TNTET Exam: தோல்வி அடைந்த ஆசிரியர்களுக்கு மீண்டும் வாய்ப்பு.. டிஆர்பி முக்கிய அறிவிப்பு!

School Student: பள்ளி மாணவர்களுக்கு ரூ.1,25,000 வரை உதவித்தொகை: யாருக்கெல்லாம் கிடைக்கும்? விண்ணப்பிப்பது எப்படி?

வினோத்குமார் — Sun, 1 Nov 2026 15:14:57 +0530

கல்விக்கு முக்கியத்துவம் கொடுக்கும் வகையில் மத்திய, மாநில அரசுகள் பள்ளி மாணவர்களுக்கு பல்வேறு உதவித்தொகைகளை வழங்கி வருகிறது. இது மாணவர்களின் உயர்கல்விக்கு வழிவகுக்கிறது. இந்நிலையில் பள்ளி மாணவர்கள் உயர்கல்வி படிப்பதை ஊக்கப்படுத்தும் விதமாக பொருளாதாரத்தில் பின்தங்கிய மாணவர்கள் மத்திய அரசு கல்வித்தொகை தொடர்பாக முக்கிய அறிவிப்பு வெளியாகியுள்ளது. எப்படி விண்ணப்பிப்பது, அதற்கான தகுதிகள் என்னென்ன என்று விரிவாக பார்க்கலாம்.

யாரெல்லாம் விண்ணப்பிக்கலாம்?

இதுதொடர்பாக நெல்லை மாவட்ட ஆட்சியர் ஆனந்த் மோகன் வெளியிட்டுள்ள செய்தி குறிப்பில்: மத்திய அரசால் இதர பிற்படுத்தப்பட்டோர், பொருளாதாரத்தில் பின்தங்கியவர்கள், சீர்மரபினர் மாணவ-மாணவிகளுக்கு கல்வி உதவித்தொகை வழங்கும் வகையில் பிரதம மந்திரியின் கல்வி உதவித்தொகை திட்டம் செயல்படுத்தப்பட்டு வருகிறது. 2026-27-ம் ஆண்டிற்கு தேசிய கல்வி உதவித்தொகை இணையதளத்தில் அறிவிக்கப்பட்டுள்ள சிறந்த செயல்பாடு கல்வி நிறுவனம் பள்ளிகளில் நடப்பாண்டில் 9-ம் வகுப்பு முதல் 12-ம் வகுப்பு வரை பயிலும் தமிழகத்தைச் சேர்ந்த தகுதியான மாணவ- மாணவிகள் கல்வி உதவித்தொகை திட்டத்தில் தேசிய கல்வி உதவித்தொகை இணையதளத்தில் (https://scholarships.gov.in) விண்ணப்பிக்கலாம்.

இதையும் படிங்க: Dearness Allowance: குஷியில் துள்ளிக்குதிக்கும் அரசு ஊழியர்கள், ஆசிரியர்கள்! அகவிலைப்படி உயர்வு! எவ்வளவு தெரியுமா?

ரூ.75,000 முதல் ரூ.1,25,000 வரை உதவித்தொகை

இந்த திட்டத்தில் கல்விக் கட்டணம் மற்றும் விடுதிக் கட்டணமாக ஆண்டுக்கு அதிகபட்சமாக 9, 10-ம் வகுப்பு படிப்பவருக்கு ரூ.75,000, மற்றும் 11, 12-ம் வகுப்பு படிப்பவருக்கு ரூ.1,25,000 வரை உதவித்தொகையாக மத்திய அரசால் வழங்கப்படும். 30 சதவீதம் மாணவிகளுக்கு இத்திட்டத்தில் ஒதுக்கீடு செய்யப்பட்டுள்ளது. மாணவ, மாணவிகள் விண்ணப்பிக்க கடைசி நாள் வருகிற 30-ம் தேதி ஆகும். கல்வி நிறுவனங்கள் விண்ணப்பத்தினை சரிபார்க்க கடைசி நாள் டிசம்பர் 15ம் தேதியாகும்.

இதையும் படிங்க: Guru - Ketu Conjunction: தீபாவளி திருநாளில் குரு-கேது சேர்க்கை.. கோடீஸ்வர யோகம் பெறப்போகும் 4 அதிர்ஷ்ட ராசிகள் எவை?

என்னென்ன தகுதிகள்?

மாணவ-மாணவிகள் இதர பிற்படுத்தப்பட்ட வகுப்பினர், பொருளாதாரத்தில் பின்தங்கிய வகுப்பினர் அல்லது சீர்மரபினர் பிரிவைச் சேர்ந்தவராக இருத்தல் வேண்டும். குடும்பத்தின் மொத்த ஆண்டு வருமானம் ரூ.2.50 லட்சத்திற்கு மிகாமல் இருக்க வேண்டும். 2025-26-ம் கல்வியாண்டில் 100 சதவீதம் தேர்ச்சி பெற்று தேசிய கல்வி உதவித்தொகை இணையதளத்தில் மத்திய அரசால் வெளியிடப்பட்டுள்ள பட்டியலில் இடம் பெற்றுள்ள பள்ளிகளில் பயில்பவராக இருத்தல் வேண்டும் என கூறப்பட்டுள்ளது.

புதுச்சேரி அரசு மருத்துவக் கல்லூரியில் MBBS இடங்கள் 200 ஆக உயர்வு! மாணவர்களுக்கு முதல்வர் ரங்கசாமி குட் நியூஸ்!

சிவரஞ்சித் — Sat, 31 Oct 2026 08:23:08 +0530

புதுச்சேரி: புதுச்சேரி மாநிலத்தில் மருத்துவம் படிக்க விரும்பும் மாணவர்களுக்கு மகிழ்ச்சியளிக்கும் முக்கிய அறிவிப்பை முதலமைச்சர் என். ரங்கசாமி வெளியிட்டுள்ளார். புதுச்சேரி கதிர்காமத்தில் இயங்கி வரும் இந்திரா காந்தி அரசு மருத்துவக் கல்லூரி மற்றும் ஆராய்ச்சி நிறுவனத்தில் (IGMC&RI) தற்போது 180 ஆக உள்ள எம்பிபிஎஸ் (MBBS) இடங்களின் எண்ணிக்கை 200 ஆக உயர்த்தப்பட உள்ளது. இதன் மூலம் கூடுதலாக 20 மருத்துவப் படிப்பு இடங்கள் கிடைக்க உள்ளன. இந்தப் புதிய இடங்களுக்கான மாணவர் சேர்க்கை அடுத்த கல்வியாண்டு முதல் அமலுக்கு வரும் என்றும் முதல்வர் தெரிவித்துள்ளார்.

புதுச்சேரி மாணவர்களின் நீண்ட நாள் கோரிக்கை!

புதுச்சேரி மாநிலத்தில் மருத்துவக் கல்வி பயில விரும்பும் மாணவர்களின் எண்ணிக்கை ஆண்டுதோறும் அதிகரித்து வருகிறது. குறிப்பாக அரசு மருத்துவக் கல்லூரிகளில் குறைந்த கட்டணத்தில் மருத்துவம் படிக்க வேண்டும் என்பது ஏழை மற்றும் நடுத்தரக் குடும்பங்களைச் சேர்ந்த மாணவர்களின் முக்கிய எதிர்பார்ப்பாக இருந்து வருகிறது.

இந்த நிலையில், புதுச்சேரி கதிர்காமத்தில் செயல்பட்டு வரும் இந்திரா காந்தி அரசு மருத்துவக் கல்லூரி மற்றும் ஆராய்ச்சி நிறுவனத்தில் எம்பிபிஎஸ் இடங்களின் எண்ணிக்கையை அதிகரிக்க வேண்டும் என்று மாணவர்கள், பெற்றோர்கள் மற்றும் பல்வேறு தரப்பினர் நீண்ட காலமாகக் கோரிக்கை விடுத்து வந்தனர்.

தற்போது இக்கல்லூரியில் ஆண்டுக்கு 180 மாணவர்கள் எம்பிபிஎஸ் மருத்துவப் படிப்பில் சேர்ந்து வருகின்றனர். இந்த எண்ணிக்கையை 200 ஆக உயர்த்த வேண்டும் என்ற கோரிக்கை இருந்து வந்த நிலையில், முதல்வர் ரங்கசாமி தற்போது அதற்கான அறிவிப்பை வெளியிட்டுள்ளார்.

180 இடங்களில் இருந்து 200 ஆக உயர்வு!

புதுச்சேரி முதலமைச்சர் என். ரங்கசாமி செய்தியாளர்களைச் சந்தித்தபோது, அரசு மருத்துவக் கல்லூரியின் எம்பிபிஎஸ் இடங்கள் அதிகரிக்கப்படுவது தொடர்பான முக்கிய அறிவிப்பை வெளியிட்டார்.

அதன்படி, தற்போது 180 இடங்களைக் கொண்டுள்ள இந்திரா காந்தி அரசு மருத்துவக் கல்லூரியில் கூடுதலாக 20 இடங்கள் அதிகரிக்கப்பட்டு, மொத்த இடங்களின் எண்ணிக்கை 200 ஆக உயர்த்தப்பட உள்ளது.

இந்தக் கூடுதல் இடங்களுக்கான மாணவர் சேர்க்கை அடுத்த கல்வியாண்டு முதல் நடைமுறைக்கு வரும் என்றும் அவர் தெரிவித்துள்ளார்.
MBBS இடங்கள் – புதிய அறிவிப்பு

தற்போதைய இடங்கள் : 180
புதிய மொத்த இடங்கள் : 200
கூடுதலாக அதிகரிப்பு : 20
சேர்க்கை தொடங்கும் காலம் - அடுத்த கல்வியாண்டு

ஏழை, எளிய மாணவர்களுக்கு கூடுதல் வாய்ப்பு!

அரசு மருத்துவக் கல்லூரியில் மருத்துவப் படிப்பு இடங்கள் அதிகரிக்கப்படுவது ஏழை மற்றும் நடுத்தரக் குடும்பங்களைச் சேர்ந்த மாணவர்களுக்கு கூடுதல் வாய்ப்பை உருவாக்கும்.

தனியார் மருத்துவக் கல்லூரிகளில் எம்பிபிஎஸ் படிப்புக்கான கல்விக் கட்டணம் அதிகமாக இருப்பதால், பொருளாதார வசதி குறைந்த குடும்பங்களைச் சேர்ந்த பல மாணவர்களால் மருத்துவக் கல்வியைத் தொடர முடியாத நிலை உள்ளது.

ஆனால் அரசு மருத்துவக் கல்லூரியில் இடம் கிடைத்தால் ஒப்பீட்டளவில் குறைந்த கல்விக் கட்டணத்தில் மருத்துவப் படிப்பைத் தொடர முடியும். எனவே, கூடுதலாக அறிவிக்கப்பட்டுள்ள 20 இடங்களும் மருத்துவம் படிக்க வேண்டும் என்ற கனவுடன் நீட் தேர்வுக்குத் தயாராகும் மாணவர்களுக்கு முக்கியமான வாய்ப்பாக அமையக்கூடும்.

சென்டாக் மூலம் மாணவர் சேர்க்கை – அதிகரிக்கும் எதிர்பார்ப்பு!

புதுச்சேரியில் அரசு மற்றும் அரசு ஒதுக்கீட்டு மருத்துவ இடங்களுக்கான மாணவர் சேர்க்கை சென்டாக் (CENTAC) மூலம் நடைபெற்று வருகிறது. இந்த நிலையில், அரசு மருத்துவக் கல்லூரியின் இடங்கள் 200 ஆக உயர்த்தப்படும்போது, சேர்க்கை நடைமுறைகளுக்கு ஏற்ப கூடுதல் இடங்கள் ஒதுக்கீடு செய்யப்படும் என எதிர்பார்க்கப்படுகிறது.

இதனால் புதுச்சேரி மாநிலத்தைச் சேர்ந்த மாணவர்களுக்கு மருத்துவக் கல்வி பயில கூடுதல் வாய்ப்பு கிடைக்கும் என்ற நம்பிக்கை ஏற்பட்டுள்ளது.

இருப்பினும், இந்த 20 கூடுதல் இடங்களில் புதுச்சேரி மாணவர்களுக்கான இடஒதுக்கீடு எவ்வாறு இருக்கும், அரசு ஒதுக்கீடு மற்றும் அகில இந்திய ஒதுக்கீட்டுக்கான இடங்கள் எவ்வாறு பிரிக்கப்படும் என்பது தொடர்பான விரிவான விவரங்கள் அதிகாரப்பூர்வ சேர்க்கை அறிவிப்பில் தெரியவரும்.

மருத்துவக் கல்வித் துறையில் புதுச்சேரிக்கு முக்கிய அறிவிப்பு!

புதுச்சேரியில் மருத்துவக் கல்வி மற்றும் சுகாதாரக் கட்டமைப்பை மேம்படுத்துவதற்கான நடவடிக்கைகளில் அரசு மருத்துவக் கல்லூரியின் இடங்களை அதிகரிப்பது முக்கியமானதாகப் பார்க்கப்படுகிறது.

இந்த நிலையில், 180 இடங்களில் இருந்து 200 இடங்களாக உயர்த்தப்படும் என்ற முதல்வர் ரங்கசாமியின் அறிவிப்பு, மருத்துவம் படிக்க விரும்பும் மாணவர்கள் மற்றும் அவர்களது பெற்றோர்களிடையே எதிர்பார்ப்பை ஏற்படுத்தியுள்ளது.

கூடுதல் இடங்களுக்கான மாணவர் சேர்க்கை அடுத்த கல்வியாண்டு முதல் தொடங்கும் நிலையில், நீட் தேர்வுக்குத் தயாராகும் புதுச்சேரி மாணவர்கள் இந்த வாய்ப்பை எதிர்பார்த்துக் காத்திருக்கின்றனர்.

மொத்தத்தில், புதுச்சேரி அரசு மருத்துவக் கல்லூரியில் மேலும் 20 எம்பிபிஎஸ் இடங்கள் அதிகரிக்கப்படுவதன் மூலம் ஆண்டுதோறும் கூடுதல் மாணவர்கள் மருத்துவக் கல்வி பயில வாய்ப்பு உருவாக உள்ளது.

தீபாவளிக்கு மறுநாளும் அரசு விடுமுறை! புதுச்சேரியில் 3 நாட்கள் தொடர் விடுமுறை - ரங்கசாமி அறிவிப்பு!

சிவரஞ்சித் — Sat, 31 Oct 2026 08:13:36 +0530

புதுச்சேரி: தமிழகத்தைத் தொடர்ந்து புதுச்சேரியிலும் தீபாவளிப் பண்டிகைக்கு மறுநாள் அரசு விடுமுறை அறிவிக்கப்பட்டுள்ளது. இதன்படி, வரும் நவம்பர் 9ஆம் தேதி திங்கட்கிழமை புதுச்சேரியில் உள்ள அரசு அலுவலகங்கள், பள்ளிகள் மற்றும் கல்லூரிகளுக்கு விடுமுறை அளித்து முதலமைச்சர் என். ரங்கசாமி உத்தரவிட்டுள்ளார். ஏற்கெனவே சனி, ஞாயிற்றுக்கிழமைகளில் வார விடுமுறை என்பதால், புதுச்சேரி மக்களுக்கு தொடர்ந்து மூன்று நாட்கள் விடுமுறை கிடைக்க உள்ளது.

நவம்பர் 8ஆம் தேதி தீபாவளிப் பண்டிகை!

இந்துக்களின் முக்கியமான பண்டிகைகளில் ஒன்றான தீபாவளித் திருநாள் ஆண்டுதோறும் நாடு முழுவதும் உற்சாகமாகக் கொண்டாடப்பட்டு வருகிறது. இந்தப் பண்டிகையை முன்னிட்டு பொதுமக்கள் புத்தாடைகள் அணிந்து, பட்டாசுகள் வெடித்து, இனிப்புகள் வழங்கி குடும்பத்தினருடன் மகிழ்ச்சியாகக் கொண்டாடுவது வழக்கம்.

குறிப்பாக வெளியூர்களில் வேலை செய்து வரும் தொழிலாளர்கள், அரசு மற்றும் தனியார் நிறுவன ஊழியர்கள், மாணவர்கள் எனப் பலரும் தீபாவளிப் பண்டிகையைக் கொண்டாட தங்களது சொந்த ஊர்களுக்குச் செல்வார்கள். இதனால் தீபாவளி காலகட்டத்தில் பேருந்து, ரயில் உள்ளிட்ட பொதுப் போக்குவரத்துகளில் பயணிகளின் கூட்டம் அதிகரிப்பதுடன், முக்கியச் சாலைகளிலும் போக்குவரத்து நெரிசல் ஏற்படுவது வழக்கம்.

சொந்த ஊர்களுக்குச் செல்லும் மக்களுக்கு கூடுதல் விடுமுறை!

தீபாவளிப் பண்டிகையைக் கொண்டாட சொந்த ஊர்களுக்குச் செல்லும் மக்கள், பண்டிகை முடிந்த உடனேயே அவசரமாகப் பணிக்குத் திரும்ப வேண்டிய நிலையைத் தவிர்க்கும் வகையில் தமிழகத்தில் தீபாவளிக்கு மறுநாள் அரசு விடுமுறை அறிவிக்கப்பட்டுள்ளது.

இதன் மூலம் வெளியூர்களில் இருந்து சொந்த ஊர்களுக்குச் சென்று பண்டிகையைக் கொண்டாடும் மக்கள், கூடுதல் நேரம் குடும்பத்தினருடன் செலவிடுவதற்கும், மீண்டும் பணியிடங்களுக்குத் திரும்புவதற்கும் வாய்ப்பு ஏற்படுகிறது.

புதுச்சேரியிலும் நவம்பர் 9ஆம் தேதி அரசு விடுமுறை!

இந்த நிலையில், தமிழகத்தைத் தொடர்ந்து புதுச்சேரியிலும் தீபாவளிக்கு மறுநாள் அரசு விடுமுறை அறிவிக்கப்பட்டுள்ளது. புதுச்சேரி முதலமைச்சர் என். ரங்கசாமி, வரும் நவம்பர் 9ஆம் தேதி திங்கட்கிழமை அரசு அலுவலகங்கள், பள்ளிகள் மற்றும் கல்லூரிகளுக்கு விடுமுறை அளிக்க உத்தரவிட்டுள்ளார்.

இதனால் புதுச்சேரி அரசு ஊழியர்கள், ஆசிரியர்கள், மாணவர்கள் மற்றும் பெற்றோர்கள் மகிழ்ச்சி அடைந்துள்ளனர். குறிப்பாக வெளியூர்களில் இருந்து புதுச்சேரிக்கு வந்து பணியாற்றுபவர்கள் மற்றும் படித்து வருபவர்கள் தங்களது சொந்த ஊர்களுக்குச் சென்று தீபாவளியைக் கொண்டாட கூடுதல் அவகாசம் கிடைத்துள்ளது.

புதுச்சேரி மக்களுக்கு 3 நாட்கள் தொடர் விடுமுறை!

இந்த ஆண்டு தீபாவளிப் பண்டிகை நவம்பர் 8ஆம் தேதி ஞாயிற்றுக்கிழமை கொண்டாடப்பட உள்ள நிலையில், அதற்கு முந்தைய நவம்பர் 7ஆம் தேதி சனிக்கிழமை வார விடுமுறையாகவும், நவம்பர் 9ஆம் தேதி திங்கட்கிழமை அரசு விடுமுறையாகவும் அமைந்துள்ளது. இதனால் புதுச்சேரி மக்களுக்கு நவம்பர் 7, 8, 9 ஆகிய மூன்று நாட்களும் தொடர்ந்து விடுமுறை கிடைக்கிறது. இந்தத் தொடர் விடுமுறையைப் பயன்படுத்தி பலரும் தங்களது சொந்த ஊர்களுக்குச் செல்லவும், குடும்பத்தினருடன் சுற்றுலா செல்லவும் திட்டமிடுவார்கள் என எதிர்பார்க்கப்படுகிறது.

ஏற்கெனவே ரூ.700 மதிப்பிலான தீபாவளி மளிகைத் தொகுப்பு அறிவிப்பு!

இதற்கிடையே, தீபாவளிப் பண்டிகையை முன்னிட்டு புதுச்சேரியில் குடும்ப அட்டைதாரர்களுக்கு ரூ.700 மதிப்பிலான மளிகைப் பொருட்கள் அடங்கிய சிறப்புத் தொகுப்பு வழங்கப்படும் என்று முதலமைச்சர் ரங்கசாமி ஏற்கெனவே அறிவித்துள்ளார்.

தீபாவளிப் பண்டிகையை முன்னிட்டு குடும்ப அட்டைதாரர்களுக்கு மளிகைப் பொருட்கள் வழங்கும் அறிவிப்புடன், தற்போது கூடுதல் விடுமுறையும் அறிவிக்கப்பட்டுள்ளதால் புதுச்சேரி மக்களுக்கு ஒரே நேரத்தில் இரண்டு முக்கிய அறிவிப்புகள் வெளியாகியுள்ளன.

சுற்றுலாப் பயணிகளின் வருகையும் அதிகரிக்க வாய்ப்பு!

புதுச்சேரி ஒரு முக்கியமான சுற்றுலாத் தலமாக விளங்குவதால், தொடர் விடுமுறைக் காலங்களில் வெளிமாநிலங்கள் மற்றும் தமிழகத்தின் பல்வேறு மாவட்டங்களில் இருந்து ஏராளமான சுற்றுலாப் பயணிகள் வருவது வழக்கம். கடற்கரை, ஒயிட் டவுன், பாரதி பூங்கா, அரவிந்தர் ஆசிரமம் உள்ளிட்ட சுற்றுலாத் தலங்களைப் பார்வையிடவும், குடும்பத்தினருடன் பொழுதைக் கழிக்கவும் பலர் புதுச்சேரிக்கு வருவார்கள்.

இந்த நிலையில், தீபாவளி தொடர் விடுமுறையை முன்னிட்டு புதுச்சேரிக்கு சுற்றுலாப் பயணிகளின் வருகை அதிகரிக்க வாய்ப்புள்ளதாக எதிர்பார்க்கப்படுகிறது. மொத்தத்தில், தீபாவளிக்கு ரூ.700 மதிப்பிலான மளிகைப் பொருட்கள் தொகுப்பு, கூடுதலாக ஒரு நாள் அரசு விடுமுறை என புதுச்சேரி மக்களுக்கு பண்டிகைக் காலத்தில் அடுத்தடுத்து அறிவிப்புகள் வெளியாகியுள்ளன.

TET Exam: டிசம்பரில் மீண்டும் டெட் சிறப்பு தேர்வு... புதிய விதிகளால் ஆசிரியர்கள் அதிருப்தி!

வினோத்குமார் — Fri, 30 Oct 2026 21:45:56 +0530

பள்ளிகளிலும் பணியாற்றும் இடைநிலை மற்றும் பட்டதாரி ஆசிரியர்களுக்கு சிறப்பு ஆசிரியர் தகுதித் தேர்வில் தேர்ச்சி பெறுவது கட்டாயமாக்கப்பட்டுள்ளது. அதன்படி தமிழக அரசின் ஆசிரியர் தேர்வு வாரியம் சார்பில் ஜூலை 4, 5-ம் தேதிகளில் தாள்-1, தாள்-2 தேர்வு நடத்தப்பட்டது. இதன் முடிவுகள் அக்டோபர் 12ம் தேதி வெளியானது. இரண்டு தேர்வுகளையும் சேர்த்து 2,17,519 ஆசிரியர்கள் எழுதிய நிலையில் 1,08,326 பேர் மட்டுமே தேர்ச்சி பெற்றனர். 1,09 லட்சம் பேர் தேர்ச்சி பெறவில்லை. அதாவது 50.66 சதவீதம் பேர் தோல்வி அடைந்தனர்.

ஆசிரியர்களுக்கு மீண்டும் ஒரு வாய்ப்பு

தேர்ச்சி பெறாத ஆசிரியர்களுக்கு இலவசமாக சிறப்பு பயிற்சியும் அளிக்கப்படும் என்றும் பள்ளிக்கல்வித்துறை அறிவித்திருந்தது. இந்நிலையில் தேர்ச்சி பெறாத ஆசிரியர்களுக்காக மீண்டும் ஒரு வாய்ப்பு வழங்கும் வகையில் டிசம்பர் மாதம் 20ம் காலையில் பட்டதாரி ஆசிரியர்களுக்கு தாள்-2 தேர்வும், இடைநிலை ஆசிரியர்களுக்கு பிற்பகலில் தாள்-1 தேர்வும் நடைபெறுகிறது. இந்த தேர்வுக்கு ஆன்லைனில் விண்ணப்பிக்க நவம்பர் 19ம் தேதி வரை கால அவகாசம் வழங்கப்பட்டுள்ளது.

ஆசிரியர்கள் கடும் அதிருப்தி

இதில் விண்ணப்பிக்கும் போது புதிதாக பணிச்சான்று பெற்று பதிவேற்ற வேண்டும் என அறிவுறுத்தப்பட்டுள்ளதால் ஆசிரியர்கள் கடும் அதிருப்தி அடைந்துள்ளனர். புதிதாக பணிச்சான்று பெற காலதாமதமாகும் என்பதால் ஏற்கெனவே பெற்ற சான்றையே பயன்படுத்த அனுமதி வழங்க வேண்டும் என ஆசிரியர்கள் கோரிக்கை விடுத்துள்ளனர்.

இதையும் படிங்க: Magalir Urimai Thogai: மகளிருக்கு ரூ.2,500 உரிமைத்தொகை எப்போது? அமைச்சர் ஜெகதீஸ்வரி முக்கிய அப்டேட்!

30 மதிப்பெண்ணை 60ஆக மாற்றலாம்

இதுகுறித்து தமிழ்நாடு உயர்நிலை மேல்நிலைப் பள்ளி பட்டதாரி ஆசிரியர் கழக மாவட்டத் தலைவர் கூறுகையில்: சிறப்பு ஆசிரியர் தகுதித் தேர்வில் தமிழ்-30, ஆங்கிலம்- 30, சமூக அறிவியல்- 60, உளவியல்- 30 என மொத்தம் 150 மதிப்பெண்ணுக்கு தேர்வு நடத்தப்படுகிறது. தமிழாசிரியர் தமிழ்ப்பாடத்தை தவிர வேறு பாடம் நடத்தக்கூடாது என விதியிருக்கும்போது தமிழ்ப்பாட ஆசிரியர் சமூக அறிவியல் பாடத்திலிருந்து 60 மதிப்பெண்ணுக்கு ஏன் தேர்வு எழுத வேண்டும் என கேள்வி எழுப்பியுள்ளார். அதனை தவிர்த்துவிட்டு தமிழ்ப்பாடத்தில் 30 மதிப்பெண் என்பதை 60 மதிப்பெண் என மாற்றலாம். அதேபோல் ஆங்கிலம், கணிதம், அறிவியல் பாட ஆசிரியர்களுக்கும் இதேபோல் கொண்டு வரலாம் என தெரிவித்துள்ளார்.

TNPSC: டிஎன்பிஎஸ்சி தேர்வர்களுக்கு குட் நியூஸ்! வயது உச்சவரம்பை உயர்த்தி முதல்வர் விஜய் உத்தரவு - எந்தெந்த பிரிவினருக்கு உயர்வு? - முழு விவரம்

ராஜேஷ். எஸ் — Fri, 30 Oct 2026 16:13:29 +0530

அரசுப் பணிகளில் நேரடி நியமனத்திற்கான வயது உச்ச வரம்பு 5 ஆண்டுகள் உயர்த்தி முதலமைச்சர் விஜய் உத்தரவிட்டுள்ளார்.

போட்டித் தேர்வர்களின் கோரிக்கையை ஏற்று வயது உச்ச வரம்பு உயர்த்தப்படுவதாக தெரிவித்துள்ள முதல்வர், வயது உச்ச வரம்பு இன்று முதல் 5 ஆண்டுகள் வரை நடைமுறையில் இருக்கும் என்று தெரிவித்துள்ளார். இந்த அறிவிப்பு இட ஒதுக்கீட்டுப் பிரிவினருக்கு ஏற்கெனவே உள்ள வயது சலுகையோடு கூடுதலாக அமையும் என்றும் வயது வரம்பு முடிவடையும் நிலையில் இருக்கும் பல்லாயிரக்கணக்கான போட்டித் தேர்வர்கள் பயனடைவார்கள் என்றும் முதல்வர் விஜய் தெரிவித்துள்ளார்.

உயத்தப்பட்ட புதிய வயது உச்சவரம்பு விவரம்

* குரூப் 1 தேர்வு எழுதும் பொதுப்பிரிவினருக்கான வயது வரம்பு 37 ஆகவும், இடஒதுக்கீட்டு பிரிவினருக்கு வயது 42 ஆகவும் மாற்றுத்திறனாளி பொதுப்பிரிவினருக்கு 47 ஆகவும் மாற்றுத்திறனாளி ஒதுக்கீட்டு பிரிவினருக்கு 52 ஆகவும் உயர்த்தப்பட்டுள்ளது.

* குரூப் 2, 2A தேர்வு எழுதும் பொதுபிரிவினருக்கான வயது வரம்பு 35 ஆகவும் மாற்றுத்திறனாளி பொதுப்பிரிவு வயது வரம்பு 45 ஆகவும் உயர்த்தப்பட்டுள்ளது. இடஒதுக்கீட்டு பிரிவினருக்கு வயது உச்ச வரம்பு இல்லை என்பது நீடிக்கும்.

* குரூப் 4 தேர்வை எழுதும் உயர் கல்வி தகுதி பிரிவினர் யாருக்கும் வயது உச்ச வரம்பு இல்லை.

* குரூப் 4 தேர்வை எழுதும் உயர் கல்வி தகுதி இல்லாத பொதுப்பிரிவினருக்கான வயது வரம்பு 30ல் இருந்து 35ஆக உயர்த்தப்பட்டுள்ளது.

* குரூப் 4 தேர்வை எழுதும் உயர் கல்வி தகுதி இல்லாத இடஒதுக்கீட்டு பிரிவினருக்கு வயது வரம்பு 32ல் இருந்து 37ஆக உயர்த்தப்பட்டுள்ளது.

உணவு இடைவேளையிலும் அனுமதி இல்லை; தலைமை ஆசிரியர்களுக்கு பள்ளிக்கல்வித்துறை அதிரடி உத்தரவு!

என்.நாகராஜன் — Thu, 29 Oct 2026 12:44:09 +0530

தமிழகத்தில் அரசு மற்றும் அரசு உதவி பெறும் பள்ளிகளில் பணியாற்றும் ஆசிரியர்கள், பள்ளி வேலை நேரத்தின்போது வளாகத்தை விட்டு வெளியே செல்லக் கூடாது என்று பள்ளிக்கல்வித்துறை அறிவுறுத்தியுள்ளதாகத் தகவல் வெளியாகியுள்ளது. அரசின் இந்த அதிரடி உத்தரவு பேசும் பொருளாகி வருகிறது.

அரசு மற்றும் அரசு உதவி பெறும் பள்ளிகளில் பணியாற்றும் ஆசிரியர்கள் உணவு இடைவேளையிலும் பள்ளிக்கு வெளியே செல்ல அனுமதி இல்லை என்றும், தவிர்க்க முடியாத அசாதாரண சூழ்நிலைகளில் வெளியே செல்ல வேண்டியிருந்தால் உயர் அதிகாரிகளுக்குத் தகவல் தெரிவித்து, அவர்களின் ஆலோசனையைப் பெற வேண்டும் என்றும் சுற்றறிக்கையில் குறிப்பிடப்பட்டுள்ளதாகக் கூறப்படுகிறது.

மாணவ-மாணவிகளின் கல்விச் செயல்பாடுகளில் கூடுதல் கவனம் செலுத்துவது, வகுப்புகள் தடையின்றி நடைபெறுவதை உறுதி செய்வது, பள்ளிகளில் ஆசிரியர்களின் பணிநேர ஒழுங்கை மேம்படுத்துவது ஆகிய நோக்கங்களுடன் இந்த அறிவுறுத்தல் வழங்கப்பட்டுள்ளதாகத் தெரிகிறது. இதையடுத்து, அரசு மற்றும் அரசு உதவி பெறும் பள்ளிகளின் தலைமை ஆசிரியர்கள் சுற்றறிக்கையில் கூறப்பட்டுள்ள வழிமுறைகளை ஆசிரியர்களுக்குத் தெரிவித்து, அவற்றைப் பின்பற்றுவதை உறுதி செய்ய வேண்டிய நிலை ஏற்பட்டுள்ளது.

உணவு இடைவேளையிலும் வெளியே செல்லக் கூடாது

பள்ளிகளில் ஆசிரியர்களின் வருகை, பணிநேரம் மற்றும் வகுப்பறைச் செயல்பாடுகள் மாணவர்களின் கல்வி முன்னேற்றத்தில் முக்கியப் பங்கு வகிக்கின்றன. குறிப்பாக, பள்ளி வேலை நேரத்தில் ஆசிரியர்கள் வளாகத்தில் இருப்பது, வகுப்புகள் முறையாக நடைபெறுவதற்கும் மாணவர்களின் கற்றல் செயல்பாடுகள் பாதிக்கப்படாமல் இருப்பதற்கும் அவசியமாகக் கருதப்படுகிறது.

இந்த நிலையில், பள்ளிக்கல்வித்துறை சார்பில் அரசு மற்றும் அரசு உதவி பெறும் பள்ளிகளுக்கு அனுப்பப்பட்டுள்ளதாகக் கூறப்படும் சுற்றறிக்கையில், பள்ளி வேலை நேரத்தில் ஆசிரியர்கள் யாரும் பள்ளி வளாகத்தை விட்டு வெளியே செல்லக் கூடாது என்று தெரிவிக்கப்பட்டுள்ளது. வழக்கமான உணவு இடைவேளையின்போதும் பள்ளிக்கு வெளியே செல்வதற்கு அனுமதி இல்லை எனக் குறிப்பிடப்பட்டுள்ளது.

பள்ளி நேரத்தில் ஆசிரியர்கள் வளாகத்தில் இருப்பதன் மூலம் மாணவர்களின் கற்றல் நடவடிக்கைகளைத் தொடர்ந்து கண்காணிக்க முடியும். வகுப்புகளுக்கு இடையிலான நேரம், மதிய உணவு இடைவேளை மற்றும் பிற கல்விச் செயல்பாடுகளின்போதும் மாணவர்களுக்குத் தேவையான வழிகாட்டுதலை வழங்க முடியும். இதனால், பள்ளியின் அன்றாடச் செயல்பாடுகள் ஒழுங்காக நடைபெறுவதற்கு ஆசிரியர்களின் பணிநேரக் கட்டுப்பாடு முக்கியமானதாகப் பார்க்கப்படுகிறது.

அவசரச் சூழ்நிலை என்றால் என்ன செய்ய வேண்டும்

ஆசிரியர்கள் பள்ளி வளாகத்தை விட்டு வெளியேற வேண்டிய சூழ்நிலைகள் சில நேரங்களில் ஏற்படலாம். குறிப்பாக, மருத்துவ அவசரம் அல்லது தவிர்க்க முடியாத தனிப்பட்ட காரணங்கள் போன்ற அசாதாரண நிகழ்வுகள் ஏற்படும்போது, அதற்கேற்ற நடைமுறைகளைப் பின்பற்ற வேண்டியிருக்கும்.

இதுபோன்ற அசாதாரண சூழ்நிலைகளில் பள்ளிக்கு வெளியே செல்ல வேண்டிய நிலை ஏற்பட்டால், சம்பந்தப்பட்ட ஆசிரியர்கள் உயர் அலுவலர்களுக்குத் தவறாமல் தகவல் தெரிவிக்க வேண்டும் என்றும், அவர்களது ஆலோசனையைப் பெற வேண்டும் என்றும் சுற்றறிக்கையில் கூறப்பட்டுள்ளதாகத் தெரிவிக்கப்படுகிறது.

இதன் மூலம் ஆசிரியர்கள் தன்னிச்சையாக பள்ளியை விட்டு வெளியேறுவதைத் தவிர்த்து, உரிய தகவல் பரிமாற்றத்துடன் செயல்பட வேண்டும் என்பது வலியுறுத்தப்படுவதாகக் கருதப்படுகிறது. எனினும், அவசர மருத்துவச் சூழ்நிலைகள் உள்ளிட்ட நிகழ்வுகளில் பின்பற்ற வேண்டிய அனுமதி நடைமுறைகள், தகவல் தெரிவிக்கும் முறை மற்றும் அதிகாரிகளின் ஒப்புதல் தொடர்பான விரிவான விதிகள் அதிகாரப்பூர்வ சுற்றறிக்கையின் முழு விவரத்தின் அடிப்படையில் உறுதிப்படுத்தப்பட வேண்டும்.

தலைமை ஆசிரியர்களுக்குப் பொறுப்பு

பள்ளிகளில் ஆசிரியர்களின் பணிநேர ஒழுங்கைப் பராமரிப்பதில் தலைமை ஆசிரியர்களுக்கு முக்கியப் பொறுப்பு உள்ளது. பள்ளி தொடங்கும் நேரம் முதல் வகுப்புகள் முடியும் வரை கல்விச் செயல்பாடுகள் தடையின்றி நடைபெறுவதை உறுதி செய்வதும், ஆசிரியர்கள் உரிய நேரத்தில் பணியில் இருப்பதை கண்காணிப்பதும் பள்ளி நிர்வாகத்தின் முக்கியப் பணிகளாகும்.

அந்த வகையில், பள்ளிக்கல்வித்துறை வெளியிட்டுள்ளதாகக் கூறப்படும் சுற்றறிக்கையில் உள்ள அறிவுறுத்தல்களை அரசு மற்றும் அரசு உதவி பெறும் பள்ளிகளின் தலைமை ஆசிரியர்கள் கவனத்தில் கொள்ள வேண்டும் என்று தெரிவிக்கப்பட்டுள்ளது. ஆசிரியர்களுக்கு இந்த வழிமுறைகளைத் தெளிவுபடுத்தி, பள்ளியின் அன்றாடச் செயல்பாடுகள் பாதிக்கப்படாமல் இருப்பதை உறுதி செய்வது அவசியமாகிறது.

அதே நேரத்தில், ஆசிரியர்களின் பணிச்சூழல், இடைவேளை வசதிகள், அவசரத் தேவைகள் மற்றும் மாணவர்களின் பாதுகாப்பு ஆகியவற்றை ஒருங்கிணைத்து நடைமுறைகளைச் செயல்படுத்துவது பள்ளி நிர்வாகத்துக்கு முக்கியமானதாக இருக்கும்.

மாணவர்களின் கல்விக்கு முக்கியத்துவம்

மாணவர்களின் கல்வித்தரத்தை மேம்படுத்துவதற்குப் பாடம் நடத்துவது மட்டுமின்றி, அவர்களுக்குத் தேவையான வழிகாட்டுதலை உரிய நேரத்தில் வழங்குவதும் அவசியம். ஆசிரியர்கள் பள்ளி வளாகத்தில் தொடர்ந்து இருப்பது, மாணவர்களின் சந்தேகங்களைத் தீர்ப்பதற்கும் கற்றல் இடைவெளிகளைச் சரிசெய்வதற்கும் உதவக்கூடும்.

பள்ளிகளில் ஆசிரியர்களின் வருகை மற்றும் பணிநேரம் தொடர்பான விதிமுறைகள் முறையாகப் பின்பற்றப்படும்போது, வகுப்புகள் திட்டமிட்டபடி நடைபெறுவதற்கான வாய்ப்பு அதிகரிக்கும். இதனால் மாணவர்களின் கற்றல் நேரம் பாதுகாக்கப்படுவதுடன், பள்ளி நிர்வாகத்தின் செயல்பாடுகளையும் ஒழுங்குபடுத்த முடியும்.

எனவே, ஆசிரியர்கள் பள்ளி வளாகத்தை விட்டு வெளியேறுவது தொடர்பான அறிவுறுத்தல்கள், தலைமை ஆசிரியர்களின் கண்காணிப்புப் பொறுப்பு மற்றும் அவசரச் சூழ்நிலைகளில் பின்பற்ற வேண்டிய நடைமுறைகள் ஆகியவை பள்ளிக் கல்விச் செயல்பாடுகளுடன் நேரடியாகத் தொடர்புடையவையாக உள்ளன.

கல்லலில் திருக்குறள் விழா: 550 மாணவர்களுக்கு வாழ்வியல் பொக்கிஷம்!

அருண் சின்னதுரை — Wed, 28 Oct 2026 20:13:13 +0530

கல்லலில் திருக்குறள் நூல் வழங்கும் விழா.

கல்லல் பிரிட்டோ மேல்நிலைப்பள்ளியில் திருக்குறள் நூல் வழங்கும் விழா நடைபெற்றது. இந்நிகழ்வில் பள்ளித்தலைமை ஆசிரியர் ஜெயசீலன் தலைமை வகித்தார், உதவித் தலைமை ஆசிரியர் தனுஷ் ஸ்டாலின் வரவேற்றார், கல்லலைச்சேரந்த திருக்குறள் பரப்புநர், பஞ்சர்கடை முத்தையா நோக்க உரையாற்றினார். சிவகங்கை தமிழவைய ஒருங்கிணைப்பாளர் புலவர் கா. காளிராசா, வாழ்த்துரைத்தார், இந்நிகழ்வில் சிறப்பு விருந்தினராக சிவகங்கை தமிழ் வளர்ச்சித் துறை உதவி இயக்குனர் தெ. சிவப்பிரகாஷ் கலந்து கொண்டு திருக்குறளை வாழ்வியலாகக் கொள்ள வேண்டும் என்று மாணவர்களிடம் வலியுறுத்தினார். மற்றொரு சிறப்பு விருந்தினராக தேசிய நல்லாசிரியர் திருக்குறள் தேனீ செ. கண்ணப்பன் கலந்துகொண்டு திருக்குறளை எளிமையாக மனனம் செய்வது எப்படி என்று ஆலோசனைகள் வழங்கியதோடு, மாணவர்கள் அதிகார எண் சொன்னால் அதிகாரத்தையும் குறள் எண் சொன்னால் திருக்குறளையும் சொல்லி மாணவர்களை வியப்பில் ஆழ்த்தினார்.

திருக்குறள் நூல் வழங்கப்பெற்றது நிகழ்வு

திருக்குறள் பரப்புநர், பஞ்சர்கடை கல்லல் முத்தையா அவர்கள் மாணவர்களிடம் திருக்குறள் சார்ந்த வினாக்களை எழுப்பி வினாவிற்கு விடையளித்த மாணவர்களுக்கு சிறப்பு பரிசு வழங்கினார். இந்நிகழ்வில் காரைக்குடி திருக்குறள் பரப்புநர் தியாகராஜன், கல்லல் பிரிட்டோ மேல்நிலைப்பள்ளி ஆசிரியர்கள், மாணவர்கள் கலந்து கொண்டனர் 550 மாணவர்களுக்கு திருக்குறள் நூல் வழங்கப்பெற்றது நிகழ்வின் இறுதியில் தமிழாசிரியர் செபஸ்தியம்மாள் நன்றி உரைத்தார்.

Holiday: தீபாவளி மறுநாள் விடுமுறை? எதிர்பார்ப்பில் பள்ளி மாணவர்கள், அரசு ஊழியர்கள்! அரசின் முடிவு என்ன?

வினோத்குமார் — Wed, 28 Oct 2026 13:39:48 +0530

விடுமுறை என்ற வார்த்தையை கேட்டாலே பள்ளி மாணவர்கள் முதல் அரசு ஊழியர்கள், ஆசிரியர்களுக்கு ஒரே குஷிதான். அதுவும் தொடர் முறை வந்துவிட்டால் சொல்லவே வேண்டாம். ஒரே ஆட்டம் பாட்டம் கொண்டாட்டம் தான். இந்நிலையில் ஆயுத பூஜை, விஜய தசமி, வார விடுமுறை என மொத்தம் 4 நாட்களுக்கு தொடர் விடுமுறை கிடைத்ததால் அரசு ஊழியர்கள், பள்ளி மாணவர்கள் சந்தோஷத்தில் இருந்து வந்தனர். தற்போது தீபாவளி பண்டிகை நெருங்கி வரும் நிலையில் எத்தனை நாட்கள் விடுமுறை என்று பள்ளி மாணவர்கள் காலாண்டரை புரட்டி பார்த்து வருகின்றனர்.

தீபாவளி பண்டிகை

ஒவ்வொரு ஆண்டும் தீபாவளி பண்டிகை தமிழகம் உள்ளிட்ட பல்வேறு மாநிலங்களில் வெகு விமர்சியாக கொண்டாப்பட்டு வருவது வழக்கம். அன்றை தினம் புதிய உடை அணிந்து குடும்பத்துடன் பட்டாசு வெடித்து கொண்டாடுகின்றனர். கடந்த இரண்டு ஆண்டுகளாக தீபாவளி பண்டிகை தொடர்ந்து அக்டோபர் மாதம் வந்த நிலையில் இம்முறை நவம்பர் மாதத்தில் வருகிறது.

இதையும் படிங்க: பள்ளி மாணவர்களுக்கு காத்திருக்கும் சர்ப்ரைஸ்.. மீண்டும் தொடர் விடுமுறை.. எப்போது தெரியுமா?

அரசு ஊழியர்கள்

அதாவது தீபாவளி பண்டிகை இம்முறை வார விடுமுறை நாட்களான நவம்பர் 8ம் தேதி ஞாயிற்றுக்கிழமை வருகிறது. பொதுவாக, தமிழகத்தில் தீபாவளிக்கு மட்டுமே அரசு விடுமுறை தினமாக அறிவிக்கப்படுவது வழக்கம். இந்நிலையில் தீபாவளிக்கு மறுநாள் அதாவது நவம்பர் 9ம் தேதி திங்கள் கிழமை அரசு விடுமுறை அளிக்க வேண்டும் என அரசு ஊழியர்கள் வலியுறுத்தி உள்ளனர்.

தீபாவளிக்கு சொந்த ஊருக்கு சென்றவர்கள் திரும்ப வருவதற்காகவும், ஒரு சிலர் தீபாவளிக்கு மறுநாள் நோன்பு(அமாவாசை) அனுசரிப்பார்கள் என்பதாலும் அன்று இரவே பணியிடங்களுக்கு திரும்புவதும் சிரமமாக இருக்கும். எனவே பொதுமக்களும் அரசு ஊழியர்களும் குடும்பத்தினருடன் மகிழ்ச்சியாக தீபாவளியைக் கொண்டாடி, சிரமமின்றி பணியிடங்களுக்குத் திரும்பும் வகையில் நவம்பர் 9ம் தேதி திங்கள் கிழமை அரசு விடுமுறை அளிக்க வேண்டும் என்று அரசு ஊழியர்கள் கோரிக்கை விடுத்துள்ளனர்.

3 நாட்கள் விடுமுறை?

இதுதொடர்பாக தமிழக அரசு தீவிர ஆலோசனையில் ஈடுபட்டு வருகிறது. விடுமுறை தொடர்பான அதிகாரப்பூர்வ அறிவிப்பு விரைவில் வெளியாகும். நவம்பர் 9ம் தேதி திங்கள்கிழமை அரசு விடுமுறை அளிக்கும் பட்சத்தில் பள்ளி மாணவர்களுக்கு மொத்தம் 3 நாட்கள் தொடர் விடுமுறை கிடைக்க வாய்ப்புள்ளது. கடந்த சில ஆண்டுகளாக தமிழக அரசு தீபாவளிக்கு மறுநாள் விடுமுறை அறிவித்து வருவது குறிப்பிடத்தக்கது.

TNPSC: அரசு வேலை வேண்டுமா? இனி ஒரு ரூபாய் செலவு இல்லை.! அரசின் ஜாக்பாட் அறிவிப்பு! விண்ணப்பிப்பது எப்படி?

வினோத்குமார் — Tue, 27 Oct 2026 12:12:30 +0530

தமிழகத்தில் இளைஞர்களுக்கு படித்த படிப்பிற்கு வேலை இல்லாமல் பல லட்சம் இளைஞர்கள் தவித்து வருகின்றனர். அவர்களுக்கு வேலை வாய்ப்பை உருவாக்கிடும் வகையில் தமிழக அரசு சார்பாக பல்வேறு திட்டங்கள் செயல்படுத்தப்பட்டு வருகிறது. அரசு வேலை கிடைக்காதவர்களுக்கு தனியார் துறையிலும் வேலைவாய்ப்பு ஏற்படுத்திக்கொடுக்கப்படுகிறது. அதாவது பல்வேறு மாவட்டங்களில் சிறப்பு முகாம்கள் நடத்தி வேலை வாய்ப்பு உருவாக்கப்பட்டு வருகிறது. அதே நேரத்தில் அரசு வேலைதான் வேண்டும் என உறுதியாக உள்ள இளைஞர்களுக்கும் மாநில அரசு மட்டுமல்ல மத்திய அரசு பணியிடங்களில் சேர்வதற்கான இலவச பயிற்சியை தமிழக அரசு வழங்கி வருகிறது.

குரூப்-4 தேர்வு

இந்நிலையில் தமிழ்நாடு அரசின் பல்வேறு துறைகளில் இளநிலை உதவியாளர், தட்டச்சர், சுருக்கெழுத்து தட்டச்சர், நேர்முக உதவியாளர் மற்றும் கிராம நிர்வாக அலுவலர் (விஏஓ), வனக்காவலர், பில் கலெக்டர், கூட்டுறவு சங்கங்களின் இளநிலை ஆய்வாளர் உள்ளிட்ட பல்வேறு பதவிகளில் காலியாகவுள்ள 6,574 இடங்கள் குரூப்-4 தேர்வு மூலம் நிரப்பப்பட உள்ளன. இந்த தேர்வுக்கு 18 வயது முதல் 32 வயதுக்கு உட்பட்டவர்கள் விண்ணப்பிக்கலாம். இதற்கான விண்ணப்பங்கள் சமர்பிக்க நவம்பர் 5ம் தேதி கடைசி நாளாகும். இந்நிலையில் ராணிப்பேட்டை மாவட்டத்தில் குரூப்-4 தேர்வுக்கான இலவச பயிற்சி அறிவிக்கப்பட்டுள்ளது.

இதையும் படிங்க: TNTET Exam: தோல்வி அடைந்த ஆசிரியர்களுக்கு மீண்டும் வாய்ப்பு.. டிஆர்பி முக்கிய அறிவிப்பு!

இலவச பயிற்சி வகுப்புகள்

அதாவது ராணிப்பேட்டை மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் செயல்படும் தன்னார்வ பயிலும் வட்டம் மற்றும் அரக்கோணம் அறிவுசார் மையம் ஆகியவை சார்பில் குரூப்-4 தேர்வுக்கான இலவச பயிற்சி வகுப்புகள் நடக்க உள்ளது.

இதில் கலந்துகொள்ள விரும்பும் தேர்வர்கள் எண். 9, ஆற்காடு சாலை, பழைய பி.எஸ்.என்.எல். அலுவலகம், ராணிப்பேட்டை பழைய பேருந்து நிலையம் (தலைமை தபால் நிலையம் அருகில்) என்ற முகவரியில் உள்ள மாவட்ட வேலைவாய்ப்பு அலுவலகத்தை நேரிலோ அல்லது deoranipet.studycircle@gmail.com-என்ற இணையதள முகவரியிலோ தொடர்பு கொள்ளலாம்.

இதையும் படிங்க: Teachers: ஆசிரியர்களுக்கு ஹேப்பி நியூஸ்! இனி வார விடுமுறை நாட்களில்! பள்ளிக்கல்வித்துறை முக்கிய அறிவிப்பு!

போட்டி தேர்வு

மேலும் போட்டி தேர்வுகளுக்கு தயாராகும் கிராமப்புற மற்றும் நகர்புற மாணவர்கள் https://tamilnaducareerservices.tn.gov.in என்ற இணையதளத்தில் பாடக்குறிப்புகள், மாதிரி வினாத்தாள்கள் மற்றும் மாதிரி தேர்வுகள் ஆகியவற்றை பதிவிறக்கம் செய்து கொள்ளலாம். இந்த தகவலை மாவட்ட வேலைவாய்ப்புத்துறை அலுவலகத்தை தொடர்பு கொள்ளலாம் என தெரிவிக்கப்பட்டுள்ளது.

TNTET Exam: தோல்வி அடைந்த ஆசிரியர்களுக்கு மீண்டும் வாய்ப்பு.. டிஆர்பி முக்கிய அறிவிப்பு!

வினோத்குமார் — Tue, 27 Oct 2026 10:45:45 +0530

பள்ளிகளிலும் பணிபுரியும் இடைநிலை மற்றும் பட்டதாரி ஆசிரியர்கள் ஆசிரியர் தகுதித் தேர்வில் தேர்ச்சி பெறுவது கட்டாயமாக்கப்பட்டுள்ளது. இந்த தேர்வு கடந்த ஜூலை 4, 5-ம் தேதிகளில் தாள்-1, தாள்-2 தேர்வு நடத்தப்பட்டது. இந்த 2 தேர்வுகளையும் சேர்த்து 2,17,519 ஆசிரியர்கள் எழுதிய நிலையில் 1,08,326 பேர் மட்டுமே தேர்ச்சி பெற்றனர். 1,09 லட்சம் பேர் தேர்ச்சி பெறவில்லை. இதில் இடைநிலை ஆசிரியர்களுக்கான தாள்-1 தேர்வில் தேர்ச்சி விகிதம் 80 சதவீதமாகவும், பட்டதாரி ஆசிரியர்களுக்கான தாள்-2 தேர்வில் தேர்ச்சி விகிதம் வெறும் 38 சதவீதமாகவும் பதிவானது.

ஆசிரியர் தகுதித் தேர்வு

இதில் 50.66 சதவீதம் பேர் தோல்வி அடைந்தனர். தேர்ச்சி பெறாத ஆசிரியர்களுக்கு சிறப்பு பயிற்சியும் அளிக்கப்படும் என்றும் பள்ளிக்கல்வித்துறை அறிவித்திருந்தது. இந்நிலையில் தேர்ச்சி பெறாத ஆசிரியர்களின் நலனுக்காக வரும் டிசம்பர் மாதம் 20ம் தேதி மீண்டும் சிறப்பு ஆசிரியர் தகுதி தேர்வு நடைபெறுகிறது. அன்றைய தினம் காலையில் முதல் தாள் தேர்வும், பிற்பகலில் 2-ம் தாள் தேர்வும் நடைபெற உள்ளது. இத்தேர்வை எழுத ஆசிரியர்கள் ஆன்லைன் மூலம் இன்று முதல் விண்ணப்பிக்கலாம் என தெரிவிக்கப்பட்டுள்ளது.

இன்று முதல் விண்ணப்பிக்கலாம்

இதுதொடர்பாக ஆசிரியர் தேர்வு வாரியம் வெளியிட்டுள்ள செய்தி குறிப்பில்: ஆசிரியர் தேர்வு வாரியத்தின் வாயிலாக அரசு / அரசு உதவி பெறும் /அங்கீகரிக்கப்பட்ட தனியார் சுயநிதிப் பள்ளிகளில் தற்போது பணிபுரிந்து வரும் ஆசிரியர்களுக்கான இரண்டாம் கட்ட தமிழ்நாடு ஆசிரியர் தகுதித் தேர்வு (SPECIAL TNTET -2) (தாள் - I மற்றும் தாள் - II) நடத்துவதற்கான அறிவிக்கை ஆசிரியர் தேர்வு வாரிய இணையதளத்தில் (Website: http://www.trb.tn.gov.in) நேற்று வெளியிடப்படுகின்றது. இத்தேர்விற்கு விண்ணப்பிக்கும் பணியிலிருக்கும் ஆசிரியர்கள் 01.09.2025க்கு முன்னர் ஆசிரியர்களாக நியமனம் செய்யப்பட்டு தொடர்ந்து பணிபுரிந்து வர வேண்டும்.

கால அவகாசம்

இத்தேர்விற்கான விண்ணப்பம் சார்ந்த அனைத்து விவரங்களும் அறிவிக்கையில் தெரிவிக்கப்பட்டுள்ளன. மேலும், இத்தேர்விற்கு தகுதி வாய்ந்த விண்ணப்பதாரர்கள் இணையதளம் வாயிலாக (Online Application) விண்ணப்பிக்க இன்று முதல் நவம்பர் 19 வரை கால அவகாசம் வழங்கப்பட்டுள்ளது என தெரிவிக்கப்படுகிறது.