`மாஸ்டர்’ படத்தின் வெற்றிக்குப் பிறகு, நடிகர் விஜய் தற்போது இயக்குநர் நெல்சன் திலீப்குமார் இயக்கி வரும் `பீஸ்ட்’ படத்தில் நடித்து வருகிறார். இயக்குநர் நெல்சன் இயக்கியுள்ள `டாக்டர்’ திரைப்படம் தற்போது திரையரங்குகளில் வெகு மக்கள் ஆதரவோடு திரையிடப்பட்டு வருகிறது. `பீஸ்ட்’ படத்தின் பணிகள் மும்முரமாக நடைபெற்று வருகின்றன.


நடிகர் விஜய் பிறந்தநாளின் போது, `பீஸ்ட்’ படத்தின் ஃபர்ஸ்ட் லுக் போஸ்டரும், அதனுடன் சில போஸ்டர்களும் வெளியிடப்பட்டு, இணையத்தில் கலக்கின. தற்போது `பீஸ்ட்’ படத்தின் படப்பிடிப்பு தளத்தில் எடுக்கப்பட்ட வீடியோ ஒன்று வைரலாகி வருவதோடு, விஜய் ரசிகர்கள் அதனைப் பகிர்ந்து கொண்டாடி வருகின்றனர். படப்பிடிப்பு தளத்தில் மொபைல் ஃபோன்களுக்கு அனுமதி இல்லை என்ற போதும், இந்த வீடியோ யாரால் எடுக்கப்பட்டது, எப்படி வெளியானது என்ற தகவல்கள் இன்னும் தெரியவரவில்லை. `பீஸ்ட்’ படத்தின் படப்பிடிப்பு லீக் வீடியோ தற்போது சமூக வலைத்தளங்களில் வைரலாகி வருகிறது. 



வைரலாகி வரும் இந்த லீக் வீடியோவில், நடிகர் விஜய் ஸ்டைலான கறுப்பு நிற சூட் அணிந்திருக்கிறார். இதனை ரசிகர்கள் வெகுவாக ரசித்து, ஆரவாரம் செய்து வருகின்றனர். எனினும் சில ரசிகர்கள் இந்த லீக் குறித்து தங்கள் அதிருப்தியை வெளிப்படுத்தி இருப்பதோடு, இந்த வீடியோக்களைப் பகிர்பவர்களிடம் அதனைத் தவிர்க்குமாறும், விஜய் படத்தை முழுவதுமாகத் திரையரங்குகளில் கொண்டாடுமாறும் கூறி வருகின்றனர். 


கடந்த ஆகஸ்ட் மாதம், `பீஸ்ட்’ பட நடிகை பூஜா ஹெக்டே படப்பிடிப்பு தளத்தின் புகைப்படம் ஒன்றைத் தனது இன்ஸ்டாகிராம் ஸ்டோரீஸ் பக்கத்தில் வெளியிட்டார். அதில் படப்பிடிப்பு வாகனங்கள் நின்றுகொண்டிருக்க, இடம் சென்னை என்று குறிக்கப்பட்டிருந்தது. எனினும், சில மணி நேரங்களில் இந்தப் படம் நீக்கப்பட்டது.



நடிகர் விஜய் நடித்து வரும் `பீஸ்ட்’ திரைப்படம் தங்க கடத்தல் பற்றிய திரைப்படமாக இருக்கும் என எதிர்பார்க்கப்படுகிறது. `டாக்டர்’ படத்தின் ப்ரொமோஷன்களின் போது, தவறுதலாக இந்த விவகாரத்தை உறுதி செய்துள்ளார் நடிகர் சிவகார்த்திகேயன். `பீஸ்ட்’ படம் ஆக்‌ஷன், காமெடி, ரொமான்ஸ் என அனைத்து பொழுதுபோக்கு அம்சங்களும் நிறைந்த படமாக இருக்கும் எனக் கூறப்படுகிறது. விஜய், பூஜா ஹெக்டே ஆகியோர் முன்னணி வேடத்தில் நடித்திருக்கின்றனர். ஷைன் டாம் சாக்கோ, செல்வராகவன், யோகி பாபு ஆகியோர் பிற வேடங்களில் நடித்துள்ளனர். 


`டாக்டர்’ படத்தின் மிகப்பெரிய வெற்றிக்குப் பிறகு, இயக்குநர் நெல்சன் திலீப்குமார் மீதான எதிர்பார்ப்பு அதிகரித்துள்ளது. `டாக்டர்’ படத்தைப் போலவே, `பீஸ்ட்’ படமும் சிறப்பாக அமைய வேண்டும் என ரசிகர்கள் தங்கள் ஆசையைத் தங்கள் சமூக வலைத்தளங்களில் வெளியிட்டு வருகின்றனர். `பீஸ்ட்’ படம் சன் பிக்சர்ஸால் தயாரிக்கப்படுகிறது; அனிருத் பின்னணி இசை அமைத்துள்ளார்.