நல்ல கதை அமைந்தால் நிச்சயம் தனது சகோதரர் சூரியாவுடன் இணைந்து நடிக்க திட்டமிருப்பதாக நடிகர் கார்த்தி தெரிவித்துள்ளார்.
கார்த்தி சூர்யா
நடிகர் சிவக்குமாரின் மகன்களான சூர்யா மற்றும் கார்த்தி தமிழ் சினிமாவின் முன்னணி நடிகர்களாக இருந்து வருகிறார்கள். இருவரும் தங்களுக்கு ஏற்ற வகையிலான கதைகளைத் தேர்வு செய்து தங்களுக்கென தனித்துவமான ஒரு அடையாளத்தை உருவாக்கி இருக்கிறார்கள். கார்த்தி சமீபத்தில் நடித்த பொன்னியின் செல்வன் மற்றும் சூரியா நடித்த ஜெய் பீம் மற்றும் எதற்கும் துணிந்தவன் ஆகிய படங்கள் ரசிகர்களிடையே நல்ல வரவேற்பைப் பெற்ற நிலையில் மேலும் பல்வேறு இயக்குநர்களுடன் கூட்டணி அமைக்க இருக்கிறார்கள்.
ஒரே வீட்டைச் சேர்ந்த இரு நடிகர்கள் ஒரு படத்தில் கூட இதுவரை இணைந்து நடித்தது இல்லை என்கிற ஆதங்கம் இரு நடிகர்களின் ரசிகர்களிடமும் இருக்கிறது . தற்போது கார்த்தி தெரிவித்திருக்கும் தகவல்படி சூர்யா கார்த்தி ஆகிய இருவரையும் ஒரே திரையில் பார்க்கும் நாள் வெகு தொலைவில் இல்லை என்பதையே உறுதிப்படுத்துகிறது.
நாங்கள் சேர்ந்து நடிப்போம்
சமீபத்தில் வெரைட்டி என்கிற ஆங்கிலப் பத்திரகைக்கு பேட்டி அளித்த நடிகர் கார்த்தி ரசிகர்களின் நீண்ட நாள் கேள்விக்கு பதில் அளித்தார். “ நானும் சூர்யாவும் இணைந்து நடிப்பதை ரசிகர்கள் அனைவரும் எதிர்பார்த்து காத்திருக்கிறார்கள். என் அப்பா மீண்டும் நடிக்கப் போவதில்லை என்கிற தெளிவோடு இருக்கிறார். ஆனால் நானும் சூர்யாவும் சேர்ந்து நடிக்க ஒரு நல்ல கதைக்காக காத்திருக்கிறோம் சினிமாவில் சகோதரர்கள் இணைந்து நடிப்பது மிக அரிதானது . அதனால் நானும் சூர்யாவும் இணைந்து ஒர் நல்ல படத்தில் நடிக்க வேண்டும் என்று ஆர்வமாக இருக்கிறோம். சூர்யாவுடன் சேர்ந்து நடிக்க எனக்கு முதலில் பயம் இருந்தது. ஆனால் இப்போது அந்த பயம் எல்லாம் எனக்கில்லை. நிச்சயம் ஒரு நல்ல கதை அமையும் தருணத்தில் நாங்கள் இணைந்து நடிப்போம்.” என்று கார்த்தி தெரிவித்துள்ளார்.
ஜப்பான்
தற்போது ராஜு முருகன் இயக்கத்தில் கார்த்தி நடித்துள்ள திரைப்படம் ஜப்பான். அனு இமானுவேல் கதாநாயகியாக நடிக்க ஜி.வி பிரகாஷ் குமார் இந்தப் படத்திற்கு இசையமைத்துள்ளார் . இந்த ஆண்டு திபாவளி வெளியீடாக ஜப்பான் படம் திரையரங்குகளில் வெளியாக இருக்கிறது. சமீபத்தில் இந்தப் படத்திற்கான டப்பிங் வீடியோவை தனது ட்விட்டர் பக்கத்தில் வெளியிட்டார் கார்த்தி.
கங்குவா
சிறுத்தை சிவா இயக்கத்தில் உருவாகும் கங்குவா படத்தில் சூரியா நடித்து வருகிறார். திஷா பதானி கதாநாயகியாக நடிக்க தேவி ஸ்ரீ பிரசாத் இசையமைக்கிறார். ஸ்டுடியோ கிரீன் நிறுவனம் இந்தப் படத்தை தயாரித்துள்ளது. இதனைத் தொடர்ந்து சுதா கொங்கரா இயக்கும் சூர்யா 43 எதிர்பார்ப்பை கிளப்பியுள்ளது. துல்கர் சல்மான் , நஸ்ரியா நஸிம், விஜய் வர்மா உள்ளிட்ட நடிகர்கள் இந்தப் படத்தில் நடிக்க இருப்பதாக கூறப்படுகிறது.