நடிகர் கமல்ஹாசன் நடித்துள்ள இந்தியன் படம் ரீ-ரிலீஸ் ஆகியுள்ளதை ரசிகர்கள் கொண்டாடி வருகின்றனர். இதுதொடர்பான வீடியோக்கள் இணையத்தில் வைரலாகியுள்ளது.
ஷங்கர் - கமல் காம்போ
கடந்த 1996 ஆம் ஆண்டு பிரமாண்ட இயக்குநர் ஷங்கர் “இந்தியன்” படத்தை இயக்கினார். இந்த படத்தில் கமல்ஹாசன், சுகன்யா, கஸ்தூரி, மனிஷா கொய்ராலா, ஊர்மிளா, கவுண்டமணி, செந்தில், நெடுமுடி வேணு, மனோரமா என ஏகப்பட்ட நட்சத்திரங்கள் நடித்திருந்தனர். ஏ.ஆர்.ரஹ்மான் இசையமைத்த இப்படம் ரிலீஸான சமயத்தில் மிகப்பெரிய அளவில் வரவேற்பை பெற்றது. இந்த படத்தில் அப்பா,மகன் என இரட்டை வேடத்தில் கமல் நடித்திருப்பார்.
சுதந்திர போராட்ட தியாகியான சேனாபதியாக வரும் அப்பா கமல் சமூகத்தில் நிலவும் ஊழல், லஞ்சம் ஆகிய பிரச்சினைகளுக்கு எதிராக சாட்டையை சுழற்றுகிறார். தன்னுடைய மகனே அத்தகைய லஞ்சத்தில் ஊறிப்போனவர் என்ற நிலையில் என்ன செய்வார் என்பது இந்த படத்தின் கதையாக அமைக்கப்பட்டிருந்தது. பாடல்களும், காட்சிகளும் பிரமாண்டத்தின் உச்சம் என சொல்லும் அளவுக்கு இந்த படம் இருந்தது. அப்போது, இந்த படம் பிரம்மாண்ட வெற்றி பெற்றது.
இந்தியன் 2
இதனிடையே 28 ஆண்டுகள் கழித்து இந்தியன் படத்தின் 2ஆம் பாகம் வெளியாக உள்ளது. ஜூலை 12 ஆம் தேதி வெளியாகவுள்ள இப்படத்தில் கமல்ஹாசன், காஜல் அகர்வால், ரகுல் ப்ரீத் சிங், சித்தார்த், பிரியா பவானி ஷங்கர், மாரிமுத்து, பாபி சிம்ஹா,மனோ பாலா, நெடுமுடி வேணு என பலரும் நடித்துள்ளனர். அனிருத் இசையமைத்துள்ளார். லைகா நிறுவனம் தயாரிக்க ஷங்கர் இயக்கியுள்ளார்.
இந்தியன் ரீ-ரிலீஸ்
இந்நிலையில் இந்தியன் படத்தின் முதல் பாகம் ரீ-ரிலீஸாகியுள்ளது. இன்று வெளியாகியுள்ள அப்படத்தை கமல் ரசிகர்கள் கொண்டாடி வருகின்றனர். இதன் வீடியோக்கள் வைரலாகி வருகிறது.