கோவையில் நடத்தையில் சந்தேகமடைந்த கணவன் தனது காதல் மனைவியை சரமாரியாக கத்தியால் குத்தி கொலை செய்த சம்பவம் பரபரப்பை ஏற்படுத்தி உள்ளது. கோவை போத்தனூர் காமராஜர் நகர் பகுதியை சேர்ந்த ராமசாமி என்பவரது மகன் நாகார்ஜூன். 30 வயதான இவர் ஆட்டோ டிரைவராக பணியாற்றி வருகிறார். இவர் அதே பகுதியை சேர்ந்த சர்மிளா (27) என்ற பெண்ணை கடந்த 10 ஆண்டுகளாக காதலித்து வந்த நிலையில், கடந்த நான்கு மாதங்களுக்கு முன்பு திருமணம் செய்துள்ளார். வீட்டில் யாரும் ஏற்று கொள்ளாததால் சுந்தராபுரம் காந்தி நகர் பகுதியில் தனிக் குடித்தனம் நடத்தி வந்துள்ளார். இந்த நிலையில் கடந்த சில தினங்களாக சர்மிளா தனது செல்போனில் சந்தேகத்திற்கிடமாக பேசி வந்ததாகவும், ’யாரிடம் பேசுகிறாய்’ என நாகார்ஜூன் கேட்கவே இருவருக்கும் இடையே தொடர் பிரச்சினை இருந்து வந்ததாகவும் கூறப்படுகிறது. மேலும் இருவருக்கும் இடையே அடிக்கடி தகராறு ஏற்பட்டு வந்ததாக தெரிகிறது.
இதனிடையே நேற்று மது போதையில் வீட்டிற்கு சென்ற நாகார்ஜூன் தனது மனைவிக்கு தகாத உறவு இருப்பதாக சந்தேகித்து, வாக்குவாதத்தில் ஈடுபட்டுள்ளார். அப்போது ஆத்திரமடைந்த நாகார்ஜீன் வீட்டில் இருந்த கத்தியை எடுத்து தனது காதல் மனைவியான சர்மிளாவை சரமாரியாக குத்தினார். இதில் சர்மிளா சம்பவ இடத்திலேயே பரிதாபமாக உயிரிழந்தார். பின்னர் நாகார்ஜீன் வீட்டில் இருந்து தப்பி சென்றுள்ளார். இதையடுத்து வழக்கம் போல் இரவில் மது அருந்த சென்ற நாகார்ஜூன் போதையில் தனது நண்பர்களிடம் மனைவியை கத்தியால் குத்தி கொலை செய்ததை தெரிவித்துள்ளார். பின்னர் அங்கிருந்த அவரது நண்பர்கள் போத்தனூர் காவல் நிலையத்திற்கு தகவல் அளித்தனர்.
இந்த தகவலின் பேரில் விரைந்து சென்ற போத்தனூர் காவல் துறையினர் சுந்தராபுரம் பகுதியில் நின்று கொண்டிருந்த நாகார்ஜூனை கைது செய்தனர். மேலும் வீட்டில் சடலமாக கிடந்த சர்மிளாவின் உடலை கைப்பற்றி பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர். இந்த கொலை சம்பவம் குறித்து வழக்குப் பதிவு செய்த காவல் துறையினர், தீவிர விசாரணை நடத்தி வருகின்றனர். பத்து ஆண்டுகள் காதலித்து திருமணம் செய்த இளம் பெண்ணை நான்கே மாதத்தில் சந்தேகத்தின் பேரில் கொலை செய்த சம்பவம் அப்பகுதியில் அதிர்ச்சியை ஏற்படுத்தி உள்ளது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்