ஜெயிலர் 2 படத்தின் படப்பிடிப்பு கடந்த ஏப்ரல் மாதம் நிறைவடைந்த நிலையில் தற்போது போஸ்ட் ப்ரோடக்ஷன் பணிகள் நடைபெற்று வருகின்றன. படத்தின் ஒரு எடிட் பார்த்த இயக்குநர் நெல்சனுக்கு முழு திருப்தி ஏற்படாததால் கூடுதலாக 25 நாட்கள் படப்பிடிப்பை தொடர அவர் முடிவு செய்துள்ளதாக தகவல்கள் வெளியாகியுள்ளன.
சன் பிக்ச்சர்ஸ் தயாரிப்பில் நெல்சன் இயக்கத்தில் ரஜினிகாந்தின் ஜெயிலர் 2 திரைப்படம் பிரம்மாண்டமாக உருவாகி வருகிறது. முந்தைய பாகத்தில் நடித்த ரம்யா கிருஷ்ணன் , மிர்னா , யோகிபாபு , ஷிவராஜ்குமார் , மோகன்லால் ஆகியோரது கதாபாத்திரம் இந்த பாகத்திலும் இடம்பெறவுள்ளது. அதே நேரம் முதல் பாகத்தில் ரஜினியின் மகனாக நடித்து கடைசியில் இறந்துபோகும் வசந்த் ரவியின் கதாபாத்திரம் இந்த பாகத்தில் மீண்டும் கொண்டுவந்துள்ளார்கள். இவர்கள் தவிர்த்து புதிதாக வித்யா பாலன் , விஜய் சேதுபதி , எஸ் ஜே சூர்யா உள்ளிட்ட பல நடிகர் இந்த படத்தில் கேமியோ ரோலில் நடித்துள்ளார்கள்.
மிஸ் ஆன ஷாருக் கான் கேமியோ
ஜெயிலர் 2 படத்தில் பாலிவுட் நடிகர் ஷாருக் கான் ஒரு முக்கிய கதாபாத்திரத்தில் நடிக்க இருந்தார். ஆனால் ஷாருக் கான் இந்த படத்தில் முதலில் நடிக்க சம்மதித்து பின் படத்தில் இருந்து விலகினார். இந்த கதாபாத்திரத்தில் பாலையா உள்ளிட்ட பல முன்னணி நடிகர்களை நடிக்க வைக்க படக்குழு முயற்சிகள் எடுத்தது. ஆனால் பெரிய ஸ்டார் நடிகர்களின் கால்ஷீட் கிடைக்காததால் இந்த ஐடியாவை நெல்சன் கைவிட்டார். கடந்த ஏப்ரல் 21 ஆம் தேதி ஜெயிலர் 2 படத்தின் படப்பிடிப்பு நிறைவு செய்யப்பட்டதாக படக்குழு அதிகாரப்பூர்வ தகவல் வெளியிட்டது
மேலும் 25 நாள் படப்பிடிப்பு
ஜெயிலர் 2 படத்தின் எடிட் செய்யப்பட்ட வெர்ஷனை அண்மையில் நெல்சன் பார்வையிட்டதாகவும் அதில் அவருக்கு முழு திருப்தி ஏற்படவில்லை என்று கூறப்படுகிறார். ரசிகர்களுக்கு முழுமையான ஒரு படத்தை கொடுக்க வேண்டும் என்று நெல்சன் விரும்புவதாகவும் இதற்காக கூடுதலாக 25 நாட்கள் ஜெயிலர் 2 படப்பிப்பை தொடர இருப்பதாகவும் தகவல்கள் வெளியாகியுள்ளது. மேலும் ஷாருக் கான் நடிக்க இருந்த அந்த முக்கிய கதாபாத்திரத்தில் ஒரு பான் இந்திய ஸ்டாரை நடிக்க வைக்க நெல்சன் தீவிரமாக முயற்சிகள் எடுத்துவருவதாகவும் கூறப்படுகிறது. முன்னதாக ஆகஸ்ட் மாதம் வெளியாகும் என எதிர்பார்க்கப்பட்ட நிலையில் ஜெயிலர் 2 செப்டம்பர் மாதம் வெளியாகும் என முடிவானது. ஆனால் தற்போதைய நிலைப்படி ஜெயிலர் 2 படம் வெளியாவதில் கூடுதல் தாமதம் ஏற்படக்கூடும் .