நடிகர் அஜித்குமார் நடித்துள்ள மங்காத்தா படம் ரீ-ரிலீஸ் செய்யப்பட்டு நிலையில் அப்படம் முதல் நாள் வசூல் நிலவரம் பற்றிக் காணலாம்.
மங்காத்தா ரீ-ரிலீஸ்
வெங்கட் பிரபு இயக்கத்தில் நடிகர் அஜித்குமாரின் 50வது படமாக வெளியானது “மங்காத்தா”. இந்த படம் 2011ம் ஆண்டு ரமலான் பண்டிகையை முன்னிட்டு வெளியாகி மிகப்பெரிய அளவில் வெற்றி பெற்றது. இந்த படத்தில் த்ரிஷா ஹீரோயினாக நடித்திருந்தார். யுவன் ஷங்கர் ராஜா இசையமைத்த இப்படத்தில் அர்ஜூன், ஆண்ட்ரியா, அஞ்சலி, வைபவ், சுப்பு பஞ்சு, லட்சுமி ராய், பிரேம்ஜி அமரன், மஹத், அரவிந்த் ஆகாஷ் என பலரும் நடித்திருந்தனர். இந்த படத்தை கிளவுட் நைன் நிறுவனம் தயாரித்த நிலையில் சன் பிக்சர்ஸ் நிறுவனம் வெளியிட்டிருந்தது.
இந்த நிலையில் திடீரென மங்காத்தா படத்தை ரீ-ரிலீஸ் செய்யப்போவதாக சன் பிக்சர்ஸ் நிறுவனம் அறிவித்தது. இதனால் கடந்த 8 மாதங்களாக அஜித் படம் பார்க்காமல் தவித்து வந்த ரசிகர்கள் உற்சாகமானார்கள். ரீ-ரிலீசுக்கான ட்ரெய்லர், புது ப்ரோமோ, போஸ்டர் என அனைத்தும் புதுப்படத்துக்கு நிகராக வெளியானது. இந்த நிலையில் ஜனவரி 23ம் தேதி இப்படம் தமிழ்நாடு முழுவதும் ரீ-ரிலீஸ் செய்யப்பட்டது.
தியேட்டர்கள் ரசிகர்கள் வெள்ளம்
இதனிடையே மங்காத்தா படம் வெளியான தியேட்டர்களில் அஜித் ரசிகர்கள் அதி தீவிர கொண்டாட்டத்தில் ஈடுபட்டனர். மேலும் புதுப்படம் பார்ப்பது போல பாலாபிஷேகம், நலத்திட்ட உதவிகள் என அமர்க்களப்படுத்தினர். மேலும் ஜனவரி 23 முதல் 26ம் தேதி வரையில் பெரும்பாலான காட்சிகளுக்கு டிக்கெட்டுகளும் விற்று தீர்ந்து விட்டது. இந்த நிலையில் ரீ-ரிலீஸில் மங்காத்தா படம் முதல் நாளில் பெற்ற வசூல் பற்றிய தகவல் வெளியாகியுள்ளது.
கில்லி தான் டாப்
மங்காத்தா படம் முதல் நாளில் ஒட்டுமொத்தமாக ரூ.4.1 கோடி வசூலைப் பெற்றுள்ளதாக தெரிவிக்கப்பட்டுள்ளது. தமிழ்நாட்டில் மட்டும் ரூ.3.75 கோடி வசூல் செய்துள்ளதாக கூறப்பட்டுள்ளது. இதன்மூலம் தமிழ்நாட்டில் ரீ-ரிலீஸில் அதிக வசூல் செய்த கில்லி படத்தின் சாதனையை மங்காத்தா முறியடித்துள்ளது. கில்லி படம் முதல் சுமார் ரூ.4 கோடி வரை வசூல் செய்தது.
இதில் பல சுவாரஸ்ய விஷயங்கள் உள்ளது. அதாவது கில்லி படத்தை விட மங்காத்தாவுக்கு தமிழ்நாட்டில் குறைந்த காட்சிகள் ஒதுக்கப்பட்டிருக்கிறது. அதேபோல மங்காத்தா படத்தின் டிக்கெட்டுகள் வழக்கமான கட்டணத்தில் விற்கப்படும் நிலையில் கில்லி படம் மிக குறைவான கட்டணத்தில் டிக்கெட்டுகள் விற்பனை செய்யப்பட்டது.
எனினும் மங்காத்தாவை விட முதல் நாளுக்கான ரசிகர்களின் எண்ணிக்கையில் கில்லி தான் முதலிடத்தில் உள்ளது. கில்லி படம் கேரளா, கர்நாடகா, ஆந்திரா போன்ற தென்னிந்தியாவில் சிறப்பான வரவேற்பை பெற்றது. இருந்தாலும் கில்லி படம் தான் தமிழ்நாட்டில் அதிக வசூல் செய்த ரீ-ரிலீஸ் படம் என்ற சிறப்பை இன்றளவும் தன்னகத்தே கொண்டுள்ளது. அப்படம் ரூ.20 கோடிக்கும் மேல் வசூலித்துள்ளது. அதனை மங்காத்தா முறியடிக்குமா என்ற எதிர்பார்ப்பு எழுந்துள்ளது.