விழுப்புரம் மாவட்டம் திண்டிவனத்தில் வீட்டில் பதுக்கி வைத்து போதை பொருட்கள் விற்பனை செய்த நான்கு இளைஞர்களை போலீசார் கைது செய்து, அவர்களிடமிருந்து போதை ஊசி, போதை மாத்திரை, கஞ்சா உள்ளிட்டவற்றை பறிமுதல் செய்தனர். திண்டிவனம் கருணாவூர் பாட்டையில் உள்ள ஒரு வீட்டில் போதைப் பொருட்கள் பதுக்கி வைத்து விற்பனை செய்வதாகவும், இளைஞர்கள் அந்த வீட்டிலேயே போதைப் பொருட்களை பயன்படுத்திக் கொள்வதாகவும் போலீசாருக்கு ரகசிய தகவல் கிடைத்தது. அதன் அடிப்படையில் சம்பவ இடத்திற்கு சென்ற திண்டிவனம் போலீசார் திண்டிவனம் ஜெயபுரம் பகுதியை சேர்ந்த ஏழுமலை மகன் சிவகுரு(20), என்பவரது வீட்டை சோதனை செய்தனர். அப்போது அவரது வீட்டில் 73 போதை மாத்திரைகள், போதை ஊசி, கஞ்சா உள்ளிட்டவற்றை பதுக்கி வைத்திருந்தது தெரிய வந்தது. மேலும் அங்கிருந்த திண்டிவனம் கோபால் தெருவை சேர்ந்த கண்ணதாசன் மகன் நித்திஷ்(22), திண்டிவனம் மன்னார் சாமி கோயில் பகுதியை சேர்ந்த ஞானசேகர் மகன் பிரவீன்ராஜ் (25), வானூர் தாலுக்கா குன்னம் கிராமத்தை சேர்ந்த சிவஞான சக்தி மகன் கோபிநாதன்(23), ஆகியோரை கைது செய்தனர். மேலும் அவர்களிடமிருந்து 5 கிராம் கஞ்சா, 73 போதை மாத்திரை, போதை ஊசி ஆகியவற்றை பறிமுதல் செய்த போலீசார் நான்கு பேர் மீதும் வழக்கு பதிவு செய்து, நீதிமன்றத்தில் ஆஜர் படுத்தி சிறையில் அடைத்தனர். திண்டிவனத்தில் போதை மாத்திரை, போதை ஊசி பறிமுதல் செய்யப்பட்ட சம்பவம் பரபரப்பு ஏற்படுத்தியுள்ளது.
இதேபோல் நேற்று அதிரடி சோதனையில் திண்டிவனம் காவல் நிலைய எல்லைக்கு உட்பட்ட பகுதியில் அதிக அளவிலான போதைப் பொருட்கள் விற்பனை செய்வதாக குற்றச்சாட்டு எழுந்தது. இதனை தடுக்கும் விதமாக திண்டிவனம் உட்கோட்டை துணை துணை காவல் கண்காணிப்பாளர் சுராஜ் பாண்டியன் மேற்பார்வையில் திண்டிவனம் காவல் ஆய்வாளர் கலைச்செல்வி உதவி ஆய்வாளர் சண்முகம், ஐயப்பன் தலைமையிலான போலீசார் திண்டிவனம் கிடங்கள் பகுதியில் தீவிர சோதனையில் ஈடுபட்டனர். அப்பொழுது கிடங்கள் வண்ணாங்குளம் அருகே சந்தேகத்திற்கு இடமாக நின்றிருந்த மூன்று வாலிபர்களை போலீசார் விசாரணை மேற்கொண்டனர். போலீசார் விசாரணையில் மூவரிடமிருந்து 150 போதை மாத்திரை 5 குளுக்கோஸ் பாட்டில் மற்றும் 10 போதை ஊசிகள் பறிமுதல் செய்தனர். மேலும் இவர்களை அழைத்துச் சென்று காவல் நிலையத்தில் விசாரணை மேற்கொண்டதில் திண்டிவனம் வடஆலப்பாக்கம் பகுதியைச் சேர்ந்த ரவி என்பவரின் மகன் இளந்திரையன்(20), கண்ணன் என்பவரின் மகன் முத்துராமன்(22), திண்டிவனம் கிடங்கள் இரண்டு பகுதியைச் சேர்ந்த விஜயகுமார் என்பவரின் மகன் அப்பு (21) என்கிற ஆகாஷ் என்பது தெரிய வந்தது இதை தொடர்ந்து போலீசார் அவர்கள் மீது வழக்கு பதிவு செய்து நீதிமன்ற காவலுக்கு அனுப்பினர். திண்டிவனத்தில் போதை மாத்திரை, போதை ஊசி பறிமுதல் செய்யப்பட்ட சம்பவம் பரபரப்பு ஏற்படுத்தியுள்ளது.