திருச்சியில் சிக்கிய 5 சிம் பாக்ஸ்: அதிரடியாக பறிமுதல் செய்த போலீசார்: பொதுமக்களுக்கு எச்சரிக்கை

"வாழ முடியாது விவாகரத்து கொடு" கோர்ட்டுக்கு வந்த மனைவியை நடுரோட்டில் வெட்டிய கணவன்

சேர்மசாமி — Sun, 1 Nov 2026 10:30:04 +0530

"கணவருடன் ஏற்பட்ட பிரச்சனை"

கன்னியாகுமரி மாவட்டம் தக்கலை அருகே ஈத்தன்விளை பகுதியைச் சேர்ந்தவர் 40 வயதுடைய வின்சென்ட் ராஜ். கூலி வேலை செய்து வரும் இவருக்கும், பொன்மனை பகுதியைச் சேர்ந்த 32 வயதுடைய ஜெர்லின் பிரேமாவுக்கும் கடந்த 7 ஆண்டுகளுக்கு முன்பு திருமணம் நடைபெற்றது. இவர்களுக்கு 7 வயதில் ஒரு மகன் உள்ளார்.

இதற்கிடையே , வின்சென்ட் ராஜ் மீது பல்வேறு குற்ற வழக்குகள் இருப்பதாகக் கூறப்படுகிறது. சிறுவன் கொலை தொடர்பான வழக்கும் அவர் மீது இருப்பதாகத் தெரிவிக்கப்படுகிறது. இந்நிலையில் , கணவருடன் ஏற்பட்ட பிரச்சனைகள் காரணமாக அவரைப் பிரிந்து வாழ விரும்பிய ஜெர்லின் பிரேமா, தக்கலை பத்மநாபபுரம் குடும்ப நல நீதிமன்றத்தில் விவாகரத்து கோரி வழக்கு தொடர்ந்துள்ளார். ஆனால் மனைவியுடன் வாழ நினைத்த வின்சென்ட் ராஜ் விவாகரத்துக்கு சம்மதிக்கவில்லை என சொல்லப்படுகிறது.

"மறைத்து வைத்திருந்த அரிவாளால் வெட்டு"

கணவனை பிரிந்து தாய் வீட்டில் இருந்த ஜெர்லின் பிரேமா விவாகரத்து வழக்கு தொடர்பாக நீதிமன்றத்துக்கு அடிக்கடி வந்து சென்றுள்ளார். இந்நிலையில் , விவாகரத்து வழக்கு தொடர்பாக நீதிமன்றத்துக்கு வந்த போது , அங்கு அவரது கணவர் வின்சென்ட் ராஜும் வந்துள்ளார். அப்போது , மனைவி மீது ஆத்திரத்தில் இருந்ததாகக் கூறப்படும் வின்சென்ட் ராஜ், தான் மறைத்து வைத்திருந்த அரிவாளை எடுத்து நீதிமன்றம் முன்புள்ள சாலையில் ஜெர்லின் பிரேமாவை சரமாரியாக வெட்டியுள்ளார்.

இதில் பலத்த காயமடைந்த ஜெர்லின் பிரேமா ரத்த வெள்ளத்தில் சரிந்து விழுந்தார். இதைக் கண்ட அக்கம் பக்கத்தினர் அவரை மீட்டு உடனடியாக மருத்துவமனைக்குச் சிகிச்சைக்காகக் கொண்டு சென்றனர். அங்கு அவர் தீவிர சிகிச்சைப் பிரிவில் அனுமதிக்கப்பட்டுள்ளார்.

இதற்கிடையே, சம்பவ இடத்தில் பொதுமக்கள் கூடியதால் அங்கிருந்து தப்பியோட முயன்ற வின்சென்ட் ராஜை, வழக்கறிஞர் ஒருவர் பிடித்து போலீசாரிடம் ஒப்படைத்ததாகக் கூறப்படுகிறது. நீதிமன்றம் முன்பே விவாகரத்து வழக்குக்காக வந்த மனைவியை கணவர் அரிவாளால் வெட்டிய சம்பவம் அப்பகுதியில் பெரும் பரபரப்பை ஏற்படுத்தியுள்ளது.

40 வில்லாக்கள், விற்ற நிறுவனத்திற்கே குத்தகை, ரூ.1.8 கோடி வாடகை..! வசூலை வாரிக்குவித்த IAS-IPS ஜோடி..!

குலசேகரன் முனிரத்தினம் — Sun, 1 Nov 2026 09:26:27 +0530

Rajasthan IAS IPS: தனியார் நிறுவனங்களுக்கு ஒப்புதல் அளிப்பதில் சலுகைகள் வழங்கியதன் மூலம், வருமானத்திற்கு அதிகமாக சொத்துகளை சேர்த்ததாக ஐஏஎஸ் - ஐபிஎஸ் தம்பதி மீது புகார் எழுந்துள்ளது.

ஐஏஎஸ் - ஐபிஎஸ் தம்பதி மீது குற்றச்சாட்டு:

ராஜஸ்தானைச் சேர்ந்த ஐஏஎஸ் அதிகாரி மற்றும் அவரது குடும்பத்தினர், இரண்டரை ஆண்டுகளில் தனியார் ரிசார்ட்ஸில் உள்ள இரண்டு இடங்களில் 40 வில்லாக்கள் மற்றும் காட்டேஜ்களை ரூ.6.16 கோடிக்கு வாங்கி, பின்னர் அவற்றைஅதே நிறுவனத்திற்கே குத்தகைக்கு விட்டு, ஆண்டுக்கு ரூ.1.8 கோடி வருமானம் ஈட்டியதாக குற்றச்சாட்டு எழுந்துள்ளது. இதையடுத்து அந்த அதிகாரி பதவியைத் தவறாகப் பயன்படுத்தி, குறிப்பிட்ட நிறுவனத்திற்குச் சாதகமான ஒப்பந்தங்களைப் பெற்றுத் தந்ததாகவும், சந்தை விலையை விட மிகக் குறைந்த விலையில் சொத்துக்களை வாங்கியதாகவும் மாநிலத்தின் ஊழல் தடுப்புப் பிரிவு போலீசார் விசாரணையை தொடங்கியுள்ளனர்.

கோடிகளில் புரண்ட ஐஏஎஸ் - ஐபிஎஸ் தம்பதி..!

மாநில தொழில்துறையின் முன்னாள் கூடுதல் தலைமைச் செயலாளரான ஷிகர் அகர்வால், ஏற்கனவே காத்திருப்பு பட்டியலில் வைக்கப்பட்டுள்ளார். அவரது மனைவியும், மூத்த ஐபிஎஸ் அதிகாரியுமான பிரஷாகா மாத்தூரும் காத்திருப்பு பட்டியலுக்கு மாற்றப்பட்டுள்ளார். அனந்தா பிராண்டின் கீழ் ரிசார்ட்டுகளை நடத்தி வரும் கோயல் ஃபேஷன்ஸ் பிரைவேட் லிமிடெட் நிறுவனத்திற்கு முறையற்ற சலுகைகள் வழங்கப்பட்டிருக்கலாம் என்ற, குற்றச்சாட்டுகள் குறித்து விரிவான விசாரணை நடத்த ஊழல் தடுப்புப் பிரிவிற்கு அரசு ஒப்புதல் அளித்துள்ளது. கோயல் ஃபேஷன்ஸ் நிறுவனத்திற்கு முறையற்ற பலன்களைப் பெறுவதற்கும், மாநிலத்திற்குப் பெரும் நிதி இழப்பை ஏற்படுத்துவதற்கும் ஷிகர் அகர்வால் அதன் இயக்குனர்களுடன் கூட்டுச் சதி செய்ததற்கான முதற்கட்ட ஆதாரங்கள் கண்டறியப்பட்டுள்ளதாக கூறப்படுகிறது.

இதையும் படியுங்கள்: German SUV: ரூ.8 லட்சத்துக்கு புதிய ஜெர்மன் எஸ்யுவி..! டர்போ இன்ஜின், 8 ஸ்பீட் ஆட்டோமேடிக் ஆப்ஷன் - முழு விவரம்

குற்றச்சாட்டுகள் என்ன?

ஊழல் தடுப்பு ஆணையத்தின்படி, அந்த நிறுவனம் ரிசார்ட் கட்டுமானத் தேவைகளில் சலுகைகளையும், கட்டாயச் சான்றிதழ்களை முறையாகச் சரிபார்க்காமலேயே ஒப்புதல்களையும், சாதகமான நிபந்தனைகளின் பேரில் சிறப்பு நிதித் தொகுப்புகளையும் பெற்றுள்ளது. இதற்காக ஷிகர் அகர்வால் பணப்பலனை பெற்றுள்ளார். 2023 செப்டம்பரில், அந்தக் குடும்பம் உதய்பூர், புஜ்தாவில் உள்ள ரிசார்ட்டில் 20 காட்டேஜ்களை வாங்கியது. 2026 மார்ச்சில், அவர்கள் அல்வார், அஜப்கரில் உள்ள ரிசார்ட்டில் மேலும் 20 வில்லாக்களை வாங்கினர். கோயல் ஃபேஷன்ஸ் நிறுவனத்திடமிருந்து இந்தச் சொத்துக்கள் மொத்தம் ரூ. 6.16 கோடிக்கு வாங்கப்பட்டன. சில வில்லாக்கள் அவற்றின் சந்தை மதிப்பை விட கணிசமாகக் குறைந்த விலையில் வாங்கப்பட்டிருக்கலாம் என்று கூறப்படுகிறது.

விலையை குறைத்து பத்திரப்பதிவு:

அந்த முகமையின்படி, அகர்வால் மற்றும் மாத்தூர் இருவரும் உதய்பூர் ரிசார்ட்டில் தலா 15 லட்சம் ரூபாய்க்கு 10 வில்லாக்களை வாங்கியுள்ளனர். அல்வார் ரிசார்ட்டில், எட்டு வில்லாக்கள் தலா 16.5 லட்சம் ரூபாய்க்கு அவர்கள் பெயரில் பதிவு செய்யப்பட்டுள்ளன. அவர்களுடைய இரண்டு மகன்கள் தலா சுமார் 15 லட்சம் ரூபாய்க்கு நான்கு வில்லாக்களை வாங்கியதாகவும், மேலும் நான்கு வில்லாக்கள் மாத்தூரின் பெற்றோர் பெயரில் சுமார் 16.5 லட்சம் ரூபாய்க்கு பதிவு செய்யப்பட்டுள்ளதாகவும் கூறப்படுகிறது. ஷிகர் அகர்வாலின் குடும்பத்தினர், சொத்துக்கள் யாரிடமிருந்து வாங்கப்பட்டனவோ அதே கோயல் ஃபேஷன்ஸ் நிறுவனத்துடன் பதிவு செய்யப்பட்ட குத்தகை ஒப்பந்தங்களை மேற்கொண்டனர்.

ஒப்பந்தங்களின்படி, உதய்பூரில் உள்ள ஒவ்வொரு காட்டேஜும் ஆண்டுக்கு ரூ. 4 லட்சத்திற்கும், அல்வாரில் உள்ள ஒவ்வொரு வில்லாவும் ஆண்டுக்கு ரூ. 5 லட்சத்திற்கும் நிறுவனத்திற்கே மீண்டும் குத்தகைக்கு விடப்பட்டது. இந்த 40 சொத்துக்களும் இணைந்து ஆண்டுக்கு ரூ. 1.80 கோடி குத்தகை வருமானத்தை ஈட்டும் என மதிப்பிடப்பட்டுள்ளது. இதில் உதய்பூரிலிருந்து ரூ. 80 லட்சமும், அல்வாரிலிருந்து ரூ. 1 கோடியும் அடங்கும்.

5000 கிடைக்கும் என ஆசை! 'தாய்மாமன் சீர்', 'வெற்றி பயணம்' பெயரில் போலி லிங்க் – மக்களே உஷார்!

கிஷோர் — Sun, 1 Nov 2026 08:36:01 +0530

அரசுத் திட்டங்களின் பெயர்களைப் பயன்படுத்தி, பொதுமக்களிடம் ஆன்லைன் மூலம் பண மோசடியில் ஈடுபடும் கும்பல்களின் நடமாட்டம் அதிகரித்து வருகிறது. அந்த வகையில், 'தாய்மாமன் சீர்', 'வெற்றி பயணம்' ஆகிய திட்டங்களின் பெயர்களில் போலி இணையதள இணைப்புகளை சமூக வலைதளங்களில் பரப்பி, பொதுமக்களின் வங்கிக் கணக்குகளில் இருந்து பணத்தைத் திருடும் முயற்சியில் மோசடி கும்பல் ஈடுபட்டு வருவது அதிர்ச்சியை ஏற்படுத்தியுள்ளது. அரசின் புதிய அறிவிப்புகள் மற்றும் நலத்திட்டங்கள் குறித்த மக்களின் ஆர்வத்தைத் தங்களுக்கு சாதகமாகப் பயன்படுத்தி, இந்த மோசடி அரங்கேற்றப்பட்டு வருகிறது.

தொழில்நுட்ப வளர்ச்சியைப் பயன்படுத்தி அதிகரிக்கும் ஆன்லைன் மோசடிகள்

தற்போதைய காலகட்டத்தில் இணையதளம் மற்றும் சமூக வலைதளங்களின் பயன்பாடு அதிகரித்துள்ள நிலையில், அதனைப் பயன்படுத்தி பல்வேறு வகையான சைபர் குற்றங்களும் அதிகரித்து வருகின்றன. குறிப்பாக, அரசு நலத்திட்டங்கள், நிதியுதவிகள், முதலீட்டுத் திட்டங்கள் மற்றும் பரிசுத் தொகைகள் வழங்கப்படுவதாகக் கூறி போலியான இணையதள இணைப்புகளை உருவாக்கி பொதுமக்களுக்கு அனுப்புகின்றனர். அரசு இணையதளங்களைப் போன்ற தோற்றத்தில் போலி இணையதளங்களை உருவாக்கி, அதன் மூலம் தனிப்பட்ட விவரங்கள் மற்றும் வங்கிக் கணக்கு தொடர்பான தகவல்களைப் பெற்று பண மோசடியில் ஈடுபடுகின்றனர்.

பிரதமர் மோடி, நிர்மலா சீதாராமன் படங்களைப் பயன்படுத்தி மோசடி

ஏற்கெனவே பிரதமர் நரேந்திர மோடி மற்றும் மத்திய நிதி அமைச்சர் நிர்மலா சீதாராமன் உள்ளிட்ட முக்கியப் பிரபலங்களின் புகைப்படங்களைப் பயன்படுத்தி, சமூக வலைதளங்களில் போலியான விளம்பரங்கள் மற்றும் வீடியோக்கள் வெளியிடப்பட்டு வந்தன. குறிப்பாக, முதலீடு செய்தால் குறுகிய காலத்தில் பல மடங்கு லாபம் கிடைக்கும் என்றும், குறிப்பிட்ட திட்டங்களில் பணம் செலுத்தினால் அதிக வருமானம் பெறலாம் என்றும் போலியான தகவல்கள் பரப்பப்பட்டன. இதற்காக செயற்கை நுண்ணறிவு தொழில்நுட்பத்தைப் பயன்படுத்தி உருவாக்கப்பட்ட போலி வீடியோக்களும் பயன்படுத்தப்படுவதாகக் கூறப்படுகிறது.

இந்த நிலையில், தமிழகத்தில் அறிவிக்கப்பட்டுள்ள புதிய திட்டங்களின் பெயர்களையும் பயன்படுத்தி மோசடி கும்பல் பொதுமக்களைக் குறிவைக்கத் தொடங்கியுள்ளது. குறிப்பாக, 'தாய்மாமன் சீர்', 'வெற்றி பயணம்' ஆகிய திட்டங்களின் பெயர்களில் போலியான இணையதள இணைப்புகள் பரப்பப்படுகின்றன.

ரூ.5,000 கிடைக்கும் எனக் கூறி போலி லிங்க்!

சமூக வலைதளங்களில் பரப்பப்படும் போலி இணைப்புகளில், 'தாய்மாமன் சீர் திட்டத்தின் கீழ் ரூ.5,000 பெற உடனடியாக இந்த லிங்கை கிளிக் செய்யுங்கள்' என்றும், 'வெற்றி பயணம் திட்டத்தில் இணைய உடனடியாகப் பதிவு செய்யுங்கள்' என்றும் கவர்ச்சிகரமான வாசகங்கள் இடம்பெற்றுள்ளன. இதனைப் பார்க்கும் பொதுமக்கள், அரசு சார்பில் உண்மையாகவே நிதியுதவி அல்லது திட்டப் பதிவு அறிவிக்கப்பட்டுள்ளதாக நினைத்து அந்த இணைப்புகளைத் திறக்க வாய்ப்புள்ளது.

அவ்வாறு இணைப்புகளைத் திறந்து, அதில் கேட்கப்படும் விவரங்களைப் பதிவு செய்யும் நபர்களின் வங்கிக் கணக்கு தொடர்பான தகவல்களை மோசடி கும்பல் திருடுவதற்கான வாய்ப்புள்ளது. இதனைத் தொடர்ந்து வங்கிக் கணக்குகளில் உள்ள பணத்தை வேறு கணக்குகளுக்கு மாற்றி மோசடியில் ஈடுபடுகின்றனர். அரசு திட்டங்களின் பெயர்களில் போலியான இணையதளங்களை உருவாக்கி, மக்களின் நம்பிக்கையைப் பெறும் வகையில் இந்த மோசடி முயற்சிகள் மேற்கொள்ளப்படுகின்றன.

பொதுமக்களுக்கு சைபர் குற்றப்பிரிவு போலீசார் எச்சரிக்கை

இதுபோன்ற போலியான இணையதள இணைப்புகள் மூலம் பண மோசடி நடைபெறுவது தொடர்பாகப் பொதுமக்கள் எச்சரிக்கையுடன் இருக்க வேண்டும் என சைபர் குற்றப்பிரிவு போலீசார் அறிவுறுத்தியுள்ளனர். குறிப்பாக, சமூக வலைதளங்களில் வரும் அரசு நலத்திட்டங்கள் தொடர்பான அறிவிப்புகளை உடனடியாக நம்பி, அதில் உள்ள இணைப்புகளைத் திறந்து தனிப்பட்ட விவரங்களைப் பதிவு செய்ய வேண்டாம் என எச்சரிக்கப்பட்டுள்ளது.

அரசுத் திட்டங்கள் தொடர்பான உண்மையான அறிவிப்புகளை சம்பந்தப்பட்ட அரசுத் துறைகளின் அதிகாரப்பூர்வ இணையதளங்கள் மற்றும் சரிபார்க்கப்பட்ட சமூக வலைதளப் பக்கங்கள் வாயிலாக மட்டுமே உறுதி செய்ய வேண்டும். வங்கிக் கணக்கு எண், ஏடிஎம் அட்டை விவரங்கள், ஓடிபி மற்றும் ரகசிய குறியீடுகள் போன்றவற்றை யாரிடமும் பகிரக்கூடாது. சந்தேகத்திற்கிடமான இணைப்புகளைத் திறப்பதையும், அதில் வரும் வழிமுறைகளைப் பின்பற்றுவதையும் தவிர்க்க வேண்டும்.

ஆன்லைன் மோசடியில் பணத்தை இழந்தவர்கள் உடனடியாக 1930 என்ற சைபர் குற்ற உதவி எண்ணை தொடர்புகொண்டு புகார் அளிக்கலாம். மேலும், தேசிய சைபர் குற்றப் புகார் இணையதளமான [cybercrime.gov.in] மூலமாகவும் புகார் அளிக்கலாம். அரசு திட்டங்களின் பெயர்களில் போலி இணைப்புகளைப் பரப்பி நடைபெறும் மோசடிகளைத் தடுக்க பொதுமக்களிடம் விழிப்புணர்வு அவசியமாகியுள்ளது.

காஞ்சிபுரம் மக்களுக்கு குட் நியூஸ்! தொழில் தொடங்க ரூ.12.18 கோடி கடன் ஒப்புதல்!

கிஷோர் — Sun, 1 Nov 2026 08:21:28 +0530

காஞ்சிபுரம் மாவட்டத்தில் குறு, சிறு மற்றும் நடுத்தரத் தொழில் நிறுவனங்களின் வளர்ச்சியை ஊக்குவிக்கும் வகையில் நடைபெற்ற தொழில் கடன் விழிப்புணர்வு முகாமில், 72 பயனாளிகளுக்கு ரூ.12.18 கோடி மதிப்பிலான கடன் ஒப்பளிப்பு ஆணைகள் வழங்கப்பட்டன. மேலும், மகளிர் தொழில் முனைவோரை ஊக்குவிக்கும் வகையில் 6 பெண்களுக்கு இ-ஆட்டோக்களை மாவட்ட ஆட்சியர் தி.சினேகா வழங்கி, கொடியசைத்து பயன்பாட்டைத் தொடங்கி வைத்தார்.

மாவட்ட ஆட்சியர் தலைமையில் தொழில் கடன் விழிப்புணர்வு முகாம்

காஞ்சிபுரம் மாவட்ட ஆட்சியர் அலுவலக வளாகத்தில் உள்ள ஊரக வளர்ச்சி முகமை கூட்டரங்கில், மாவட்டத் தொழில் மையத்தின் சார்பில் நேற்று (அக்டோபர் 30) தொழில் கடன் விழிப்புணர்வு முகாம் நடைபெற்றது. இந்த முகாமிற்கு மாவட்ட ஆட்சித்தலைவர் தி.சினேகா தலைமை வகித்தார்.

ஊரகப் பகுதிகளில் வேலைவாய்ப்புகளை உருவாக்குவதிலும், உள்ளடக்கிய வளர்ச்சியை உறுதி செய்வதிலும் குறு, சிறு மற்றும் நடுத்தரத் தொழில் நிறுவனங்கள் முக்கியப் பங்கு வகிக்கின்றன. இதனை கருத்தில் கொண்டு, இத்தகைய நிறுவனங்களுக்குத் தேவையான வங்கிக் கடன்கள் உரிய காலத்தில் கிடைப்பதை உறுதி செய்ய தமிழக அரசு பல்வேறு நடவடிக்கைகளை மேற்கொண்டு வருகிறது.

காஞ்சிபுரம் மாவட்டத்திற்கு ரூ.8,346 கோடி கடன் இலக்கு!

2026-27ஆம் நிதியாண்டிற்கான ஆண்டு நிதிக் கடன் திட்டத்தின் கீழ், காஞ்சிபுரம் மாவட்டத்தில் செயல்பட்டு வரும் குறு, சிறு மற்றும் நடுத்தரத் தொழில் நிறுவனங்களுக்கு மொத்தம் ரூ.8,346.24 கோடி கடன் வழங்க இலக்கு நிர்ணயிக்கப்பட்டுள்ளது.

இதில் செப்டம்பர் மாதத்துடன் முடிவடைந்த முதல் காலாண்டு காலப்பகுதியில் மட்டும் ரூ.5,660.85 கோடி கடன் வழங்கப்பட்டுள்ளது. இது நிர்ணயிக்கப்பட்ட இலக்கில் 67.82 சதவீதமாகும். மேலும், அக்டோபர் மாதத்தில் மட்டும் குறு, சிறு மற்றும் நடுத்தரத் தொழில் நிறுவனங்களுக்கு ரூ.447.96 கோடி கடனுதவி வழங்கப்பட்டுள்ளதாக மாவட்ட ஆட்சியர் தெரிவித்தார்.

தொடர்ந்து, வங்கிகள் தங்களுக்கு நிர்ணயிக்கப்பட்ட கடன் இலக்குகளை விரைந்து எட்டுவதுடன், தொழில் தொடங்க ஆர்வமுள்ள பயனாளிகளுக்கு அரசு மானியத்துடன் கூடிய கடனுதவிகளை விரைவாக வழங்க வேண்டும் என்றும் ஆட்சியர் கேட்டுக்கொண்டார். கடனுதவி பெற்று தொழில் தொடங்கும் பயனாளிகள் தங்களது தொழிலை சிறப்பாக நடத்தி பொருளாதார முன்னேற்றம் அடைய வேண்டும் என்றும் அறிவுறுத்தினார்.

72 பயனாளிகளுக்கு ரூ.12.18 கோடி கடன் ஒப்பளிப்பு!

இந்த விழிப்புணர்வு முகாமின் முக்கிய நிகழ்வாக, மாவட்டத் தொழில் மையத்தின் மூலம் செயல்படுத்தப்படும் பல்வேறு சுயவேலைவாய்ப்புத் திட்டங்களின் கீழ் தேர்வு செய்யப்பட்ட மொத்தம் 72 பயனாளிகளுக்கு ரூ.12.18 கோடி மதிப்பிலான வங்கிக் கடன் ஒப்பளிப்பு ஆணைகளை மாவட்ட ஆட்சியர் வழங்கினார்.

இந்தக் கடனுதவிகள் மூலம் பயனாளிகள் புதிதாகத் தொழில் தொடங்குவதற்கும், ஏற்கனவே நடத்தி வரும் தொழில்களை விரிவுபடுத்துவதற்கும், தங்களது தொழில் நடவடிக்கைகளை மேம்படுத்துவதற்கும் வாய்ப்பு ஏற்பட்டுள்ளது. இதன் மூலம் தனிநபர் வருமானம் உயர்வதுடன், குடும்பங்களின் பொருளாதார நிலையும் மேம்படும் என எதிர்பார்க்கப்படுகிறது.

6 பெண்களுக்கு இ-ஆட்டோ வழங்கிய ஆட்சியர்!

மகளிர் தொழில் முனைவோரை ஊக்குவித்து, அவர்கள் பொருளாதார ரீதியாக சுயசார்பு அடைவதை நோக்கமாகக் கொண்டு பல்வேறு திட்டங்கள் செயல்படுத்தப்பட்டு வருகின்றன. அந்த வகையில், நபார்டு வங்கியின் மூலம் 30 நாட்கள் பயிற்சி அளிக்கப்பட்டு, மாவட்டத் தொழில் மையத்தின் வாயிலாக செயல்படுத்தப்படும் தமிழ்நாடு மகளிர் தொழில் முனைவோர் அங்கீகாரத் திட்டம் (TWEES) மற்றும் அண்ணல் அம்பேத்கர் வணிக முன்னோடிகள் திட்டம் (AABCS) ஆகிய திட்டங்களின் கீழ் 6 மகளிருக்கு இ-ஆட்டோக்கள் வழங்கப்பட்டன.

இந்த இ-ஆட்டோக்களை மாவட்ட ஆட்சியர் தி.சினேகா பயனாளிகளுக்கு வழங்கியதுடன், கொடியசைத்து அவற்றின் இயக்கத்தையும் தொடங்கி வைத்தார். இதன் மூலம் பெண்கள் சுயமாக வருமானம் ஈட்டுவதற்கும், தொழில் முனைவோராக வளர்வதற்கும் புதிய வாய்ப்பு உருவாகியுள்ளது.

தொழில் முனைவோருக்கு வங்கிக் கடன் பெறுவது குறித்து விளக்கம்

இந்த முகாமின் நோக்கம் மாவட்டத்தில் குறு, சிறு மற்றும் நடுத்தரத் தொழில் நிறுவனங்கள் எளிதாக வங்கிக் கடன்களைப் பெறுவதை உறுதி செய்வதுடன், தமிழக அரசின் பல்வேறு சுயவேலைவாய்ப்புத் திட்டங்கள் குறித்த விழிப்புணர்வை ஏற்படுத்துவதாகும்.

இதில் பல்வேறு வங்கிகள் மற்றும் நிதி நிறுவனங்களைச் சேர்ந்த அலுவலர்கள் பங்கேற்று, தங்களது வங்கிகள் மூலம் வழங்கப்படும் கடன் திட்டங்கள், கடன் பெறுவதற்கான நடைமுறைகள் மற்றும் தொழில் தொடங்குவதற்கான நிதி வாய்ப்புகள் குறித்து விளக்கினர்.

மேலும், மாவட்டத் தொழில் மையத்தின் பொதுமேலாளர், மையத்தின் மூலம் செயல்படுத்தப்படும் சுயதொழில் திட்டங்கள், தொழில் கடன் பெறுவதற்கான வழிமுறைகள் மற்றும் புதிய தொழில்களைத் தொடங்குவதற்கான வாய்ப்புகள் குறித்து விரிவாக எடுத்துரைத்தார். தொழில் தொடங்க ஆர்வமுள்ளவர்கள் கூடுதல் விவரங்களுக்கு காஞ்சிபுரம் மாவட்டத் தொழில் மையத்தை நேரில் அணுகலாம் என்றும் தெரிவித்தார்.

மொத்தத்தில், காஞ்சிபுரம் மாவட்டத்தில் தொழில்முனைவோர் வளர்ச்சி, மகளிர் சுயசார்பு, புதிய வேலைவாய்ப்புகள் மற்றும் உள்ளூர் பொருளாதார முன்னேற்றத்தை ஊக்குவிக்கும் வகையில் இந்தத் தொழில் கடன் விழிப்புணர்வு முகாம் அமைந்தது.

"முகம் கேவலமா இருக்கு" கேலி செய்த சக தொழிலாளியை கொடூரமாக தீர்த்துக் கட்டிய நபரால் பரபரப்பு

சேர்மசாமி — Sat, 31 Oct 2026 23:10:12 +0530

"கோடாரியால் வெட்டி கொலை"

தூத்துக்குடி மாவட்டம் கோவில்பட்டி நகராட்சிக்குட்பட்ட சங்கரலிங்கபுரம் பகுதியைச் சேர்ந்தவர் மாயாண்டியின் மகன் காளிராஜ் ( வயது 42 ). இவர் திட்டங்குளத்தில் உள்ள பெருந்தலைவர் காமராஜர் வணிக வளாகத்தில் செயல்பட்டு வரும் தனியார் தினசரி சந்தையில் சுமை தூக்கும் தொழிலாளியாகப் பணியாற்றி வந்தார்.

அதே சந்தையில் , அஞ்சரம்பட்டி கிராமத்தைச் சேர்ந்த முத்துக்கருப்பனின் மகனான 40 வயதுடைய சின்னத்துரை என்பவரும் சுமை தூக்கும் தொழிலாளியாகப் பணியாற்றி வந்தார். இருவருக்கும் இடையே அடிக்கடி தகராறு ஏற்பட்டு வந்ததாகக் கூறப்படுகிறது.

இந்நிலையில் தினசரி சந்தையில் உள்ள காய்கறிக் கடையில் காளிராஜ் தூங்கிக் கொண்டிருந்தார். அப்போது அங்கு வந்த சின்னத்துரை, கோடரியால் காளிராஜை வெட்டிக் கொலை செய்ததாகக் கூறப்படுகிறது. பின்னர் , அவர் கொப்பம்பட்டி காவல் நிலையத்திற்குச் சென்று சரணடைந்தார். இது குறித்து கொப்பம்பட்டி போலீசார் , கோவில்பட்டி கிழக்கு காவல் நிலைய போலீசாருக்குத் தகவல் தெரிவித்தனர். இதையடுத்து சம்பவ இடத்துக்கு விரைந்த போலீசார், உயிரிழந்த காளிராஜின் உடலை மீட்டு , உடற்கூறாய்வுக்காக கோவில்பட்டி அரசு மருத்துவமனைக்கு அனுப்பி வைத்தனர்.

"உன் முகம் கேவலமா இருக்கு பாக்க முடியல"

தூத்துக்குடி மாவட்ட காவல் கண்காணிப்பாளர் சிவபிரசாத் சம்பவ இடத்தை நேரில் பார்வையிட்டு விசாரணை நடத்தினார். காவல் நிலையத்தில் சரணடைந்த சின்னத்துரையிடமும் போலீசார் தீவிர விசாரணை மேற்கொண்டு வருகின்றனர். போலீசாரின் முதற்கட்ட விசாரணையில், காளிராஜ் சின்னத்துரையை பார்க்கும் போது "உன் முகம் கேவலமா இருக்கு பாக்க முடியல" என கூறி வந்துள்ளார். இதனால் இருவருக்கும் இடையே அடிக்கடி வாக்குவாதம் ஏற்பட்டதாகத் தெரிகிறது.

வழக்கம் போல கடந்த சனிக்கிழமை சுமை தூக்கும் வேலைக்கு வந்த இருவருக்கும் இடையே தகராறு ஏற்பட்ட போது, காளிராஜ் சின்னத்துரையை கேலி செய்து கீழே தள்ளித் தாக்கியதாகக் கூறப்படுகிறது. தினசரி சந்தையில் மற்றவர்கள் முன்னிலையில் தன்னைத் தாக்கியதை அவமானமாகக் கருதிய சின்னத்துரை, ஆத்திரத்தில் காளிராஜைக் கொலை செய்தது தெரிய வந்துள்ளது. இருப்பினும் , உருவக் கேலி மற்றும் தாக்குதல் சம்பவங்கள் தான் கொலைக்குக் காரணமா அல்லது வேறு ஏதேனும் முன்விரோதம் உள்ளதா என்பது குறித்து போலீசார் தொடர்ந்து விசாரணை நடத்தி வருகின்றனர்.

கொலை செய்யப்பட்ட காளிராஜுக்குத் திருமணமாகி மூன்று குழந்தைகள் உள்ளனர். கடந்த சில மாதங்களுக்கு முன்பு தான் அவரது மனைவிக்கு இரட்டை ஆண் குழந்தைகள் பிறந்துள்ளன. இந்நிலையில் , காளிராஜ் கொலை செய்யப்பட்ட சம்பவம் அவரது குடும்பத்தினரிடையே பெரும் சோகத்தை ஏற்படுத்தியுள்ளது. விளையாட்டாகத் தொடங்கியதாகக் கூறப்படும் கேலி , வாக்குவாதம் மற்றும் முன் விரோதம் கொலையில் முடிந்த சம்பவம் கோவில்பட்டி பகுதியில் பரபரப்பை ஏற்படுத்தியுள்ளது.

மனநலம் பாதிக்கப்பட்ட சிறுமிக்கு கொடூரம்... அக்காவையும் விட்டுவைக்காத முதியவர்! நீதிமன்றம் அதிரடி தீர்ப்பு!

சிவரஞ்சித் — Sat, 31 Oct 2026 17:28:24 +0530

விழுப்புரம்: மனநலம் பாதிக்கப்பட்ட 14 வயது சிறுமி மற்றும் அவரது 25 வயது அக்கா ஆகிய இருவரையும் பாலியல் வன்கொடுமை செய்த வழக்கில், குற்றவாளியான 50 வயது முதியவருக்கு இயற்கை மரணம் ஏற்படும் வரை சிறை தண்டனை விதித்து விழுப்புரம் போக்சோ சிறப்பு நீதிமன்றம் அதிரடி தீர்ப்பளித்துள்ளது. மேலும், பாதிக்கப்பட்ட இரு சகோதரிகளுக்கும் தமிழக அரசு சார்பில் தலா ரூ.10 லட்சம் இழப்பீடு வழங்க நீதிபதி உத்தரவிட்டுள்ளார்.

சிறுமிக்கு நேர்ந்த கொடுமை

விழுப்புரம் மாவட்டம், திண்டிவனம் அடுத்த கிராண்டிபுரம் பகுதியைச் சேர்ந்தவர் கன்னியப்பன் (50). இவர் கடந்த 2019-ஆம் ஆண்டு ஜனவரி 15-ஆம் தேதி மனநலம் பாதிக்கப்பட்ட 14 வயது சிறுமியை பாலியல் வன்கொடுமை செய்துள்ளார்.

இந்தச் சம்பவம் தொடர்பாக பாதிக்கப்பட்ட சிறுமி தரப்பில் அளிக்கப்பட்ட புகாரின் அடிப்படையில், திண்டிவனம் அனைத்து மகளிர் போலீசார் போக்சோ சட்டத்தின் கீழ் வழக்குப்பதிவு செய்து விசாரணை மேற்கொண்டனர். தொடர்ந்து கன்னியப்பனை கைது செய்து விசாரணை நடத்தினர்.

அக்காவையும் பாலியல் வன்கொடுமை செய்தது அம்பலம்

போலீசார் நடத்திய விசாரணையில், பாதிக்கப்பட்ட 14 வயது சிறுமியின் 25 வயது அக்காவையும் கன்னியப்பன் பாலியல் வன்கொடுமை செய்தது தெரியவந்தது. இதனால் இந்த வழக்கு மேலும் அதிர்ச்சியை ஏற்படுத்தியது.

இதையடுத்து, இரு சகோதரிகளும் பாதிக்கப்பட்டது தொடர்பான குற்றச்சாட்டுகளின் அடிப்படையில் போலீசார் விசாரணையைத் தொடர்ந்து முடித்து, வழக்கை நீதிமன்ற விசாரணைக்கு கொண்டு சென்றனர்.

இயற்கை மரணம் ஏற்படும் வரை சிறை – நீதிபதி அதிரடி தீர்ப்பு

இந்த வழக்கு விழுப்புரத்தில் உள்ள போக்சோ சிறப்பு நீதிமன்றத்தில் நடைபெற்று வந்தது. பல்வேறு கட்ட விசாரணைகள் மற்றும் சாட்சியங்களின் அடிப்படையில் வழக்கை விசாரித்த நீதிபதி வினோதா, குற்றம் சாட்டப்பட்ட கன்னியப்பன் மீதான குற்றச்சாட்டுகள் நிரூபிக்கப்பட்டதைத் தொடர்ந்து தண்டனை விவரங்களை அறிவித்தார்.

அதன்படி, கன்னியப்பனுக்கு இயற்கை மரணம் ஏற்படும் வரை சிறை தண்டனை விதித்து தீர்ப்பளித்த நீதிபதி, அவருக்கு ரூ.14 ஆயிரம் அபராதமும் விதித்தார்.

இரு சகோதரிகளுக்கும் தலா ரூ.10 லட்சம் இழப்பீடு

மேலும், இந்த வழக்கில் பாதிக்கப்பட்ட 14 வயது சிறுமி மற்றும் அவரது 25 வயது அக்கா ஆகிய இருவருக்கும் அரசு சார்பில் தலா ரூ.10 லட்சம் வீதம் மொத்தம் ரூ.20 லட்சம் இழப்பீட்டுத் தொகை வழங்க வேண்டும் என்றும் நீதிபதி உத்தரவிட்டார்.

ஒரே குடும்பத்தைச் சேர்ந்த இரு சகோதரிகளையும் பாலியல் வன்கொடுமை செய்த வழக்கில், குற்றவாளிக்கு இயற்கை மரணம் ஏற்படும் வரை சிறை தண்டனை விதிக்கப்பட்டுள்ளதும், பாதிக்கப்பட்ட இருவருக்கும் தலா ரூ.10 லட்சம் இழப்பீடு வழங்க உத்தரவிடப்பட்டுள்ளதும் விழுப்புரம் மாவட்டத்தில் பரபரப்பை ஏற்படுத்தியுள்ளது.

சிறுமிகள் மற்றும் பெண்களுக்கு எதிரான பாலியல் குற்றங்களில் கடுமையான சட்ட நடவடிக்கைகள் எடுக்கப்பட வேண்டும் என்ற எதிர்பார்ப்புக்கு மத்தியில் இந்தத் தீர்ப்பு முக்கியத்துவம் பெற்றுள்ளது.

நடிகை ராதிகா வீட்டுப் பணிப்பெண் மகன் கொடூர கொலை: பீர் பாட்டிலால் கழுத்தறுத்து பீச்சில் புதைப்பு

ராஜேஷ். எஸ் — Sat, 31 Oct 2026 15:02:38 +0530

நடிகை ராதிகா வீட்டு பணிப்பெண்ணின் மகனை சென்னை அருகே பழவேற்காடு கடற்கரையில் பீர் பாட்டிலால் கழுத்தை அறுத்து மணலில் புதைத்த சம்பவம் அதிர்ச்சியை ஏற்படுத்தியுள்ளது.

கடலூர் மாவட்டத்தை சேர்ந்த இளைஞர் திருமணத்தை மீறிய உறவால் அடித்து கொலை செய்ததாக கைது செய்யப்பட்டவர்கள் அளித்த தகவலின்பேரில், வருவாய் துறை அதிகாரிகளின் மேற்பார்வையில் உடல் தோண்டி எடுத்து கூராய்வுக்காக அனுப்பி வைக்கப்பட்டுள்ளது.

ராதிகா வீட்டு பணிப்பெண்

கடலூர் மாவட்டம் பண்ருட்டியை அடுத்த சிறுவத்தூர் கிராமத்தைச் சேர்ந்த எழில் செல்வி என்பவரது மகன் பிரசாந்த் (19). எழில் செல்வி சென்னையில் உள்ள நடிகை ராதிகா சரத்குமார் வீட்டில் பணி பெண்ணாக பணியாற்றி வருகிறார். இவரது மகன் பிரசாந்த் தமது மாமா ரமேஷ் என்பவருடன் வீடுகளுக்கு டைல்ஸ் போடும் வேலை பார்த்து வந்ததாக தெரிகிறது. கடந்த 27-ஆம் தேதி சென்னையில் உள்ள தமது தாயை பார்க்க செல்வதாக தாய்மாமனிடம் கூறிவிட்டு வந்த பிரசாந்த், மறுநாள் 28-ஆம் தேதி தமது நண்பருக்கு வீடியோ கால் செய்து தம்மை அடிப்பதாக கூறியதாக சொல்லப்படுகிறது. பின்னர் அவரது தொலைபேசி அணைத்து வைக்கப்பட்டதாக ரமேஷ் கடலூர் மாவட்டம் புதுப்பேட்டை காவல் நிலையத்தில் புகார் அளித்துள்ளார்.

இந்த புகாரின் பேரில் கடலூர் போலீசார், காணாமல் போனவர் பிரிவில் வழக்கு பதிந்து விசாரணை நடத்தி வந்த நிலையில், முதற்கட்ட விசாரணையில் அதே கிராமத்தை சேர்ந்த பிரசாந்தின் நண்பன் வேதராசு என்பவரது மனைவியுடன் பிரசாந்துக்கு திருமணத்தை மீறிய உறவு இருந்ததும், தமது நண்பன் தினேஷ் என்பவருடன் சேர்ந்து பிரசாந்தை சென்னை அடுத்த பழவேற்காடு கடற்கரை பகுதியில் பீர் பாட்டிலால் கழுத்தை அறுத்து கொலை செய்து புதைத்ததாக வாக்குமூலம் அளித்துள்ளனர்.

கடற்கரை மணலில் புதைக்கப்பட்ட சடலம்

இதனைத் தொடர்ந்து கடலூர் போலீசார் இருவரையும் கைது செய்து, சென்னை அழைத்து வந்து பழவேற்காடு அடுத்த சாட்டாங் குப்பம் கடற்கரை பகுதியில் சடலம் புதைத்த இடத்தை அடையாளம் காட்டியுள்ளனர். கடலூர் போலீசார், திருப்பாலைவனம் போலீசாரின் உதவியுடன் கடற்கரை மணலில் மேலோட்டமாக புதைக்கப்பட்ட சடலத்தை கைப்பற்றி உடற்கூறு ஆய்விற்காக பொன்னேரி அரசு மருத்துவமனைக்கு அனுப்பி வைத்தனர்.

மேலும், கொலை சம்பவம் அரங்கேறி உள்ள காவல் நிலைய எல்லையான திருப்பாலைவனம் போலீசார் கொலை வழக்கு பதிந்து கடலூர் போலீசார் கைது செய்து அழைத்து வந்த இருவரையும் கைது செய்து விசாரணை நடத்தி வருகின்றனர்.

நடிகை ராதிகா வீட்டு பணிப்பெண்ணின் மகன் சென்னை அருகே அடித்து கொலை செய்து கடற்கரையில் புதைக்கப்பட்ட சம்பவம் பரபரப்பை ஏற்படுத்தி உள்ளது.

ஆம்ஸ்ட்ராங் கொலை சம்பவம் பாணியில்! உணவு டெலிவரி உடை! கத்தி, முகமூடி! 4 பேர் கொண்ட கும்பல் சிக்கியது எப்படி?

வினோத்குமார் — Sat, 31 Oct 2026 15:00:25 +0530

கிருஷ்ணகிரி புதிய பேருந்து நிலையத்தில் நகர காவல் துறையினர் இரவு ரோந்து பணியில் ஈடுபட்டிருந்தனர். அப்போது கருப்பு உடை அணிந்த 4 இளைஞர்கள் சந்தேகப்படும் வகையில் அங்கு தூங்கிக் கொண்டிருந்தனர். அவர்களிடம் போலீசார் விசாரித்தபோது, ஓசூரில் இருந்து இருசக்கர வாகனத்தில் வந்ததாகவும், போச்சம்பள்ளி செல்ல வேண்டும் என்றும் தெரிவித்துள்ளனர். ஆனால், ஊருக்குச் செல்லாமல் பேருந்து நிலையத்தில் கருப்பு உடை அணிந்து படுத்திருந்தது போலீசாருக்கு சந்தேகத்தை ஏற்படுத்தியது.

போலீசாருக்கு காத்திருந்த அதிர்ச்சி

இதையடுத்து அவர்களிடம் இருந்த பையைச் சோதனை செய்தபோது போலீசாருக்கு அதிர்ச்சி காத்திருந்தது. அந்த பையில் கத்தி, முகமூடி, கையுறைகள், மயக்க மருந்து, சிரிஞ்ச், லேசர் லைட், பூச்சிக்கொல்லி மருந்து, ஆசிட் உள்ளிட்ட பல்வேறு பொருட்கள் இருந்ததாக கூறப்படுகிறது. இதனால் நான்கு பேரையும் காவல் நிலையத்திற்கு அழைத்துச் சென்று போலீசார் பாணியில் தீவிர விசாரணை மேற்கொண்டனர். விசாரணையில், ஊத்தங்கரை தாலுகா கல்லாவி அருகே உள்ள கொரப்பநாயக்கன்பட்டியைச் சேர்ந்த சிங்காரவேலன், போச்சம்பள்ளி அருகே மலையாண்ட அள்ளியைச் சேர்ந்த கல்கி, இளம்பருதி, விமல் என்பது தெரியவந்தது. இவர்களில் சிங்காரவேலன், கல்கி ஆகியோர் வாடகை வாகன ஓட்டுநர்களாகப் பணியாற்றி வருகின்றனர். இளம்பருதி தருமபுரியில் உள்ள கலைக் கல்லூரியில் பி.ஏ. பொருளாதாரம் இரண்டாம் ஆண்டும், விமல் மொரப்பூரில் உள்ள கல்லூரியில் பி.பி.ஏ. இரண்டாம் ஆண்டும் படித்து வருகின்றனர்.

இதையும் படிங்க: என் புருஷன் உனக்கு கேட்குதாடி? சாணியை கரைத்து ஊற்றி தாக்குதல்! கம்பி எண்ணும் இன்ஸ்டா பிரபலம்!

விசாரணையில் அம்பலம்

இவர்கள் காவல்துறையிடம் சிக்காமல் எப்படிக் கொள்ளையடிப்பது என சமூக வலைதளங்களில் வீடியோக்களைப் பார்த்து, அதன்படி திட்டமிட்டது விசாரணையில் அம்பலமானது. கைரேகை பதிவாகாமல் இருக்க கையுறைகள், அடையாளம் தெரியாமல் இருக்க முகமூடிகள், பாதுகாப்புக்காக கத்தி ஆகியவற்றை வைத்திருந்ததாகக் கூறப்படுகிறது. யாராவது பிடிக்க முயன்றால் மயக்க மருந்தைப் பயன்படுத்த ஊசியும் வைத்திருந்ததாகத் தெரிவித்துள்ளனர். மேலும், இருட்டில் அடையாளம் தெரியாமல் இருக்க கருப்பு உடை அணிந்ததுடன், சிசிடிவி கேமராக்களை மறைக்க கருப்பு ஸ்பிரே பெயிண்ட்டும், தங்களுக்குள் ரகசியமாக சைகை கொடுக்க லேசர் லைட்டும் வைத்திருந்ததாகக் கூறப்படுகிறது.

சுற்றித் திரிந்து நோட்டமிட்ட கும்பல்

அதுமட்டுமல்லாமல் இந்த கும்பலின் மற்றொரு திட்டத்தை கேட்டு போலீசாரே அதிர்ச்சியில் உறைந்தனர். Swiggy உணவு டெலிவரி ஊழியர்களைப் போல உடை அணிந்து, உணவு விநியோகம் செய்வது போல் முக்கியப் பகுதிகளில் சுற்றித் திரிந்து நோட்டமிட்டதாக விசாரணையில் தெரியவந்துள்ளது. குறிப்பாக, ஓசூர் மூக்கண்டப்பள்ளி பகுதியில் கொள்ளையடிக்கத் திட்டமிட்டு அங்கு சுற்றி வந்ததாக அவர்கள் தெரிவித்துள்ளனர். இதனையடுத்து பல்வேறு பிரிவுகளின் கீழ் வழக்குப்பதிவு செய்த போலீசார் அவர்களை நீதிமன்றத்தில் ஆஜர்படுத்தி சிறையில் அடைத்தனர். பகுஜன் சமாஜ் கட்சியின் மாநில தலைவராக இருந்த ஆம்ஸ்ட்ராங் கொலை செய்யப்பட்ட போது உணவு டெலிவரி உடையில் வந்து சம்பவம் செய்தது குறிப்பிடத்தக்கது.

மயிலாடுதுறை தேடப்படும் குற்றவாளிகள் பட்டியல் வெளியீடு - உங்க ஊரிலிருந்து யார்-யார் இருக்காங்கன்னு பாருங்க!

எஸ்.ஜெகநாதன், மயிலாடுதுறை — Sat, 31 Oct 2026 12:22:53 +0530

மயிலாடுதுறை: மயிலாடுதுறை மாவட்டம் முழுவதும் சட்டம் ஒழுங்கை நிலைநாட்டுவதற்கும், பொதுமக்களின் பாதுகாப்பை உறுதி செய்வதற்கும் மாவட்டக் காவல் துறையினர் பல்வேறு தொடர் நடவடிக்கைகளை மேற்கொண்டு வருகின்றனர். இதன் ஒரு முக்கியப் பகுதியாக, கடந்த காலங்களில் பல்வேறு குற்ற வழக்குகளில் தொடர்புடைய நபர்களைக் கைது செய்து நீதிமன்றத்தில் ஆஜர்படுத்தி முறையான சட்ட நடவடிக்கைகள் எடுக்கப்பட்டு வருகின்றன.

ஆனால், அத்தகைய வழக்குகளில் தொடர்புடைய பல குற்றவாளிகள் நீதிமன்ற விசாரணையின் போது தொடர்ந்து ஆஜராகாமல் வேண்டுமென்றே தலைமறைவாகி வருவது காவல்துறைக்கும் நீதித்துறைக்கும் பெரும் சவாலாக உருவெடுத்துள்ளது. சாட்சி விசாரணைகள், வழக்கு விசாரணையின் அடுத்த கட்ட நகர்வுகள் மற்றும் இறுதித் தீர்ப்புகள் போன்ற முக்கியமான நீதித்துறை நடவடிக்கைகளுக்குக் குற்றவாளிகள் நீதிமன்றத்தில் நேரில் ஆஜராக வேண்டியது அவசியமாகும்.

இந்தச் சூழலில், மயிலாடுதுறை காவல் நிலையத்தில் பதியப்பட்டு நிலுவையில் உள்ள பல்வேறு வழக்குகளில் நீண்ட காலமாகத் தலைமறைவாகி இருந்த எட்டு முக்கியக் குற்றவாளிகளைக் கண்டறிந்து நீதிமன்றத்தின் முன் நிறுத்தக் காவல் துறையினர் தீவிர முயற்சிகளை மேற்கொண்டனர். அவர்களின் தொடர் முயற்சிகளின் பலனாக, இந்த வழக்குகளை விசாரித்து வரும் மயிலாடுதுறை குற்றவியல் நீதித்துறை நீதிமன்றம் எண் 1-ன் மூலம் சம்பந்தப்பட்ட எட்டு நபர்களும் அதிகாரப்பூர்வமாகத் தேடப்படும் குற்றவாளிகளாகப் பிரகடனம் செய்யப்பட்டு அறிவிக்கப்பட்டுள்ளனர்.

தேடப்படும் குற்றவாளிகளின் விவரங்கள் மற்றும் முகவரிகள்

நீதிமன்றத்தால் தேடப்படும் குற்றவாளிகளாக அதிகாரப்பூர்வமாக அறிவிக்கப்பட்டுள்ள அந்த எட்டு நபர்களின் முழு விவரங்கள் மற்றும் முகவரிகள் காவல் துறையினரால் வெளியிடப்பட்டுள்ளன. அதன்படி, மயிலாடுதுறை ரயிலடி ஆரோக்கியநாதபுரம் பகுதியைச் சேர்ந்த இன்னாசிமுத்து என்பவரின் மகன் செந்தில், நீடூர் செட்டியார் காலனி எண் 24-ஐச் சேர்ந்த முகமது யாகூப் என்பவரின் மகன் சிராஜிதீன், அப்பன்குளம் வடக்கு தெருவைச் சேர்ந்த ராமையா என்பவரின் மகன் ராஜசேகரன், அதே அப்பன்குளம் வடக்கு தெருவைச் சேர்ந்த நவநீதன் என்பவரின் மகன் ஜனார்த்னன் ஆகியோர் இந்தப் பட்டியலில் முதன்மையாக இடம்பெற்றுள்ளனர்.

இவர்களைத் தொடர்ந்து, கூறைநாடு வடக்கு தெரு எண் 24-ஐச் சேர்ந்த முருகையன் என்பவரின் மகன் சிவா என்ற ஸ்ரீகுருசிவா, கலைஞர் நகரைச் சேர்ந்த திருஞானம் என்பவரின் மகன் ராஜா, அவையாம்பாள்புரம் பகுதியைச் சேர்ந்த குமாரசாமி என்ற தாண்டவராயன் என்பவரின் மகன் மெட்ராஸ் முர்த்தி என்ற முர்த்தி மற்றும் திருவாரூர் மாவட்டம் பேரளம் பள்ளிவாசல் தெருவைச் சேர்ந்த அப்துல் ரஹ்மான் என்பவரின் மகன் ஜாகிர்உசேன் ஆகியோரும் தேடப்படும் குற்றவாளிகளாகப் பிரகடனம் செய்யப்பட்டுள்ளனர். இவர்கள் அனைவரும் நீதிமன்றத்தின் பிடியிலிருந்து பல ஆண்டுகளாகத் தலைமறைவாக வாழ்ந்து வருவது குறிப்பிடத்தக்கது.

பொதுமக்களின் ஒத்துழைப்பும் காவல் துறையின் எச்சரிக்கையும்

நீதிமன்றத்தால் தேடப்படும் குற்றவாளிகளாகப் பிரகடனம் செய்யப்பட்டுள்ள மேற்கண்ட நபர்கள் குறித்து பொதுமக்களுக்கு ஏதாவது தகவல் தெரிந்தால் உடனடியாகக் காவல் துறைக்குத் தெரிவிக்குமாறு மாவட்டக் காவல் துறை சார்பில் கேட்டுக் கொள்ளப்பட்டுள்ளது. தலைமறைவாக உள்ள இந்த நபர்கள் பற்றிய துப்பு அல்லது அவர்கள் பதுங்கியிருக்கும் இடம் குறித்த ரகசியத் தகவல்களை மயிலாடுதுறை காவல் நிலையத்திற்குக் கொடுக்கலாம் என்று அறிவுறுத்தப்பட்டுள்ளது.

பொதுமக்கள் தங்களுக்குக் கிடைக்கும் நம்பகமான தகவல்களை எவ்விதத் தயக்கமுமின்றி நேரடியாக மயிலாடுதுறை காவல் நிலையத்தின் அதிகாரப்பூர்வத் தொலைபேசி எண் 9498100916 என்ற எண்ணிற்குத் தொடர்பு கொண்டு தெரிவிக்கலாம் என்று கேட்டுக் கொள்ளப்பட்டுள்ளது. தகவல் அளிப்பவர்களின் பெயர்கள் மற்றும் விவரங்கள் முற்றிலும் இரகசியமாகப் பாதுகாக்கப்படும் என்றும், குற்றவாளிகளுக்கு அடைக்கலம் தருபவர்கள் மீதும் கடுமையான சட்ட நடவடிக்கைகள் பாயும் என்றும் காவல் துறை தரப்பில் எச்சரிக்கப்பட்டுள்ளது.

பொதுமக்களின் முழுமையான ஒத்துழைப்புடன் குற்றவாளிகள் விரைவில் கைது செய்யப்பட்டுச் சட்டத்தின் முன் நிறுத்தப்படுவார்கள் என்ற அசைக்க முடியாத நம்பிக்கையை மயிலாடுதுறை மாவட்டக் காவல் துறையினர் வெளிப்படுத்தியுள்ளனர்.

திருச்சியில் சிக்கிய 5 சிம் பாக்ஸ்: அதிரடியாக பறிமுதல் செய்த போலீசார்: பொதுமக்களுக்கு எச்சரிக்கை

என்.நாகராஜன் — Sat, 31 Oct 2026 07:12:36 +0530

திருச்சி: திருச்சியில் டிஜிட்டல் அரெஸ்ட் மோசடிக்கு பயன்படுத்த இருந்ததாக 5 சிம் பாக்ஸ்சை போலீசார் அதிரடியாக பறிமுதல் செய்துள்ளனர். இந்த வழக்கில் ஒருவர் கைது செய்யப்பட்டுள்ளார்.

தொலைபேசி அழைப்புகள் மூலம் பொதுமக்களை ஏமாற்றி பணம் பறிக்கும் ஆன்லைன் மோசடிகளுக்கு பயன்படுத்தப்பட்டதாகக் கூறப்படும் நவீன சிம் பாக்ஸ் கருவிகளை திருச்சி மாநகர சைபர் கிரைம் போலீசார் பறிமுதல் செய்துள்ளனர். உறையூர் பகுதியில் மேற்கொள்ளப்பட்ட இந்த அதிரடி நடவடிக்கையில் 5 சிம் பாக்ஸ் கருவிகள் உள்ளிட்ட மின்னணு சாதனங்கள் கைப்பற்றப்பட்டதுடன், அவற்றைப் பயன்படுத்தியதாகக் கூறப்படும் ஒருவரும் கைது செய்யப்பட்டுள்ளார்.

சமீபகாலமாக நாடு முழுவதும் டிஜிட்டல் அரெஸ்ட் என்ற பெயரில் நடைபெறும் இணையவழி மோசடிகள் பொதுமக்களிடையே பெரும் அச்சத்தை ஏற்படுத்தி வருகின்றன. காவல்துறை, நீதிமன்றம், விசாரணை அமைப்புகள் அல்லது அரசு அதிகாரிகள் போலத் தங்களை அறிமுகப்படுத்திக் கொண்டு, தொலைபேசியில் தொடர்பு கொள்ளும் மோசடி நபர்கள், சட்ட நடவடிக்கை எடுக்கப்படும் என மிரட்டி பணம் பறிப்பதாகப் புகார்கள் அதிகரித்துள்ளன.

இதுபோன்ற மோசடிகளுக்குப் பயன்படுத்தப்படும் தொழில்நுட்ப வசதிகளில் சிம் பாக்ஸ் கருவிகளும் முக்கியமானதாகக் கூறப்படுகிறது. திருச்சி உறையூர் பகுதியில் இருந்து டிஜிட்டல் அரெஸ்ட் மற்றும் ஆன்லைன் மோசடிகளுக்குப் பயன்படுத்தப்படும் ஜி.எஸ்.எம். கேட்வே எனப்படும் சிம் பாக்ஸ் கருவிகள் இயக்கப்படுவதாக பி.எஸ்.என்.எல். நிறுவனம் சார்பில் மாநகர சைபர் கிரைம் போலீசாருக்கு புகார் அளிக்கப்பட்டது.

இந்தப் புகாரின் அடிப்படையில் போலீசார் ரகசிய விசாரணை மேற்கொண்டனர். பின்னர் சம்பந்தப்பட்ட இடத்தில் சோதனை நடத்தினர். அப்போது ஒரு அறையில் வைக்கப்பட்டிருந்த 5 சிம் பாக்ஸ் கருவிகள், கேமராக்கள், மோடம் மற்றும் அவற்றுடன் தொடர்புடைய மின்னணு உபகரணங்கள் உள்ளிட்டவை பறிமுதல் செய்யப்பட்டன.

அந்த அறையில் கருவிகளைப் பயன்படுத்தி வந்த நபரையும் போலீசார் கைது செய்தனர். விசாரணை தொடர்ந்து நடைபெற்று வருவதால் கைது செய்யப்பட்டவரின் பெயர் உள்ளிட்ட விவரங்களை உடனடியாக போலீசார் வெளியிடவில்லை.

சிம் பாக்ஸ் கருவியின் செயல்பாடு குறித்து காவல்துறை விளக்கியுள்ள தகவல்கள் பொதுமக்கள் கவனிக்க வேண்டியவை. வெளிநாடுகளில் இருந்து வரும் தொலைபேசி அழைப்புகளை உள்ளூர் அழைப்புகள் போல மாற்றிக் காட்டும் வகையில் இக்கருவிகள் பயன்படுத்தப்படலாம்.

இதன் மூலம் சர்வதேச அழைப்புகளுக்கான தொலைத்தொடர்பு நடைமுறைகளைத் தவிர்த்து, அழைப்பின் உண்மையான மூலத்தை மறைப்பதற்கும் முயற்சி செய்யப்படலாம். இதனால் அழைப்பு எங்கிருந்து வருகிறது, யார் தொடர்பு கொள்கிறார்கள் என்பதை கண்டறிவது விசாரணை அமைப்புகளுக்கு சிக்கலாக மாறும் அபாயம் உள்ளது.

இத்தகைய தொழில்நுட்பம் தெரிந்தவர்களால் மட்டுமே இந்தக் கருவிகளை இயக்க முடியும் என்பதால், கைது செய்யப்பட்ட நபர் தனியாகச் செயல்பட்டாரா அல்லது அவருக்குப் பின்னால் வேறு நபர்கள் உள்ளனரா என்ற கோணத்திலும் போலீசார் விசாரணை நடத்தி வருகின்றனர்.

கருவிகளின் பயன்பாடு, அவற்றில் பயன்படுத்தப்பட்ட சிம் அட்டைகள், தொடர்பு கொண்ட எண்கள், பணப் பரிமாற்ற விவரங்கள் உள்ளிட்டவற்றை ஆய்வு செய்வது விசாரணையில் முக்கியமாக இருக்கும்.

பொதுமக்கள் அறியாத எண்ணிலிருந்து வரும் அழைப்புகளில் தங்களை போலீஸ் அதிகாரி அல்லது நீதிமன்ற அதிகாரி என அறிமுகப்படுத்துபவர்களை உடனடியாக நம்ப வேண்டாம். கைது, வழக்கு, விசாரணை என மிரட்டி பணம் அனுப்பச் சொன்னால் எந்தச் சூழலிலும் பணம் அனுப்பக் கூடாது. சந்தேகத்துக்குரிய அழைப்புகளை காவல்துறையின் சைபர் குற்றப்பிரிவிடம் தெரிவிக்க வேண்டும்.

திருச்சியில் சிம் பாக்ஸ் கருவிகள் பறிமுதல் செய்யப்பட்டுள்ள சம்பவம், இணையவழி மோசடிகள் எவ்வளவு தொழில்நுட்ப ரீதியாக வளர்ந்து வருகின்றன என்பதை வெளிப்படுத்தியுள்ளது. இந்தக் கருவிகளின் பின்னணியில் செயல்படும் முழு வலையமைப்பையும் கண்டறிந்து நடவடிக்கை எடுக்க வேண்டும் என்பதே பொதுமக்களின் எதிர்பார்ப்பாக உள்ளது.