காரைக்காலின் பாரம்பரியத்தை பறைசாற்றும் 'மாதிரி வாக்குச்சாவடி': சட்டமன்றத் தேர்தலைத் திருவிழாவாக மாற்றிய தேர்தல் அதிகாரிகள்..!

சட்டமன்றத் தேர்தலில் 100% வாக்குப்பதிவை வலியுறுத்தி, வாக்குச்சாவடியில் பாரம்பரியத்தை பறைசாற்றும் விதத்தில் அமைக்கப்பட்ட வித்யாசமான மாதிரி வாக்குச்சாவடி வாக்காளர்களை வெகுவாக கவர்ந்ததுள்ளது.

மாதிரி வாக்குச்சாவடி

Source : ABP

காரைக்கால்: காரைக்கால் சட்டமன்றத் தேர்தலில் 100% வாக்குப்பதிவை வலியுறுத்தி, வாக்குச்சாவடியில் தென்னை ஓலைகள், மீன்குட்டை மற்றும் பாரம்பரியக் கருவிகளுடன் அமைக்கப்பட்ட வித்யாசமான மாதிரி வாக்குச்சாவடி வாக்காளர்களை வெகுவாக கவர்ந்ததுள்ளது.

புதுச்சேரி மாநிலம் காரைக்கால் மாவட்டத்தில் உள்ள ஐந்து சட்டமன்றத் தொகுதிகளுக்கான தேர்தல் வாக்குப்பதிவு இன்று காலை 7 மணி முதலே மிகவும் விறுவிறுப்பாகத் தொடங்கி நடைபெற்று வருகிறது. ஜனநாயகக் கடமையை ஆற்ற வாக்காளர்கள் அதிகாலையிலேயே நீண்ட வரிசையில் காத்திருந்து தங்கள் வாக்குகளைப் பதிவு செய்து வருகின்றனர்.

இந்தத் தேர்தலில் 100 சதவீத வாக்குப்பதிவை வலியுறுத்தியும், வாக்காளர்களைக் கவரும் வகையிலும் மாவட்ட நிர்வாகம் மேற்கொண்டுள்ள ஒரு வினோதமான மற்றும் கலைநயமிக்க முயற்சி பொதுமக்களிடையே பெரும் வரவேற்பைப் பெற்றுள்ளது. குறிப்பாக, காரைக்காலின் மண்ணின் பாரம்பரியத்தையும், வாழ்வியலையும் பிரதிபலிக்கும் வகையில் அமைக்கப்பட்டுள்ள 'மாதிரி வாக்குச்சாவடி' அனைவரது கவனத்தையும் ஈர்த்துள்ளது.

பாரம்பரிய வாழ்வியலை கண்முன் நிறுத்திய அலங்காரம்

காரைக்கால் தந்தை பெரியார் அரசு உயர்நிலைப் பள்ளியில் அமைக்கப்பட்டுள்ள வாக்குச்சாவடிதான் இந்த மாற்றத்திற்குச் சாட்சியாகத் திகழ்கிறது. இந்த வாக்குச்சாவடியின் நுழைவாயில், பிளாஸ்டிக் தோரணங்களுக்குப் பதிலாகத் தென்னை ஓலைகளைக் கொண்டு பின்னப்பட்ட அலங்கார ஆர்ச் மற்றும் இயற்கை மலர்களால் மிகவும் ரம்மியமாக அலங்கரிக்கப்பட்டுள்ளது.

வாக்குச்சாவடி வளாகத்திற்குள் நுழைந்தால், அது ஒரு தேர்தல் நடக்கும் இடம் என்பதைத் தாண்டி, காரைக்காலின் கலை மற்றும் கலாச்சாரக் கண்காட்சி போலக் காட்சியளிக்கிறது.

மீன்பிடித் தொழிலை மையமாகக் கொண்ட மீன்குட்டை மற்றும் அதன் நடுவே மிதக்கும் படகு. மீன் வியாபாரிகளின் தத்ரூபமான சிலைகள் மற்றும் வேளாண்மைக்குத் தேவையான பாரம்பரியக் கருவிகள், மறைந்து வரும் பாரம்பரிய நெல் ரகங்களின் மாதிரிகள் மற்றும் பழங்கால இசைக்கருவிகள்.

இவை அனைத்தும் காரைக்காலின் பூர்வகுடி மக்களின் வாழ்வியலை இன்றைய தலைமுறைக்கு நினைவூட்டும் வகையில் அமைக்கப்பட்டுள்ளன. இந்தத் தனித்துவமான ஏற்பாடுகளை மாவட்ட ஆட்சியர் இஷிதா ராட்டி நேரில் பார்வையிட்டு இந்த அரங்கை தொடங்கி வைத்தார்.

தேர்தல் புள்ளிவிவரங்கள்: ஒரு பார்வை

காரைக்கால் மாவட்டத்தில் உள்ள 5 சட்டமன்றத் தொகுதிகளிலும் சேர்த்து மொத்தம் 1,56,250 வாக்காளர்கள் உள்ளனர். இவர்கள் எவ்வித இடையூறுமின்றி வாக்களிக்க ஏதுவாக மாவட்டம் முழுவதும் 181 வாக்கு மையங்கள் அமைக்கப்பட்டுள்ளன. வாக்குப்பதிவிற்காக மொத்தம் 775 வாக்குப்பதிவு இயந்திரங்கள் பயன்படுத்தப்படுகின்றன.

பெண் வாக்காளர்களைக் கவரும் விதமாகவும், 100% பெண் வாக்குப்பதிவை ஊக்குவிக்கவும், முழுமையாகப் பெண்களாலேயே நிர்வகிக்கப்படும் 5 பிங்க் (இளஞ்சிவப்பு) வாக்கு மையங்கள் அமைக்கப்பட்டுள்ளன.

பாதுகாப்பு மற்றும் கண்காணிப்பு ஏற்பாடுகள்

தேர்தல் அமைதியாகவும், நேர்மையாகவும் நடைபெறுவதை உறுதி செய்ய மாவட்ட நிர்வாகம் பல்வேறு பாதுகாப்பு நடவடிக்கைகளை மேற்கொண்டுள்ளது. மாவட்டத்தில் அடையாளம் காணப்பட்டுள்ள 36 பதட்டமான வாக்கு மையங்கள், சிசிடிவி மற்றும் நுண் பார்வையாளர்கள் மூலம் தீவிர கண்காணிப்பு வளையத்திற்குள் கொண்டு வரப்பட்டுள்ளன. தேர்தல் விதிமுறை மீறல்களைத் தடுக்கவும், பணப்புழக்கத்தைக் கண்காணிக்கவும் 5 பறக்கும் படைகள் மற்றும் 10 கண்காணிப்புக் குழுக்கள் பணியில் ஈடுபட்டுள்ளன.

வாக்குப்பதிவு மையங்களில் குடிநீர், நிழற்குடை மற்றும் மாற்றுத்திறனாளிகளுக்கான சக்கர நாற்காலி வசதிகள் உள்ளிட்ட அடிப்படைத் தேவைகளும் சிறப்பாகச் செய்யப்பட்டுள்ளன.

காரைக்காலின் பாரம்பரியத்தைச் சிறப்பிக்கும் வகையில் அமைக்கப்பட்டுள்ள இந்த மாதிரி வாக்குச்சாவடி, வாக்களிப்பதன் முக்கியத்துவத்தை உணர்த்துவதோடு, ஒரு சமூகத் திருவிழாவிற்கான உணர்வையும் மக்களிடையே ஏற்படுத்தியுள்ளது.