தமிழ் சினிமா மட்டுமின்றி பாலிவுட், ஹாலிவுட் வரை தனது தடத்தை பதித்தவர் தனுஷ். 2013ம் ஆண்டு இயக்குநர் ஆனந்த் எல் ராயின் இயக்கத்தில் வெளியான 'ராஞ்சனா' என்ற படத்தின் மூலம் அறிமுகமானார். சோனம் கபூர், அபய் தியோல், ஸ்வரா பாஸ்கர் உள்ளிட்ட பலர் நடித்த அப்படம் மாபெரும் வெற்றி படமாக அமைந்தது. ஏ.ஆர். ரஹ்மான் இசையில் பாசிட்டிவ் விமர்சனங்களை பெற்ற ரஞ்சனா திரைப்படம் பாக்ஸ் ஆபிஸில் சக்கைபோடு போட்டு உலகெங்கிலும் வெளியாகி 93.97 கோடி வரை வசூலித்தது. இப்படத்தில் தனது சிறப்பான நடிப்பால் பாலிவுட் ரசிகர்களையும் கவர்ந்த நடிகர் தனுஷ் இயக்குநர் ஆனந்த் எல் ராயின் முதல் சாய்ஸ் இல்லை என்பது குறிப்பிடத்தக்கது.
ராஞ்சனா படத்தில் குந்தன் என்ற கதாபாத்திரத்தில் நடிக்க ஒரு வசீகரமான தோற்றம் கொண்ட இளம் ஹீரோ தேவைப்பட்டது. அதில் நடிகர் ஷாஹித் கபூர் சிறப்பாக பொருந்துவார் என்பது ஆனந்த் எல் ராயின் விருப்பமாக இருந்தது. அவரை இப்படத்தில் இணைக்க வேண்டுமென ஆனந்த் தனது விருப்பத்தையும் ஷாஹித் கபூரிடம் வெளிப்படுத்தியுள்ளார். இருப்பினும் சில காரணங்களால் ஷாஹித் கபூர் 'ரஞ்சனா' பட வாய்ப்பை ஏற்றுக்கொள்ள முடியாததால் அதை நிராகரித்துள்ளார். ரஞ்சனா படம் மட்டுமின்றி ரங் தே பசந்தி, ராக்ஸ்டார், பேங் பேங் உள்ளிட்ட பட வாய்ப்புகளையும் தட்டி கழித்துள்ளார் எனக்கூறப்படுகிறது.
இருப்பினும் ஆனந்த் எல் ராயின் 'ராஞ்சனா' படத்தில் குந்தன் கதாபாத்திரத்தில் வெகு சிறப்பாக பொருந்தி நடித்த தனுஷ் பார்வையாளர்களின் கவனத்தை ஈர்த்தார். அதனை தொடர்ந்து ஆனந்த் எல் ராயின் இயக்கத்தில் வெளியான 'அட்ராங்கி ரே' படத்தில் சாரா ஜோடியாக நடித்திருந்தார். ஆனந்த் எல் ராய் - தனுஷ் - ஏ.ஆர். ரஹ்மான் வெற்றி கூட்டணி மீண்டும் ஒருமுறை 'தேரே இஷ்க் மெயின்' என்ற படத்தின் மூலம் இணைந்துள்ளனர்.
ராஞ்சனா படம் 10 ஆண்டுகளை நிறைவு செய்ததை முன்னிட்டு இந்த புதிய படத்தின் டைட்டிலை வெளியிட்டார் தனுஷ். 'ஒரு சில படங்கள் நமது வாழ்க்கையை மாற்றும். அப்படி ஒரு படம் தான் ராஞ்சனா' என குறிப்பிட்டு இருந்தார் தனுஷ். மேலும் படத்தின் டைட்டிலை வெளியிட்ட தயாரிப்பாளர்கள் ' தனுஷுடன் எங்களின் அடுத்த முயற்சியை வெளியிட இதை விட ஒரு நல்ல சந்தர்ப்பம் அமையாது. ராஞ்சனா படம் எங்களின் இதயத்திற்கு மிகவும் நெருக்கமான ஒரு சிறப்பு இடத்தை பிடித்த படம். மேலும் அதே அன்பை உலகெங்கிலும் உள்ள ரசிகர்களிடம் இருந்து பெற எங்களின் அடுத்த முயற்சி இது. இது எது மாதிரியான ஒரு பயணமாக இருக்குமென தெரியவில்லை என்றாலும் நிச்சயம் அட்வென்சராக இருக்கும்' என குறிப்பிட்டு இருந்தனர்.
மீண்டும் ஆனந்த் எல் ராயின் இயக்கத்தில் தனுஷ் இணையும் இப்படமும் ஒரு வெற்றி படமாக அமையும் என மிகுந்த எதிர்பார்ப்பில் உள்ளனர் ரசிகர்கள்.