நடிகை நயன்தாரா பற்றி சர்ச்சைக்குரிய வகையில் கருத்து தெரிவித்த அதிமுக மாநிலங்களவை எம்.பி., சி.வி.சண்முகத்திற்கு நடிகர் விஷால் கடும் கண்டனம் தெரிவித்துள்ளார்.
கடந்த சில நாட்களுக்கு முன் தமிழ்நாடு அரசை கண்டித்து தமிழ்நாடு முழுவதும் தேசிய ஜனநாயக கூட்டணி சார்பில் கண்டன ஆர்ப்பாட்டம் நடைபெற்றது. இதில் விழுப்புரத்தில் நடைபெற்ற நிகழ்ச்சியில் சி.வி.சண்முகம் தலைமை தாங்கி உரையாற்றினார். அப்போது மு.க.ஸ்டாலினின் உங்கள் கனவை சொல்லுங்க திட்டத்தைப் பற்றி குறிப்பிட்ட அவர், அதில் நடிகை நயன்தாரா பெயரை சொல்லி சர்ச்சையாக பேசினார்.
உடனடியாக சி.வி.சண்முகம் கருத்துக்கு பலரும் கடும் கண்டனம் தெரிவித்தனர். இதனைத் தொடர்ந்து வாய் தவறி அவரின் பெயர் வந்து விட்டதாகவும், தவறுக்கு வருந்துவதாகவும் சி.வி.சண்முகம் விளக்கமளித்தார்.
இப்படியான நிலையில் நடிகர் விஷால் வீடியோ ஒன்றை வெளியிட்டுள்ளார். அதில், “சி.வி.சண்முகத்திற்கு வணக்கம் தெரிவித்துக் கொள்கிறேன். நீங்க சமீபத்தில் உங்கள் கட்சி நிகழ்ச்சியில் எங்கள் சினிமா துறை சார்ந்த கதாநாயகி பற்றி மிகவும் தரக்குறைவாக பேசினீர்கள். அதற்கு நிறைய பேரு கண்டனம் தெரிவித்திருந்தார்கள். அந்த கட்டாயத்தை நீங்கள் தான் ஏற்படுத்தியிருக்கிறீர்கள். தென்னிந்திய நடிகர் சங்கம் சார்பில் நாங்களும் அதனை கண்டித்தோம். இப்போது இந்த வீடியோவை வெளியிட காரணம், ஒரு நடிகர், சமூக அக்கறை கொண்டவன், வாக்காளன், பார்வையாளர், நடிகர் சங்கத்தின் பொதுச்செயலாளராக கூட இருக்கலாம்.
நீங்க பேசிய வார்த்தைகள் ஒரு பெண்மணி ஒரு நடிகை, குடும்ப பெண்மணி, இந்திய சினிமாவில் பிரபலமானவர். நீங்கள் கைதட்ட வாங்குவதற்காக இப்படி ஒருவரை கொச்சைப்படுத்த வேண்டிய அவசியம் இல்லை. நீங்க ஏதாவது நலத்திட்டம் அறிவிச்சி கைதட்டல் வாங்கியிருந்தால் நாங்கள் மகிழ்ந்திருப்போம். ஆனால் அந்த நேரத்தில் இந்த மாதிரி தவறான கருத்தை அந்த நடிகை பற்றி பேசியிருக்கிறீர்கள்.
நீங்கள் ஜெயலலிதா தலைமையிலான அதிமுக ஆட்சியில் சட்டத்துறை அமைச்சராக இருந்துள்ளீர்கள். ஜெயலலிதாவை பொறுத்தவரை பெண்களுக்கு பாதுகாப்பு மட்டுமல்ல மரியாதையும் இருந்தது. உங்களிடம் ஒரு வேண்டுகோள் விடுக்கிறேன். நீங்கள் தவறான கருத்தை பதிவு செய்துள்ளீர்கள். மக்கள் மத்தியில் உங்கள் மரியாதையை கெடுத்துக் கொள்ளாதீர்கள். பெண்களை மதித்தால் தான் நமக்கு ஒரு மதிப்பு கிடைக்கும். அது கடமை. அது மனதார வரவேண்டும். சினிமா மட்டுமல்ல உங்கள் கட்சிக்குள் இருக்கும் பெண்மணியை பேசினால் கூட மீண்டும் இதுபோன்று வீடியோ வெளியிடுவேன்” என விஷால் கூறியுள்ளார்.