நடிகர் விக்ரம் நடித்து வரும் துருவ நட்சத்திரம் படத்தின் படப்பிடிப்பு மீண்டும் தொடங்கப்பட்டுள்ளதாக இயக்குநர் கௌதம் மேனன் தனது சமூக வலைத்தளப்பக்கத்தில் தெரிவித்துள்ளார்.
தமிழ் சினிமாவில் முன்னணி நடிகர்களில் ஒருவராக வலம் வரும் நடிகர் விக்ரம் நடிப்பில் அடுத்ததாக பொன்னியின் செல்வன்-1, கோப்ரா என அடுத்தடுத்து படங்கள் வெளியாகவுள்ளது. சீயான் என ரசிகர்களால் அன்போடு அழைக்கப்படும் விக்ரம், படத்திற்காக எப்பேர்ப்பட்ட தியாகத்தையும் செய்ய துணிபவர். அதற்கு உதாரணமாக சேது, பிதாமகன், அந்நியன், ஐ போன்ற படங்களை சொல்லலாம். சமீபத்தில் உடல் நலக்குறைவால் பாதிக்கப்பட்ட அவர் கோப்ரா ஆடியோ வெளியிட்டு விழாவில் நான் எப்பவும் சினிமாவுக்காகவே வாழ்வேன்.சினிமாவே எனது உயிர் என உருக்கமாக தனது ரசிகர்களிடம் தெரிவித்திருந்தார்.
இதனிடையே கடந்த 2016 ஆம் ஆண்டு பிரபல இயக்குநர் கௌதம் வாசுதேவ் மேனன் இயக்கத்தில் விக்ரம் நடிக்கும் துருவ நட்சத்திரம் படப்பிடிப்பு தொடங்கப்பட்டது. இந்த படத்திற்கு ஹாரிஸ் ஜெயராஜ் இசையமைப்பதாகவும், ஹீரோயின்களாக ரிதுவர்மா, ஐஸ்வர்யா ராஜேஷ், சிம்ரன் உள்ளிட்ட பலரும் நடிப்பதாக தெரிவிக்கப்பட்டது. மேலும் படத்தில் ஒரு மனம் பாடலும், டீசரும் வெளியானது. இப்படம் ஏழு நாடுகளில் படமாக்கப்பட்டுள்ளதாக கூறப்படும் நிலையில் படப்பிடிப்பானது நிதி நெருக்கடி காரணமாக நின்று போனது.
அதன்பின் விக்ரம் ஸ்கெட்ச், சாமி-2, கடாரம் கொண்டான், ஆதித்ய வர்மா, மகான், கோப்ரா, பொன்னியின் செல்வன் ஆகிய படங்களில் நடித்து முடித்து விடார். கௌதம் மேனனும் சிம்புவின் வெந்து தணிந்தது காடு, ஓடிடி தளங்களுக்கான படங்கள் என பிசியாகி விட்டார். இதனால் துருவ நட்சத்திரம் படம் வெளியாகுமா என்ற கேள்வி ரசிகர்களிடம் எழுந்தது.
இந்நிலையில் விக்ரம் ரசிகர்களை மகிழ்ச்சிக்குள்ளாக்கும் வண்ணம் துருவ நட்சத்திரம் படத்தின் படப்பிடிப்பு மீண்டும் தொடங்கப்பட்டுள்ளதாக இயக்குநர் கௌதம் மேனன் தனது சமூக வலைத்தளப்பக்கத்தில் விக்ரமுடன் இருக்கும் புகைப்படத்தை பதிவிட்டு தெரிவித்துள்ளார்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்