bigg-boss-tamil

டேங்கர் லாரி அடுத்தடுத்து 2 லாரிகளுடன் நேருக்கு நேர் பயங்கர மோதல் பகீர் சிசிடிவி வீடியோ : Accident

ABP NADU — Tue, 3 Nov 2026 13:29:37 +0530

டேங்கர் லாரி அடுத்தடுத்து 2 லாரிகளுடன் நேருக்கு நேர் பயங்கர மோதல் பகீர் சிசிடிவி வீடியோ : Accident

3 அடி உயரத்தில் வரலாற்றுப் பொக்கிஷம் - செஞ்சி அருகே மாணவர்கள் கண்டுபிடித்த அதிசயம்!

சிவரஞ்சித் — Tue, 3 Nov 2026 13:27:54 +0530

விழுப்புரம்: செஞ்சி அருகே பென்னகர் கிராமத்தில் ஆதிகால மனிதர்கள் உருவாக்கிய பழங்கால பாறை ஓவியம் கண்டறியப்பட்டுள்ளது. வேட்டைக்குச் செல்லும் மனிதன், அவருக்கு அருகில் நிற்கும் நாய் ஆகியவை இடம்பெற்றுள்ள இந்த ஓவியம், ஆதிகால மனிதர்களின் வாழ்க்கை முறை மற்றும் வேட்டையாடும் பழக்கங்களை எடுத்துக்காட்டும் வகையில் அமைந்துள்ளது. செஞ்சி அரசு கலை மற்றும் அறிவியல் கல்லூரி தமிழ்த்துறை பேராசிரியர் மற்றும் மாணவர்கள் மேற்கொண்ட கள ஆய்வின்போது இந்த ஓவியம் கண்டுபிடிக்கப்பட்டுள்ளது.

கள ஆய்வில் கிடைத்த வரலாற்றுச் சான்று!

விழுப்புரம் மாவட்டம், செஞ்சி மற்றும் அதன் சுற்றுவட்டாரப் பகுதிகள் வரலாற்றுச் சிறப்புமிக்க இடங்களாக விளங்கி வருகின்றன. குறிப்பாக, செஞ்சி மலைத்தொடர்களில் பழங்கால மனிதர்களின் வாழ்வியல், பண்பாடு மற்றும் கலைத் திறன்களை வெளிப்படுத்தும் பல்வேறு தொல்லியல் சான்றுகள் காணப்படுகின்றன.

இந்நிலையில், செஞ்சி அருகே உள்ள பென்னகர் கிராமத்தில் செஞ்சி அரசு கலை மற்றும் அறிவியல் கல்லூரி தமிழ்த்துறை பேராசிரியர் சுதாகர், மூன்றாம் ஆண்டு மாணவர்களுடன் இணைந்து கள ஆய்வு மேற்கொண்டார்.

அப்போது பென்னகர் கிராமத்தில் இருந்து கருங்குழி செல்லும் சாலையோரப் பகுதியில் உள்ள பாறையை ஆய்வு செய்தபோது, பழங்கால மனிதர்கள் உருவாக்கிய பாறை ஓவியம் இருப்பது கண்டறியப்பட்டது. இந்த கண்டுபிடிப்பு அப்பகுதியின் தொன்மையான வரலாற்றை வெளிப்படுத்தும் முக்கிய சான்றாக அமைந்துள்ளது.

மூன்று அடி உயரத்தில் மனித உருவம்!

கண்டறியப்பட்டுள்ள பாறை ஓவியம் சுமார் மூன்று அடி உயரமும், ஒரு அடி அகலமும் கொண்டதாக உள்ளது. இதில் மனித உருவம் முழுமையாகத் தெளிவாக இடம்பெற்றுள்ளது.

இந்த ஓவியத்தின் சிறப்பம்சம் என்னவென்றால், ஆதிகால மனிதர்கள் இயற்கை வண்ணங்களைப் பயன்படுத்தி ஓவியம் வரையத் தொடங்குவதற்கு முந்தைய காலகட்டத்தில், சிறிய கற்களைக் கொண்டு பாறையின் மேற்பரப்பைத் தேய்த்து உருவங்களை உருவாக்கிய முறையில் இந்த ஓவியம் அமைந்துள்ளதாகத் தெரிகிறது.

அதாவது, பாறையின் மேற்பரப்பில் கல்லைக் கொண்டு தேய்த்து, அதன் மூலம் உருவங்களை வெளிப்படுத்தியுள்ளனர். இந்த முறையில் உருவாக்கப்பட்ட ஓவியமாக இது இருக்கலாம் என ஆய்வில் தெரிவிக்கப்பட்டுள்ளது.

வேட்டைக்குச் செல்லும் மனிதன்... உடன் நிற்கும் நாய்!

இந்தப் பாறை ஓவியத்தில் ஆதிகால மனிதன் வேட்டைக்குச் செல்லும் காட்சி சித்தரிக்கப்பட்டுள்ளது. மனித உருவத்தின் கையில் கத்தி போன்ற ஆயுதம் இடம்பெற்றுள்ளது.

அந்த மனிதனுக்கு அருகில் ஒரு நாய் நிற்பது போன்ற உருவமும் வரையப்பட்டுள்ளது. அந்த நாய் மனிதனைப் பார்த்தவாறு நிற்கும் வகையில் ஓவியம் அமைந்துள்ளது.

இதன் மூலம் ஆதிகால மனிதர்கள் வேட்டையாடச் செல்லும்போது நாய்களையும் தங்களுடன் அழைத்துச் சென்ற பழக்கத்தை இந்த ஓவியம் எடுத்துக்காட்டுவதாக பேராசிரியர் சுதாகர் தெரிவித்துள்ளார்.

மேலும், அக்கால மனிதர்களுக்கும் நாய்களுக்கும் இடையே இருந்த தொடர்பு, வேட்டையாடுவதில் விலங்குகளின் பங்களிப்பு உள்ளிட்ட வரலாற்றுச் செய்திகளை அறிந்துகொள்ள இத்தகைய பாறை ஓவியங்கள் உதவுகின்றன.

கோணை ஓவியத்தைவிட பென்னகர் ஓவியம் தெளிவு!

ஏற்கனவே செஞ்சி அருகே உள்ள கோணை கிராமத்திலும் இதேபோன்று பாறையைத் தேய்த்து உருவாக்கப்பட்ட பழங்கால ஓவியம் கண்டறியப்பட்டுள்ளது.

தற்போது பென்னகர் கிராமத்தில் கண்டறியப்பட்டுள்ள ஓவியம், கோணை கிராமத்தில் உள்ள ஓவியத்தைவிட தெளிவாகவும், அழகாகவும், சிதைவுகள் இன்றியும் காணப்படுகிறது.

இதனால், ஆதிகால மனிதர்களின் கலை வெளிப்பாடுகள் மற்றும் அவர்கள் பயன்படுத்திய ஓவிய உருவாக்க முறைகளை ஒப்பிட்டு ஆய்வு செய்வதற்கு இந்தப் புதிய கண்டுபிடிப்பு முக்கியத்துவம் பெறுகிறது.

செஞ்சி மலைத்தொடரில் ஏராளமான பாறை ஓவியங்கள்!

செஞ்சி மலைத்தொடர் பகுதிகளில் பழங்கால மனிதர்கள் வரைந்த பல்வேறு பாறை ஓவியங்கள் காணப்படுகின்றன. குறிப்பாக, வெள்ளை, மஞ்சள், சிவப்பு உள்ளிட்ட இயற்கை வண்ணங்களைப் பயன்படுத்தி வரையப்பட்ட ஓவியங்கள் அதிக அளவில் உள்ளன.

இந்த ஓவியங்கள் மூலம் அக்கால மனிதர்களின் வாழ்க்கை முறை, வேட்டையாடும் பழக்கம், விலங்குகளுடனான தொடர்பு மற்றும் கலைத்திறன் உள்ளிட்ட பல்வேறு அம்சங்களை அறிந்துகொள்ள முடிகிறது.

இருப்பினும், வண்ணங்களைப் பயன்படுத்தாமல் பாறையின் மேற்பரப்பைக் கற்களால் தேய்த்து உருவாக்கப்பட்ட ஓவியங்கள் பென்னகர் மற்றும் கோணை ஆகிய இரண்டு இடங்களில் மட்டுமே இதுவரை கண்டறியப்பட்டுள்ளதாக பேராசிரியர் சுதாகர் தெரிவித்துள்ளார்.

வரலாற்று ஆய்வுக்கு முக்கியத்துவம் பெறும் கண்டுபிடிப்பு!

செஞ்சி பகுதியில் தொடர்ந்து மேற்கொள்ளப்படும் கள ஆய்வுகள் மூலம் இதுபோன்ற பழங்கால வரலாற்றுச் சான்றுகள் வெளிச்சத்திற்கு வந்து கொண்டிருக்கின்றன.

தற்போது பென்னகர் கிராமத்தில் கண்டறியப்பட்டுள்ள பாறை ஓவியம், ஆதிகால மனிதர்களின் வேட்டையாடும் முறை மற்றும் அவர்கள் பயன்படுத்திய கலை நுட்பங்களை அறிந்துகொள்ள உதவும் முக்கியமான சான்றாக அமைந்துள்ளது.

குறிப்பாக, மனிதனுடன் நாய் இடம்பெற்றுள்ள காட்சி, ஆதிகால மனிதர்களின் அன்றாட வாழ்க்கையில் விலங்குகள் எந்த அளவுக்கு முக்கியப் பங்கு வகித்தன என்பதை எடுத்துக்காட்டும் வகையில் அமைந்துள்ளது. இவ்வாறு பேராசிரியர் சுதாகர் தெரிவித்தார்.

8,618 பேரில் 1,539 பேர் மட்டுமே பயன்! புதுச்சேரி காமராஜர் கல்வீடு திட்டத்தில் என்ன நடக்கிறது?

சிவரஞ்சித் — Tue, 3 Nov 2026 13:11:41 +0530

புதுச்சேரி: புதுச்சேரி அரசின் காமராஜர் நூற்றாண்டு கல்வீடு கட்டும் திட்டத்தின் கீழ் கடன் பெற்று, பல்வேறு காரணங்களால் வீடு கட்ட முடியாமல் தவித்த பயனாளிகளுக்கு அறிவிக்கப்பட்ட வட்டி தள்ளுபடி சலுகையின் காலக்கெடு வரும் 30-ம் தேதியுடன் நிறைவடைகிறது. இதுவரை சுமார் 20 சதவீத பயனாளிகள் மட்டுமே இச்சலுகையைப் பயன்படுத்தி தங்களது நிலப்பத்திரங்களை மீட்டுள்ள நிலையில், மீதமுள்ள 80 சதவீத பயனாளிகளும் பயன்பெறும் வகையில் திட்டத்தின் கால அவகாசத்தை மேலும் ஓராண்டிற்கு நீட்டிக்க வேண்டும் என்ற கோரிக்கை வலுத்துள்ளது.

ஏழை மக்களின் சொந்த வீட்டு கனவு!

புதுச்சேரி மாநிலத்தில் ஏழை, எளிய மக்களின் சொந்த வீட்டு கனவை நனவாக்கும் நோக்கில், கடந்த 2003-04-ம் நிதியாண்டில் அப்போதைய முதல்வர் ரங்கசாமியால் காமராஜர் நூற்றாண்டு கல்வீடு கட்டும் திட்டம் தொடங்கப்பட்டது.

நகர மற்றும் கிராம அமைப்புத் துறையின் வழிகாட்டுதலின்படி, புதுச்சேரி குடிசை மாற்று வாரியம் வாயிலாக இத்திட்டம் செயல்படுத்தப்பட்டு வருகிறது. சொந்தமாக நிலம் வைத்திருந்தும், பொருளாதார வசதி இல்லாத காரணத்தால் வீடு கட்ட முடியாமல் தவிக்கும் ஏழை மக்களுக்கு நிதியுதவி வழங்குவதே இத்திட்டத்தின் முக்கிய நோக்கமாகும்.

மூன்று தவணைகளில் வழங்கப்பட்ட நிதியுதவி!

இத்திட்டத்தின் கீழ் பயன்பெற விரும்பும் பயனாளிகள் தங்களது நிலப்பத்திரத்தை அடமானமாக வைத்து, மூன்று தவணைகளில் அரசின் நிதியுதவியைப் பெற்று வீடு கட்ட வேண்டும்.

ஆனால், எதிர்பாராத குடும்பச் செலவுகள், வறுமை, பொருளாதார நெருக்கடி உள்ளிட்ட பல்வேறு காரணங்களால் சில பயனாளிகளால் வீடு கட்டும் பணியைத் தொடங்க முடியாமலும், தொடங்கிய பணியை முழுமையாக முடிக்க முடியாமலும் போனது.

அரசின் விதிமுறைகளின்படி, பெற்ற நிதியுதவியை வட்டியுடன் திருப்பிச் செலுத்தினால் மட்டுமே அடமானம் வைக்கப்பட்ட நிலப்பத்திரத்தை மீட்க முடியும் என்ற நிலை ஏற்பட்டது.

இதனால் அசல் தொகையுடன் வட்டியும் தொடர்ந்து அதிகரித்தது. ஒரு கட்டத்தில் வாங்கிய கடனைவிட திருப்பிச் செலுத்த வேண்டிய தொகை அதிகரித்ததால், ஏழை குடும்பங்கள் தங்களது சொந்த நிலப்பத்திரத்தை மீட்க முடியாமல் தவித்தன.

இந்தப் பிரச்னை தொடர்பாக பயனாளிகள் பலமுறை அரசின் கவனத்திற்கு கொண்டு சென்றதுடன், புதுச்சேரி சட்டசபையிலும் பல்வேறு சட்டமன்ற உறுப்பினர்கள் இப்பிரச்னையை எழுப்பினர்.

வட்டி முழுவதும் தள்ளுபடி – அரசின் சிறப்புச் சலுகை!

பயனாளிகளின் நீண்டகாலப் பிரச்னைக்குத் தீர்வு காணும் வகையில், புதுச்சேரி அரசு ஒருமுறை சிறப்புச் சலுகையை அறிவித்தது.

அதன்படி, காமராஜர் நூற்றாண்டு கல்வீடு கட்டும் திட்டத்தின் ஆறு கட்டங்களின் கீழ் நிதியுதவி பெற்று, வீடு கட்ட முடியாமல் தவிக்கும் பயனாளிகள், தங்களுக்கான நிலுவை வட்டி முழுவதையும் தள்ளுபடி செய்து கொள்ளலாம் என அறிவிக்கப்பட்டது.

மேலும், பயனாளிகள் தாங்கள் பெற்ற அசல் கடன் தொகையுடன், அபராதமாக ரூ.3,000 மட்டும் சேர்த்து ஒரே தவணையாகச் செலுத்தினால், அடமானம் வைக்கப்பட்ட நிலப்பத்திரத்தை மீட்டுக் கொள்ளலாம் என அரசு அறிவித்தது.

இதன் மூலம் பல ஆண்டுகளாக வட்டி சுமையால் அவதிப்பட்டு வந்த ஏழை மக்களுக்கு நிம்மதி கிடைக்கும் என எதிர்பார்க்கப்பட்டது.

அதேநேரத்தில், அரசாணை பிறப்பிக்கப்பட்ட நாளில் இருந்து ஆறு மாதங்களுக்குள் பயனாளிகள் தொகையைச் செலுத்தி சலுகையைப் பெற வேண்டும் என்றும், குறிப்பிட்ட காலத்திற்குள் பணத்தைச் செலுத்தத் தவறினால் வட்டி தள்ளுபடி சலுகை ரத்து செய்யப்பட்டு, பழைய நடைமுறையின்படி முழு வட்டியுடன் தொகை வசூலிக்கப்படும் என்றும் தெரிவிக்கப்பட்டது.

8,618 பயனாளிகளில் 1,539 பேர் மட்டுமே பயன்!

இந்த வட்டி தள்ளுபடி திட்டத்திற்கான அரசாணை கடந்த மே மாதம் பிறப்பிக்கப்பட்டு, ஜூன் மாதம் முதல் நடைமுறைக்கு வந்தது. இதற்கான ஆறு மாத கால அவகாசம் வரும் 30-ம் தேதியுடன் நிறைவடைகிறது.

ஆனால், அரசின் எதிர்பார்ப்புக்கு மாறாக, இதுவரை குறைந்த எண்ணிக்கையிலான பயனாளிகள் மட்டுமே இச்சலுகையைப் பயன்படுத்தியுள்ளனர்.

இத்திட்டத்தின் கீழ் மொத்தம் 8,618 பேர் கடன் பெற்றிருந்த நிலையில், இதுவரை 1,539 பேர் மட்டுமே வட்டி தள்ளுபடி சலுகையைப் பயன்படுத்தி தங்களது நிலப்பத்திரங்களை மீட்டுள்ளனர்.

அதாவது, மொத்த பயனாளிகளில் சுமார் 20 சதவீதம் பேர் மட்டுமே இத்திட்டத்தின் மூலம் பயனடைந்துள்ளனர். மீதமுள்ள சுமார் 80 சதவீத பயனாளிகள் இன்னும் இச்சலுகையைப் பயன்படுத்த முடியாத நிலையில் உள்ளனர்.

20 கோடி வட்டி தள்ளுபடி – அரசுக்கு வந்தது ரூ.7 கோடி மட்டுமே!

இந்தத் திட்டத்தின் கீழ் பயனாளிகள் இதுவரை மொத்தம் ரூ.41 கோடியை அசல் கடனாகப் பெற்றிருந்தனர். காலப்போக்கில் வட்டி சேர்ந்து, திருப்பிச் செலுத்த வேண்டிய மொத்தத் தொகை ரூ.61 கோடியாக அதிகரித்தது.

இதில் சுமார் ரூ.20 கோடி வரையிலான வட்டியைத் தள்ளுபடி செய்ய அரசு முன்வந்தது. இதன் மூலம் பயனாளிகளுக்கு மிகப்பெரிய நிதிச் சுமை குறையும் வாய்ப்பு ஏற்பட்டது.

ஆனால், இதுவரை வட்டி தள்ளுபடி திட்டத்தின் கீழ் பயனாளிகளிடமிருந்து அரசுக்கு சுமார் ரூ.7 கோடி மட்டுமே வசூலாகியுள்ளது. இன்னும் சுமார் ரூ.34 கோடி நிலுவைத் தொகையாக வசூலிக்கப்பட வேண்டியுள்ளது.

அரசு வட்டி தள்ளுபடி அளித்தும், பெரும்பாலான பயனாளிகளால் ஒரே தவணையாக அசல் தொகையைச் செலுத்த முடியாததே இந்தக் குறைந்த வசூலுக்குக் காரணமாகக் கூறப்படுகிறது.

கால அவகாசத்தை மேலும் ஓராண்டு நீட்டிக்க கோரிக்கை!

வட்டி தள்ளுபடி திட்டத்தின் காலக்கெடு நெருங்கி வரும் நிலையில், மீதமுள்ள பயனாளிகள் மத்தியில் கவலை ஏற்பட்டுள்ளது.

ஏற்கனவே பொருளாதார நெருக்கடியில் உள்ள ஏழை மக்கள், ஒரே தவணையாக அசல் தொகையைத் திரட்டிச் செலுத்துவதற்கு போதிய கால அவகாசம் தேவைப்படுவதாகக் கூறப்படுகிறது.

எனவே, ஏழை மக்களின் வாழ்வாதார நிலையைக் கருத்தில் கொண்டு, வட்டி தள்ளுபடி திட்டத்தின் காலக்கெடுவை மேலும் ஓராண்டிற்கு நீட்டிக்க வேண்டும் என பொதுமக்கள் கோரிக்கை விடுத்துள்ளனர்.

கால அவகாசம் நீட்டிக்கப்பட்டால், இதுவரை பயன்பெற முடியாத ஆயிரக்கணக்கான பயனாளிகள் தங்களது நிலுவைக் கடனைச் செலுத்தி நிலப்பத்திரங்களை மீட்க வாய்ப்பு கிடைக்கும்.

அதேபோல், அரசுக்கும் நிலுவையில் உள்ள தொகையை வசூலிக்க கூடுதல் வாய்ப்பு ஏற்படும். எனவே, ஏழை மக்களின் நலனையும், அரசின் வருவாய் வசூலையும் கருத்தில் கொண்டு, காமராஜர் நூற்றாண்டு கல்வீடு திட்டத்தின் வட்டி தள்ளுபடி சலுகையை மேலும் ஓராண்டிற்கு நீட்டிக்க அரசு நடவடிக்கை எடுக்குமா என்ற எதிர்பார்ப்பு பயனாளிகள் மத்தியில் எழுந்துள்ளது.

தீபாவளி முன்பணக்கடன், போனஸ் தவெக ஆட்சியிலாவது கிடைக்குமா? பகுதிநேர ஆசிரியர்கள் 11,773 குடும்பங்கள் ஏக்கம்!

எஸ்.ஜெகநாதன், மயிலாடுதுறை — Tue, 3 Nov 2026 12:41:19 +0530

உலகம் முழுவதும் உள்ள தமிழர்கள் அனைவரும் மிகவும் உற்சாகமாகக் கொண்டாடும் தீபாவளித் திருநாள் இந்த ஆண்டு நவம்பர் 8 -ஆம் தேதியன்று கோலாகலமாகக் கொண்டாடப்பட உள்ளது. இத்தகைய சிறப்புமிக்க பண்டிகைக் காலத்தில், புத்தாடை அணிந்தும், பட்டாசு வெடித்தும், இன்சுவை மிகுந்த பலகாரங்களைச் சுவைத்தும் தங்களது குடும்பத்தினருடன் மகிழ்ச்சியைப் பகிர்ந்துகொள்ள அனைத்துத் தரப்பு மக்களும் தயாராகி வருகின்றனர்.

ஆனால், இன்பமயமான இத்தீபாவளித் திருநாளில் தங்களது இல்லங்களிலும் மகிழ்ச்சி ஒளிர வேண்டும் என்பதற்காக தமிழக அரசுப் பள்ளிகளில் பல ஆண்டுகளாகப் பணியாற்றி வரும் ஆயிரக்கணக்கான பகுதிநேர ஆசிரியர்கள் பல எதிர்பார்ப்புகளுடன் காத்திருக்கின்றனர். தற்போதைய சூழலில், அரசுப் பள்ளிகளில் கடந்த 16 ஆண்டுகளாகத் தற்காலிகமாக உடற்கல்வி, ஓவியம், கணினி, தையல், இசை மற்றும் தொழிற்கல்வி போன்ற பல்வேறு முக்கியப் பாடங்களில் பணிபுரிகின்ற 11,773 பகுதிநேர ஆசிரியர்களின் குடும்பங்கள் பல்வேறு பொருளாதாரச் சுமையால் பாதிக்கப்பட்டுள்ளன. இவர்களின் நீண்டகால ஏக்கமான போனஸ் மற்றும் பண்டிகை கால முன்பணக்கடன் கோரிக்கையானது இந்த முறையாவது தவெக ஆட்சியிலாவது நிறைவேற்றப்படுமா என்ற பெரும் எதிர்பார்ப்பையும் ஏக்கத்தையும் ஏற்படுத்தியுள்ளது.

முன்பணக்கடன் கோரிக்கை

தமிழக அரசுப் பள்ளிகள் மற்றும் பல்வேறு அரசுத் துறைகளில் ஒப்பந்த அடிப்படையிலும், நிரந்தரப் பணியிலும் பணிபுரியும் அரசு ஊழியர்களுக்கு தீபாவளிப் பண்டிகைக் காலத்தில் ஏற்படும் கூடுதல் குடும்பச் செலவினங்களை எளிதில் சமாளிக்கும் பொருட்டு, தமிழ்நாடு அரசு ஒவ்வொரு ஆண்டும் பண்டிகை கால முன்பணக்கடனாக ரூபாய் 20 ஆயிரத்தை வழங்கி வருகிறது.

இந்தச் சிறப்புக் கடனானது ஒரு ஆண்டில் ஒரு நபருக்கு ஒரு முறை மட்டுமே வழங்கப்படுவதுடன், இதற்கு எத்தகைய வட்டியும் வசூலிக்கப்படுவதில்லை என்பது குறிப்பிடத்தக்கது. மேலும், இத்தொகையானது பத்துப் பகுதிகளாக அதாவது மாதந்தோறும் தவணை முறையில் ஊதியத்திலிருந்து பிடித்தம் செய்யப்பட்டு வருகிறது.

இதே முறையைப் பின்பற்றி, தற்பொழுது குறைந்த ஊதியத்தில் அவதிப்படும் பகுதிநேர ஆசிரியர்களுக்கும் பண்டிகை முன்பணக்கடனை வழங்கி, அதனை அவர்களின் மாதச் சம்பளத்தில் தவணை முறையில் பிடித்தம் செய்ய வேண்டும் என்று கோரப்பட்டுள்ளது. இத்தகைய சலுகையைத் தவெக அரசு உடனே நடைமுறைப்படுத்தினால், வெளியில் வட்டிக்குக் கடன் வாங்கித் தவிக்கக்கூடிய துயரத்திலிருந்து ஆயிரக்கணக்கான பகுதிநேர ஆசிரியர் குடும்பங்கள் முழுமையாக விடுபட முடியும் என்று தமிழ்நாடு பகுதிநேர ஆசிரியர்கள் கூட்டமைப்பின் மாநில ஒருங்கிணைப்பாளர் எஸ்.செந்தில்குமார் தனது அறிக்கையின் மூலம் ஆழமாக வலியுறுத்தியுள்ளார்.

சம்பள முன்கூட்டிய வழங்கல்

கடந்த 15 ஆண்டுகளாகத் தற்காலிகப் பணியாளர்களாகத் தொடர்ந்து உழைத்து வரும் பகுதிநேர ஆசிரியர்களுக்கு, நடப்பு ஆண்டிலாவது தீபாவளிப் போனஸ் வழங்கி அவர்களின் நீண்டகால ஏமாற்றத்தைப் போக்க வேண்டும் என்ற குரல்கள் வலுத்து வருகின்றன. குறிப்பாக, தமிழகத்தின் பள்ளிக்கல்வித்துறையின் கீழ் இயங்கும் இவர்களின் உழைப்பைக் கவுரவிக்கும் வகையில், நடப்பு நவம்பர் மாதத்திற்குச் சேர வேண்டிய ரூபாய் 15 ஆயிரம் ஊதியத்தை பண்டிகைக்கு முன்பாகவே முன்கூட்டியே வழங்கி உதவ வேண்டும் என்று எதிர்பார்க்கப்படுகிறது.

பகுதிநேர ஆசிரியர்களின் குடும்பங்கள் எந்தவிதப் பொருளாதாரத் தடையுமின்றி மகிழ்ச்சியாகத் தீபாவளித் திருநாளைக் கொண்டாட வழிவகை செய்யும் வகையில், தமிழக முதல்வர் விஜய் உடனடியாகத் தலையிட்டுத் தகுந்த உத்தரவுகளைப் பிறப்பிக்க வேண்டும் என்று கோரிக்கை விடுக்கப்பட்டுள்ளது.

பண்டிகைக் காலத்தில் குழந்தைகளுக்குப் புத்தாடை வாங்கித் தருவதற்கும், அத்தியாவசியப் பண்டிகைச் செலவுகளைச் செய்வதற்கும் இந்த முன்கூட்டிய சம்பளமும் போனசும் மிகவ அத்தியாவசியமானதாகக் கருதப்படுகிறது.

தேர்தல் வாக்குறுதி நினைவூட்டல்

பண்டிகைக் காலச் சலுகைகள் மற்றும் முன்பணக்கடன் கோரிக்கைகளைத் தாண்டி, பகுதிநேர ஆசிரியர்களின் எதிர்காலத்தைப் பாதுகாக்கும் நிரந்தரத் தீர்வாகப் பணிநிரந்தரம் செய்யப்பட வேண்டும் என்ற கோரிக்கையும் முன்வைக்கப்பட்டுள்ளது. கடந்த காலத் தேர்தல் வாக்குறுதிகளில், ஐந்து ஆண்டுகளுக்கு மேல் பணியாற்றிய அனைத்துத் தற்காலிக ஆசிரியர்களும் எவ்விதத் தயக்கமுமின்றிப் பணிநிரந்தரம் செய்யப்படுவார்கள் என்று உறுதியளிக்கப்பட்டிருந்தது. அந்த வாக்குறுதியின் அடிப்படையில், உடற்கல்வி, ஓவியம், கணினி, தையல், இசை மற்றும் தொழிற்கல்விப் பாடங்களில் கல்வி கற்பித்து வரும் பகுதிநேர ஆசிரியர்களின் நீண்டகாலச் சேவைகளைக் கருத்திற்கொண்டு அவர்களைப் பணிநிரந்தரம் செய்வதற்குத் தவெக அரசு உடனடியாக ஒரு தெளிவான கொள்கை முடிவை எடுக்க வேண்டும். பல ஆண்டுகளாகக் குறைந்த தொகுப்பூதியத்தில் தற்காலிகமாகப் பணியாற்றிவரும் இவர்களின் வாழ்வாதாரத்தை உயர்த்தும் வகையில் அரசு ஆக்கப்பூர்வமான நடவடிக்கைகளை மேற்கொண்டு, இவர்களின் குடும்பங்களின் இன்னல்களைத் தீர்க்க முன்வர வேண்டும் என்பதே ஒட்டுமொத்தப் பகுதிநேர ஆசிரியர்களின் எதிர்பார்ப்பாக உள்ளது.

கடல் அரிப்புக்கு இயற்கைத் தீர்வு தேடும் காரைக்கால் - களமிறங்கிய அதிகாரிகள்!

சிவரஞ்சித் — Tue, 3 Nov 2026 12:00:59 +0530

காரைக்கால்: கடல் அரிப்பைத் தடுக்கும் வகையிலும், கடற்கரைப் பகுதிகளில் இயற்கையான பாதுகாப்பு அரணை உருவாக்கும் நோக்கிலும் காரைக்கால் மாவட்டத்தில் சுமார் 2,000 பனை விதைகள் நடும் பணி தொடங்கப்பட்டுள்ளது.

உலக பேரிடர் அபாய குறைப்பு தினத்தை முன்னிட்டு, காரைக்கால் மாவட்ட பேரிடர் மேலாண்மைத் துறை மற்றும் குடிமை பாதுகாப்புப் படை சார்பில் இந்தப் பனை விதைகள் நடும் திட்டம் செயல்படுத்தப்படுகிறது.

காரைக்கால்மேடு மீனவ கிராமத்தில் நடைபெற்ற தொடக்க நிகழ்ச்சியில் வனத்துறை அதிகாரி நந்தகுமார், மாவட்ட துணை ஆட்சியர் பாலு, ஆப்த மித்ரா ஒருங்கிணைப்பாளர் சதீஷ் ராமன் உள்ளிட்ட அதிகாரிகள் கலந்து கொண்டனர். அவர்கள் கடற்கரைப் பகுதியில் பனை விதைகளை நட்டு இத்திட்டத்தைத் தொடங்கி வைத்தனர்.

கடல் அரிப்பைத் தடுக்க இயற்கை அரண்!

கடலோரப் பகுதிகளில் ஏற்படும் கடல் அரிப்பு காரணமாக கடற்கரையின் நிலப்பரப்பு பாதிக்கப்படுவதுடன், கடலோரத்தில் வசிக்கும் மீனவ மக்களின் வாழ்விடங்களுக்கும் பல்வேறு பாதிப்புகள் ஏற்படும் சூழல் உள்ளது. இதனைத் தடுக்கும் வகையில் இயற்கை சார்ந்த பாதுகாப்பு நடவடிக்கைகளை மேற்கொள்வது அவசியமாகியுள்ளது.

இதன் ஒரு பகுதியாக, கடற்கரைப் பகுதிகளில் பனை மரங்களை அதிக அளவில் உருவாக்கும் திட்டம் முன்னெடுக்கப்பட்டுள்ளது. பனை மரங்கள் வளர்ந்து நிலைபெறும்போது, அவற்றின் வேர் அமைப்பு மணல் மற்றும் மண்ணை நிலைநிறுத்துவதற்கு உதவும். இதன் மூலம் கடற்கரைப் பகுதிகளில் இயற்கையான பசுமை அரணை உருவாக்க முடியும் என்ற நோக்கத்தில் இத்திட்டம் செயல்படுத்தப்படுகிறது.

பல்வேறு கடற்கரைப் பகுதிகளில் 2,000 பனை விதைகள்!

காரைக்கால் மாவட்டத்தில் உள்ள காரைக்கால்மேடு உள்ளிட்ட பல்வேறு கடற்கரைப் பகுதிகளில் மொத்தம் சுமார் 2,000 பனை விதைகள் நடப்பட உள்ளதாக அதிகாரிகள் தெரிவித்துள்ளனர்.

பேரிடர் பாதிப்புகளைக் குறைப்பதற்கான முன்னெச்சரிக்கை நடவடிக்கையாகவும், கடலோர சுற்றுச்சூழலைப் பாதுகாக்கும் முயற்சியாகவும் இத்திட்டம் மேற்கொள்ளப்படுகிறது.

மேலும், பனை மரங்களை வளர்ப்பதன் மூலம் கடற்கரைப் பகுதிகளில் பசுமைப் பரப்பை அதிகரிப்பதுடன், எதிர்கால சந்ததியினருக்கு இயற்கை வளங்களைப் பாதுகாத்து வழங்கவும் முடியும் என எதிர்பார்க்கப்படுகிறது.

உலக பேரிடர் அபாய குறைப்பு தினத்தை முன்னிட்டு தொடங்கப்பட்டுள்ள இந்த முயற்சி, காரைக்கால் மாவட்டத்தின் கடலோரப் பாதுகாப்பில் இயற்கை சார்ந்த நடவடிக்கைகளுக்கு முக்கியத்துவம் அளிக்கும் வகையில் அமைந்துள்ளது.

Karur By Election 2026: கரூர் இடைத்தேர்தலில் மு.க.ஸ்டாலின் போட்டியா? ஐடியா கொடுத்த செந்தில் பாலாஜி!

சுகுமாறன் — Tue, 3 Nov 2026 11:58:05 +0530

தமிழ்நாட்டில் தவெக தனிப்பெரும்பான்மை இல்லாமல் கூட்டணி கட்சிகளுடன் ஆட்சி நடத்தி வருகிறது. தமிழ்நாட்டில் சமீீபத்தில் நடைபெற்ற தாராபுரம் மற்றும் மதுராந்தகம் ஆகிய இரு தொகுதிகளுக்கான இடைத்தேர்தலில் ஆளுங்கட்சியான தவெக அபார வெற்றி பெற்றது.

கரூரில் போட்டியிடுகிறாரா மு.க.ஸ்டாலின்?

தமிழ்நாட்டில் இன்னும் கரூர், அம்பாசமுத்திரம், விராலிமலை, திருச்சி கிழக்கு மற்றும் பெருந்துறை ஆகிய தொகுதிகள் காலியாக உள்ளது. இதில் திருச்சி கிழக்கு தவிர எஞ்சிய 4 தொகுதிகள் அதிமுக வசம் இருந்தவை. அதிமுக-வைக் காட்டிலும் தவெக-வே தற்போது திமுக-விற்கு மிகப்பெரிய அரசியல் எதிரியாக உருவெடுத்துள்ளது. குறிப்பாக, மு.க.ஸ்டாலினே தோற்றதால் தவெக-வை வீழ்த்தியே ஆக வேண்டும் என்ற முனைப்பில் திமுக-வினர் உள்ளனர்.

இந்த நிலையில், சமீபத்தில் முன்னாள் முதலமைச்சர் மு.க.ஸ்டாலினுடன் செந்தில்பாலாஜி நேரில் சந்தித்துப் பேசியுள்ளார். அப்போது, அவரிடம் கரூர் தொகுதியில் போட்டியிடுமாறு வேண்டுகோள் விடுத்துள்ளார். அதிமுக கோட்டையான தாராபுரத்திலே அதிமுக-வைப் பின்னுக்குத் தள்ளி இரண்டாம் இடம் பிடித்துவிட்டதால் கரூரில் போட்டியிட்டால் கண்டிப்பாக வெற்றி பெற்றுவிடலாம் என்று மு.க.ஸ்டாலினிடம் நம்பிக்கையுடன் தெரிவித்துள்ளார்.

என்ன முடிவு எடுப்பார்?

செந்தில் பாலாஜி கூறியதை கவனமாக கேட்டுக்கொண்ட மு.க.ஸ்டாலின் எந்தவொரு பதிலும் கூறவில்லை. கரூரைப் பொறுத்தமட்டில் செந்தில் பாலாஜி தனக்கென தனி செல்வாக்கு கொண்டவராக இருப்பதால் அவரை நம்பி களமிறங்கினால் வெற்றி வாய்ப்பும் பிரகாசமாக இருக்கும் என்றே கருதப்படுகிறது.
தவெக சார்பில் முன்னாள் அமைச்சர் எம்ஆர் விஜயபாஸ்கர் களமிறங்க வாய்ப்புகள் இருப்பதாக கூறப்படுகிறது.

இந்த இடைத்தேர்தலில் மு.க.ஸ்டாலினை களமிறக்க வெற்றி பெறச் செய்து மீண்டும் அவரை சட்டசபைக்கு அழைத்துச் செல்ல வேண்டும் என்று திமுக-வினர் தீவிரமாக இருந்தாலும், மறுபக்கம் இடைத்தேர்தலில் போட்டியிட்டு தோல்வி அடைந்தால் அது மிக மோசமான விளைவுகளை திமுக-விற்கு ஏற்படுத்தும் என்ற அச்சமும் இருக்கிறது. ஏனென்றால், தமிழ்நாட்டைப் பொறுத்தமட்டில் இடைத்தேர்தல் என்றாலே வெற்றி வாய்ப்பு பொதுவாக ஆளுங்கட்சிக்கு சாதகமாக அமைந்துள்ளது.

களத்தில் விஜய்:

இதனால், கரூரில் களமிறங்குவது குறித்து சிந்தித்தே முடிவு எடுக்கலாம் என்று சிலர் மு.க.ஸ்டாலினுக்கு ஆலோசனை வழங்கி வருகின்றனர். இடைத்தேர்தல் நடைபெற உள்ள ஒவ்வொரு தொகுதிக்கும் முதலமைச்சர் விஜய் தீவிரமாக நலத்திட்ட உதவிகள் வழங்குவதற்காக நேரில் சென்று கொண்டிருக்கிறார். இது ஒரு வகையில் அந்தந்த தொகுதிகளுக்கான பரப்புரையாகவே பார்க்கப்படுகிறது.

இடைத்தேர்தலில் எஞ்சிய 5 தொகுதிகளையும் கைப்பற்றியே ஆக வேண்டும் என்ற விடாப்பிடியுடன் விஜய் உள்ளார். இந்த வெற்றி மூலமாக தனது ஆட்சியை மேலும் வலுப்படுத்த விஜய் தீவிரமாக களப்பணியாற்ற கட்சியினருக்கம் உத்தரவிட்டுள்ளார். இதனால், களமிறங்கினால் கண்டிப்பாக வெற்றி வாய்ப்பு உறுதி என்றால் மட்டுமே மு.க.ஸ்டாலின் மீண்டும் களத்தில் இறங்குவார் என்று கருதப்படுகிறது. இடைத்தேர்தல் தேதி அறிவிக்கப்பட்டால் தமிழ்நாட்டில் அரசியல் களம் மீண்டும் சூடுபிடிக்கும் என்பது உறுதி.

Cyclone Update: தமிழகத்தை நோக்கி வரும் ராட்சசன்! மக்களே உஷார்! எப்போது தெரியுமா? வானிலை இயக்குனர் வார்னிங்!

வினோத்குமார் — Tue, 3 Nov 2026 11:48:52 +0530

தமிழகத்தில் வடகிழக்கு பருவமழை தொடங்கியுள்ளதை பல்வேறு மாவட்டங்களில் இடி, மின்னலுடன் கனமழை வெளுத்து வாங்கி வருகிறது. இந்நிலையில் அர்னாப் புயலை அடுத்து முரசு புயல் உருவானது. இந்த இரண்டு புயல்களும் ஆந்திரா நோக்கி சென்றுவிட்டது. இதனால் மரங்களும், மின்கம்பங்களும் சாய்ந்தன. மேலும் பல்வேறு இடங்களில் 25 செ.மீ. பதிவானதை அடுத்து தாழ்வான இடங்களை மழைநீர் சூழ்ந்தது. உயிரிழப்புகளும் ஏற்பட்டன.

ஆனால் தமிழகத்தில் எதிர்பார்த்த மழையை கொடுக்கவில்லை. இந்நிலையில் நவம்பர் 15ம் தேதிக்கு பிறகு வங்கக்கடலில் உருவாகும் புயல் தமிழ்நாட்டை நோக்கி வர வாய்ப்புள்ளதாக சென்னை வானிலை மையம் தெரிவித்துள்ளது.

இதையும் படிங்க: Cyclone Murasu: கோரத்தாண்டவம் ஆடிய முரசு புயல்.. 120 கி.மீ. வேகத்தில் காற்று.. தமிழகத்தில் 14 மாவட்டங்களுக்கு மழை எச்சரிக்கை!

தமிழகத்தை நோக்கி வரும் புயல்

இதுகுறித்து வானிலை ஆய்வு மைய இயக்குனர் துரை செய்தியாளர்களுக்கு பேட்டியளிக்கையில்: நவம்பர் 15ம் தேதி வரை தமிழகத்திற்கு எந்த பாதிப்பும் பெரிதளவிற்கு வராது. ஆனால் நவம்பர் 15ம் தேதிக்கு மேல் புதிய புயலுக்கு வாய்ப்புள்ளதாகவும் தெரிவித்துள்ளார். அதேபோல் நவம்பர் மற்றும் டிசம்பர் மாதத்தில் உருவாகும் புயல்கள் தமிழகத்தை நோக்கியே வரும். ஆகையால் இனி வரும் நாட்களில் பொதுமக்கள் எச்சரிக்கையாக இருக்க வேண்டும் என அறிவுறுத்தியுள்ளார்.

கனமழை எச்சரிக்கை

தமிழகத்தில் வடகிழக்குப் பருவமழை இதுவரை இயல்பைவிட 18 சதவீதம் அதிகமாகப் பெய்துள்ளது. அடுத்த 24 மணி நேரத்தில் வேலூர் மற்றும் நீலகிரி மாவட்டங்களில் கனமழை பெய்யக்கூடும். காற்றின் வேகம் அதிகமாக இருக்கும் என்பதால் வட தமிழக கடலோரப் பகுதிகளில் மீனவர்கள் மீன்பிடிக்கச் செல்ல வேண்டாம் என அறிவுறுத்தப்பட்டுள்ளது.

இதையும் படிங்க: Gold Rate Today: தீபாவளிக்கு முன் அதிர்ச்சி! மீண்டும் ஜெட் வேகத்தில் உயரும் தங்கம் விலை..! வெள்ளி நிலவரம் என்ன?

11 மாவட்டங்களில் மழை

இதனிடையே தமிழகத்தில் அடுத்த 3 மணிநேரத்தில் அதாவது காலை 10 முதல் 1 மணி வரை 11 மாவட்டங்களில் மழைக்கு வாய்ப்புள்ளது. அதாவது சென்னை, திருவள்ளூர், செங்கல்பட்டு, காஞ்சிபுரம், கடலூர், மயிலாடுதுறை, நாகப்பட்டினம், புதுக்கோட்டை, ராமநாதபுரம், திருவண்ணாமலை, விழுப்புரம் உள்ளிட்ட மாவட்டங்களில் மழைக்கு வாய்ப்புள்ளதாக சென்னை வானிலை மையம் தெரிவித்துள்ளது.

தமிழக அரசு வழங்கும் ரூ.36 லட்சம் வெளிநாட்டு கல்வி உதவித்தொகை: யார் விண்ணப்பிக்கலாம்? முழு விவரம்.

எஸ்.ஜெகநாதன், மயிலாடுதுறை — Tue, 3 Nov 2026 11:06:29 +0530

தமிழ்நாடு அரசு சிறுபான்மை சமூகத்தைச் சார்ந்த மாணவ மாணவியர்களின் கல்வி வளர்ச்சிக்காகவும், அவர்களின் எதிர்காலத்தை வளமாக்குவதற்காகவும் பல்வேறு சிறப்பான திட்டங்களைச் செயல்படுத்தி வருகிறது. அந்த வகையில், உலகத் தரம் வாய்ந்த பல்கலைக்கழகங்களில் உயர்கல்வி பயில வேண்டும் என்ற ஏழை மற்றும் நடுத்தரக் குடும்பங்களைச் சேர்ந்த மாணவர்களின் கனவை நனவாக்கும் வகையில் வெளிநாட்டு கல்வி உதவித்தொகை திட்டம் அறிவிக்கப்பட்டுள்ளது.

இத்திட்டமானது தமிழ்நாட்டில் உள்ள முஸ்லிம் சிறுபான்மையின மாணவ மாணவியர்கள் சர்வதேச அளவில் புகழ்பெற்ற கல்வி நிறுவனங்களில் சென்று முதுகலைப் படிப்பு பயில்வதற்கு மிகப்பெரிய பொருளாதார உதவியாக அமையும் என்பதில் எந்தவித ஐயமும் இல்லை. ஏழ்மை நிலை காரணமாக பன்னாட்டுப் பல்கலைக்கழகங்களில் படிக்க முடியாத திறமையான மாணவர்களை அடையாளம் கண்டு அவர்களுக்கு சிறப்பான எதிர்காலத்தை உருவாக்கித் தரும் நோக்கில் தமிழக அரசால் இத்திட்டம் மிகவும் வெற்றிகரமாகச் செயல்படுத்தப்பட்டு வருகிறது.

உதவித்தொகையின் விவரம் மற்றும் நிதி உதவிப் பயன்கள்

நடப்பு 2026-2027 ஆம் கல்வி ஆண்டிற்காகச் செயல்படுத்தப்படும் இத்திட்டத்தின் கீழ், தமிழகத்தைச் சேர்ந்த தகுதியான 10 முஸ்லிம் மாணவ மாணவியர்கள் தேர்வு செய்யப்பட உள்ளனர். இவர்களுள் ஒரு மாணவருக்கு அதிகபட்சமாக ரூபாய் 36.00 இலட்சம் வரை கல்வி உதவித்தொகையாக வழங்கப்படவுள்ளது. இந்த மாபெரும் நிதி உதவியானது மாணவர்கள் வெளிநாடுகளில் தங்கிப் படிப்பதற்கான கட்டணம், கல்விச் செலவுகள் மற்றும் பிற அவசியமான செலவினங்களை முழுமையாகச் சமாளிக்க மிகவும் உதவியாக இருக்கும்.

அரசின் இந்த தாராளமான நிதியுதவித் திட்டமானது மாணவ மாணவியர்கள் எத்தகைய பொருளாதாரச் சுமையுமின்றி தங்களின் முழு கவனத்தையும் படிப்பில் செலுத்தவும், உலகளாவிய அளவில் போட்டிப் போட்டுக் கொண்டு உயர்தரக் கல்வியைக் கற்றுத் தேறவும் பெரிதும் வழிகோலும்.

விண்ணப்பிப்பதற்கான தகுதி வரம்புகள் மற்றும் நிபந்தனைகள்

இத்திட்டத்தின் மூலம் கல்வி உதவித்தொகையைப் பெற விரும்பும் மாணவ மாணவியர்கள் சில குறிப்பிட்ட கட்டாயத் தகுதிகளைப் பெற்றிருத்தல் அவசியமாகும். அதன்படி, விண்ணப்பதாரர்களின் பெற்றோர் அல்லது பாதுகாவலரின் ஆண்டு வருமானம் ரூபாய் 8.00 லட்சத்திற்கு மிகாமல் இருக்க வேண்டும். மேலும், முந்தைய இளங்கலைப் பட்டப்படிப்பில் குறைந்தது 60 சதவீத மதிப்பெண்கள் அல்லது அதற்கு இணையான தேர்ச்சி சதவீதத்தைப் பெற்றிருக்க வேண்டும்.

மிகவும் முக்கியமாக, 2026-2027 ஆம் கல்வியாண்டில் முதுகலைப் பட்டப்படிப்பு படிக்க உலகளாவிய கியூ.எஸ். (Quacquarelli Symonds) தரவரிசையில் முதல் 250 இடங்களுக்குள் இடம்பெற்றுள்ள புகழ்பெற்ற பல்கலைக்கழகங்கள் அல்லது கல்வி நிறுவனங்களிடமிருந்து நிபந்தனையற்ற சேர்க்கைக் கடிதத்தை (Unconditional Offer Letter) மாணவர்கள் பெற்றிருத்தல் வேண்டும்.

இத்துடன் மருத்துவம், பொறியியல், மேலாண்மை அறிவியல், வணிகவியல் மற்றும் நிதி, மனிதநேயம் மற்றும் கலை, வேளாண்மை அறிவியல், சுகாதாரம் பயன்பாட்டு அறிவியல், சர்வதேச வணிகம், பொருளாதாரம், நிதி கணக்கியல், சமூக அறிவியல், நுண்கலைகள் மற்றும் சட்டம் போன்ற பல்வேறு முக்கியப் பாடப்பிரிவுகளைத் தேர்ந்தெடுத்து முதுகலைப் பட்டப்படிப்புக்கான சேர்க்கை பெறுபவராக இருத்தல் வேண்டும்.

குறிப்பாக, வெளிநாடு சென்ற பிறகு அளிக்கப்படும் விண்ணப்பங்கள் மற்றும் ஏற்கெனவே வெளிநாட்டுக் கல்லூரிகளில் சேர்ந்து கல்வி பயின்று வருபவர்களின் விண்ணப்பங்கள் எக்காரணம் கொண்டும் பரிசீலிக்கப்பட மாட்டாது என்பதால், மாணவர்கள் இந்த நிபந்தனைகளைக் கவனத்தில் கொண்டு விண்ணப்பிக்க வேண்டும்.

விண்ணப்பிக்கக் கால அவகாசம் நீட்டிப்பு

2026-2027 ஆம் ஆண்டில் வெளிநாட்டில் முதுகலைப் படிப்பு பயில விரும்பும் சிறுபான்மையின முஸ்லிம் மாணவ மாணவியர்கள் கல்வி உதவித்தொகை பெறுவதற்கு இதற்கு முன்பு அக்டோபர் 15, 2026 வரை மட்டுமே விண்ணப்பிக்கக் கால அவகாசம் வழங்கப்பட்டிருந்தது. இந்நிலையில், மாணவர்கள் பலர் தங்களுக்குத் தேவையான ஆவணங்களைத் திரட்டுவதிலும், பல்கலைக்கழகங்களின் சேர்க்கைக் கடிதத்தைப் பெறுவதிலும் உள்ள நடைமுறைச் சிக்கல்களைக் கருத்திற்கொண்டும், மேலும் அதிகமான மாணவ மாணவியர்கள் இத்திட்டத்தின் மூலம் பயன்பெற வேண்டும் என்ற நோக்கத்துடனும் தமிழக அரசு இக்கால அவகாசத்தை நீட்டித்துள்ளது. தற்போது இத்திட்டத்தின் கீழ் விண்ணப்பிப்பதற்கான கடைசி நாள் வருகிற நவம்பர் 09, 2026 வரை நீட்டிக்கப்பட்டுள்ளது. எனவே, தகுதியும் விருப்பமும் உள்ள மாணவ மாணவியர்கள் இந்த நீட்டிக்கப்பட்ட காலக்கெடுவுக்குள் தங்களது விண்ணப்பங்களைச் சமர்ப்பித்து இந்த பொன்னான வாய்ப்பைப் பயன்படுத்திக் கொள்ளுமாறு கேட்டுக்கொள்ளப்பட்டுள்ளனர்.

விண்ணப்பங்களைச் சமர்ப்பிக்கும் முறை மற்றும் முகவரி விவரங்கள்

இத்திட்டத்தில் பயன்பெற விரும்பும் ஆர்வமுள்ள மாணவ மாணவியர்கள் தமிழ்நாடு அரசின் அதிகாரப்பூர்வ வலைத்தளமான www.bcinadu.tn.gov.in/scholarships.html என்ற இணையதளத்திற்குச் சென்று விண்ணப்பத்தைப் பதிவிறக்கம் செய்துகொள்ள வேண்டும். அந்த விண்ணப்பப் படிவத்தை உரிய முறையில் பூர்த்தி செய்து, அதற்குத் தேவையான அனைத்து சான்றிதழ்கள் மற்றும் ஆவணங்களுடன் இணைத்து அனுப்ப வேண்டும். பூர்த்தி செய்யப்பட்ட விண்ணப்பங்களை, "ஆணையர், சிறுபான்மையினர் நலத்துறை, கலசமஹால் பாரம்பரிய கட்டடம், முதல் தளம், சேப்பாக்கம், சென்னை - 600 005" என்ற முகவரிக்கு அஞ்சல் மூலம் அனுப்பி வைக்க வேண்டும்.

Ration Shop: சந்தோஷத்தில் துள்ளிக்குதிக்கும் ரேஷன் கடை ஊழியர்கள்! தமிழக அரசு வெளியிட்ட சூப்பர் அறிவிப்பு!

வினோத்குமார் — Tue, 3 Nov 2026 09:32:04 +0530

தீபாவளி பண்டிகை தமிழகம் மட்டுமின்றி நாடு முழுவதும் நவம்பர் 8ம் தேதி ஞாயிற்றுக்கிழமை கொண்டாடப்படுகிறது. இப்பண்டிகையை கொண்டாட மக்கள் தங்கள் சொந்த ஊர்களுக்கு குடும்பத்தினருடன் செல்ல திட்டமிட்டுள்ளனர். பொதுவாக, தமிழகத்தில் தீபாவளிக்கு மட்டுமே அரசு விடுமுறை அறிவிக்கப்படுவது வழக்கம்.

தீபாவளி பண்டிகை

இந்நிலையில் தீபாவளி கொண்டாட சொந்த ஊர்களுக்கு செல்பவர்கள் திரும்புவதற்கு ஏதுவாக தீபாவளி மறுநாள் அதாவது நவம்பர் 9ம் தேதி திங்கள் கிழமை அரசு விடுமுறை அளிக்க வேண்டும் என அரசு ஊழியர்கள் மற்றும் ஆசிரியர்கள் முதல்வர் விஜய்க்கு கோரிக்கை வைத்திருந்தனர். இதனையடுத்து தீபாவளிக்கு மறுநாள் திங்கட்கிழமை அரசு விடுமுறை தினமாக தமிழக அரசு அறிவிப்பை வெளியிட்டிருந்தது. அதேபோல் ரேஷன் கடை பணியாளர்களும் நவம்பர் 9ம் தேதி விடுமுறை அளிக்க வேண்டும் என்ற கோரிக்கை ஏற்கப்பட்டுள்ளது.

இதையும் படிங்க: School Leave: இடைவிடாமல் வெளுத்து வாங்கும் கனமழை.! பள்ளிகளுக்கு இன்று விடுமுறை அறிவிப்பு.!

ரேஷன் கடை ஊழியர்கள்

இதுதொடர்பாக தமிழ்நாடு உணவுப்பொருள் வழங்கல் மற்றும் நுகர்வோர் பாதுகாப்புத்துறை ஆணையர், கூட்டுறவு சங்கங்களின் பதிவாளருக்கு அனுப்பியுள்ள சுற்றறிக்கையில்: ஆயுத பூஜை, சரஸ்வதி பூஜை ஆகியவற்றுக்கான தொடர் விடுமுறை காரணமாக, பொது விநியோகத்திட்டத்தின் கீழ் வழங்கப்படும் அத்தியாவசிய பொருட்கள், ரேஷன் அட்டைதாரர்களை சென்றடைவதை உறுதி செய்வதற்காக அக்டோபர் 18ம் தேதியன்று அனைத்து ரேஷன் கடைகளுக்கும் வேலை நாளாக அறிவிக்கப்பட்டது.

இதையும் படிங்க: TASMAC: குடிமகன்களுக்கு ஹேப்பி நியூஸ்...100 மீட்டருக்குள் பார்.. தமிழக அரசின் புது ரூல்ஸ்! முழு விவரம் இதோ!

தீபாவளி மறுநாள் விடுமுறை

அதை ஈடுசெய்யும் விதமாக நவம்பர் 21ம் தேதி அன்று விடுமுறை நாளாக அறிவிக்கப்பட்டு இருந்தது. இந்நிலையில் தீபாவளி பண்டிகை தினமான 8-ம் தேதிக்கு (ஞாயிற்றுக்கிழமை) அடுத்த நாளான 9-ம் தேதியை விடுமுறை நாளாக, அதாவது விடுமுறை நாளாக அறிவிக்கப்பட்ட 21.11.2026 தேதிக்கு மாற்றாக அறிவிக்க வேண்டும் என்று தமிழ்நாடு அரசு ரேஷன் கடை பணியாளர்கள் சங்கம் கோரிக்கை வைத்தது. அந்த கோரிக்கையை ஏற்று, வரும் 9-ம் தேதியை விடுமுறை நாளாகவும், 21-ம் தேதியை பணி நாளாகவும் அறிவித்து உத்தரவிடப்படுகிறது என தெரிவிக்கப்பட்டுள்ளது.

தேனி தேக்கம்பட்டி சிறை கைதிகள் சித்திரவதை ! விசாரணைக்கு உயர் நீதிமன்றம் அதிரடி உத்தரவு!

நாகராஜ் — Tue, 3 Nov 2026 08:37:37 +0530

தேனி மாவட்ட சிறையில் இருந்து தப்பிய கைதிகள் துன்புறுத்தப்பட்டார்களா என விசாரணை செய்து அறிக்கை அளிக்கும்படி, தேனி மாவட்ட சட்டப்பணிகள் ஆணைக்குழு தலைவருக்கு, தமிழ்நாடு மாநில சட்டப்பணிகள் ஆணைக்குழு உத்தரவிட்டுள்ளது.

தேனி மாவட்டம் ஆண்டிப்பட்டி அருகே உள்ள மாவட்ட சிறையில் இருந்து கடந்த 26-ந்தேதி இரவு காவலர்களை தாக்கி மொத்தம் 17 கைதிகள் தப்பிச்சென்றனர். ஒரே நேரத்தில் இத்தனைகள் கைதிகள் தப்பியது பேசுபொருளாகிய நிலையில், இது சிறைத்துறையினரின் அலட்சியப்போக்கை வெளிக்காட்டியதாக கடும் கண்டனங்கள் எழுந்தன. இதனையடுத்து படிப்படியாக 17 கைதிகளும் பிடிபட்டனர். அவர்களை பிடிப்பதற்காக 17 தனிப்படைகள் அமைக்கப்பட்டன. அதன்படி, 36 மணி நேரத்தில் அனைவரையும் போலீசார் பிடித்தனர். தொடர்ந்து அவர்கள் கடலூர், மதுரை, சேலம் மற்றும் பாளையங்கோட்டை மத்திய சிறைகளில் அடைக்கப்பட்டுள்ளனர். சிறைக்கைதிகள் தப்பிய விவகாரத்தின் எதிரொலியாக சிறைத்துறை டிஜிபியாக இருந்த சந்தீப்ராய் ரத்தோர் அப்பதவியில் இருந்து மாற்றம் செய்யப்பட்டு அவர் மின்வாரிய லஞ்ச ஒழிப்புப்பிரிவு கண்காணிப்பு அதிகாரியாக நியமிக்கப்பட்டுள்ளார். மேலும் சிறைத்துறை காவல் இயக்குநர் பதவி ஏடிஜிபி தரத்திற்கு குறைக்கப்பட்டு அப்பதவிக்கு ஏடிஜிபி சங்கர் ஐபிஎஸ் நியமிக்கப்பட்டார்.

இந்த நிலையில் , தேனி மாவட்ட சிறையில் இருந்து 17 கைதிகள் துன்புறுத்தப்பட்டார்களா என விசாரித்து அறிக்கை தாக்கல் செய்ய தேனி மாவட்ட சட்டப்பணிகள் ஆணைக்குழு தலைவருக்கு, தமிழ்நாடு மாநில சட்டப்பணிகள் ஆணைக்குழு செயல் தலைவரும், சென்னை உயர் நீதிமன்ற நீதிபதியுமான எஸ்.எம் சுப்பிரமணியம் உத்தரவிட்டுள்ளார். தற்போது கடலூர், மதுரை, சேலம் மற்றும் பாளையங்கோட்டை சிறைகளில் அடைக்கப்பட்டுள்ள 17 கைதிகளை நேரில் சந்தித்து, தனிப்பட்ட முறையில் ஒவ்வொருவரிடமும் துன்புறுத்தல் குறித்து விசாரிக்க வேண்டும் என்றும், அவர்களின் உடலில் காயங்கள் ஏதும் உள்ளதா என்பதை சரிபார்த்து நவம்பர் 16ஆம் தேதிக்குள் அறிக்கை தாக்கல் செய்ய வேண்டும் என்றும் அந்த உத்தரவில் குறிப்பிடப்பட்டுள்ளது.

மேலும் தமிழ்நாடு மாநில சட்டப் பணிகள் ஆணை குழுவின் உறுப்பினர் செயலர் பாலகிருஷ்ணன் வெளியிடப்பட்டுள்ள செய்திக்குறிப்பில் தெரிவிக்கப்பட்டுள்ளது. தேனி மாவட்ட சிறையில் இருந்து அக்டோபர் 26ஆம் தேதி இரவு 17 கைதிகள் தப்பிச் சென்றனர். இந்த சம்பவம் நாடு முழுவதும் பேசுபொருளான நிலையில், இந்நிலையில், தப்பிய கைதிகளில் ஒருவரான மீனாட்சி சுந்தரம், தங்களுக்கு சிறையில் முறையாக உணவு, குடிநீர் வசதிகள் வழங்கப்படாததாலும், காவலர்கள் மனிதாபிமானமற்ற முறையில் துன்புறுத்தியதாலும் தப்பி சென்றதாக வீடியோ ஒன்றை வெளியிட்டிருந்தார்.

அந்த வீடியோவில்,”நீதிபதி மற்றும் முதலமைச்சருக்கு இதை வேண்டுகோளாக வைக்கிறேன். நாங்கள் அனைவரும் சிறையிலிருந்து பிரச்சினை செய்வதற்கோ, வேறு எதுவும் செய்வதற்கோ தப்பிக்கவில்லை. எங்களுடைய பிரச்சினைகளை நீதிபதியிடம் கூறி, கோர்ட்டிலேயே சரண்டர் ஆகத்தான் வந்தோம். அந்த சிறையில் இருக்கவே எங்கள் யாருக்கும் பிடிக்கவில்லை. அதனால் பேசித் தான் நாங்கள் அனைவரும் வந்தோம். ஜெயிலில் எங்களை ரொம்ப சித்திரவதை செய்தார்கள். சிறை கண்காணிப்பாளரிடம் இதுகுறித்து முறையிட்டும் அவர்கள் நடவடிக்கை எடுக்கவில்லை” எனப் பேசியிருந்தார்.இந்த வீடியோ தமிழகத்தில் மீண்டும் ஒரு பரபரப்பை ஏற்படுத்தியது.