகழ்கின்றனர். சுமார் 50 ஆண்டுகளுக்கும் மேலாக நடித்து வரும் மம்மூட்டி தளபதி, ஆனந்தம், பேரன்பு உள்ளிட்ட படங்கள் மூலம் தமிழ் சினிமா ரசிகர்களின் மனதிலும் இடம்பிடித்தார். அதேபோல், அவரது மகனான துல்கர் சல்மானும் ஓ காதல் கண்மணி, வாயை மூடி பேசவும், கண்ணும் கண்ணும் கொள்ளையடித்தால் போன்ற படங்களில் நடித்து தமிழ் சினிமா ரசிகர்களை வெகுவாக கவர்ந்தார். இருவருமே தென்னிந்திய அளவில் பெரும் வணிக ஈர்ப்பை வைத்துள்ளனர் என்பது குறிப்பிடத்தக்கது.

தனுஷுடன் இணைந்த மம்மூட்டி

ராஜ்குமார் பெரியசாமி இயக்கத்தில் தனுஷ் நடித்துள்ள ஓம் திரைப்படத்தில் மம்மூட்டி முன்னணி கதாப்பாத்திரத்தில் நடித்துள்ளார். ஜி.வி.பிராகாஷ் இசையமைத்துள்ள இத்திரைப்படம் வருகிற 16ஆம் தேதி வெளியாக இருந்த நிலையில், ரஜினியின் ஜெயிலர் 2 ரிலீஸ் காரணமாக நவம்பர் 20ஆம் தேதிக்கு ஒத்திவைக்கப்பட்டது. இதற்கு முன் கடந்த 2019 ஆம் ஆண்டு வெளியான பேரன்பு படமே மம்மூட்டி நேரடியாக தமிழில் நடித்து ரிலீசான கடைசி படம். சுமார் 6 ஆண்டுகள் கழித்து மம்மூட்டி தமிழில் நடித்துள்ளதால் அவரை திரையில் காண தமிழ் சினிமா ரசிகர்கள் ஆர்வத்துடன் உள்ளனர்.

அப்பாவுடன் மோதும் துல்கர்

துல்கர் சல்மான் நடிப்பில் உருவாகியுள்ள ஆகாசம்லோ ஒக்க தாரா திரைப்படமும் வருகிற நவம்பர் 20ஆம் தேதி திரையரங்குகளில் வெளியாகவுள்ளது. இத்திரைப்படம் தெலுங்கு, தமிழ், மலையாளம் மற்றும் ஹிந்தி ஆகிய மொழிகளில் பான் இந்தியன் படமாக வெளியாகவுள்ளது. இதில், ஸ்ருதி ஹாசன், ஸ்வாசிகா உள்ளிட்டோர் முக்கிய கதாப்பாத்திரங்களில் நடித்துள்ளனர்.

சுவாரஸ்ய மோதல்

குறிப்பாக இருவரின் படங்களுமே கடந்த சில ஆண்டுகளாக தமிழ், தெலுங்கு, ஹிந்தி என பல மொழிகளில் வெளியாகும் சூழலில் இம்முறையும் அவ்வாறே வெளியாகவுள்ளது. மம்மூட்டி நடித்துள்ள ஓம் திரைப்படமும் துல்கர் சல்மானின் படத்தை போன்று தமிழ், தெலுங்கு மற்றும் ஹிந்தி மொழிகளில் பான் இந்தியன் படமாக வெளியாகிறது. மேலும், இரண்டு படங்களுக்கும் தமிழ் மற்றும் தெலுங்கில் பெரிய வரவேற்பு இருக்கும் என எதிர்ப்பார்க்கப்படுவதால், திரையரங்க ஒதுக்கீடு தொடர்பான பேச்சுவார்த்தைகள் மும்முரமாக நடைபெற்று வருகிறது.