தனியார் தொலைக்காட்சியான விஜய் தொலைக்காட்சியில் ஒளிபரப்பாகும் ஏராளமான தொடர்கள் மக்கள் மத்தியில் பிரபலம். அந்த தொலைக்காட்சியில ஒளிபரப்பாகி வரும் தொடர் குக் வித் கோமாளி என்ற தொடர். இந்த தொடரில் நடிகை ஷகீலா, பாபாபாஸ்கர், மதுரை முத்து, அஸ்வின், தர்ஷா குப்தா, பவித்ரா லட்சுமி, கடைக்குட்டி சிங்கம் தீபா, கனி, புகழ், பாலா, ஷிவாங்கி, மணிமேகலை, சரத், சுனிதா, வி.ஜே.பார்வதி ஆகியோர் பங்கேற்று வருகின்றனர்.
இந்த தொடரில் பங்கேற்பவர்கள் செய்யும் செயல்களும், அவர்களது நகைச்சுவைகளும் பொதுமக்கள் மத்தியில் மிகுந்த வரவேற்பை பெற்றவை. குறிப்பாக, இந்த நிகழ்ச்சி மூலம் ஷிவாங்கி, அஸ்வின், புகழ் ஆகியோருக்கு ஏராளமான ரசிகர்கள் தமிழ்நாட்டில் உருவாகியுள்ளனர். இந்த நிகழ்ச்சி தற்போது நிறைவடைந்து அடுத்த சீசனை உருவாக்கும் முயற்சிகள் நடைபெற்றுக் கொண்டிருக்கின்றன. இந்த நிகழ்ச்சியில் பங்கேற்ற பலருக்கும் திரைப்படங்களிலும், வெப் சீரிஸ்களிலும் நடிப்பதற்கு வாய்ப்புகள் வந்து கொண்டிருக்கின்றன.
இந்த தொடரில் பிரபலமான ஷிவாங்கி, தற்போது சிவகார்த்திகேயன் நடிக்கும் டான் என்ற திரைப்படத்தின் மூலம் தமிழ் திரையுலகில் நடிகையாக அறிமுகமாக உள்ளார். டான் படத்தின் படப்பிடிப்புகளும் தற்போது நடைபெற்று வருகிறது. நடிகை ஷிவாங்கி சொந்தமாக யூ டியூப் சேனல் வைத்துள்ளார். அதில், அவர் தன்னுடைய குறும்புத்தனங்கள், தன்னுடைய சொந்த வீடியோக்கள், வாழ்க்கை முறைகள் ஆகியவற்றை வீடியோக்களாக அவ்வப்போது பதிவிட்டு வந்தார். இவர் தொலைக்காட்சி தொடர் மூலம் மிகவும் பிரபலம் என்பதால், இவருடைய யூ டியூப் சேனலும் ரசிகர்கள் மத்தியில் மிகுந்த வரவேற்பைப் பெற்றது. அதனால், அவரது யூ டியூப்பிற்கு சப்ஸ்கிரைபர்களும், பார்வையாளர்கள் எண்ணிக்கையும் நாளுக்கு நாள் அதிகரித்து வந்தது.
இந்த நிலையில், அவரது யூ டியூப் சேனலுக்கு 10 லட்சம் சந்தாதாரர்கள் கிடைத்துள்ளனர். இதனால், அவருக்கு வாழ்த்து தெரிவித்து யூ டியூப் நிறுவனம் தங்க பட்டனை அனுப்பியுள்ளது. இதனை அவர் தனது இன்ஸ்டாகிராம் பக்கத்திலும் பதிவிட்டுள்ளார். யூ டியூப்பில் இதுவரை 28 வீடியோக்களை மட்டுமே பதிவிட்டுள்ள ஷிவாங்கிக்கு 1.58 மில்லியன் சப்ஸ்கிரைபர்கள் உள்ளனர் என்பது குறிப்பிடத்தக்கது. 1 மில்லியன் சப்ஸ்கிரைபர்களை கடந்ததற்காக தங்க பட்டனை பெற்றதற்கு அவரது ரசிகர்கள் பலரும் ஷிவாங்கிக்கு வாழ்த்து தெரிவித்து வருகின்றனர்.