கடந்த வாரத்தில் விஜய் சேதுபதியின் ‘பத்தா’, ஜேசன் சஞ்சய் இயக்கிய ‘சிக்மா’ மற்றும் அசோக் செல்வனின் ’அன்பில் அவன்’ ஆகிய படங்கள் திரையரங்குகளில் வெளியானது. முதல் 3 நாளில் இந்த 3 படங்களின் வசூல் விவரங்கள் இதோ...
மனிதம் பேசும் ’பத்தா’
நடுவுல கொஞ்சம் பக்கத்த காணோம், சீதக்காதி படங்களுக்கு பிறகு மக்கள் செல்வன் விஜய் சேதுபதி - இயக்குனர் பாலாஜி தரணிதரம் கூட்டணியில் வெளியாகியுள்ள படம் ’பத்தா’. 1980 காலக்கட்டங்களில் வடசென்னை பின்னணியில் அமைக்கப்பட்டுள்ள இக்கதையில் விஜ்ய் சேதுபதி உள்ளூர் ரவுடியாக மிரட்டியுள்ளார். அவருக்கு ஜோடியாக லிஜோமோல் ஜோஸ் நடித்துள்ளார். மறுப்பக்கம் சபரி என்ற 8 வயது சிறுவன் கதாப்பாத்திரத்தில் குழந்தை நட்சத்திரம் சாய் பிரித்விராஜ் நடித்துள்ளார். விஜய்சேதுபதி - சபரி ஆகிய இருவரும் சந்திக்கும் போது ஏற்படும் பிரச்சனை பூதாகரமாக உருவெடுக்கிறது. அதன் பிறகு என்னவானது என்பதே கதை.
ஜேசன் சஞ்சயின் ’சிக்மா’
முதலமைச்சர் விஜயின் மகன் ஜேசன் சஞ்சய் இயக்குனராக அறிமுகமாகியுள்ள படம் ‘சிக்மா’. மிகுந்த சிரமத்திற்கும், கடனுக்கும் மத்தியில் தனது குடும்ப சொத்தான பழைய நூலகத்தை நடத்தி வரும் நாயகன் சந்தீப் கிஷன், தனது தாயின் நினைவாக உள்ள அந்த நூலகத்தை பாதுக்காக போராடுவதை மையமாக கொண்டே கதைக்களம் அமைக்கப்பட்டுள்ளது. நூலகராக நடித்துள்ள சந்தீப் கிஷன் கதைக்களத்திற்கு ஏற்ப தனது மிடுக்கான நடிப்பை வெளிப்படுத்தியுள்ளதாக பார்வையாளர்கள் தெரிவித்துள்ளனர். அதேபோல், தமனின் பின்னணி இசை படத்திற்கு மேலும் ஒரு பிளஸ்சாக அமைந்துள்ளது. இதுதவிர, பிற கதாப்பாத்திரங்கள் பெரிதாக எடுபடவில்லை என்று விமர்சகர்கள் தெரிவிக்கின்றனர்.
அசோக் செல்வனின் ’அன்பில் அவன்’
இயக்குனர் கார்த்திகேயன் இயக்கத்தில் அசோக் செல்வன் மற்றும் ப்ரீத்தி முகுந்தன் கூட்டணியில் உருவாகியுள்ள படம் ’அன்பில் அவன்’. பெற்றோர்களின் எதிர்ப்பை மீறி காதல் திருமணம் செய்து கொண்ட அசோக் செல்வன் - ப்ரீத்தி முகுந்தன் ஜோடி, பிரபல நட்சத்திர விடுதிகளில் வேலை செய்கின்றனர். பணக்கார வீட்டுப் பெண்ணான ப்ரீத்தி முகுந்தன் காதலுக்காக தனது குடும்பத்தை உதறிவிட்டு கஷ்டப்படுகிறார். இதனால் கவலைக்குள்ளாகும் aசோக் செல்வன் தன்னுடைய காதலியின் கனவான ஹோம் ஸ்டே எனப்படும் தங்கும் விடுதியை உருவாக்க முயற்சிக்கிறார். அதன் பின் அந்த முயற்சியில் அவர் வெற்றிக் கண்டாரே என்பதே கதை.
வசூலில் முந்தியது யார்?
விஜய்சேதுபதியின் ‘பத்தா’ திரைப்படம் இந்திய அளவில் கடந்த 3 நாட்களில் 8.08 கோடி வசூல் ஈட்டியுள்ள நிலையில், ஜேசன் சஞ்சய் இயக்குனராக அறிமுகமான ’சிக்மா’ திரைப்படம் 3 நாட்களில் 5.60 கோடி வசூல் ஈட்டியுள்ளதாக தகவல் வெளியாகியுள்ளது. மறுபுறம் குறைவான காட்சிகள் மட்டுமே திரையிடப்பட்ட அசோக் செல்வனின் ’அன்பில் அவன்’ திரைப்படம் இந்திய அளவில் 1.90 கோடி ரூபாய் வசூல் ஈட்டியுள்ளதாக கூறப்படுகிறது.