நள்ளிரவில் வீடு புகுந்து பெண்ணின் தாலிச் செயினை பறிக்க முயற்சி: பெயிண்டரை தட்டித்தூக்கிய போலீசார்

தவெக மாவட்ட செயலாளருக்கு அரசு மேடையில் முதல் மரியாதை? மயிலாடுதுறையில் தொடரும் சர்ச்சை!

எஸ்.ஜெகநாதன், மயிலாடுதுறை — Wed, 7 Oct 2026 18:25:17 +0530

மயிலாடுதுறை: மயிலாடுதுறை நகராட்சிக்குட்பட்ட தனியார் திருமண மண்டபத்தில், சமூக நலம் மற்றும் மகளிர் உரிமைத் துறையின் கீழ் இயங்கும் ஒருங்கிணைந்த குழந்தை வளர்ச்சித் திட்டப் பணிகள் துறை சார்பில் முந்திய ஆட்சியாளர்களால் கொண்டுவரப்பட்ட சமுதாய வளைகாப்பு விழா இன்று நடைபெற்றது.

மாவட்ட நிர்வாகம் சார்பில் ஒருங்கிணைக்கப்பட்ட இந்த அரசு விழாவில், மயிலாடுதுறை மற்றும் குத்தாலம் வட்டாரங்களைச் சேர்ந்த சுமார் 200 கர்ப்பிணி தாய்மார்களுக்கு சமுதாய வளைகாப்பு நடத்தப்பட்டு, சீர்வரிசை பொருட்கள் வழங்கும் நிகழ்வுகள் ஏற்பாடு செய்யப்பட்டிருந்தன. விழாவுக்கு வந்திருந்த கர்ப்பிணி பெண்களுக்கு மாவட்ட ஆட்சியர் ஹெச்.எஸ்.ஸ்ரீகாந்த் மற்றும் மயிலாடுதுறை சட்டமன்ற உறுப்பினர் ஜமால் முகமது யூனுஸ் ஆகியோர் குத்துவிளக்கேற்றி நிகழ்வை முறைப்படி தொடங்கி வைத்தனர்.

தொடர்ந்து, பயனாளிகளுக்கு தாம்பூலத்தில் புடவை, மங்கலப் பொருட்கள், பூமாலை, வளையல், இனிப்புகள் மற்றும் ஐந்து வகையான சுவையான உணவுகள் அடங்கிய சீர்வரிசைகளை அதிகாரிகளும் மக்கள் பிரதிநிதிகளும் இணைந்து வழங்கினர்.

தமிழ்நாடு அரசு சமூக நலம் மற்றும் மகளிர் உரிமைத் துறை மூலம் செயல்படுத்தும் ஒருங்கிணைந்த குழந்தை வளர்ச்சிப் பணிகள் திட்டம், பிறந்தது முதல் 6 வயதிற்குட்பட்ட குழந்தைகள், கர்ப்பிணிப் பெண்கள், பாலூட்டும் தாய்மார்கள் மற்றும் வளரிளம் பெண்களின் ஊட்டச்சத்து நிலையை மேம்படுத்துவதில் பெரும் பங்காற்றி வருகிறது. வருமான வரம்பு ஏதுமின்றி தகுதியுடைய அனைத்து பொதுமக்களும் தங்களுக்கு அருகில் உள்ள அங்கன்வாடி மையங்களில் பதிவு செய்து பயன்பெறும் வகையில் இத்திட்டம் வடிவம் பெற்றுள்ளது.

இதன் மூலம் 6 மாதம் முதல் 2 வயது வரையிலான குழந்தைகளுக்கு குறிப்பிட்ட அளவீடுகளில் சத்துமாவு பாக்கெட்டுகள், வாரம் மூன்று முட்டைகள் மற்றும் கடுமையான ஊட்டச்சத்து குறைபாடுள்ள குழந்தைகளுக்குச் செறிவூட்டப்பட்ட பிஸ்கெட்டுகள் உள்ளிட்டவை தொடர்ச்சியாக வழங்கப்பட்டு வருகின்றன.

தொடர்கதையாகும் சர்ச்சை:

இத்தகைய மகத்தான நோக்கம் கொண்ட அரசு திட்டத்தின் விழா நகரில் நடைபெற்ற நிலையில், நிகழ்வின் பின்னணியில் எழுந்த அரசியல் தலையீடு தற்போது பெரும் விவாதத்தைக் கிளப்பியுள்ளது.

அரசு நிர்வாகத்தின் வழிகாட்டுதல்களின்படி நடத்தப்பட்ட இந்த அதிகாரப்பூர்வ விழாவில், துறை சார்ந்த மாவட்ட திட்ட அலுவலர் பிரபா, குழந்தை வளர்ச்சித் திட்ட அலுவலர் கிருத்திகா மற்றும் மயிலாடுதுறை வட்டாட்சியர் விஜயராகவன் உள்ளிட்ட முக்கிய அரசு அதிகாரிகள் பலர் கலந்துகொண்டனர்.

இருப்பினும், அதிகாரப்பூர்வமாக அரசுப் பொறுப்பிலோ அல்லது மக்கள் பிரதிநிதித்துவப் பொறுப்பிலோ இல்லாத தமிழக வெற்றிக் கழகத்தின் (தவெக) மயிலாடுதுறை மாவட்ட செயலாளர் கோபிநாத் மேடையில் சிறப்பு முக்கியத்துவம் அளிக்கப்பட்டதாக குற்றச்சாட்டு எழுந்துள்ளது. விழாவின் முன்வரிசையில் அமரவைக்கப்பட்ட அவர், மாவட்ட ஆட்சியர் மற்றும் சட்டமன்ற உறுப்பினருக்கு இணையாக மேடையில் நின்று கர்ப்பிணி பெண்களுக்கு அரசு சார்பில் தயார் செய்யப்பட்ட சீர்வரிசைப் பொருட்களை நேரில் வழங்கியுள்ளார்.

அரசு விதிமுறைகள் மீறப்படுவதாக புகார்

அரசு விழாக்கள் மற்றும் திட்ட உதவிகள் வழங்கும் நிகழ்வுகளில், சம்பந்தப்பட்ட நிர்வாக அதிகாரிகளும் தேர்ந்தெடுக்கப்பட்ட மக்கள் பிரதிநிதிகளும் மட்டுமே முன்னின்று நடத்துவப்பது வழக்கமான நடைமுறையாகும். ஆனால், அரசுக்கு எவ்விதத்திலும் தொடர்பு இல்லாத கட்சியின் மாவட்ட பொறுப்பாளர் ஒருவர், அரசு இயந்திரத்தின் அதிகாரப்பூர்வ மேடையில் நேரடியாகப் பங்கேற்று நலத்திட்ட உதவிகளை வழங்கியது அப் பகுதியில் பெரும் அதிர்வலைகளை ஏற்படுத்தியுள்ளது.

ஏற்கனவே சில தினங்களுக்கு முன்பு நடைபெற்ற அரசு சார்ந்த 'தாய்மாமன் தங்க மோதிரம்' வழங்கும் விழாவிலும், தவெக மாவட்ட செயலாளர் கோபிநாத் மாவட்ட ஆட்சியருடன் இணைந்து மோதிரங்களை வழங்கியது பெரும் சர்ச்சையை ஏற்படுத்தியிருந்தது.

அந்த சர்ச்சை ஓய்வதற்குள்ளாகவே, தற்போது ஒருங்கிணைந்த குழந்தை வளர்ச்சித் திட்டத்தின் வளைகாப்பு விழாவிலும் அதே நபர் முன்வரிசையில் பங்கேற்று சீர்வரிசைகளை வழங்கியிருப்பது தொடர்கதையாக மாறியுள்ளது. அரசு அதிகாரிகளும் நிர்வாகமும் எந்த அடிப்படையில் ஒரு குறிப்பிட்ட அரசியல் கட்சியின் மாவட்ட செயலாளருக்கு அரசு மேடைகளில் இத்தகைய முக்கியத்துவத்தை மீண்டும் மீண்டும் வழங்குகிறார்கள் என்ற கேள்வியை பொதுமக்கள் மற்றும் சமூக ஆர்வலர்கள் பலமாக எழுப்பி வருகின்றனர்.

அரசு விழாக்களில் பொது விதிமுறைகள் மீறப்படுவதாகவும், கட்சிச் சார்பற்ற முறையில் நடைபெற வேண்டிய நிகழ்ச்சிகள் அரசியல் ஆதாயத்திற்காகப் பயன்படுத்தப்படுவதாகவும் பொதுமக்கள் தங்களது கடுமையான அதிர்ச்சியையும் அதிருப்தியையும் பதிவு செய்து வருகின்றனர்.

மயிலாடுதுறை மாவட்டத்தில் நீளும் குண்டாஸ் பட்டியல்... இதுவரை 67 கைது...!

எஸ்.ஜெகநாதன், மயிலாடுதுறை — Wed, 7 Oct 2026 17:23:42 +0530

மயிலாடுதுறை மாவட்டத்தில் நடப்பாண்டில் பல்வேறு வழக்குகளில் தொடர்புடைய குற்றவாளிகள் 67 பேர் இதுவரை குண்டாஸ் வழக்கில் கைது செய்யப்பட்டு சிறையில் அடைக்கப்பட்டுள்ளனர்.

மயிலாடுதுறை: மயிலாடுதுறை மாவட்டத்தில் போக்சோ வழக்கிலும், பொது அமைதிக்கு பங்கம் விளைவித்த வழக்கிலும் கைது செய்யப்பட்ட இரு ரவுடிகள் மீது குண்டர் தடுப்புச் சட்டம் பாய்ந்துள்ளது. மாவட்ட ஆட்சியரின் உத்தரவின் பேரில் இருவரும் கடலூர் மத்திய சிறையில் அடைக்கப்பட்டுள்ளனர்.

போக்சோ வழக்கு மற்றும் ரவுடிசம்

மயிலாடுதுறை மாவட்டம், குத்தாலம் தாலுகா, கஞ்சனூர் புதுத்தெருவைச் சேர்ந்த சித்திருப்பு என்பவரது மகன் மூர்த்தி (44), என்பவர் கடந்த 05.09.2026 அன்று 17 வயது சிறுமியிடம் பாலியல் அத்துமீறலில் ஈடுபட்டதாக மயிலாடுதுறை அனைத்து மகளிர் காவல் நிலையத்தில் வழக்குப்பதிவு செய்யப்பட்டது. அதனைத் தொடர்ந்து ஆய்வாளர் அழகம்மாள் விசாரணையை மேற்கொண்டு, போக்சோ சட்டத்தின் கீழ் மூர்த்தியைக் கைது செய்து நீதிமன்றக் காவலுக்கு அனுப்பினார்.

அதேபோல, சீர்காழி பகுதியைச் சேர்ந்த சரித்திர பதிவேடு குற்றவாளியான கொண்டல் வள்ளுவக்குடி வடக்கு தெரு, ஏசுப்பிள்ளை என்பவரது மகன் விக்னேஷ் (22), என்பவர் கடந்த 13.09.2026 அன்று பொதுமக்களை அச்சுறுத்தும் வகையிலும், பொது அமைதிக்கு பங்கம் விளைவிக்கும் வகையிலும் செயல்பட்டதால் சீர்காழி காவல் நிலையத்தில் வழக்குப் பதிவு செய்யப்பட்டு சிறையில் அடைக்கப்பட்டார்.

குண்டர் சட்டத்தின் கீழ் நடவடிக்கை

தொடர்ந்து சட்டவிரோதச் செயல்களில் ஈடுபட்டு வந்த இவ்விருவர் மீதும் குண்டர் தடுப்புச் சட்டத்தின் கீழ் நடவடிக்கை எடுக்க மயிலாடுதுறை மாவட்ட காவல் கண்காணிப்பாளர் Dr. B.சினேஹா பிரியா, மாவட்ட ஆட்சியருக்குப் பரிந்துரை செய்தார். இதனை ஏற்றுக்கொண்ட மாவட்ட ஆட்சியர், இருவரையும் குண்டர் சட்டத்தின் கீழ் சிறையிலடைக்க உத்தரவிட்டார். இந்த உத்தரவின் அடிப்படையில், மூர்த்தி மற்றும் விக்னேஷ் ஆகிய இருவரும் கடலூர் மத்திய சிறையில் அடைக்கப்பட்டனர்.

நடப்பாண்டில் 67 பேர் மீது பாய்ந்த குண்டாஸ்

மயிலாடுதுறை மாவட்டத்தில் நடப்பாண்டில் (2026) குற்றச் செயல்களில் ஈடுபட்டவர்கள் மீது தீவிர நடவடிக்கை எடுக்கப்பட்டு வருகிறது. அதன்படி இதுவரை;

* கொலை வழக்குகள்: 05 நபர்கள்

* பொது அமைதிக்கு பங்கம் விளைவித்தல்:26 நபர்கள்

* மதுவிலக்கு குற்றங்கள்: 10 நபர்கள்

* கஞ்சா விற்பனை: 21 நபர்கள்

* குட்கா விற்பனை: 01 நபர்

* பாலியல் குற்றங்கள்: 04 நபர்கள்

என மொத்தம் 67 நபர்கள் குண்டர் தடுப்புச் சட்டத்தின் கீழ் கைது செய்யப்பட்டு சிறையில் அடைக்கப்பட்டுள்ளனர்.

மாவட்ட காவல் கண்காணிப்பாளர் எச்சரிக்கை

சமூக விரோதச் செயல்களில் ஈடுபடுபவர்களின் நடவடிக்கைகள் தொடர்ந்து தீவிரமாகக் கண்காணிக்கப்பட்டு வருவதாக மயிலாடுதுறை மாவட்ட காவல் கண்காணிப்பாளர் dr.சினேஹா பிரியா தெரிவித்துள்ளார். மேலும், பொதுமக்களை அச்சுறுத்தும் ரவுடிகள், பெண்கள் மற்றும் குழந்தைகளுக்கு எதிரான பாலியல் குற்றங்களில் ஈடுபடுவோர், கஞ்சா மற்றும் தடைசெய்யப்பட்ட புகையிலைப் பொருட்களை விற்பனை செய்வோர் மீது தயவுதாட்சண்யமின்றி குண்டர் தடுப்புச் சட்டத்தின் கீழ் கடும் நடவடிக்கை எடுக்கப்படும் என்றும் அவர் எச்சரித்துள்ளார்.

பாதுகாக்கப்பட்டு ரகசியம்

மேலும், மாவட்டத்தில் கஞ்சா மற்றும் போதைப்பொருட்கள் நடமாட்டத்தைக் கட்டுப்படுத்த தனிப்படைகள் அமைக்கப்பட்டுத் தீவிரக் கண்காணிப்புப் பணிகள் மேற்கொள்ளப்பட்டு வருகின்றன. பொதுமக்கள் தங்கள் பகுதியில் நடைபெறும் சட்டவிரோதச் செயல்கள் மற்றும் சந்தேகத்திற்கிடமான நபர்கள் குறித்து எவ்வித அச்சமுமின்றி காவல்துறைக்கு உடனடியாகத் தகவல் தெரிவிக்கலாம் எனவும், தகவல் தெரிவிப்பவர்களின் விவரங்கள் ரகசியமாகப் பாதுகாக்கப்படும் என்றும் காவல்துறை தரப்பில் தெரிவிக்கப்பட்டுள்ளது.

திருவொற்றியூரில் 6 வயது சிறுமிக்கு கொடூரம்... குற்றவாளிகளுக்கு தூக்குத் தண்டனை வேண்டும் – அன்புமணி ஆவேசம்

சிவரஞ்சித் — Wed, 7 Oct 2026 13:27:33 +0530

சென்னை: திருவொற்றியூர் பகுதியில் பெற்றோருடன் வசித்து வந்த 6 வயது வடமாநிலச் சிறுமி கூட்டுப் பாலியல் வன்கொடுமைக்கு ஆளாக்கப்பட்டதாக கூறப்படும் சம்பவம் அதிர்ச்சியை ஏற்படுத்தியுள்ளது. இந்தக் கொடூர சம்பவத்தில் தொடர்புடைய குற்றவாளிகளை தப்பவிடாமல், சட்டப்படி அதிகபட்ச தண்டனை பெற்றுத்தர தமிழக அரசும், காவல்துறையும் நடவடிக்கை எடுக்க வேண்டும் என்று பா.ம.க. தலைவர் மருத்துவர் அன்புமணி இராமதாஸ் வலியுறுத்தியுள்ளார்.

இதுதொடர்பாக அவர் வெளியிட்டுள்ள அறிக்கையில், திருவொற்றியூர் பகுதியில் பெற்றோருடன் வசித்து வந்த 6 வயது சிறுமி, அதே பகுதியில் வசித்து வந்ததாகக் கூறப்படும் வடமாநில இளைஞர்களால் கூட்டுப் பாலியல் வன்கொடுமைக்கு ஆளாக்கப்பட்டிருப்பது அதிர்ச்சியளிப்பதாக தெரிவித்துள்ளார்.

பெற்றோர் வெளியே சென்ற நேரத்தில் கொடூரம்

திருவொற்றியூரில் உள்ள ஒரு வீட்டில் சிறுமி தனது பெற்றோருடன் வசித்து வந்ததாக கூறப்படுகிறது. சிறுமியின் பெற்றோர் மாலை நேரத்தில் பானி பூரி விற்பனைக்காக வெளியே சென்றிருந்த நிலையில், அதனைப் பயன்படுத்திக் கொண்டு அதே வீட்டின் மேல்தளத்தில் வசித்து வந்ததாகக் கூறப்படும் ராகுல், சித்தரஞ்சன், மனோஜ் ஆகியோர் சிறுமியிடம் பாலியல் வன்கொடுமையில் ஈடுபட்டதாக புகார் எழுந்துள்ளது.

சிறுமிக்கு நேர்ந்த கொடுமையை உடனடியாக பெற்றோரிடம் தெரிவிக்க முடியாத நிலையில் இருந்ததாகவும் கூறப்படுகிறது. பின்னர் சிறுமிக்கு அதிகளவில் ரத்தப்போக்கு ஏற்பட்டதைத் தொடர்ந்து, அவரை பெற்றோர் மருத்துவமனைக்கு அழைத்துச் சென்றுள்ளனர்.

அங்கு சிறுமியை மருத்துவர்கள் பரிசோதித்தபோது, அவருக்கு பாலியல் வன்கொடுமை செய்யப்பட்டிருப்பது தெரியவந்ததாகவும், இதையடுத்து பெற்றோரிடம் மருத்துவர்கள் தகவல் தெரிவித்ததாகவும் அன்புமணி இராமதாஸ் தனது அறிக்கையில் குறிப்பிட்டுள்ளார்.

2 பேர் பிடிபட்டதாக தகவல்

இந்தச் சம்பவம் தொடர்பாக மருத்துவமனையில் சிறுமிக்கு உதவிய அப்பகுதியைச் சேர்ந்த ஒருவர் மற்றும் பொதுமக்கள் இணைந்து சந்தேகிக்கப்படும் இருவரை பிடித்து காவல்துறையினரிடம் ஒப்படைத்ததாக கூறப்படுகிறது.

மேலும், சம்பவத்தில் தொடர்புடையதாகக் கூறப்படும் மற்றொரு நபர் தப்பியோடியதாகவும், அவரை காவல்துறையினர் தேடி வருவதாகவும் அன்புமணி இராமதாஸ் தெரிவித்துள்ளார்.

தப்பியோடிய நபரையும் உடனடியாக கைது செய்து, வழக்கை விரைந்து விசாரித்து சட்டத்தின் முன் நிறுத்த வேண்டும் என்றும் அவர் வலியுறுத்தியுள்ளார்.

“குற்றவாளிகளை தப்பவிடக் கூடாது”

குழந்தைகள் பாதுகாக்கப்பட வேண்டியவர்கள் என்றும், அவர்களுக்கு எதிரான பாலியல் குற்றங்கள் மிகவும் கடுமையாக கையாளப்பட வேண்டும் என்றும் அன்புமணி இராமதாஸ் தெரிவித்துள்ளார்.

தெய்வமாகக் கொண்டாடப்பட வேண்டிய குழந்தைக்கு இத்தகைய கொடுமையை செய்ததாகக் கூறப்படும் நபர்களை அரசு மற்றும் காவல்துறை எக்காரணம் கொண்டும் தப்பவிடக் கூடாது என்றும், சட்டத்தின் கீழ் கிடைக்கக்கூடிய அதிகபட்ச தண்டனையை பெற்றுத்தர வேண்டும் என்றும் அவர் வலியுறுத்தியுள்ளார்.

மேலும், தமிழ்நாட்டின் எந்தப் பகுதியிலும் பெண்கள் மற்றும் குழந்தைகளுக்கு பாலியல் வன்கொடுமை உள்ளிட்ட குற்றங்கள் நடைபெறாமல் இருப்பதை தமிழக காவல்துறை உறுதி செய்ய வேண்டும் என்றும் அன்புமணி இராமதாஸ் கேட்டுக்கொண்டுள்ளார்.

குழந்தைகளின் பாதுகாப்பு குறித்து கூடுதல் கவனம்

சிறுமி தொடர்பான இந்த வழக்கில் காவல்துறை விரைந்து விசாரணை நடத்தி, சம்பவத்தின் முழு பின்னணியையும் கண்டறிந்து, தொடர்புடைய அனைவருக்கும் எதிராக சட்டப்படி கடுமையான நடவடிக்கை எடுக்க வேண்டும் என்பதே அரசியல் கட்சிகள் மற்றும் பொதுமக்களின் எதிர்பார்ப்பாக உள்ளது.

சிறுமியின் மருத்துவ சிகிச்சை, பாதுகாப்பு மற்றும் மனநல ஆதரவு உள்ளிட்ட தேவையான அனைத்து உதவிகளையும் அரசு வழங்க வேண்டும் என்பதும் முக்கியத்துவம் பெறுகிறது.

மயிலாடுதுறையில் கொடூர விபத்து: பொறியியல் கல்லூரி மாணவன் பலி - புதுமணத் தம்பதி உள்ளிட்ட மூவர் கவலைக்கிடம்!

எஸ்.ஜெகநாதன், மயிலாடுதுறை — Wed, 7 Oct 2026 10:53:50 +0530

மயிலாடுதுறை: மயிலாடுதுறை மாவட்டம் மயிலாடுதுறை அருகேயுள்ள மாப்படுகை கிராமத்தைச் சேர்ந்தவர் ஆசிரியர் மணிமாறன். இவருடைய 20 வயதான மகன் சுபிக்ஷன் தனியார் கல்லூரியில் பொறியியல் படித்து வந்தார். சுபிக்ஷன் தனது நண்பரான மயிலாடுதுறை தனியூர் சாலிய தெருவைச் சேர்ந்த சீனிவாசன் மகன் 28 வயதான ஸ்ரீராம் என்பவருடன் இருசக்கர வாகனத்தில் குத்தாலம் பகுதியிலிருந்து மயிலாடுதுறை நோக்கி புறப்பட்டு சென்று கொண்டிருந்தார்.

இந்த பயணத்தின் போது ஸ்ரீராம் இருசக்கர வாகனத்தை இயக்கி வந்துள்ளார். வாலிபர்கள் இருவரும் தங்களது பயணத்தை வழக்கம்போல தொடர்ந்த நிலையில், மகாதானபுரம் அருகே அவர்கள் வந்தபோது எதிர்பாராதவிதமாக ஒரு பெரிய அசம்பாவிதம் காத்திருந்தது.

முந்திச்செல்ல முயன்றபோது நேரிட்ட கொடூர விபத்து

மகாதானபுரம் சாலையில் இருசக்கர வாகனம் அதிவேகமாக சென்று கொண்டிருந்தபோது, அவர்களுக்கு முன்னால் சென்றுகொண்டிருந்த ஒரு பேருந்தை கடந்து முந்திச்செல்ல ஸ்ரீராம் முயற்சி செய்துள்ளார். அப்போது எதிரே மற்றொரு இருசக்கர வாகனம் வந்துகொண்டிருந்தது. கண்ணிமைக்கும் நேரத்திற்குள் இரண்டு இருசக்கர வாகனங்களும் பயங்கர சத்தத்துடன் நேருக்கு நேர் மோதி விபத்துக்குள்ளாகின.

இந்த அதிர்ச்சிகரமான மோதலின் வீரியத்தில் வாகனங்களில் வந்த அனைவரும் சாலையில் தூக்கி வீசப்பட்டனர். இதில் பலத்த காயமடைந்த கல்லூரி மாணவன் சுபிக்ஷன், ரத்த வெள்ளத்தில் சம்பவ இடத்திலேயே பரிதாபமாக உயிரழந்தார்.

திருமணமான 10 நாட்களில் தம்பதிக்கு நேர்ந்த சோகம்

எதிரே வந்த இருசக்கர வாகனத்தில் பயணித்தவர்கள் மயிலாடுதுறை தருமபுரம் ரோட்டைச் சேர்ந்த முகமது ரமீஸ் என்பவரின் 19 வயது மகள் பாத்திமா ஜெப்ரானா மற்றும் அவருடைய கணவர் நாகூர் பனங்குடியைச் சேர்ந்த 22 வயதான அப்துல் சர்தார் என்பதும் தெரியவந்தது. இவர்களுக்கு திருமணமாகி வெறும் பத்து நாட்களே ஆகியிருந்த நிலையில், பாத்திமா ஜெப்ரானாவின் தந்தை கீழே விழுந்து உடல்நலக்குறைவு ஏற்பட்டதால் அவரைக் காண்பதற்காக கணவருடன் மயிலாடுதுறைக்கு வந்துள்ளனர்.

தந்தையைப் பார்த்துவிட்டு மீண்டும் மயிலாடுதுறையிலிருந்து குத்தாலம் நோக்கி அவர்கள் இருசக்கர வாகனத்தில் பயணித்தபோதே இந்த கொடூர விபத்தில் சிக்கி படுகாயமடைந்தனர். புதுமணத் தம்பதிக்கு திருமணமான சில நாட்களிலேயே இத்தகைய சோகம் நேரிட்டது அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.

மருத்துவமனையில் உறவினர்கள் கண்ணீர் அஞ்சலி

விபத்து குறித்து தகவலறிந்த பொதுமக்கள் உடனடியாக 108 ஆம்புலன்ஸுக்கு தகவல் தெரிவித்தனர். அதன்பேரில் சம்பவ இடத்திற்கு விரைந்து வந்த ஆம்புலன்ஸ் ஊழியர்கள், படுகாயமடைந்த புதுமணத் தம்பதி பாத்திமா ஜெப்ரானா, அப்துல் சர்தார் மற்றும் வாலிபர் ஸ்ரீராம் ஆகிய மூவரையும் மீட்டு சிகிச்சைக்காக மயிலாடுதுறை மாவட்ட அரசு தலைமை மருத்துவமனைக்கு கொண்டு சென்றனர். அங்கு அவர்களுக்கு முதலுதவி சிகிச்சைகள் தீவிரமாக அளிக்கப்பட்டன.

விபத்து குறித்த தகவல் காட்டுத்தீ போல பரவியதையடுத்து, காயமடைந்தவர்களின் உறவினர்களும் நண்பர்களும் மருத்துவமனை வளாகத்தில் பெருந்திரளாகக் கூடினர். உயிரிழந்த மாணவனின் உடலைக் கண்டு உறவினர்கள் கதறி அழுத காட்சி காண்போரின் நெஞ்சை பதற வைத்தது.

மேல்சிகிச்சைக்காக தஞ்சாவூருக்கு இடமாற்றம்

மயிலாடுதுறை அரசு மருத்துவமனையில் அனுமதிக்கப்பட்ட மூவரின் உடல்நிலையும் மிகவும் கவலைக்கிடமாக இருந்ததால், மேல்சிகிச்சைக்காக தஞ்சாவூருக்கு கொண்டு செல்ல மருத்துவர்கள் பரிந்துரைத்தனர். அதன்படி படுகாயமடைந்த புதுமணத் தம்பதியினர் இருவரும் தஞ்சாவூரில் உள்ள தனியார் மருத்துவமனைக்கும், வாலிபர் ஸ்ரீராம் தஞ்சாவூர் அரசு மருத்துவக் கல்லூரி மருத்துவமனைக்கும் அவசர அவசரமாக அனுப்பி வைக்கப்பட்டனர். அங்கு அவர்களுக்கு அவசர சிகிச்சை பிரிவில் தீவிர சிகிச்சைகள் அளிக்கப்பட்டு வருகின்றன.

போலீசார் வழக்குப்பதிவு செய்து தீவிர விசாரணை

இச்சம்பவம் தொடர்பாக தகவலறிந்த குத்தாலம் காவல்நிலைய போலீசார் சம்பவ இடத்திற்கு விரைந்து சென்று விபத்து நடந்த பகுதியை பார்வையிட்டு ஆய்வு செய்தனர். மேலும் உயிரிழந்த மாணவன் சுபிக்ஷனின் உடலை உடற்கூறாய்வுக்காக கைப்பற்றிய போலீசார், விபத்து குறித்து வழக்குப்பதிவு செய்து தீவிர விசாரணை மேற்கொண்டு வருகின்றனர். அதிவேகமாக வாகனத்தை இயக்கியதும், பேருந்தை முந்திச்செல்ல முயன்றதுமே இந்த சோகத்திற்கு காரணம் என்று முதற்கட்ட விசாரணையில் தெரியவந்துள்ளது. கல்லூரி மாணவன் பலியானதும், புதுமணத் தம்பதி உட்பட மூவர் உயிருக்குப் போராடி வருவதும் மயிலாடுதுறை மற்றும் குத்தாலம் வட்டாரப் பகுதியில் பெரும் சோக அலையை ஏற்படுத்தியுள்ளது.

மனைவி கண்ணெதிரே பயங்கரம் !! நடுரோட்டில் வழிமறித்து கணவன் வெட்டிக் கொலை

சேர்மசாமி — Wed, 7 Oct 2026 10:36:00 +0530

"இருசக்கர வாகனத்தை வழிமறித்த கும்பல்"

திண்டுக்கல் மாநகராட்சி ஒப்பந்ததாரரும் திமுக பிரமுகருமான 'பாத்ரூம்' முருகன், கடந்த 2025-ம் ஆண்டு ஜூலை மாதம் காரில் கடத்தப்பட்டு , ஓடும் காரிலேயே வெட்டிக் கொலை செய்யப்பட்டார். மேட்டுப்பட்டி காளியம்மன் கோயில் கணக்கு தொடர்பான பிரச்சினையில் ஏற்பட்ட முன்விரோதமே இந்தக் கொலைக்கு காரணம் எனக் கூறப்பட்டது.

இந்த வழக்கில் முருகனின் கார் ஓட்டுநர் உள்ளிட்ட 8 பேரை போலீசார் கைது செய்திருந்தனர். அவர்கள் அனைவரும் அண்மையில் ஜாமீனில் வெளியே வந்ததாக தெரிவிக்கப்பட்டுள்ளது. இந்த நிலையில் , முருகன் கொலை வழக்கில் முக்கிய குற்றவாளியாக சேர்க்கப்பட்டிருந்த மேட்டுப்பட்டியைச் சேர்ந்த வீரபத்திரன் , தனது மனைவியுடன் இருசக்கர வாகனத்தில் திண்டுக்கல் - நத்தம் நெடுஞ்சாலையில் சென்று கொண்டிருந்தார். அவர்கள் நொச்சி ஓடைப்பட்டி அருகே சென்ற போது , மர்ம கும்பல் ஒன்று இருசக்கர வாகனத்தை வழிமறித்ததாக கூறப்படுகிறது.

"பயங்கர ஆயுதங்களுடன் கார் பறிமுதல்"

வழி மறித்த கும்பல் வீரபத்திரனை பயங்கர ஆயுதங்களால் சரமாரியாக தாக்கியுள்ளனர். மக்கள் நடமாட்டம் அதிகமாக இருந்த பகுதியில் நடைபெற்ற இந்தத் தாக்குதலில் , பலத்த காயமடைந்த வீரபத்திரன் சம்பவ இடத்திலேயே உயிரிழந்தார். தாக்குதலின் போது இருசக்கர வாகனத்தில் இருந்து கீழே விழுந்த வீரபத்திரனின் மனைவியும் படுகாயமடைந்தார். அவரை போலீசார் மீட்டு 108 ஆம்புலன்ஸ் மூலம் திண்டுக்கல் அரசு மருத்துவக் கல்லூரி மருத்துவமனைக்கு சிகிச்சைக்காக அனுப்பி வைத்தனர்.

சம்பவம் குறித்து தகவல் அறிந்த சாணார்பட்டி போலீசார், வீரபத்திரனின் உடலை மீட்டு உடற்கூறாய்வுக்காக அனுப்பி வைத்தனர். இதனிடையே, மாவட்ட காவல் கண்காணிப்பாளர் ஜெயக்குமார் உத்தரவின் பேரில், புறநகர் கூடுதல் காவல் கண்காணிப்பாளர் மஞ்சிமா தலைமையில் தனிப்படை அமைக்கப்பட்டு , கொலையாளிகளை போலீசார் தீவிரமாக தேடி வருகின்றனர். கொலைக்குப் பயன்படுத்தப்பட்டதாக சந்தேகிக்கப்படும் வகையில், கொலையாளிகள் தப்பிச் சென்ற ஸ்கார்பியோ காரை போலீசார் பறிமுதல் செய்துள்ளனர். அந்த காரில் இருந்து பயங்கர ஆயுதங்களும் கைப்பற்றப்பட்டதாக தெரிவிக்கப்பட்டுள்ளது.

பாத்ரூம் முருகன் கொலைக்கு பழிவாங்கும் வகையில் , வீரபத்திரன் கொலை செய்யப்பட்டாரா அல்லது இதன் பின்னணியில் வேறு ஏதேனும் காரணம் உள்ளதா என்ற பல்வேறு கோணங்களில் போலீசார் விசாரணை நடத்தி வருகின்றனர்.

"என் பொண்டாட்டிய பாரு..." நண்பர்களிடம் லட்சக்கணக்கில் வசூல்: மயிலாடுதுறையில் ஒரு சைக்கோ கணவனின் கொடூரம்!

எஸ்.ஜெகநாதன், மயிலாடுதுறை — Wed, 7 Oct 2026 10:20:48 +0530

மயிலாடுதுறை: திருமணமான 15 நாட்களில் கணவரின் லீலைகள் அம்பலமானதால் அதிர்ச்சியடைந்த பட்டதாரி பெண், தன் கணவர் மீது கடும் நடவடிக்கை எடுக்கக் கோரி மயிலாடுதுறை மாவட்ட காவல் கண்காணிப்பாளரிடம் (எஸ்பி) கண்ணீர்மல்க புகார் அளித்துள்ளார்.

27 பெண்களுடன் தொடர்பில் இருந்ததோடு, மனைவியையும் நிர்வாணப்படுத்தி நண்பர்களுக்கு காண்பித்து பணம் பறித்த கொடூர சம்பவம் அப்பகுதியில் பெரும் பரபரப்பை ஏற்படுத்தியுள்ளது.

சீர்காழி அருண் - காரைக்கால் பெண் திருமணமும்

மயிலாடுதுறை மாவட்டம், சீர்காழி தாலுகா மங்கைமடம் பகுதியைச் சேர்ந்தவர் அருண் (36). ஐடிஐ வரை பயின்றுள்ள இவர், சிங்கப்பூரில் கார் ஓட்டுநராக பணியாற்றி வந்துள்ளார். இவருக்கும், புதுச்சேரி மாநிலம் காரைக்காலைச் சேர்ந்த 25 வயதான பி.காம் பட்டதாரி பெண்ணிற்கும் இடையே கடந்த ஜூலை மாதம் 12-ஆம் தேதி பெற்றோர் முன்னிலையில் விமரிசையாக திருமணம் நடைபெற்றது.

திருமணத்தின் போது மணமகளின் பெற்றோர் தங்களால் முடிந்தளவு 10 சவரன் தங்க நகைகளை வரதட்சணையாகக் கொடுத்து, தன் மகளின் வாழ்க்கை சிறப்பாக இருக்கும் என்ற நம்பிக்கையுடன் அனுப்பி வைத்தனர்.

செல்போன் சந்தேகமும் வெளிவந்த அதிர்ச்சி உண்மையும்

திருமணமான புதிதிலேயே அருணின் நடவடிக்கைகள் மனைவிக்கு சந்தேகத்தை ஏற்படுத்தின. அருண் எப்போதும் தனது செல்போனில் பெண்களிடம் தகாத முறையில் பேசி வந்ததோடு, நள்ளிரவு நேரங்களில் வீடியோ கால்களிலும் பேசி வந்துள்ளார். கணவனின் நடத்தையில் சந்தேகம் அடைந்த மனைவி, ஒரு நாள் அருண் தூங்கிக் கொண்டிருந்தபோது அவரது செல்போனை எடுத்து ஆய்வு செய்தார். அப்போது அதில் அதிர்ச்சியளிக்கும் தகவல்கள் வெளிவந்தன.

அருண் சுமார் 27-க்கும் மேற்பட்ட பெண்களுடன் நெருக்கமாக மற்றும் உல்லாசமாக இருந்த வீடியோக்கள் அந்த செல்போனில் சேமித்து வைக்கப்பட்டிருந்தன. இதைப்பார்த்து அதிர்ச்சியடைந்த அந்த பெண், உடனடியாக தனது கணவரிடம் இதுகுறித்து நியாயம் கேட்டுள்ளார்.

வரதட்சணை கொடுமை மற்றும் தாக்குதல்

தான் மாட்டிக்கொண்டதை உணர்ந்த அருண், மனைவியை தகாத வார்த்தைகளால் திட்டி, கொடூரமாகத் தாக்கியுள்ளார். மேலும், கூடுதல் நகையும் பணமும் பெற்றோர் வீட்டிலிருந்து வாங்கி வர வேண்டும் என்று கூறி அவரை சித்திரவதை செய்துள்ளார். இந்த அநியாயத்திற்கு அருணின் குடும்பத்தினரும் உடந்தையாக இருந்து அருணிற்கே ஆதரவாக செயல்பட்டுள்ளனர்.

கணவரின் தாக்குதலில் பலத்த காயமடைந்த அப்பெண், காரைக்கால் அரசு மருத்துவமனையில் அனுமதிக்கப்பட்டு சிகிச்சை பெற்றார். இதனிடையே, இதுகுறித்து பெண்ணின் குடும்பத்தினர் சீர்காழி அனைத்து மகளிர் காவல் நிலையத்தில் புகார் அளித்தனர். ஆனால், அந்த புகாரின் மீது மகளிர் காவல்துறையினர் எவ்வித உடனடி நடவடிக்கையும் எடுக்கவில்லை எனக் கூறப்படுகிறது.

எஸ்பியிடம் நேரில் கண்ணீர் புகார்

சீர்காழி காவல்துறையினர் நடவடிக்கை எடுக்காததால், பாதிக்கப்பட்ட பெண் தனது குடும்பத்தினருடன் மயிலாடுதுறை மாவட்ட காவல் கண்காணிப்பாளர் (எஸ்பி) சினேகா பிரியாவை நேரில் சந்தித்து கண்ணீருடன் புகார் மனு அளித்தார். மனுவைப் பெற்றுக்கொண்ட எஸ்பி, இந்த விவகாரம் குறித்து தீவிர விசாரணை நடத்தி குற்றவாளி மீது கடுமையான நடவடிக்கை எடுக்கப்படும் என உறுதியளித்தார்.

பாதிக்கப்பட்ட பெண்ணின் வாக்குமூலம்

இதுகுறித்து பாதிக்கப்பட்ட பெண் கூறுகையில்: "எனது கணவர் 27க்கும் மேற்பட்ட பெண்களுடன் தொடர்பில் இருந்ததும், அவர்களுடன் உல்லாசமாக இருந்த வீடியோக்கள் செல்போனில் இருந்ததும் தெரியவந்தது. இது குறித்து கேட்டதற்கு என்னை அடித்து துன்புறுத்தி, கூடுதல் நகை, பணம் கேட்டு சித்திரவதை செய்தார்.

திருமணம் முடிந்த 15 நாட்களிலேயே, மற்ற பெண்களுடன் இருக்கும் ஆபாச வீடியோக்களை எனக்குக் காண்பித்து, அதே போல் நடந்துகொள்ள வேண்டும் என வற்புறுத்தினார். முக்கியமாக, குரூப் வீடியோ காலில் வரும்போது என்னை ஆடைகளைக் கழற்றி நிர்வாணமாக நிற்கச் சொல்வார். அந்த குரூப் வீடியோவில் அவரது நண்பர்கள் இருப்பார்கள். என்னை நிர்வாணமாகக் காட்டி, தனது நண்பர்களிடமிருந்து லட்சக்கணக்கில் பணம் வசூலித்துள்ளார்.

சீர்காழி அனைத்து மகளிர் காவல் நிலையத்தில் புகார் அளித்தும் எந்தப் பலனும் இல்லை. கணவர் வெளியே சுதந்திரமாக சுற்றித்திரிகிறார். கட்டப்பஞ்சாயத்து செய்து எங்களை அச்சுறுத்துகிறார். என் வாழ்க்கை நாசமானது போல் வேறு எந்தப் பெண்ணின் வாழ்க்கையும் சீரழியக்கூடாது. எனக்கு உரிய நீதி கிடைக்க வேண்டும்." என வேதனையுடன் தெரிவித்துள்ளார்.

ஆபாச இணையதளங்களில் வீடியோ விற்பனை: அதிர்ச்சி பின்னணி

இச்சம்பவம் குறித்து காவல்துறை தரப்பில் விசாரிக்கையில் மேலும் பல திடுக்கிடும் தகவல்கள் வெளியாகியுள்ளன. அருண், தனது மனைவி மற்றும் பல பெண்களுடன் உல்லாசமாக இருக்கும் போது, அவர்களுக்குத் தெரியாமல் ரகசியமாக செல்போனில் வீடியோ எடுத்துள்ளார். அந்த வீடியோக்களைத் தனது நண்பர்களுக்கு அனுப்பி பணம் பெற்று வந்ததோடு மட்டுமல்லாமல், பிரபல ஆபாச இணையதளங்களிலும் (Pornographic Websites) பதிவேற்றம் செய்து விற்று பணம் சம்பாதித்து வந்துள்ளார் என்பது தெரியவந்துள்ளது.

தற்போது இச்சம்பவம் தொடர்பாக போலிசார் வழக்குப்பதிவு செய்து, அருணின் செல்போனை பறிமுதல் செய்து தீவிர விசாரணை மேற்கொண்டு வருகின்றனர். முழுமையான விசாரணைக்கு பிறகே இந்த விவகாரத்தில் பின்னணியில் உள்ள மற்ற நபர்கள் பற்றிய விவரங்கள் தெரியவரும் என காவல்துறை தரப்பில் தெரிவிக்கப்பட்டுள்ளது.

விமான நிலைய பார்சல்களை ஆட்டையை போட்ட துப்புரவுத் தொழிலாளி !! ரூ.3 லட்சம் மோசடி பெண் கைது

சேர்மசாமி — Tue, 6 Oct 2026 23:56:04 +0530

"ரூ.3 லட்சம் மதிப்புள்ள பார்சல்கள் மாயம்"

சென்னை அரும்பாக்கத்தைச் சேர்ந்த ரவிச்சந்திரன் ( வயது 51 ) என்பவர் பாண்டிபஜார் பகுதியிலுள்ள கொரியர் நிறுவனத்தில் மேலாளராக வேலை செய்து வருகிறார். இவரது கொரியர் நிறுவனத்திற்கு பல்வேறு மாநிலங்களிலிருந்து விமானம் மூலம் வரும் பார்சல்கள் சென்னை விமான நிலைய கிடங்கிலிருந்து தனியார் டெலிவரி நிறுவனத்தின் வாகனம் மூலம் பாண்டிபஜார் கிளை அலுவலகத்தில் சேர்ப்படுகிறது.

சில நாட்கள் முன்பு அவ்வாறு வரும் பார்சல்களில் சுமார் ரூ.3,40,391/- மதிப்புள்ள 4 பார்சல்கள் காணாமல் போய் உள்ளது. இதனால் சிசிடிவி பதிவுகளை ஆய்வு செய்த போது, விமான நிலையத்திலிருந்து பார்சல்களை கொண்டு வரும் தனியார் டெலிவரி நிறுவனத்தில் துப்புரவு வேலை செய்து வரும் குமுதவள்ளி என்பவர் பார்சல்களை திருடியது தெரிய வந்தது.

"குற்றத்தை ஒப்புக் கொண்ட பெண்"

அந் நிறுவனத்தின் உரிமையாளர் மூலம் விசாரணை செய்த போது, குமுதவள்ளி திருடிய குற்றத்தை ஒப்புக் கொண்டு, திருடிய பொருட்களை விற்று செலவு செய்து விட்டதாக கூறியுள்ளார். அதில் ரூ.33,225/- பணத்தை 16.06.2026 அன்று கொடுத்து விட்டு, மீதி பணம் ரூ.3,04,166/-ஐ ஒரு வாரத்திற்குள் தருவதாக உறுதியளித்து சென்றுள்ளார்.

ஆனால் குமுத வள்ளி மீதி பணத்தை தராமல் ஏமாற்றி வந்த நிலையில், தற்போது தர வேண்டிய மீதி பணத்தை தர மறுத்துள்ளார். ஆகவே, நிறுவனத்தின் பொருட்களை திருடிச் சென்ற குமுதவள்ளி மீது நடவடிக்கை எடுத்து பணத்தை பெற்று தருமாறு ரவிச்சந்திரன் என்பவர் சௌந்தரபாண்டியனார் அங்காடி காவல் நிலைய குற்றப் பிரிவில் புகார் கொடுத்துள்ளார்.

வழக்குப் பதிவு செய்து விசாரணை மேற்கொண்ட போலீசார் , திருட்டில் ஈடுபட்ட கொருக்குப்பேட்டை ஜே.ஜே நகர் பகுதியை சேர்ந்த குமுதவள்ளி ( வயது 55 ) என்பவரை கைது செய்தனர். கைது செய்யப்பட்ட குமுத வள்ளி விசாரணைக்குப் பின்னர் நீதிமன்றத்தில் ஆஜர் செய்யப்பட்டு நீதிமன்ற உத்தரவுப்படி சிறையில் அடைக்கப்பட்டார்.

பள்ளி தோழியுடன் அந்தரங்க உறவு !! செல்போனில் வீடியோ காட்சிகள் - மிரட்டிய இளைஞர்

சேர்மசாமி — Tue, 6 Oct 2026 22:47:44 +0530

"திருமணம் மீறிய உறவு"

கன்னியாகுமரி மாவட்டம் இரணியல் அருகே உள்ள பேயன்குழி பகுதியைச் சேர்ந்தவர் 29 வயது இளம்பெண். இவருக்கு அவரது உறவினருடன் திருமணமாகி 9 வயதில் மகன் உள்ளார். கருது வேறுபாடு காரணமாக கணவனை பிரிந்த இளம்பெண் மகனுடன் தனியாக வீடு எடுத்து வசித்து வருகிறார். இவர் பரசேரி பகுதியில் அழகு நிலையம் ஒன்றை நடத்தி வரும் நிலையில் , அவரது பள்ளி தோழனான 29 வயதுடைய அபிஷேக் என்பவருடன் மீண்டும் பழக்கம் ஏற்பட்டுள்ளது.

இருவரும் தொடர்ந்து பழகி வந்த நிலையில் நாளடைவில் இவர்களது பழக்கமானது , திருமணத்திற்கு மீறிய உறவாக மாறியுள்ளது. கடந்த மூன்று வருடங்களாக இருவரும் தொடர்பில் உள்ள நிலையில் அடிக்கடி தனியாக சந்தித்து இருவரும் தனிமையில் இருந்து வந்ததாகவும் கூறப்படுகிறது.

"செல்போனில் ரகசிய வீடியோ"

இதனிடையே , அபிஷேக் வேலைக்காக கடந்த ஒரு வருடத்திற்கு முன்பு இத்தாலி நாட்டிற்கு சென்ற நிலையில் , இருவருக்கும் இடையே கருத்து வேறுபாடு ஏற்பட்டு உறவில் விரிசல் ஏற்பட்டதாக தெரிகிறது. இந்நிலையில் , இத்தாலியில் இருந்து சொந்த ஊருக்கு திரும்பிய அபிஷேக் , மீண்டும் அந்த இளம்பெண்ணுடன் உறவை தொடர முயன்றதாக கூறப்படுகிறது. ஆனால் அதற்கு இளம் பெண் மறுப்பு தெரிவித்துள்ளார்.

இதனால் ஆத்திரமடைந்த அபிஷேக், இருவரும் ஏற்கெனவே தனியாக இருந்த போது தனது செல்போனில் ரகசியமாக பதிவு செய்திருந்ததாக கூறப்படும் தனிப்பட்ட வீடியோ காட்சிகளை அந்தப் பெண்ணிடம் காட்டி மிரட்டியதாகவும், தொடர்ந்து அவரை தாக்கியதாகவும் புகார் அளிக்கப்பட்டுள்ளது. இதில் காயமடைந்த இளம்பெண் மருத்துவமனையில் அனுமதிக்கப்பட்டார். பின்னர் அவர் அளித்த புகாரின் அடிப்படையில் இரணியல் போலீசார் பெண் வன்கொடுமை, கொலை மிரட்டல் உள்ளிட்ட 5 பிரிவுகளின் கீழ் வழக்குப் பதிவு செய்தனர்.

இதையடுத்து, இத்தாலியில் இருந்து சொந்த ஊருக்கு திரும்பிய அபிஷேக்கை போலீசார் கைது செய்து இரணியல் நீதிமன்றத்தில் ஆஜர்படுத்தினர். பின்னர் நீதிமன்ற உத்தரவின்படி அவர் சிறையில் அடைக்கப்பட்டார். இருப்பினும் இந்த சம்பவம் தொடர்பாக முழு விவரம் தெரிந்து கொள்ள இரணியல் போலீசார் தொடர்ந்து விசாரணை நடத்தி வருகின்றனர்.

‘பாத்ரூம்’ முருகன் கொலைக்கு பழிக்குப் பழியா? முக்கிய குற்றவாளி வீரபத்திரன் பட்டப்பகலில் கொடூரக் கொலை!

நாகராஜ் — Tue, 6 Oct 2026 20:29:54 +0530

திண்டுக்கல் நத்தம் நெடுஞ்சாலையில், திமுக பிரமுகர் 'பாத்ரூம்' முருகன் கொலை வழக்கின் முக்கிய குற்றவாளியான வீரபத்திரன் இன்று பட்டப்பகலில் கொடூரமாக வெட்டிக் கொலை செய்யப்பட்ட சம்பவம் அப்பகுதியில் பெரும் பரபரப்பையும் ஏற்படுத்தியுள்ளது.

திண்டுக்கல் மாநகராட்சி ஒப்பந்ததாரரும் திமுக பிரமுகருமான 'பாத்ரூம்' முருகன், கடந்த 2025-ஆம் ஆண்டு ஜூலை மாதம் காரில் கடத்தப்பட்டு ஓடும் காரிலேயே வெட்டிக் கொலை செய்யப்பட்டார். மேட்டுப்பட்டி காளியம்மன் கோயில் கணக்கு வழக்கு விவகாரத்தில் ஏற்பட்ட முன்விரோதம் காரணமாக இந்த படுகொலை நடந்தது.

இவ்வழக்கில் முருகனின் கார் ஓட்டுநர் உட்பட 8 பேரை போலீசார் கைது செய்திருந்த நிலையில், அவர்கள் அனைவரும் அண்மையில் ஜாமீனில் வெளியே வந்திருந்தனர். இந்நிலையில், முருகனின் கொலை வழக்கில் முக்கிய குற்றவாளியாக சேர்க்கப்பட்டிருந்த மேட்டுப்பட்டியைச் சேர்ந்த வீரபத்திரன், இன்று தனது மனைவியுடன் இருசக்கர வாகனத்தில் திண்டுக்கல் - நத்தம் நெடுஞ்சாலை, நொச்சி ஓடைப்பட்டி அருகே சென்று கொண்டிருந்தார்.

அப்போது அவரை வழிமறித்த மர்ம கும்பல் ஒன்று, மக்கள் நடமாட்டம் மிகுந்த பகுதியில் வைத்து வீரபத்திரனை பயங்கர ஆயுதங்களால் சரமாரியாக வெட்டியது. இதில் பலத்த காயமடைந்த அவர் சம்பவ இடத்திலேயே ரத்த வெள்ளத்தில் உயிரிழந்தார். இத்தாக்குதலின் போது இருசக்கர வாகனத்தில் இருந்து கீழே விழுந்த அவரது மனைவி படுகாயமடைந்தார். உடனடியாக அவரை மீட்ட போலீசார், 108 ஆம்புலன்ஸ் மூலம் சிகிச்சைக்காக திண்டுக்கல் அரசு மருத்துவக் கல்லூரி மருத்துவமனைக்கு அனுப்பி வைத்தனர்.

சம்பவம் குறித்து தகவல் அறிந்த சாணார்பட்டி போலீசார் உடலை மீட்டு உடற்கூறாய்வுக்கு அனுப்பி வைத்தனர். மாவட்ட காவல் கண்காணிப்பாளர் ஜெயக்குமார் உத்தரவின் பேரில், புறநகர் கூடுதல் காவல் கண்காணிப்பாளர் (ASP) மஞ்சிமா தலைமையிலான தனிப்படை போலீசார் கொலையாளிகளைத் தீவிரமாகத் தேடி வந்தனர்.இந்நிலையில், கொலையாளிகள் தப்பிச் செல்லப் பயன்படுத்திய ஸ்கார்பியோ காரை பறிமுதல் செய்த போலீசார், அதிலிருந்த பயங்கர ஆயுதங்களையும் கைப்பற்றியுள்ளனர். திமுக பிரமுகர் முருகன் கொலை செய்யப்பட்டதற்குப் பழிக்குப் பழியாக இந்தச் சம்பவம் அரங்கேற்றப்பட்டதா அல்லது வேறு ஏதேனும் காரணமா என்ற கோணத்தில் போலீசார் தீவிர விசாரணை மேற்கொண்டு வருகின்றனர்

நள்ளிரவில் வீடு புகுந்து பெண்ணின் தாலிச் செயினை பறிக்க முயற்சி: பெயிண்டரை தட்டித்தூக்கிய போலீசார்

என்.நாகராஜன் — Tue, 6 Oct 2026 17:45:00 +0530

தஞ்சாவூர்: தஞ்சாவூர் அருகே நள்ளிரவில் வீட்டுக்குள் புகுந்து தூங்கிக் கொண்டிருந்த பெண்ணின் கழுத்தில் கிடந்த 5 பவுன் தாலிச் செயினை பறிக்க முயன்ற 2 பேரில் ஒருவரை போலீசார் கைது செய்தனர். மற்றொருவர் தலைமறைவான நிலையில், அவர் மீது ஏற்கனவே பல்வேறு காவல் நிலையங்களில் வழக்குகள் நிலுவையில் இருப்பதும், போலீசாரின் சரித்திர பதிவேடு குற்றவாளி என்பதும் விசாரணையில் தெரியவந்துள்ளது. அவரை போலீசார் தீவிரமாக தேடி வருகின்றனர்.

நள்ளிரவில் நடந்த துணிகர முயற்சி

தஞ்சாவூர் அருகே உள்ள ஆப்ரகாம் பண்டிதர் நகரைச் சேர்ந்தவர் அன்பழகன். இவரது மனைவி பாரதி (40). கடந்த 2-ம் தேதி நள்ளிரவு பாரதி வழக்கம்போல் தனது வீட்டில் தூங்கிக் கொண்டிருந்தார்.

அப்போது இரவு நேரத்தை சாதகமாக பயன்படுத்திய 2 மர்மநபர்கள் வீட்டிற்குள் புகுந்துள்ளனர். பின்னர் அங்கு தூங்கிக் கொண்டிருந்த பாரதியின் கழுத்தில் அணிந்திருந்த 5 பவுன் தாலிச் செயினை பறிக்க முயன்றதாக கூறப்படுகிறது.

திடீரென கழுத்தில் கை வைக்கப்பட்டதை உணர்ந்த பாரதி அதிர்ச்சியடைந்து சத்தம் போட்டுள்ளார். உடனடியாக அவர் அலறி கூச்சலிட்டதால் அக்கம் பக்கத்தினர் விழித்துக் கொண்டு வீட்டை நோக்கி ஓடி வந்தனர்.

சத்தம் கேட்டதும் தப்பி ஓட்டம்

அக்கம்பக்கத்தினர் வருவதை பார்த்ததும், தாலிச் செயினை பறிக்க முயன்ற 2 பேரும் அங்கிருந்து தப்பிச் சென்றுள்ளனர். அவர்கள் ஏற்கனவே தயார் நிலையில் வைத்திருந்த மோட்டார் சைக்கிளில் ஏறி அங்கிருந்து வேகமாக சென்றதாக கூறப்படுகிறது.

நள்ளிரவில் வீட்டுக்குள் புகுந்து பெண்ணிடம் நகையை பறிக்க முயன்ற சம்பவம் அப்பகுதி மக்களிடையே பரபரப்பை ஏற்படுத்தியது. இதையடுத்து சம்பவம் தொடர்பாக பாரதி கள்ளப்பெரம்பூர் போலீஸ் நிலையத்தில் புகார் அளித்தார்.

போலீசார் தீவிர விசாரணை

புகாரின் அடிப்படையில் சப்-இன்ஸ்பெக்டர் பா.ஜெகதீசன் தலைமையிலான போலீசார் வழக்குப்பதிவு செய்து விசாரணையை தொடங்கினர். சம்பவம் நடந்த இடம் மற்றும் அதன் சுற்றுப்புற பகுதிகளில் விசாரணை மேற்கொண்டதுடன், சந்தேக நபர்களின் நடமாட்டம் குறித்தும் போலீசார் தகவல்களை சேகரித்தனர்.

தொடர்ந்து நடைபெற்ற விசாரணையில், பாரதியின் தாலிச் செயினை பறிக்க முயன்றவர்கள் ஆப்ரகாம் பண்டிதர் முதல் தெருவைச் சேர்ந்த ராஜசேகரின் மகன் பிரதீப் (23), சேப்பனாவாரி தென்கரையைச் சேர்ந்த சிவராஜின் மகன் இளம்பாரதி என்பது தெரியவந்தது.

ஒருவர் கைது; மற்றொருவருக்கு வலை

இதையடுத்து போலீசார் பிரதீப்பை கைது செய்தனர். பெயிண்டராக வேலை செய்து வரும் பிரதீப்பிடம் சம்பவம் தொடர்பாக விசாரணை நடத்தப்பட்டு வருகிறது. மேலும், இந்த சம்பவத்தில் தொடர்புடையதாக கூறப்படும் இளம்பாரதி தலைமறைவாகி உள்ளார். அவரை பிடிப்பதற்காக போலீசார் பல்வேறு இடங்களில் தேடுதல் நடத்தி வருகின்றனர்.

ஏற்கனவே பல வழக்குகள் நிலுவை

இதற்கிடையே தலைமறைவான இளம்பாரதி குறித்து போலீசார் நடத்திய விசாரணையில், அவர் போலீசாரின் சரித்திர பதிவேடு குற்றவாளி என்பது தெரியவந்துள்ளது. மேலும் தஞ்சாவூர் மேற்கு காவல் நிலையம், தஞ்சாவூர் தெற்கு காவல் நிலையம் ஆகியவற்றிலும், திருச்சி மாவட்டம் சோமரசம்பேட்டை மற்றும் திருவெறும்பூர் காவல் நிலையங்களிலும் அவர் மீது வழக்குகள் நிலுவையில் இருப்பதாக போலீசார் கூறுகின்றனர்.

நள்ளிரவில் வீடு புகுந்து பெண்ணின் தாலிச் செயினை பறிக்க முயன்ற வழக்கில் ஒருவர் கைது செய்யப்பட்டுள்ள நிலையில், தலைமறைவான மற்றொருவரையும் விரைவில் கைது செய்து, சம்பவத்தின் பின்னணி குறித்து முழுமையாக விசாரிக்க போலீசார் நடவடிக்கை மேற்கொண்டு வருகின்றனர்.