நாடு முழுவதும் உள்ள மருத்துவக் கல்லூரிகளில் எம்.பி.பி.எஸ், பி.டி.எஸ் உள்ளிட்ட இளநிலை படிப்புகளில் சேருவதற்கான நீட் (NEET UG 2026) நுழைவுத் தேர்வு விரைவில் நடைபெற உள்ளது. இதற்கான ஹால் டிக்கெட் எனப்படும் அட்மிட் கார்டை தேசியத் தேர்வுகள் முகமை விரைவில் தனது அதிகாரப்பூர்வ இணையதளத்தில் வெளியிட உள்ளது.
மருத்துவர் ஆக வேண்டும் என்ற கனவோடு காத்திருக்கும் லட்சக்கணக்கான மாணவர்கள் இந்தத் தேர்வுக்காகத் தீவிரமாகத் தயாராகி வருகின்றனர். தேர்வு மையத்திற்குள் நுழைய ஹால் டிக்கெட் கட்டாயம் என்பதால், வெளியீட்டுத் தேதியைத் தேர்வர்கள் ஆவலுடன் எதிர்பார்த்துக் காத்திருக்கின்றனர். என்டிஏவின் அதிகாரப்பூர்வ இணையதளமான exams.nta.ac.in/NEET என்ற தளத்தில் மாணவர்கள் தங்கள் விண்ணப்ப எண் மற்றும் பிறந்த தேதியை உள்ளிட்டு ஹால் டிக்கெட்டைப் பதிவிறக்கம் செய்துகொள்ளலாம்.
இந்த ஆண்டு மே 3ஆம் தேதி மதியம் 2 முதல் 5 மணி வரை நீட் தேர்வு நடைபெற உள்ளது.
ஹால்டிக்கெட்டில்இருக்கும்முக்கியவிவரங்கள்
ஹால் டிக்கெட்டைப் பதிவிறக்கம் செய்தவுடன், அதில் உள்ள விவரங்கள் சரியாக இருக்கிறதா என்பதை மாணவர்கள் தவறாமல் சரிபார்க்க வேண்டும். அதில் கீழ்க்காணும் முக்கியத் தகவல்கள் இடம்பெற்றிருக்கும்:
- மாணவரின் முழுப் பெயர், பாஸ்போர்ட் அளவு புகைப்படம் மற்றும் கையொப்பம்.
- தேர்வுப் பதிவு எண் (Roll Number) மற்றும் விண்ணப்ப எண்.
- ஒதுக்கப்பட்டுள்ள தேர்வு மையத்தின் பெயர் மற்றும் முழுமையான முகவரி.
- தேர்வு நடைபெறும் நாள் மற்றும் நேரம்.
- தேர்வு மையத்திற்குள் எந்த நேரத்திற்குள் செல்ல வேண்டும் மற்றும் கேட் மூடப்படும் நேரத்தின் விவரங்கள்
- தேர்வுக்கான வழிகாட்டுதல்கள் மற்றும் கட்டுப்பாடுகள்.
மாணவர்கள் என்ன செய்ய வேண்டும்?
ஹால் டிக்கெட்டில் மாணவரின் பெயரிலோ, பிறந்த தேதியிலோ அல்லது வேறு எந்த விவரங்களிலோ பிழைகள் இருந்தால், தாமதிக்காமல் உடனடியாக தேசிய தேர்வு முகமையின் உதவி எண்ணைத் தொடர்புகொண்டு திருத்திக்கொள்ள வேண்டும்.
மேலும், தேர்வு நாளின் கடைசி நேரப் பதற்றத்தைத் தவிர்க்க, முன்கூட்டியே ஹால் டிக்கெட்டை இரண்டு அல்லது மூன்று பிரதிகள் எடுத்து வைத்துக்கொள்வது பாதுகாப்பானது. முடிந்தவரை கலர் பிரிண்ட் எடுத்துக்கொள்ளலாம்.
ஹால் டிக்கெட்டில் தெளிவாகக் குறிப்பிடப்பட்டுள்ள ஆடைக் கட்டுப்பாடு மற்றும் தேர்வறை விதிமுறைகளை மாணவர்கள் தவறாமல் பின்பற்ற வேண்டும் எனவும் அறிவுறுத்தப்பட்டுள்ளது.