விழுப்புரம் மாவட்டம் திருவெண்ணெய்நல்லூர் அருகே அரசுப் பள்ளியில் படிக்கும் 9 மாணவிகளிடம் தவறான தொடுதலில் ஈடுபட்டதாக எழுந்த புகாரில், பள்ளித் தலைமையாசிரியர் மீது போக்சோ சட்டத்தின் கீழ் போலீசார் வழக்குப்பதிவு செய்து விசாரணை நடத்தி வருகின்றனர். இதற்கிடையே, புகாருக்கு உள்ளான தலைமையாசிரியரை மாவட்ட தொடக்கக் கல்வி அலுவலர் இளமதி தற்காலிகப் பணிநீக்கம் செய்து உத்தரவிட்டுள்ளார். இச்சம்பவம் பெற்றோர் மற்றும் பொதுமக்கள் மத்தியில் அதிர்ச்சியை ஏற்படுத்தியுள்ளது.
9 மாணவிகளிடம் தவறான தொடுதல் எனப் புகார்!
விழுப்புரம் மாவட்டம், திருவெண்ணெய்நல்லூர் அருகேயுள்ள புதூர் அருங்குறிக்கை கிராமத்தில் ஊராட்சி ஒன்றிய தொடக்கப்பள்ளி செயல்பட்டு வருகிறது. இந்தப் பள்ளியில் விக்ரமன் என்பவர் தலைமையாசிரியராகப் பணியாற்றி வருகிறார்.
இந்நிலையில், அந்தப் பள்ளியில் படித்து வரும் 9 மாணவிகளிடம் தலைமையாசிரியர் விக்ரமன் தவறான முறையில் தொட்டு பாலியல் சீண்டலில் ஈடுபடுவதாகக் கூறப்படுகிறது.
இதனால் பாதிக்கப்பட்டதாகக் கூறப்படும் மாணவிகள், தங்களுக்கு நேர்ந்த சம்பவங்கள் குறித்து பெற்றோரிடமும், பள்ளியில் பணியாற்றும் சக ஆசிரியர்களிடமும் தெரிவித்துள்ளனர். இதனைக் கேட்டு அதிர்ச்சியடைந்த பெற்றோரும், ஆசிரியர்களும் சம்பந்தப்பட்ட அதிகாரிகளிடம் புகார் அளிக்க நடவடிக்கை எடுத்தனர்.
தலைமையாசிரியர் தற்காலிகப் பணிநீக்கம்!
மாணவிகளின் புகார் தொடர்பாக பள்ளி ஆசிரியர்கள் தொடக்கக் கல்வித்துறை அதிகாரிகளிடம் முறையிட்டனர். இதையடுத்து, விழுப்புரம் மாவட்ட தொடக்கக் கல்வி அலுவலர் இளமதி விசாரணை மேற்கொண்டார்.
அதன் அடிப்படையில், புகாருக்கு உள்ளான தலைமையாசிரியர் விக்ரமனைத் தற்காலிகப் பணிநீக்கம் செய்து மாவட்ட தொடக்கக் கல்வி அலுவலர் இளமதி உத்தரவிட்டுள்ளார்.
மேலும், இந்த விவகாரம் தொடர்பாக துறை ரீதியான விசாரணை நடத்தி, உரிய அறிக்கையைச் சமர்ப்பிக்கவும் அதிகாரிகளுக்கு உத்தரவிடப்பட்டுள்ளது.
போக்சோ சட்டத்தின் கீழ் போலீசார் வழக்குப்பதிவு!
இதற்கிடையே, கல்வித்துறை அலுவலர்கள் மூலமாக விழுப்புரம் அனைத்து மகளிர் காவல் நிலையத்தில் தலைமையாசிரியர் விக்ரமன் மீது புகார் அளிக்கப்பட்டுள்ளது.
இந்தப் புகாரின் அடிப்படையில், மாணவிகளுக்கு எதிரான பாலியல் குற்றங்களில் இருந்து குழந்தைகளைப் பாதுகாக்கும் போக்சோ சட்டத்தின் கீழ் போலீசார் வழக்குப்பதிவு செய்துள்ளனர். மேலும், புகார் தொடர்பாக விசாரணை மேற்கொண்டு வருகின்றனர்.
ஒரு பள்ளியில் கல்வி கற்கச் செல்லும் மாணவிகளுக்கு பாதுகாப்பாக இருக்க வேண்டிய தலைமையாசிரியர் மீதே இத்தகைய குற்றச்சாட்டு எழுந்திருப்பது அப்பகுதியில் பெரும் அதிர்ச்சியையும் பரபரப்பையும் ஏற்படுத்தியுள்ளது.
9 மாணவிகளிடம் நடைபெற்றதாகக் கூறப்படும் பாலியல் சீண்டல் புகார் தொடர்பாக போலீசார் மற்றும் கல்வித்துறை அதிகாரிகள் தொடர்ந்து விசாரணை மேற்கொண்டு வருகின்றனர். விசாரணையின் முடிவில் மேலும் பல தகவல்கள் வெளியாகும் என எதிர்பார்க்கப்படுகிறது.
