தமிழ் திரையுலகில் சாதாரண நகைச்சுவை நடிகராக தனது திரை வாழ்க்கையைத் தொடங்கி பின்னர் தனது நடிப்பால் கதாநாயகனாக உயர்ந்திருப்பவர் சூரி. விடுதலை படம் மூலமாக கதாநாயகனாக அறிமுகமாகிய இவர் அடுத்தடுத்து கொட்டுக்காளி, கருடன், மாமன் ஆகிய படங்கள் மூலமாக கவனம் ஈர்த்தார். கடைசியாக இவர் நடிப்பில் வெளியான மண்டாடி படம் ரூபாய் 100 கோடி வசூலைத் தொட்டது.
சூரியின் புதிய படம்:
தற்போது தமிழ் சினிமாவின் முக்கியமான கதாநாயகனாக உருவெடுத்துள்ள சூரி கதாநாயகனாக நடிக்கும் புதிய திரைப்படத்தின் பூஜை இன்று நடந்தது. அவர் கதாநாயகனாக நடிக்கும் இந்த புதிய படத்தை ரவிக்குமார் இயக்குகிறார். அவர் நேற்று இன்று நாளை, அயலான் படங்களை இயக்கியவர்.
இந்த படத்தில் சூரிக்கு ஜோடியாக ரஜிஷா விஜயன் நடிக்கிறார். இந்த படம் தமிழ் மற்றும் தெலுங்கு ஆகிய இரு மொழிகளிலும் தயாராகிறது. ரவிக்குமார் இதற்கு முன்பு இயக்கிய இரு படங்களும் கால இயந்திரம் எனப்படும் டைம் மெஷின், ஏலியன் எனப்படும் வேற்று கிரக வாசி சார்ந்த கதையாகும்.
நகரத்து பின்னணி:
சூரி இதுவரை கிராமத்து சாயல் கொண்ட படங்களிலே நாயகனாக நடித்து வரும் நிலையில், இந்த படத்தில் அவர் ஒரு நகரத்து நாயகனாக புதிய அவதாரம் எடுப்பார் என்று கருதப்படுகிறது. மேலும், இந்த படமும் ரவிக்குமாரின் முந்தைய படங்கள் போல வித்தியாசமான திரைக்கதை கொண்ட படமாக இருக்குமா? என்ற கேள்வி ரசிகர்கள் மத்தியில் எழுந்துள்ளது. படத்தின் மற்ற தொழில்நுட்ப கலைஞர்கள், நடிகர்கள் பற்றிய தகவல்கள் வெளியாகவில்லை.
இந்த படத்தை தெலுங்கு திரையுலகின் பிரபல தயாரிப்பு நிறுவனம் மைத்ரி மூவி மேக்கர்ஸ் நிறுவனம் தயாரிக்கிறது. இந்த படத்தஜ் பூஜையில் சிவகார்த்திகேயன், வெற்றிமாறன் பங்கேற்று படக்குழுவை வாழ்த்தினர். சிவகார்த்திகேயன் கிளாப் அடித்து படப்பிடிப்பைத் தொடங்கி வைத்தார்.
சூரியின் மார்க்கெட்:
சூரி கதாநாயகனாக நடிக்கும் 7வது திரைப்படம் இதுவாகும். கார்த்தி நடிப்பில் வெளியான சர்தார் 2 படத்தைக் காட்டிலும் சூரியின் மண்டாடி படம் மிகப்பெரிய வெற்றி பெற்றதால் அவரது செல்வாக்கு தமிழ் சினிமா உலகில் உயர்ந்துள்ளது. அடுத்தடுத்து அவருக்கு கதாநாயகனாக நடிக்க பட வாய்ப்புகள் குவிந்து வருகிறது.