தனது மூத்த மகள் ஐஸ்வர்யாவின் திருமணத்திற்கு பின் அர்ஜூன் தனது இளைய மகள் அஞ்சனாவின் திருமணத்தை திட்டமிட்டு வருகிறார். அமெரிக்க நாட்டைச் சேர்ந்த நபரை அர்ஜூனின் இரண்டாவது மகள் அஞ்சனா திருமணம் செய்துகொள்ள இருக்கிறார். வரும் அக்டோபர் மாதம் தனது இரண்டாவது மகள் திருமணம் நடைபெற இருப்பதாக சமீபத்திய பேட்டி ஒன்றில் அர்ஜூன் தெரிவித்துள்ளார்
அர்ஜூன் , அபிராமி மற்றும் ப்ரீத்தி முகுந்தன் இணைந்து நடித்துள்ள ப்ளாஸ்ட் திரைப்படம் திரையரங்கில் வெற்றிகரமாக ஓடிக்கொண்டிருக்கிறது. ஆக்ஷன் கிங் என ரசிகர்ளால் கொண்டாடப்பட்ட அர்ஜூன் தனது பெயருக்கு ஏற்ற மாதிரியான ஒரு முழு ஆக்ஷன் ரோலில் இப்படத்தில் நடித்துள்ளார். தனிப்பட்ட வாழ்க்கையைப் பொறுத்தவரை அர்ஜூனின் மூத்த மகள் ஐஸ்வர்யாவுக்கும் நகைச்சுவை நடிகர் தம்பி ராமையாவின் மகல் உமாபதி ராமையாவுக்கும் சில ஆண்டுகள் முன் திருமணம் நடைபெற்றது . மூத்த மகளைத் தொடர்ந்து தனது இளைய மகளின் திருமணம் வரும் அக்டோபர் மாதம் நடைபெற இருப்பதாக நடிகர் அர்ஜூன் பேட்டி ஒன்றில் பகிர்ந்துகொண்டுள்ளார்.
அர்ஜூன் இளைய மகள் திருமணம்
அர்ஜூனின் இளைய மகளான அஞ்சனா சினிமாவில் இருந்து விலகியே இருந்து வருகிறார். இவர் சிறு வயதில் இருந்தே வெளிநாட்டில் படித்தும் அங்கு வசித்தும் வருகிறார். தன்னுடன் படித்த இசையா என்கிற அமெரிக்கரை கடந்த 13 ஆண்டுகளாக அஞ்சனா காதலித்து வருகிறார். தற்போது அஞ்சனா சொந்தமாக ஹேண்ட் பேக் தயாரிக்கும் நிறுவனம் ஒன்றை நடத்தி வருகிறார். வழக்கம் போல விலங்குகளில் தோலில் இருந்து இல்லாமல் பழங்களால் தயாரிக்கப்படும் லெதரால் இந்த ஹேண்ட் பேக்குகள் செய்யப்படுவதே இதன் சிறப்பு. அஞ்சனா மற்றூம் இசையாவுக்கு கடந்த ஆண்டு தங்களது குடும்பத்தினர் மத்தியில் இத்தாலியில் பிரம்மாண்டமாக திருமணம் நிச்சயிக்கப்பட்டது. இதனைத் தொடர்ந்து வரும் அக்டோபர் மாதம் இருவருக்கும் திருமணம் நடைபெற உள்ளதாக அர்ஜூன் தெரிவித்துள்ளார்.
தனது மகள் திருமணம் குறித்து அர்ஜூன் கூறுகையில் " பெற்றோர்கள் என்பவர்கள் தங்கள் குழந்தைகளுக்கு ஒரு கல் மாதிரி அவர்கள் பின்னால் இருந்து ஆதரவு கொடுக்க வேண்டும் என்பதை என்னுடைய அப்பாவிடம் இருந்து நான் கற்றுக்கொண்டேன். என் மகள் தான் ஒருவரை காதலிப்பதாக சொன்னதும் கொஞ்சம் யோசனையாக இருந்தாலும் அவரது முடிவிற்கு நான் சம்மதித்தேன். ' என்று கூறியுள்ளார்