அர்ஜுன் :
தமிழ் சினிமாவில் ஆக்ஷன் கிங் என்னும் அடைமொழியுடன் வலம் வருபவர் நடிகர் அர்ஜூன். உலகமே ப்ரூஸ்லியை பார்த்து வியந்து கொண்டிருந்த சமயத்தில் அச்சு அசல் அவரை போன்ற தோற்றத்தில் தமிழ் சினிமாவில் அறிமுகமானவர் அர்ஜுன். காராத்தே தற்காப்பு கலையில் பிளாக் பெல்ட் பெற்றவர். அதோடு குத்துச்சண்டை உள்ளிட்ட பல கலைகளையும் கற்றவர். இவரது தந்தை ஜே. சி. ராமசாமி (எ) சக்தி பிரசாத் ஒரு முன்னாள் புகழ் பெற்ற கன்னடத் திரைப்பட நடிகர் ஆவார். தமிழ் மட்டுமல்லாது கன்னடம் , தெலுங்கு , மலையாளம் உள்ளிட்ட பல மொழி திரைப்படங்களிலும் அர்ஜூன் நடித்துள்ளார்.
சிவாஜி சார்தான் பிடிக்கும் :
நடிகர் அர்ஜுனுக்கு நடிகர் திலகம் சிவாஜி கணேசன் என்றா மிகவும் பிடிக்கும். அவருடன் இரண்டு படங்களில் நடித்திருக்கிறார். ஒருமுறை சிவாஜி கணேசனுடன் அமர்ந்து அடுத்த ஷெடியூலிற்காக காத்திருந்தாராம் அர்ஜூன். அப்போது நடிகர் திலகத்துடன் புகைப்படம் எடுக்க நிறைய பேர் வந்திருந்தார்களாம் அவர்களிடம் அர்ஜூனை அறிமுகம் செய்து வைத்தாராம் சிவாஜி. “ இவரு யாருனு தெரியுதா ?” என வந்தவர்களிடம் கேட்க, அவர்கள் திரு திரு என முழித்தார்களாம். உடனே சிவாஜி “இவர ஆக்ஷன் கிங்குனு சொல்லுறானுவ..மரத்துக்கு மரம் தாவிட்டு இருக்கான்..ஹ்ம்ம் பய கொஞ்சம் நடிக்கிறான்” என்றாராம். அது தனக்கு வாழ்நாளில் கிடைத்த மிகப்பெரிய அங்கீகாரம் என்கிறார் நடிகர் அர்ஜுன். தனக்கு பிடித்த நடிகை என்றால் அது சாவித்ரி அம்மாதான். எனது ரியல் லைஃபில் அப்பாதான் எப்போதுமே எனக்கு ஹீரோ என்றார் அர்ஜூன்.