தெலங்கானாவில் பிரிந்து சென்ற மனைவி வருவார் என பிறந்தநாளில் ஆசையாக காத்திருந்த இளைஞர் தூக்கிட்டு தற்கொலை செய்துக் கொண்ட சம்பவம் பெரும் அதிர்ச்சியை ஏற்படுத்தியுள்ளது. இதுதொடர்பாக காவல்துறையினர் விசாரணை நடத்தி வருகின்றனர்.
இந்த சோக சம்பவம் கோத்தகுடம் மாவட்டம், இல்லெண்டு மண்டலத்தில் நடைபெற்றுள்ளது. அங்குள்ள திலக்நகர் பஞ்சாயத்து எல்லைக்குட்பட்ட கல்திராமையா கிராமத்தில் தட்லா வித்யாசாகர் என்ற 26 வயது இளைஞர் ஒருவர் மணுக்குருவில் ஓட்டுநராகப் பணிபுரிந்து வருகிறார். இவர் கடந்த 3 ஆண்டுகளுக்கு முன்பு கம்மம் மாவட்டம், கரேபள்ளி மண்டலத்தைச் சேர்ந்த ஒரு இளம் பெண்ணை திருமணம் செய்துக் கொண்டார்.
இவர்கள் திருமண வாழ்க்கை எல்லாம் நன்றாக சென்று கொண்டிருந்த நிலையில் தம்பதியினர் தங்கள் கிராமத்தை விட்டு மணுக்குருவில் இருந்து இல்லெண்டு பகுதிக்கு வந்தனர். இந்த நிலையில் கணவன், மனைவி இடையே கருத்து வேறுபாடு ஏற்பட்டது. அடிக்கடி இருவரும் சண்டையிட்டுள்ளனர். அவர்கள் குடும்பத்தினர் சமாதானம் செய்து வைத்தாலும் பிரச்னை குறைந்தபாடில்லை.
இந்த நிலையில் சில நாட்கள் முன்பு ஏற்பட்ட கருத்து வேறுபாட்டால் மனைவி தன் கணவரை விட்டுப் பிரிந்து சொந்த ஊருக்கு சென்றுள்ளார். அந்த பெண் தற்போது கம்மத்தில் உள்ள ஒரு துணிக்கடையில் பணிபுரிந்து வருகிறார். இதனிடையே அக்டோபர் 5ம் தேதி தன் மனைவி பிறந்தநாள் என்பதால் தட்லா வித்யாசாகர் அவரை செல்போனில் அழைத்து பேசி வாழ்த்து தெரிவித்துள்ளார். மீண்டும் வீட்டுக்கு வருமாறு அழைத்ததாகவும், அப்போது அந்த பெண் சரி என சொன்னதாகவும் கூறப்படுகிறது. இந்த நிலையில் வேலை முடிந்து அப்பெண் இலெண்டு பேருந்து நிலையத்திற்கு வருவார் என வித்யாசாகர் காத்திருந்தார்.
ஆனால் அவர் வரவே இல்லை. இதனால் மிகுந்த மன உளைச்சலுக்கு உள்ளான வித்யாசாகர் வீட்டிற்கு திரும்பிய நிலையில் யாரிடமும் பேசாமல் இருந்துள்ளார். இதனிடையே திடீரென அக்டோபர் 6ம் தேதி அதிகாலையில் தனது வீட்டில் தூக்கிட்டு தற்கொலை செய்துக் கொண்டார். இதனைக் கண்டு அதிர்ச்சியடைந்த குடும்பத்தினர் அவரை மருத்துவமனைக்கு அழைத்துச் சென்றனர். ஆனால் வித்யாசாகர் ஏற்கனவே இறந்து விட்டதாக மருத்துவர்கள் தெரிவித்துள்ளனர். இதனைத் தொடர்ந்து இந்த சம்பவம் தொடர்பாக காவல்துறையினர் வித்யாசாகர் மனைவி மற்றும் குடும்பத்தினரிடம் விசாரணை நடத்தி வருகின்றனர்.
(தற்கொலை என்பது எந்தவொரு பிரச்னைக்கும் தீர்வு கிடையாது. மன அழுத்தம் ஏற்பட்டாலோ அல்லது தற்கொலை செய்துக் கொள்ளும் எண்ணம் உண்டானாலோ ஆலோசனைக்கு தொடர்பு கொள்ள வேண்டிய எண்கள்: சினேகா தற்கொலை தடுப்பு உதவி மையம் - 044 -24640050 , மாநில தற்கொலை தடுப்பு உதவி மையம் - 104, சமூக நீதி மற்றும் அதிகாரமளித்தல் அமைச்சகத்தின் ஹெல்ப்லைன் – 1800 599 0019)