நடிகர் விஜயகாந்த் இயக்குனர் விஜய் மில்டனின் புதிய படத்தில் சிறப்புத் தோற்றத்தில் நடிப்பதாக முன்னதாகத் தகவல் பரவிய நிலையில், விஜயகாந்தின் கதாபாத்திரம் குறித்து விஜய் மில்டன் பேசியுள்ளார்.
80கள் தொடங்கி தமிழ் சினிமா ரசிகர்கள் மனதில் தனக்கென ஒரு பிரத்யேக இடம் பிடித்துள்ளவர் நடிகர் தேமுதிக தலைவர் விஜயகாந்த்.
கேப்டன் விஜயகாந்த்
தன்னுடைய ஆரம்பகால திரை வாழ்வில் பல தோல்விகளை சந்தித்தாலும், தொடர்ந்து அவரது விடாமுயற்சியின் காரணமாக வெள்ளி விழா நாயகனாக உருவெடுத்தார் விஜயகாந்த்.
1984ஆம் ஆண்டு ஒரே ஆண்டில் 18 படங்கள் கொடுத்தவர் எனும் பெருமைக்கும் சாதனைக்கும் ஒரே சொந்தக்காரராக விஜயகாந்த் இன்று வரை விளங்குகிறார்.
ஊமை விழிகள், சின்ன கவுண்டர், ஹானஸ்ட் ராஜ், புலன் விசாரணை என வெற்றிப் படங்களைக் கொடுத்து வந்த விஜயகாந்த், தனது 100ஆவது படமான கேப்டன் பிரபாகரன் மூலம் கேப்டன் எனும் அடைமொழியைப் பெற்றார்.
அரசியல் எண்ட்ரீ
2005ஆம் ஆண்டு தேசிய முற்போக்கு திராவிடக் கழகம் கட்சியைத் தொடங்கி அரசியலில் அடி எடுத்து வைத்த விஜயகாந்த் 2006ஆம் ஆண்டு சட்டப்பேரவைத் தேர்தலில் வெற்றி பெற்று விருதாச்சலம் தொகுதி சட்டபேரவை உறுப்பினரானார்.
2011ஆம் ஆண்டு தேமுதிக எதிர்க்கட்சி அந்தஸ்தைப் பெற்றதை அடுத்து முழு நேர அரசியலில் ஈடுபடத் தொடங்கிய விஜயகாந்த், 2016ஆம் ஆண்டு மக்கள் நலக் கூட்டணியின் முதலமைச்சர் வேட்பாளராகக் களமிறங்கி படுதோல்வியை சந்தித்தார்.
சினிமாவில் ரீ எண்ட்ரீ
கடந்த சில ஆண்டுகளாக விஜயகாந்த் உடல்நலக் குறைவு காரணமாக தொடர்ந்து மருத்துவமனைகள் சென்று சிகிச்சைப் பெற்று வருகிறார், பொது நிகழ்வுகளிலும் பங்கேற்காமல் உள்ளார். இந்நிலையில், முன்னதாக விஜய் ஆண்டனி ஹீரோவாக நடிக்கும் ’மழை பிடிக்காத மனிதன்’ எனும் படத்தில் விஜயகாந்த் நடித்து வருவதாகத் தகவல்கள் வெளிவந்தன.
இதனை சமீபத்திய பேட்டியில் இயக்குநர் விஜய் மில்டனும் உறுதிப்படுத்தினார். இந்நிலையில், முன்னதாக விஜயகாந்த் கதாபாத்திரம் குறித்துப் பேசியுள்ள விஜய் மில்டன், “விஜயகாந்த் பகுதிகளை நாங்கள் இன்னும் படமாக்கவில்லை. மேலும் அவரது உடல்நிலை காரணமாக படமாக்கம் தாமதமாகிறது. ஆனால் அவரை வைத்து படமாக்குவோம் என்பதில் நாங்கள் உறுதியாக உள்ளோம்.
படத்தின் அவரது இருப்பு மிகவும் அவசியமானது. ஆனால் அவர் படத்தில் தோன்றுகிறாரா அல்லது அவரது குரலில் தோன்றுகிறாரா என்று பொறுத்திருந்து தான் பார்க்கவேண்டும் " என்று கூறியுள்ளார்.
தனது மகன் சண்முகபாண்டியன் அறிமுகமான 'சகாப்தம்’ என்ற படத்தில் விஜயகாந்த் கடைசியாக நடித்திருந்தார். அந்தப் படம் 2015ஆம் ஆண்டு வெளியானது. ஒருவேளை மழை பிடிக்காத மனிதன் படத்தில் விஜயகாந்த் நடிக்கும்பட்சத்தில் ஆறு ஆண்டுகளுக்கு பிறகு திரையில் மீண்டும் தோன்றுவார் என்பது குறிப்பிடத்தக்கது.