2019ம் ஆண்டு வெளியான 'அவெஞ்சர்ஸ் எண்ட் கேம்' திரைப்படத்தின் வசூலை முறியடித்து இந்தியாவில் வெளியான ஹாலிவுட் படங்களில் அதிகம் வசூலித்த திரைப்படம் என்ற சாதனையை படைத்துள்ளது 'அவதார்: தி வே ஆஃப் வாட்டர்'.
அவதார் 2:
கடந்த 2009-ஆம் ஆண்டு ஜேம்ஸ் கேமரூன் இயக்கத்தில் உலகெங்கும் மாபெரும் வெற்றியை பெற்ற திரைப்படம் 'அவதார்'. அப்படத்தின் 2 மணி நேரம் 40 நிமிடத்தையும் பார்வையாளர்களின் கவனத்தை கொஞ்சம் கூட சிதறவிடாமல் வேறு ஒரு உலகத்திற்கே அழைத்து சென்றது அவதார் திரைப்படம் என்றே சொல்ல வேண்டும். சுமார் ரூ. 1000 கோடி செலவில் எடுக்கப்பட்ட அப்படம் ரூ. 280 கோடி அமெரிக்கன் டாலரை வசூலித்தது என்பது குறிப்பிடத்தக்கது.
அவதார் படத்தின் இரண்டாம் பாகம் 13 ஆண்டுகளுக்கு பிறகு கடந்த ஆண்டு இறுதியில் வெளியானது. உலகளவில் 52 ஆயிரம் திரையரங்குகளில் 160 மொழிகளில் திரையிடப்பட்டது. இந்திய அளவில் இப்படம் தற்போது ரூ. 368.20 கோடி வசூலித்துள்ளது என கூறப்படுகிறது. உலக அளவில் ரூ.7 ஆயிரம் கோடிக்கும் மேல் வசூலித்துள்ளது என கூறப்படுகிறது.
அவெஞ்சர்ஸ் வசூல் முறியடிப்பு:
ஜேம்ஸ் கேமரூன் இயக்கியுள்ள 'அவதார்: தி வே ஆஃப் வாட்டர்' திரைப்படம், அவெஞ்சர்ஸ் எண்ட்கேமின் வாழ்நாள் வசூலை முறியடித்து இந்திய அளவில் அதிகம் வசூலித்துள்ள ஹாலிவுட் திரைப்படம் என்ற அந்தஸ்தை பெற்றுள்ளது. அவெஞ்சர்ஸ் எண்ட்கேம் திரைப்படம் ரூ. 367 கோடி வசூலித்திருந்த நிலையில் 'அவதார்: தி வே ஆஃப் வாட்டர்' திரைப்படம் ரூ. 368.20 கோடி வசூலித்து மிகப்பெரிய சாதனையை நிகழ்த்தியுள்ளது.
மார்வெல் ஸ்டுடியோஸ் நிறுவனத்தின் தயாரிப்பில் 2018ம் ஆண்டு வெளியான இன்பினிட்டி வார் படத்தின் தொடர்ச்சியாக 2019ம் ஆண்டு வெளியான திரைப்படம் அவெஞ்சர்ஸ்: எண்ட்கேம். ஆண்டனி மற்றும் ஜோ ருஸ்ஸோ இயக்கிய இந்தப் படத்தில் ராபர்ட் டவுனி ஜூனியர், கிறிஸ் எவன்ஸ், மார்க் ருஃபாலோ, கிறிஸ் ஹெம்ஸ்வொர்த், ஸ்கார்லெட் ஜோஹன்சன் மற்றும் ஜெர்மி ரென்னர் உள்ளிட்டோர் நடித்திருந்தனர்.