personal-finance

ஹோம் லோன் கட்டி முடித்தீர்களா? இந்த டாக்குமெண்ட்ஸ் வாங்க மறந்தால் சிக்கல்! RBI விதிமுறை என்ன?

நாகராஜ் — Sun, 30 Aug 2026 14:57:47 +0530

ஹோம் லோனை முழுசா கட்டி முடிச்சிட்டீங்களா? அப்போ இந்த டாக்குமெண்ட்ஸ்-ஐ வாங்க மறந்துறாதீங்க! அவசரப்பட்டு ஹோம் லோன் வாங்கிவிட்டு ஒரு நாள் அதை முழுமையாக அடைக்கும் போது ஒரு விதமான திருப்தி வரும். அதை அனுபவித்தவர்களுக்கு மட்டும்தான் அது புரியும். ஏனெனில் பல ஆண்டுகள் தொடர்ந்து சிரமப்பட்டு ஈஇஎம்ஐ செலுத்தி வருவார்கள். அதை முடித்துவிட்டு தங்களுடைய பத்திரத்தை கையில் வாங்கும் போது ஏற்படுகிற மகிழ்ச்சிக்கு அளவே இருக்காது.

நீங்கள் பிணையமாக வைத்த பத்திரத்தை வங்கியோ அல்லது நிதி நிறுவனத்தில் இருந்தோ வாங்கிவிட்டால் மட்டும் அந்த சொத்து உங்களுக்கு உரிமையாகிவிடாது. சொத்தின் மீதான முழு அதிகாரத்தையும் சட்டபூர்வமாக பெறுவதற்கு நீங்கள் சில விஷயங்களை செய்தே ஆக வேண்டும். வீட்டுக் கடன் பெறுவதற்கு வங்கி அல்லது நிதி நிறுவனத்திடம் உங்களுடைய ஒரிஜினல் டாக்குமெண்ட்ஸ் அனைத்தையும் வழங்கி இருப்பீர்கள்.

இதை முதலில் வாங்க வேண்டும். உதாரணமாக சொத்து பத்திரம், அலாட்மெண்ட் லெட்டர், ஹவுசிங் சொசைட்டியின் என்ஓசி, கட்டிட வரைபடம், வில்லங்கச் சான்றிதழ் போன்ற ஆவணங்கள் இதில் அடங்கும். அதேபோல நீங்கள் கடனை முடித்த பிறகு வங்கியிடம் இருந்து பெரும் ஆவணங்கள் அனைத்தும் சேதமடையாமல் இருக்க வேண்டும். அதேபோல எல்லா பேஜும் சரியாக இருக்கிறதா என்பதையும் உறுதிப்படுத்திக் கொள்ளுங்கள். ரிசர்வ் வங்கி இதற்கென தனி விதிமுறையை வகுத்துள்ளது. கடன் வழங்குனர் நீங்கள் கடனை முடித்த 30 நாட்களுக்குள் உங்களுடைய ஒரிஜினல் டாக்குமெண்ட்ஸ் அனைத்தையும் உங்களிடம் ஒப்படைக்க வேண்டும். இதில் ஏதேனும் தாமதம் ஏற்பட்டால், தாமதமாகும் ஒவ்வொரு நாளும் அந்த வங்கி உங்களுக்கு ரூ.5000 வீதம் இழப்பீடு வழங்க வேண்டும்.

இதை நீங்கள் கடன் பெற்ற வங்கிகள் உங்களுக்கு வழங்கும். அதாவது ஒரு வாடிக்கையாளர் தங்களுடைய வீட்டுக் கடனை முழுமையாக செலுத்துவிட்டார் என்பதற்காக வங்கிகளிடம் இருந்து பெறப்படும் அதிகாரப்பூர்வ கடிதம் தான் இது. வங்கிகளால் வழங்கப்படும் சான்றிதழ்களுள் ஒன்றுதான் இந்த என்டிசி சான்றிதழ். அதாவது நீங்கள் கடன் பெற்ற வங்கிக்கும் உங்கள் சொத்துக்கும் இனிமேல் எந்தவித சம்பந்தமும் இல்லை என்பதை உறுதிப்படுத்துவதற்கான சட்டப்பூர்வ ஆவணம். NDC சான்றிதழில் சொத்து யார் பெயரில் இருக்கிறது?, எந்த முகவரியில் இருக்கிறது?, கடன் விவரங்கள் எவ்வளவு?, கடன் வாங்கப்பட்ட நாள், கடன் முடிக்கப்பட்ட நாள் இப்படி பல விவரங்கள் இருக்கும்.

உங்கள் கடனை முடித்த அடுத்த கனமே ரெஜிஸ்ட்ரேஷன் ஆபீசுக்கு சென்று புதிதாக வில்லங்கச் சான்றிதழ் பெற வேண்டும். அப்போதுதான் எதிர்காலத்தில் யாரும் உங்கள் சொத்தின் மீது உரிமை கொண்டாடாமல் இருப்பார்கள்.கடன் முழுமையாக அடைக்கப்பட்டதும் உங்கள் கிரெடிட் கார்டு ரிப்போர்ட் அப்டேட் செய்யப்பட்டிருக்கிறதா என்பதை கவனித்துக் கொள்ளுங்கள். ரிப்போர்ட்டில் "Closed" என்று இருக்கிறதா? அல்லது "Settled" என்று இருக்கிறதா? என்பதையும் பார்த்துக் கொள்ளுங்கள். ஏனெனில் கடன் முழுமையாக முடிந்த பின்னர் கிலோஸ்டு என்றுதான் குறிப்பிடப்பட்டிருக்க வேண்டும்.

5 ஆண்டுகளில் ரூ.4.20 லட்சம்... போஸ்ட் ஆபீஸ் சேமிப்பு திட்டத்தின் முழு கணக்கு!

கிஷோர் — Sun, 23 Aug 2026 12:57:24 +0530

சிறு முதலீட்டாளர்கள் மற்றும் நடுத்தரக் குடும்பங்களைச் சேர்ந்தவர்கள் மாதந்தோறும் ஒரு குறிப்பிட்ட தொகையைச் சேமித்து, பாதுகாப்பான முறையில் தங்கள் பணத்தை வளர்க்க உதவும் திட்டங்களில் தபால் நிலையத்தின் தொடர் வைப்பு நிதி (Post Office Recurring Deposit - RD) முக்கியமானதாக உள்ளது. ஒவ்வொரு மாதமும் தவணை முறையில் பணத்தைச் செலுத்தி, திட்டத்தின் முதிர்வுக் காலம் முடிந்த பிறகு முதலீட்டுத் தொகையுடன் வட்டியையும் சேர்த்து பெற முடியும்.

மாதம் ரூ.5,860 சேமித்தால் எவ்வளவு கிடைக்கும்?

தற்போது தபால் நிலைய RD திட்டத்திற்கு ஆண்டுக்கு 6.7% வட்டி வழங்கப்படுவதாகக் கூறப்படுகிறது. இந்த வட்டி காலாண்டு அடிப்படையில் கூட்டப்பட்டு கணக்கிடப்படுகிறது. இந்த வட்டி விகிதத்தை அடிப்படையாகக் கொண்டு, ஒருவர் மாதம் ரூ.5,860 வீதம் தொடர்ந்து 5 ஆண்டுகள் முதலீடு செய்தால், 60 மாதங்களில் மொத்தம் ரூ.3,51,600 முதலீடு செய்யப்படும்.

கொடுக்கப்பட்ட கணக்கீட்டின்படி, இந்த முதலீட்டிற்கு சுமார் ரூ.68,397 வட்டி வருவாய் கிடைக்கும். இதன் மூலம் 5 ஆண்டுகள் முடிவில் முதலீட்டாளருக்கு சுமார் ரூ.4,19,997, அதாவது கிட்டத்தட்ட ரூ.4.20 லட்சம் முதிர்வுத் தொகையாகக் கிடைக்கும்.

மாதம் சிறிய தொகையில் தொடங்கலாம்

தபால் நிலைய RD திட்டத்தின் முக்கிய சிறப்பம்சங்களில் ஒன்று, பெரிய தொகையை ஒரே நேரத்தில் முதலீடு செய்ய வேண்டிய அவசியம் இல்லாதது. மாதந்தோறும் தவணையாக பணத்தைச் செலுத்தி சேமிப்பை உருவாக்க முடியும். மாதம் ரூ.100 முதல் RD கணக்கைத் தொடங்கும் வசதி இருப்பதாகக் கூறப்படுகிறது. அதிகபட்ச முதலீட்டிற்கு குறிப்பிட்ட உச்சவரம்பு இல்லை.

இதனால், ஒரே நேரத்தில் பெரிய தொகையை முதலீடு செய்ய முடியாதவர்களும் தங்களது மாத வருமானத்திற்கு ஏற்ப ஒரு குறிப்பிட்ட தொகையைத் தொடர்ந்து சேமித்து வருங்காலத்திற்கான நிதியை உருவாக்க முடியும்.

5 ஆண்டுகள் முதிர்வுக் காலம்

தபால் நிலைய RD கணக்கின் வழக்கமான முதிர்வுக் காலம் 5 ஆண்டுகள் ஆகும். இந்த காலகட்டத்தில் முதலீட்டாளர் ஒவ்வொரு மாதமும் நிர்ணயிக்கப்பட்ட தவணையைத் தொடர்ந்து செலுத்த வேண்டும். தொடர்ந்து சேமிப்பது மூலம் 5 ஆண்டுகளின் முடிவில் முதலீட்டுத் தொகையுடன் வட்டியையும் சேர்த்து பெற முடியும்.

மேலும், 5 ஆண்டுகள் முடிந்த பிறகும் சேமிப்பைத் தொடர விரும்புபவர்கள், விதிமுறைகளுக்கு உட்பட்டு கணக்கை மேலும் 5 ஆண்டுகளுக்கு நீட்டிக்கும் வாய்ப்பும் உள்ளது. இதன் மூலம் நீண்டகால நிதித் தேவைகளுக்காக தொடர்ந்து சேமிக்க முடியும்.

12 மாதங்களுக்குப் பிறகு கடன் வசதி

RD திட்டத்தில் தொடர்ந்து 12 மாதங்கள் தவணை செலுத்திய பிறகு, கணக்கில் சேர்ந்துள்ள தொகையில் குறிப்பிட்ட அளவு வரை கடன் பெறும் வசதியும் உள்ளது. கொடுக்கப்பட்ட தகவலின்படி, கணக்கில் சேர்ந்துள்ள தொகையில் 50% வரை கடனாகப் பெற முடியும்.

இதனால் எதிர்பாராத நிதித் தேவை ஏற்பட்டாலும், RD கணக்கை உடனடியாக முடிப்பதற்குப் பதிலாக, தகுதி மற்றும் பொருந்தும் விதிமுறைகளுக்கு உட்பட்டு கடன் வசதியைப் பயன்படுத்திக் கொள்ள முடியும்.

பாதுகாப்பான முதலீட்டை விரும்புவோருக்கு ஏற்றது

சந்தை சார்ந்த முதலீடுகளில் வருமானம் அதிகமாக இருக்க வாய்ப்பிருந்தாலும், அதனுடன் சந்தை ஏற்ற இறக்கங்களும் இருக்கும். ஆனால் தபால் நிலைய RD போன்ற சேமிப்புத் திட்டங்கள் நிலையான வட்டி அடிப்படையில் செயல்படுவதால், சந்தை அபாயத்தைத் தவிர்த்து ஒழுங்காகச் சேமிக்க விரும்புபவர்களுக்கு இது ஒரு மாற்று வாய்ப்பாக இருக்கிறது.

குறிப்பாக மாத வருமானத்தில் இருந்து ஒரு குறிப்பிட்ட தொகையை ஒதுக்கி, நீண்ட காலத்திற்கு சேமிக்க விரும்பும் குடும்பங்கள், சம்பளதாரர்கள் மற்றும் சிறு முதலீட்டாளர்கள் RD திட்டத்தைப் பரிசீலிக்கலாம். இருப்பினும், வட்டி விகிதங்கள் மற்றும் திட்ட விதிமுறைகள் காலப்போக்கில் மாறக்கூடியவை என்பதால், முதலீடு செய்வதற்கு முன்பு தற்போதைய விதிமுறைகளை தபால் நிலையத்தில் உறுதி செய்து கொள்வது அவசியம்.

முக்கியமாக தெரிந்து கொள்வது: ரூ.5,860 மாதத் தவணை, ரூ.68,397 வட்டி மற்றும் ரூ.4,19,997 முதிர்வுத் தொகை ஆகியவை நீங்கள் வழங்கிய தகவலின் அடிப்படையிலான தோராயமான கணக்கீடுகள்.

RBI Loan Recovery: லோன் வசூல் நடவடிக்கைகள் - கடும் கட்டுப்பாடுகளை விதித்த ஆர்பிஐ - புதிய விதிகள் என்ன?

குலசேகரன் முனிரத்தினம் — Tue, 11 Aug 2026 08:50:11 +0530

RBI Loan Recovery: வங்கிக் கடனை வசூலிப்பதற்காக இரவு நேரங்களில் தொலைபேசியில் தொடர்பு கொள்வது போன்றவற்றிற்கு ரிசர்வ் வங்கி தடை விதித்துள்ளது.

கடனை வசூலிக்க வங்கிகளுக்கான வழிமுறைகள்:

இந்திய ரிசர்வ் வங்கி, கடன் வசூலை முற்றிலும் வெளிப்படையானதாகவும், கடன் வாங்கியவர்களுக்கு உகந்ததாகவும் மாற்றும் வகையில் புதிய அறிவிப்பை வெளியிட்டுள்ளது. ஜனவரி 1, 2027 முதல் அமலுக்கு வரும் திருத்தப்பட்ட வழிகாட்டுதல்கள், வங்கிகள் மற்றும் வசூல் முகவர்கள் கடன் வாங்கியவர்களைத் தொடர்புகொள்வது, வசூல் நடவடிக்கைகளை மேற்கொள்வது மற்றும் கடன் வசூலில் தொழில்நுட்பத்தைப் பயன்படுத்துவது ஆகியவற்றை நிர்வகிக்கும் கடுமையான விதிகளை கொண்டுள்ளன. கடன் வாங்கியவர்கள் எதிர்கொள்ளும் துன்புறுத்தலைத் தடுக்கும் வகையிலும், அதே சமயம் மீட்பு நடைமுறைகள் நியாயமாகவும் இருப்பதை உறுதிசெய்யும் வகையில் புதிய விதிகள் வடிவமைக்கப்பட்டுள்ளன.

இரவில் தொலைபேசி அழைப்புகள் கூடாது..!

புதிய விதிகளின்படி, வங்கிகளும் மீட்பு முகவர்களும் வழக்கமாக காலை 8:00 மணி முதல் மாலை 7:00 மணி வரை மட்டுமே கடன் வாங்கியவர்களைத் தொடர்பு கொள்ள வேண்டும். கடன் வாங்குபவர் குறிப்பாகக் கோரியிருந்தாலோ அல்லது அனுமதி அளித்திருந்தாலோ மட்டுமே, இந்த நேரங்களை தாண்டி அழைப்பதோ அல்லது சந்திப்பதோ அனுமதிக்கப்படும். மருத்துவ அவசர நிலைகள், குடும்பத்தில் துக்கம் மற்றும் திருமண விழாக்கள் போன்ற உணர்திறன் மிக்க தனிப்பட்ட சூழ்நிலைகளின் போது கடன் வாங்கியவர்களைத் தொடர்புகொள்வதைத் தவிர்க்குமாறும் அறிவுறுத்தப்பட்டுள்ளது.

மிரட்டுவது கூடாது..!

மீட்பு முகவர்கள் அச்சுறுத்துவது, இழிவான அல்லது மிரட்டும் நடத்தையைப் பயன்படுத்துவதை தவிர்க்க வேண்டும் என ரிசர்வ் வங்கி கடுமையாக எச்சரித்துள்ளது. அதன்படி,

அடையாளம் தெரியாத அல்லது மிரட்டும் தொலைபேசி அழைப்புகளை மேற்கொள்வது
கடன் வாங்குபவர்களுக்கு அழுத்தம் கொடுப்பதற்காக அவர்களைத் திரும்பத் திரும்ப தொலைபேசியில் அழைப்பது
கடன் வாங்கியவர்களைப் பொதுவெளியில் அவமானப்படுத்துதல்
குடும்ப உறுப்பினர்கள், சொத்துக்கள் அல்லது நற்பெயருக்கு அச்சுறுத்தல் விடுப்பது
கடன் வாங்குபவர்களின் தனிப்பட்ட தகவல்கள், புகைப்படங்கள், காணொளிகள் அல்லது ஒலிப்பதிவுகளைப் பகிர்வதன் மூலம் சமூக ஊடகங்களைத் தவறாகப் பயன்படுத்துதல் ஆகியவற்றிற்கு தடை விதிக்கப்பட்டுள்ளது.

நினைத்த நேரத்தில் வீட்டிற்கு செல்லக்கூடாது

இந்திய ரிசர்வ் வங்கி, நேரடியாக வீட்டிற்கு சென்று பணம் வசூலிப்பதிலும் வெளிப்படைத்தன்மையை அதிகரித்துள்ளது. அதன்படி, வீட்டிற்கு வருவது குறித்து கடன் வாங்குபவர்களுக்கு குறைந்தபட்சம் ஒரு நாள் முன்னறிவிப்பு வழங்கப்பட வேண்டும். வங்கிகள், நியமிக்கப்பட்ட மீட்பு முகமையின் பெயரையும் விவரங்களையும் வெளியிட வேண்டும்.
மீட்பு முகவர்கள் பயனர்களின் வீட்டிற்கு வரும்போது அதிகாரப்பூர்வ அடையாள அட்டை, அங்கீகாரக் கடிதம், தொடர்புடைய மீட்பு அறிவிப்பு ஆகியவற்றை கொண்டு வரவேண்டும். மேலும் மீட்பு முகமை மற்றும் வங்கியின் குறைதீர்ப்பு அதிகாரி ஆகிய இருவரின் தொடர்பு விவரங்களையும் கொண்டிருக்க வேண்டும். கடன் வாங்குபவர்கள் தங்களுக்கு விருப்பமான சந்திப்பு இடத்தை தேர்வு செய்யலாம். எந்த விருப்பமும் தெரிவிக்கப்படாவிட்டால் அல்லது கடன் வாங்குபவர் மீண்டும் மீண்டும் ஆஜராகத் தவறினால், முகவர்கள் கடன் வாங்குபவரின் இல்லம் அல்லது பணியிடத்திற்குச் செல்லலாம்.

இதையும் படியுங்கள்: CM Vijay: பீச்சோரம் வீட்டருகிலேயே புதிய தலைமை செயலகம் - ப்ளான் சொன்ன CM விஜய்? களமிறங்கிய அதிகாரிகள்?

பதிவுகள் கட்டாயம்:

பொறுப்புணர்வை வலுப்படுத்தும் வகையில், கடன் வசூல் தொடர்பான தகவல்தொடர்புகளின் பதிவுகளைப் பராமரிக்குமாறு கடன் வழங்குநர்களுக்கு இந்திய ரிசர்வ் வங்கி அறிவுறுத்தியுள்ளது. வங்கிகள் வாடிக்கையாளர்கள் உடனான் உரையாடல்களைப் பதிவுசெய்து, பின்வரும் விவரங்களைப் பாதுகாக்க வேண்டும்.

அழைப்பு நேரம்
பயன்படுத்தப்பட்ட தொலைபேசி எண்கள்
மீட்பு தொடர்புகள்

இந்தப் பதிவுகள் பொதுவாகக் குறைந்தபட்சம் ஆறு மாத காலத்திற்குப் பாதுகாக்கப்பட வேண்டும். மூன்றாம் தரப்பு முகமைகள் பணியமர்த்தப்பட்டாலும் கூட, வசூல் நடைமுறைகளுக்கு வங்கிகளே முழுப் பொறுப்பு வகிக்கின்றன என்றும் இந்திய ரிசர்வ் வங்கி தெளிவுபடுத்தியுள்ளது.

கடன் வசூலுக்குத் தேவையான கடன் வாங்குபவரின் தகவல்களை மட்டுமே மீட்பு முகவர்கள் பெற வேண்டும். கடன் வாங்குபவர்களின் தனிப்பட்ட தகவல்கள் தவறாகப் பயன்படுத்தப்படுவதிலிருந்து பாதுகாக்கப்படுவதை உறுதி செய்யுமாறு வங்கிகளுக்கு அறிவுறுத்தப்பட்டுள்ளது.

How To Save ₹100 Every Day: ஒரு நாளுக்கு 100 ரூபாய் சேமித்தால் நிதி எதிர்காலம் எப்படி மாறும்? - : கோடீஸ்வரர் ஆகும் ரகசியம் இதுதான்!

ராஜேஷ். எஸ் — Mon, 3 Aug 2026 17:53:31 +0530

How To Save ₹100 Every Day: மாதத்தின் முதல் தேதியிலேயே சம்பளம் அக்கவுண்டில் விழுந்ததும், போனில் கிரெடிட் கார்டு பில்லுகள், EMIகள், வீட்டு வாடகை எல்லாம் கழிந்துவிடுகின்றன. அதன் பிறகு Swiggy, Zomatoவில் பிரியாணி ஆர்டர்கள், வீக்கெண்ட் வந்தாலே மல்டிப்ளெக்ஸ்களில் படங்கள், பப்கள், கஃபேக்களில் பார்ட்டிகள், இப்படி ஸ்மார்ட் போன் கையில் இருந்தாலே போதும் UPI PIN அடித்துக் கொண்டு விருப்பம்போல் செலவு செய்து விடுகிறோம். மாத இறுதி வரும்போது அக்கவுண்டில் பேலன்ஸ் இல்லை. கடன் யாராவது தருவார்களா என்று நண்பர்களை நோக்கிப் பார்க்கிறோம். பலர் சந்திக்கும் மிகப் பெரிய நிதி பிரச்சினை இதுதான். சேமிக்க வேண்டும் என்ற எண்ணம் எல்லோருக்கும் இருக்கும். ஆனால் சேவிங்ஸ் என்றால் மாதந்தோறும் ஆயிரக்கணக்கில் ஒதுக்க வேண்டுமோ, அந்த அளவு பணம் நம்மிடம் எங்கே இருக்கிறது என்று பலர் லைட் ஆக எடுத்துக்கொள்கிறார்கள். ஆனால் நிதி நிபுணர்கள் சொல்வது என்னவென்றால்... நீங்கள் கோடீஸ்வரராக ஆக பெரிய பெரிய தொகைகள் தேவையில்லை. உங்கள் தினசரி செலவுகளில் இருந்து வெறும் நூறு ரூபாய் மட்டும் ஒதுக்கினாலே போதும் என்கிறார்கள். பார்க்கச் சிறிய தொகை போலத் தோன்றினாலும், இது உங்கள் ஃப்யூச்சரை எப்படி மாற்றும் என்று தெரிந்தால் ஷாக் ஆகிவிடுவீர்கள்.

ஒரு நாளுக்கு நூறு ரூபாய் சேமிப்பு சாத்தியமா?

ஒரு நாளுக்கு நூறு ரூபாய் சேமிப்பதா? இது மிகவும் சிம்பிள் போலத் தோன்றலாம். ஆனால் நடைமுறையில் அதை ஒவ்வொரு நாளும் செய்வது மிகவும் கடினம். இதையே நிதி உலகில் லாட்டே ஃபாக்டர் என்பார்கள். பிரபல எழுத்தாளர் டேவிட் பாச் சொன்ன இந்தக் கோட்பாட்டின்படி, நாம் தினமும் செய்யும் சிறிய சிறிய தேவையற்ற செலவுகளை குறைத்தால் அற்புதமான செல்வத்தை உருவாக்கலாம்.

உதாரணமாக, நீங்கள் தினமும் ஆபீஸுக்கு கேண்டீனில் குடிக்கும் எக்ஸ்ட்ரா காபிகள், ஸ்மோக்கிங் பழக்கங்கள், போர் அடிக்கும்போது ஆன்லைனில் செய்யும் இம்பல்சிவ் ஷாப்பிங், OTT சப்ஸ்கிரிப்ஷன்கள் இப்படி உங்களுக்கே தெரியாமல் ஒரு நாளுக்கு 200 முதல் 300 வரை வீணாகிறது. இவற்றில் இருந்து வெறும் நூறு ரூபாய் காப்பாற்றிக் கொள்வது பெரிய கஷ்டம் இல்லை. வெளியே சாப்பிடும் ஜங்க் ஃபுட்டை வாரத்திற்கு ஒருமுறை மட்டுமே வைத்துக்கொள்ளுங்கள். அருகிலுள்ள தூரங்களுக்கு கேப்கள், ஆட்டோக்கள் புக் செய்யாமல் நடப்பது அல்லது பப்ளிக் டிரான்ஸ்போர்ட் பயன்படுத்துவது நல்லது. பாட்டில் வாட்டர் வாங்குவதற்குப் பதிலாக, வீட்டிலிருந்தே வாட்டர் பாட்டில் எடுத்துச் செல்வது போன்ற சிறிய மாற்றங்களால் ஒரு நாளுக்கு 100 ரூபாய் சேமிப்பது மிகவும் ஈஸி.

உங்கள் நூறு ரூபாய் கோடிகளாக எப்படி மாறும்?

ஐன்ஸ்டீன் சொன்னதுபோல் காம்பவுண்டிங் என்பது உலகின் எட்டாவது அதிசயம். புரிந்தவன் பணம் சம்பாதிக்கிறான். புரியாதவன் வட்டிகள் கட்டுகிறான். நீங்கள் ஒரு நாளுக்கு 100 ரூபாய் சேமித்தால், மாதத்திற்கு அது 3000 ரூபாய் ஆகும். இந்த மூன்று ஆயிரம் ரூபாயை வெறும் வங்கி சேவிங்ஸ் அக்கவுண்டில் வைத்தால் பணவீக்கத்தின் தாக்கத்தால் அதன் மதிப்பு குறையும். அதற்கு பதிலாக, இந்த மாதத்திற்கு 3000 ரூபாயை தொடர்ந்து மியூச்சுவல் ஃபண்ட்ஸில் சிஸ்டமேட்டிக் இன்வெஸ்ட்மென்ட் பிளான் மூலம் முதலீடு செய்தால் மேஜிக் தொடங்கும்.

பங்குச் சந்தை சார்ந்த ஈக்விட்டி மியூச்சுவல் ஃபண்ட்ஸ் நீண்ட காலத்தில் சராசரியாக 12 சதவீதம் முதல் 15 சதவீதம் வரை ஆண்டு வருமானம் தருகின்றன. நீங்கள் கன்சர்வேட்டிவாக 12 சதவீத வருமானத்தை கணக்கிட்டாலும் ரிசல்ட் மைண்ட் ப்ளாக் ஆகும் அளவுக்கு இருக்கும்.

முதலீட்டு காலம்	நீங்கள் முதலீடு செய்த தொகை	கிடைத்த லாபம்	உங்கள் கைக்கு வரும் தொகை
ஐந்து ஆண்டுகள்	1, 80, 000	67,460	2,47,460
பத்து ஆண்டுகள்	3,60,000	3,32,323	6,92,323
15 ஆண்டுகள்	5,40,000	10,03,733	15, 43, 733
20 ஆண்டுகள்	7,20,000	22,77,444	29,97,444
25 ஆண்டுகள்	9,000,000	47,92,752	56,92,752
30 ஆண்டுகள்	10,80,000	94, 49, 531	1,05, 29, 531

ஸ்கேன் அண்ட் பே டிராப்புக்கு இப்படிப் பிரேக் வையுங்கள்!

இன்றைய காலத்தில் செலவுகள் அதிகரிப்பதற்கான முக்கிய காரணம் டிஜிட்டல் பேமென்ட்ஸ். பர்ஸில் நூறு ரூபாய் நோட்டு இருந்தால் அதை செலவு செய்ய இரண்டு முறை யோசிப்போம். ஆனால் போனில் QR கோட் ஸ்கேன் செய்து PIN அடிப்பது சில விநாடிகளில் நடந்து விடுகிறது. இதைத் தடுக்க உங்கள் சம்பளம் வரும் மேன் அக்கவுண்டை GPay, PhonePe-க்கு லிங்க் செய்யாதீர்கள். அதற்கு பதிலாக ஒரு சிறிய சேவிங்ஸ் அக்கவுண்டை ஓபன் செய்து, வாரத்திற்குத் தேவையான பாக்கெட் மணியை மட்டும் அதில் போட்டு அதை UPIக்கு பயன்படுத்துங்கள். பேலன்ஸ் முடிந்ததும் தானாகவே செலவுகளுக்கு பிரேக் விழும். ஆன்லைனில் Amazon, Flipkart-இல் ஏதாவது பொருள் வாங்க வேண்டும் என்று தோன்றினால், அதை உடனே கார்டில் போட்டு பேமென்ட் செய்யாதீர்கள். கட்டாயம் 24 மணி நேரம் காத்திருந்து யோசியுங்கள். அடுத்த நாளும் அந்தப் பொருள் உங்களுக்கு அவசியம் என்று தோன்றினால் வாங்குங்கள்.

ஸ்மார்ட் மணி மேனேஜ்மென்ட் ரூல்

உங்கள் சம்பளத்தில் பாதியை உங்கள் தேவைகளுக்கு, அதாவது வாடகை, மளிகை, பில்லுகள், EMIகள், குழந்தைகளின் கட்டணங்களுக்கு ஒதுக்க வேண்டும். மேலும் 30 சதவீதத்தை என்ஜாய் செய்வதற்கு, அதாவது படங்கள், ஷாப்பிங், டிப்ஸ்களுக்கு ஒதுக்குங்கள். மேலும் 20 சதவீதத்தை எமர்ஜென்சி ஃபண்ட், SIP, அல்லது ரிட்டையர்மென்டுக்காக சேமிக்க வேண்டும். இன்வெஸ்ட்மென்டில் டைமிங்கை விட டைம் கடத்துவது மிகவும் முக்கியம். இதுவரை சம்பளம்-செலவுகள்=சேமிப்பு என்ற ஃபார்முலாவை விடுங்கள். இப்போது சம்பளம்-சேமிப்பு=செலவுகள் என்ற ஃபார்முலாவுக்கு பழகுங்கள். வரும் மாற்றத்தை நீங்களே கவனியுங்கள்.

Income Tax Return: இன்றே கடைசி..! வருமான வரி தாக்கல் செய்யாவிட்டால் ரூ.5000 அபராதம் - கூடுதல் அவகாசம் யாருக்கு?

குலசேகரன் முனிரத்தினம் — Fri, 31 Jul 2026 10:15:37 +0530

Income Tax Return: வருமான வரி தாக்கல் செய்வதற்கான அவகாசம் இன்றுடன் முடிவடையும் நிலையில், யாருக்கு கூடுதல் அவகாசம் வழங்கப்படும் என கீழே விவரிக்கப்பட்டுள்ளது.

வருமான வரி தாக்கல் - இன்றே கடைசி

மத்திய அரசின் அறிவிப்பின்படி, 2026-27 மதிப்பீட்டு ஆண்டிற்கான வருமான வரி தாக்கல் செய்வதற்கான அவகாசம், பெரும்பாலான வரி செலுத்துவதற்கு ஜுலை 31ம் தேதியன்று முடிவடைய உள்ளது. இந்த வாய்ப்பை தவறவிடுபவர்கள் பல்வேறு பிரச்னைகளை எதிர்கொள்ளக் கூடும். குறிப்பாக கால தாமதத்திற்காக 5 ஆயிரம் ரூபாய் அபராதம் செலுத்தப்பட வேண்டி வரும். அதேநேரம், இன்றே கடைசி நாள் என்பது அனைத்து வகையான வரி செலுத்துவோருக்கும் பொருந்தாது. வெளியாகியுள்ள தகவலின்படி இதுவரை, 5 கோடியே 2 லட்சம் பேர் 2026-27 மதிப்பீட்டு ஆண்டிற்கான வருமான வரி தாக்கல் செய்துள்ளனர். கடந்த மதிப்பீட்டு ஆண்டில் ஒட்டுமொத்தமாக 6 கோடியே 97 லட்சம் பேர் வருமான வரி தாக்கல் செய்து இருந்தது குறிப்பிடத்தக்கது.

யாரெல்லாம் ITR தாக்கல் செய்ய இன்றே கடைசி..!

ITR-1, ITR-2 விண்ணப்பங்களை தாக்கல் செய்ய தகுதியானவர்கள், ஜுலை 31ம் தேதிக்குள் வருமான வரி தாக்கல் செய்தாக வேண்டும். இந்த பிரிவானது பொதுவாக மாத சம்பளம் வாங்குபவர்கள் மற்றும் மூலதன ஆதாயங்கள் & இழப்பீடுகளை எதிர்கொள்பவர்கள் அடங்குவர்.சம்பள வருமானம் மற்றும் பிற தகுதி நிபந்தனைகளுக்கு உட்பட்டு, ரூ. 1.25 லட்சம் வரையிலான நீண்ட கால மூலதன ஆதாயங்களைக் (LTCG) கொண்ட குடியுரிமை பெற்ற தனிநபர்கள் ITR-1 படிவத்தைத் தாக்கல் செய்யலாம். இருப்பினும், வணிக வருமானம் இல்லாத பட்சத்தில், ரூ. 1.25 லட்சத்திற்கு அதிகமான LTCG அல்லது வரிக்குட்பட்ட குறுகிய கால மூலதன ஆதாயங்களைக் கொண்டவர்கள் பொதுவாக ITR-2 படிவத்தைத் தாக்கல் செய்ய வேண்டும். இதுபோக ITR-5 (வணிக வருமானம் இல்லாத மற்றும் தணிக்கைக்கு உட்படாதவர்கள்), வணிக வருமானம் இல்லாத சங்கங்கள் அல்லது வணிகம் செய்யாத நிறுவனங்கள், மற்றும் ITR-7 ஆவணங்களை தாக்கல் செய்பவர்களுக்கான அவகாசம் இன்றுடன் முடிவடைய உள்ளது.

ITR தாக்கல் - யாருக்கு ஆக.31 வரை வாய்ப்பு?

வரி தணிக்கைக்கு உட்படாத வணிக அல்லது தொழில் வருமானம் உள்ள வரி செலுத்துவோர், தங்களது வருமான வரிக் கணக்கைத் தாக்கல் செய்ய ஆகஸ்ட் 31 வரை அவகாசம் பெறுவர். வருமானத்தின் தன்மை மற்றும் தகுதியைப் பொறுத்து, அவர்கள் ITR-3 அல்லது ITR-4 படிவத்தைத் தாக்கல் செய்ய வேண்டும். வருமான வரி அறிக்கை-5 (வணிக வருமானம், தணிக்கை அல்லாத வழக்குகள்) தாக்கல் செய்பவர்களுக்கும் ஆகஸ்ட் 31, 2026 வரை அவகாசம் உள்ளது. இதற்கிடையில், கணக்குகள் தணிக்கை செய்யப்பட வேண்டிய வரி செலுத்துவோர், தங்களது வருமான வரிக் கணக்குகளைத் தாக்கல் செய்ய அக்டோபர் 31 வரை அவகாசம் உள்ளது. வரித் தணிக்கைக்கான காலக்கெடு செப்டம்பர் 30 ஆகும்.

இதையும் படியுங்கள்: Nexon Rival: நெக்ஸானுக்கு போட்டியாக 25KM மைலேஜில் வரும் புது எஸ்யுவி - மினிமம் பட்ஜெட், மேக்ஸிமம் அம்சங்கள்

தாக்கல் செய்ய தவறினால் என்ன நடக்கும்?

வருமான வரி அறிக்கை (ITR-1) அல்லது வருமான வரி அறிக்கை 2 (ITR-2) தாக்கல் செய்ய வேண்டிய வரி செலுத்துவோர், இன்றைக்குள் தனது கடமையை செய்து முடிக்காவிட்டால், தாமதமாகத் தாக்கல் செய்ததற்கான கட்டணம் உட்படப் பல பின் விளைவுகளைச் சந்திக்க நேரிடலாம். வருமான வரிச் சட்டத்தின் பிரிவு 234F-இன் கீழ் இந்த அபராதங்கள் வேறுபடுகின்றன.

மொத்த வருமானம் ரூ. 5 லட்சம் வரை: தாமதமாகத் தாக்கல் செய்தால் ரூ. 1,000 கட்டணம்.

மொத்த வருமானம் ரூ. 5 லட்சத்திற்கு மேல்: தாமதமாகத் தாக்கல் செய்தால் ரூ. 5,000 கட்டணம்.

அடிப்படை விலக்கு வரம்பிற்குக் குறைவான வருமானம்: தாமதக் கட்டணம் எதுவும் செலுத்தத் தேவையில்லை

செலுத்தப்படாத வரிகளுக்கான வட்டி: வருமான வரி நிலுவையில் இருந்தால், பிரிவு 234A-இன் கீழ், செலுத்த வேண்டிய தேதியிலிருந்து வரி செலுத்தப்படும் வரை, செலுத்தப்படாத வரித் தொகையின் மீது மாதம் அல்லது மாதத்தின் பகுதிக்கு 1% என்ற விகிதத்தில் வட்டி வசூலிக்கப்படும்.

வரித் திரும்பப் பெறுதலில் தாமதம்: நீங்கள் வரித் திரும்பப் பெறுதலுக்குத் தகுதியுடையவராக இருந்தால், உரிய தேதிக்குப் பிறகு உங்கள் கணக்கு அறிக்கையைத் தாக்கல் செய்வது, உங்கள் அறிக்கை செயலாக்கப்படுவதையும், அதன் விளைவாக, நீங்கள் திரும்பப் பெறும் தொகையைப் பெறுவதையும் தாமதப்படுத்தக்கூடும்.

Indian Billionaires: ஆண்டுக்கு ரூ.100 கோடி சம்பாதிக்கும் 570 இந்தியர்கள்..! 5 ஆண்டுகளில் அசுர வளர்ச்சி - அரசு தகவல்

குலசேகரன் முனிரத்தினம் — Wed, 29 Jul 2026 09:51:12 +0530

Indian Billionaires: இந்தியர்களில் ஆண்டுக்கு 100 கோடி ரூபாய் வருவாய் ஈட்டும் நபர்களின் எண்ணிக்கை, கடந்த 5 ஆண்டுகளில் 300 சதவிகிதம் உயர்ந்துள்ளது.

ரூ.100 கோடி வருவாய் ஈட்டும் 570 இந்தியர்கள்:

இந்தியாவின் மிகவும் பெரிய பணக்காரர்களின் பட்டியல் என்பது மேலும் நீளமடைந்துள்ளது. நாடாளுமன்றத்தில் நிதியமைச்சகம் தாக்கல் செய்த தரவுகளின்படி, 2025-26 மதிப்பீட்டு ஆண்டில் ஒரு ஆண்டுக்கு 100 கோடி ரூபாய் அல்லது அதற்கு மேல் வருவாய் ஈட்டும் தனி நபர்களின் எண்ணிக்கை 576 ஆக உயர்ந்துள்ளது. இந்த எண்ணிக்கையானது 2024-25 காலகட்டத்தில் வெறும் 415 பேர் ஆக மட்டுமே இருந்தது குறிப்பிடத்தக்கது. நாட்டில் பெரும்பணக்காரர்களின் எண்ணிக்கை அதிகரித்து வருவதை மத்திய அரசு தொடர்ந்து கண்காணித்து வருகிறதா? என நாடாளுமன்ற உறுப்பினர் எழுப்பிய கேள்விக்கு, மத்திய நிதித்துறை இணையமைச்சர் பங்கஜ் சவுத்ரி மேற்குறிப்பிடப்பட்ட விவரங்களை எழுத்துப்பூர்வமாக தாக்கல் செய்துள்ளார்.

5 ஆண்டுகளில் 300% உயர்வு

5 ஆண்டுகளுக்கு முன்பாக அதாவது 2021-22 காலகட்டத்தில் ஆண்டிற்கு குறைந்தபட்சம ரூ.100 கோடி வருவாய் ஈட்டும் தனி நபர்களின் எண்ணிக்கை 142 மட்டுமே ஆகும். அந்த எண்ணிக்கையானது தற்போது 300 சதவிகிதத்திற்கும் அதிகமாக உயர்ந்து இந்த பட்டியலில் புதியதாக 576 பேர் இணைந்துள்ளனர். ஒரு குறுகிய காலகட்டத்தில் பதிவான சரிவைத் தவிர மற்றபடி இந்த எண்ணிக்கையானது தொடர்ந்து உயர்ந்து வருகிறது. 2021-22 காலகட்டத்தில் 142 ஆக இருந்த எண்ணிக்கை, 2022-23ல் 301 ஆக அதிகரித்தது. 2023-24 மதிப்பீட்டு ஆண்டில் மட்டும் 284 ஆக சரிந்தது. இருப்பினும் 2024-25 காலகட்டத்தில் இந்த எண்ணிக்கை 415 ஆக ஏறுமுகத்திற்கு திரும்ப, 2025-26 மதிப்பீட்டு ஆண்டில் 576 ஆக புதியௌச்சத்தை எட்டியுள்ளது. நாடாளுமன்றத்தில் 'பில்லியனர்கள்' என குறிப்பிட்டு கேள்வி எழுப்பப்பட்ட போதிலும், பில்லியனர் என்பதற்குத் தங்களிடம் அதிகாரப்பூர்வமான வரையறை இல்லை என மத்திய அரசு விளக்கமளித்துள்ளது. அதற்கு பதிலாக, ஆண்டு வருமானம் ரூ. 100 கோடி அல்லது அதற்கு மேல் இருப்பதாகத் தெரிவிக்கும் வரி செலுத்துவோரின் வருமான வரி அறிக்கை (ITR) தரவுகளை மத்திய அரசு வெளியிட்டுள்ளது.

தரவுகள் இல்லை - அரசு பதில்

2025-ஆம் ஆண்டு வருமான வரிச் சட்டம் அல்லது முந்தைய 1961-ஆம் ஆண்டு வருமான வரிச் சட்டத்தின் அடிப்படையில் 'பில்லியனர்' என்ற சொல்லுக்கு சட்டப்பூர்வமான வரையறை எதுவும் இல்லை என்று அரசாங்கம் தெரிவித்துள்ளது. இந்திய கோடீஸ்வரர்களின் மொத்த சொத்து மதிப்பு குறித்தும், கடந்த ஐந்து ஆண்டுகளில் அது எவ்வாறு மாறியுள்ளது என்பது குறித்தும் அரசாங்கம் தரவுகளைப் பராமரிக்கிறதா என்ற கேள்விக்கு, அத்தகைய அதிகாரப்பூர்வ தரவுகள் எதுவும் பராமரிக்கப்படவில்லை என்று பதிலளிக்கப்பட்டுள்ளது. அதாவது"1957-ஆம் ஆண்டின் செல்வ வரிச் சட்டம் 01 ஏப்ரல் 2016 முதல் ரத்து செய்யப்பட்டது, மேலும் வரி செலுத்துவோரின் மொத்த செல்வம் குறித்த தரவுகளை அரசாங்கம் பராமரிப்பதில்லை," என்று நிதியமைச்சகம் தெரிவித்துள்ளது.

இதையும் படியுங்கள்: Honda QC3 Scooter Vs Rivals: ஹோண்டா QC3 மின்சார ஸ்கூட்டரின் போட்டியாளர்கள் எப்படி? விலை, பேட்டரி, ரேஞ்ச், வசதி - முழு ஒப்பீடு

பொருளாதார ஏற்றத்தாழ்வுகள்:

மேற்குறிப்பிடப்பட்டுள்ள பெரும் பணக்காரர்கள் தொடர்பான புள்ளி விவரங்களானது, சமூகத்தில் அதிகரித்து வரும் பொருளாதார சமத்துவமின்மையை காட்டுவதாக கவலைகள் எழுகின்றன. ஆனால், மத்திய அரசின் பல்வேறு நடவடிக்கைகளால் கிராமப்புற மற்றும் நகர்ப்புறங்களுக்கு இடையிலான நுகர்வு ஏற்றத்தாழ்வு இடைவெளி குறைந்து வருவதாக அரசு விளக்கமளிக்கிறது. வரி நடவடிக்கைகள் மற்றும் நலத்திட்டங்களின் கலவையின் மூலம் வருமானம் மற்றும் செல்வ ஏற்றத்தாழ்வைச் சரிசெய்து வருவதாக நிதி அமைச்சகம் தெரிவித்துள்ளது. அதில் பிரதம மந்திரி ஆவாஸ் யோஜனா, பிரதம மந்திரி ஜன் தன் யோஜனா, பிரதம மந்திரி-கிசான், ஆயுஷ்மான் பாரத் மற்றும் ஜல் ஜீவன் மிஷன் போன்ற முதன்மைத் திட்டங்களுடன், வேலைவாய்ப்பு, புத்தொழில் நிறுவனங்கள், கூட்டுறவு சங்கங்கள் ஆகியவை அடங்கும். மேலும் இந்தியாவின் வருமான வரி அமைப்பின்படி, மிக அதிக வருமானம் ஈட்டும் தனிநபர்கள் சாதாரண வருமான வரிக்கு மேலாகக் கூடுதல் கட்டணம் செலுத்த வேண்டியுள்ளது எனவும் மத்திய அரசு தெரிவித்துள்ளது.

PF உறுப்பினர் இறந்துவிட்டாரா? குடும்பத்தினர் நிதி, பென்ஷன், இன்சூரன்ஸ் பலனை பெறுவது எப்படி?

குலசேகரன் முனிரத்தினம் — Tue, 28 Jul 2026 12:54:21 +0530

EPFO: வருங்கால வைப்பு நிதி முதலில் உறுப்பினரால் பதிவு செய்யப்பட்ட பரிந்துரைக்கப்பட்ட நபருக்கு வழங்கப்படும் என விதிகள் தெரிவிக்கின்றன.

EPFO உறுப்பினர்களின் வாரிசுகளுக்கான அப்டேட்கள்

வருங்கால வைப்பு நிதி திட்டத்தின் உறுப்பினர் இறந்துவிட்டால் அவர் தொடர்பான வைப்பு நிதி, ஓய்வூதியம் மற்றும் காப்பீட்டு பலன்களை குடும்பத்தினர் EPFO போர்டல் மூலம் ஆன்லைன் வழியாக மட்டுமே உரிமை கோர முடியும். முன்னதாக உமாங் செயலியில் இந்த வசதி இருந்த நிலையில், தற்போது EPFO இணையதளம் வாயிலாக மட்டுமே அணுக முடியும் என அறிவிக்கப்பட்டுள்ளது. வருங்கால வைப்பு நிதி திட்டத்தின் உறுப்பினர் காலமானால், அவரது கணக்கில் திரட்டப்பட்ட சேமிப்பு காலாவதியாகாது. மாறாக, பரிந்துரைக்கப்பட்ட ஆன்லைன் செயல்முறையைப் பின்பற்றுவதன் மூலம், நியமனதாரர் அல்லது தகுதியுள்ள சட்டப்பூர்வ வாரிசுகள் அந்தத் தொகையைப் பெற்றுக்கொள்ளலாம்.

EPFO - யாருக்கு வாரிசு அங்கீகாரம்?

வருங்கால வைப்பு நிதி திட்ட உறுப்பினர் உயிரிழந்தால் திட்டப் பலன்கள், முதலில் அவரால் பரிந்துரைக்கப்பட்ட நியமனதாரருக்கு வழங்கப்படுகிறது. நியமனம் எதுவும் இல்லாத பட்சத்தில், அந்தத் தொகை தகுதியுள்ள குடும்ப உறுப்பினர்களிடையே சமமாகப் பகிர்ந்து அளிக்கப்படுகிறது. EPFO விதிகளின்படி, இறந்த உறுப்பினரின் பணத்தை பெற அவரது வாழ்க்கைத் துணை மற்றும் குழந்தைகள் தகுதியானவர்களாக கருதப்படுகிறார்கள். ஒரு உறுப்பினர் பரிந்துரை பட்டியலை தாக்கல் செய்யும் போது அவருக்குக் குடும்பம் இல்லையென்றால், அவர் தனது விருப்பப்படி எந்த நபரையும் பரிந்துரை செய்யலாம். இருப்பினும், அந்த உறுப்பினர் பின்னர் திருமணம் செய்துகொண்டாலோ அதன் மூலம் குடும்பம் உருவானலோ, குடும்ப உறுப்பினர்களுக்கு ஆதரவாக ஒரு புதிய பரிந்துரை ஆவணத்தை சமர்பிப்பது அவசியமாகிறது. உறுப்பினர் திருமணமாகாதவராகவும், உயிருடன் இருக்கும் துணைவர் அல்லது தகுதியுள்ள குழந்தை இல்லாதவராகவும் இருக்கும் பட்சத்தில், உடன்பிறந்தவரையும் வருங்கால வைப்பு நிதி மற்றும் ஓய்வூதியப் பலன்களுக்காகப் பரிந்துரைக்கலாம். முறையான பரிந்துரைக்கப்பட்ட நபரோ அல்லது தகுதியுள்ள குடும்ப உறுப்பினரோ இல்லாத பட்சத்தில், சட்டப்படி அதைப் பெற உரிமையுள்ள நபருக்கு அந்தப் பணம் வழங்கப்படும்.

வாரிசுகள் சமர்பிக்க வேண்டிய ஆவணங்கள்:

கோரிக்கை நடைமுறையை தொடங்குவதற்கு முன், சில ஆவணங்களை கட்டாயம் தயாராக வைத்திருக்க வேண்டும். அதில்

உயிரிழந்த உறுப்பினரின் 12 இலக்க உலகளாவிய கணக்கு எண் (UAN)
இ-நாமினேஷனில் குறிப்பிடப்பட்டுள்ள பயனாளியின் ஆதார், பெயர் மற்றும் பிறந்த தேதி.
உறுப்பினரின் இறப்புச் சான்றிதழ் (PDF, 2 MB வரை)
ரத்து செய்யப்பட்ட காசோலை அல்லது பயனாளியின் வங்கிப் பாஸ்புக் (PDF, 2 MB வரை)

இதையும் படியுங்கள்: Crime News: 5 வயது சிறுவனின் பிறப்புறுப்பில் சூடு வைத்த ஆசிரியை - காரணம் என்ன? கொதித்து எழுந்த பெற்றோர்

ஆன்லைனில் க்ளெய்மிற்கு தாக்கல் செய்வது எப்படி?

EPFO உறுப்பினர் இணையதளம் மூலம் விண்ணப்பத்தைச் சமர்ப்பிக்கலாம். முதலில், இறந்த உறுப்பினரின் UAN எண்ணை, பயனாளியின் ஆதார் விவரங்கள், பிறந்த தேதி மற்றும் கேப்ட்சாவுடன் உள்ளிடவும். "அங்கீகார PIN-ஐப் பெறு" என்பதைக் கிளிக் செய்த பிறகு, சரிபார்ப்பிற்காக உறுப்பினரின் கணக்குடன் இணைக்கப்பட்ட பதிவுசெய்யப்பட்ட மொபைல் எண்ணுக்கு OTP அனுப்பப்படும். அதனை உள்ளீடு செய்து இணையதளத்திற்குள் நுழைந்த பிறகு, மரணக் கோரிக்கை விருப்பத்தைத் தேர்ந்தெடுக்கவும். பணியாளரின் விவரங்களை மதிப்பாய்வு செய்து, மரணத் தேதியை குறிப்பிட்டு, மரணச் சான்றிதழைப் பதிவேற்றவும். பின்னர், பயனாளியின் தொடர்பு மற்றும் முகவரி விவரங்களை வழங்கவும்.

விண்ணப்பதாரர்கள் தங்களது தகுதியைப் பொறுத்து, பின்வரும் கோரிக்கைகளில் ஒன்றையோ அல்லது அதற்கு மேற்பட்டவற்றையோ தேர்வு செய்யலாம்:

வருங்கால வைப்பு நிதியிலிருந்து மொத்தமாகப் பணம் எடுப்பதற்கான படிவம் 20
மாதாந்திர ஓய்வூதியத்திற்கான படிவம் 10D
EDLI காப்பீட்டுப் பலன்களுக்கான படிவம் 5IF

இறுதியாக, பயனாளியின் வங்கி விவரங்களை பதிவு செய்து, ரத்து செய்யப்பட்ட காசோலையைப் பதிவேற்றி, பயனாளியின் ஆதார் இணைக்கப்பட்ட கைபேசி எண்ணுக்கு அனுப்பப்பட்ட OTP-ஐப் பயன்படுத்தி சமர்ப்பிப்பை நிறைவு செய்யவும். உரிய கால இடைவெளியில் ஆவணங்கள் சரிபார்க்கப்பட்ட பிறகு, பயனருக்கான பலன்கள் கிடைக்கப்பெறும்.

Financial Changes: ஆதார் தொடங்கி பாஸ்போர்ட் வரை - ஜுலை 1 முதல் எகிறப்போகும் செலவுகள் - மாற்றங்கள் என்ன?

குலசேகரன் முனிரத்தினம் — Tue, 30 Jun 2026 07:05:06 +0530

Financial Changes July 1st: நாடு முழுவதும் நாளை (ஜுலை 1) முதல் அமலுக்கு வரவுள்ள புதிய மாற்றங்கள், நடுத்தர மக்களின் பட்ஜெட்டில் தாக்கத்தை ஏற்படுத்தக்கூடும்.

நாடு முழுவதும் அமலுக்கு வரும் புதிய மாற்றங்கள்:

நாடு முழுவதும் நாளை (ஜுலை 1) முதல் நிதி தொடர்பான பல்வேறு புதிய விதிகள் அமலுக்கு வரவுள்ளன. இந்த மாற்றங்களானது வரி செலுத்துவோர், வங்கி வாடிக்கையாளர்கள், க்ரெடிட் கார்ட் பயன்பாட்டாளர்கள், பாஸ்போர்ட் விண்ணப்பதாரர்கள் உள்ளிட்டோருக்கு நேரடியாக தாக்கத்தை ஏற்படுத்த உள்ளன. அந்த வகையில் அடுத்த மாதம் அமலுக்கு வரவுள்ள முக்கியமான புதிய விதிகள் கீழே பட்டியலிடப்பட்டுள்ளன.

நாளை அமலுக்கு வரும் மாற்றங்கள்:

1. வருமான வரி தாக்கல்:

வருமான வரி அறிக்கை-1 மற்றும் வருமான வரி அறிக்கை-2 ஆவணங்களை தாக்கல் செய்யும் வரி செலுத்துவோருக்கு, 2025-26 நிதியாண்டிற்கான (மதிப்பீட்டு ஆண்டு 2026-27) வருமான வரிக் கணக்கை தாக்கல் செய்வதற்கான அவகாசம் வரும் ஜூலை 31ம் தேதியுடன் முடிவடைய உள்ளது. இதனை தவறவிட்டால், அபராதங்கள், குறிப்பிட்ட வரி விதிப்பு முறைகளைத் தேர்ந்தெடுப்பதில் கட்டுப்பாடுகள் மற்றும் தகுதியான நஷ்டங்களை எதிர்கொள்ளலாம்.

2. ஆதார் அட்டை அப்டேட்

இந்திய தனி அடையாள ஆணையம் (UIDAI), ஜூலை 1 முதல் உங்கள் ஆதார் அட்டையில் பதிவு செய்யப்பட்ட மின்னஞ்சல் முகவரியைப் புதுப்பிப்பதற்கான ரூ.75 என்ற கட்டணத்தை தற்காலிகமாக ரத்து செய்துள்ளது. இந்தச் சேவை ஆறு மாதங்களுக்கு அதாவது வரும் டிசம்பர் 31ம் தேதி வரை) முற்றிலும் இலவசமாக வழங்கப்படும். ஆதார் மொபைல் செயலி மூலம் மின்னஞ்சல் முகவரியைப் புதுப்பிக்கும் சேவையை அணுகலாம்.

3. எஸ்பிஐ க்ரெடிட் கார்ட்கள்:

குறிப்பிட்ட PhonePe SBI கிரெடிட் கார்ட்களுக்கான ரிவார்ட் பாயிண்ட்ஸ் திட்டத்தில் சில மாற்றங்களை SBI கார்ட் அறிவித்துள்ளது. இந்த மாற்றங்கள் ஜூலை 1, 2026 முதல் அமலுக்கு வரும். ரிவார்ட் பாயிண்ட்ஸை பெறுவதற்கான புதிய வரம்புகள் மற்றும் ரிவார்ட் பாயிண்ட்ஸை பெற்றுத் தராத பரிவர்த்தனைகளின் விரிவான பட்டியல் அறிமுகப்படுத்தப்பட்டுள்ளதால், இந்தத் திருத்தம் PhonePe SBI கிரெடிட் கார்டு பர்பிள் மற்றும் PhonePe SBI கிரெடிட் கார்டு செலக்ட் பிளாக் ஆகிய இரண்டு வகை அட்டைதாரர்களையும் பாதிக்கிறது.

4. HDFC க்ரெடிட் கார்ட்கள்

நாளை முதல் HDFC கிரெடிட் கார்ட் வைத்திருப்பவர்கள், முந்தைய காலாண்டில் குறைந்தபட்சம் ரூ. 60,000 செலவு செய்திருந்தால், ஒவ்வொரு காலாண்டிற்கும் மூன்று இலவச உள்நாட்டு விமான நிலைய ஓய்வறைப் பயன்பாடுகளுக்குத் தகுதி பெறுவார்கள். உதாரணமாக, ஜூலை-செப்டம்பர் 2026 காலாண்டில் ஓய்வறைப் பயன்பாட்டைப் பெற, HDFC கிரெடிட் கார்ட் வைத்திருப்பவர் ஏப்ரல் மற்றும் ஜூன் 2026-க்கு இடையில் ரூ. 60,000 அல்லது அதற்கு மேல் செலவு செய்திருக்க வேண்டும். இந்தச் செலவு அடிப்படையிலான தகுதி, அதைத் தொடரும் ஒவ்வொரு காலாண்டிற்கும் பொருந்தும்.

இதையும் படியுங்கள்: TN Weather Update: தமிழ்நாட்டின் எந்தெந்த மாவட்டங்களில் இன்று கனமழைக்கு வாய்ப்பு? சென்னை? வானிலை அறிக்கை

5. பாஸ்போர்ட் கட்டணம் உயர்வு

சாதாரண மற்றும் தட்கால் விண்ணப்பதாரர்கள் இருவருக்கும் பாஸ்போர்ட் பெறுவதற்கான செலவு நாளை முதல் அதிகரிக்க உள்ளது. வெளியுறவு அமைச்சகம் வெளியிட்ட அறிவிப்பின்படி, ஆயிரம் ரூபாய் முதல் ஆயிரத்து 500 ரூபாய் வரை விலை உயர்த்தப்பட்டுள்ளது.

மேற்குறிப்பிடப்பட்டவை போக மாதந்தோறும் திருத்தப்படும் நடைமுறையின் அடிப்படையில் வணிக மற்றும் வீட்டு உபயோக சிலிண்டருக்கான விலையும் நாளை உயர்த்தப்படலாம். பெட்ரோல் மற்றும் டீசல் அகியவற்றின் விலையிலும் மாற்றம் ஏற்பட வாய்ப்புள்ளது.

Passport Price Hike: அடுத்த ஷாக்..! பாஸ்போர்ட் கட்டணத்தை உயர்த்தி அரசு அறிவிப்பு - எந்த பிரிவிற்கு எவ்வளவு?

குலசேகரன் முனிரத்தினம் — Fri, 26 Jun 2026 07:26:53 +0530

Passport Price Hike: புதியதாக பாஸ்போர்ட் பெற விண்ணப்பிப்போருக்கு 2,500 ரூபாயும், தட்கல் முறையில் விண்ணப்பிப்பவர்களுக்கு 5000 ரூபாயும் இனி கட்டணமாக வசூலிக்கப்பட உள்ளது.

பாஸ்போர்ட்களுக்கான கட்டணம் உயர்வு

மத்திய அரசால் வழங்கப்படும் பாஸ்போர்ட் என்பது வெளிநாடு பயணங்களுக்கான ஆவணம் மட்டுமே எனவும், அது இந்திய குடிமகன் என்பதற்கான அடையாளம் இல்லை எனவும் அண்மையில் அரசு தரப்பில் வழங்கப்பட்ட விளக்கம் பலரையும் ஆச்சரியப்படுத்தியது. இந்நிலையில் தான் 1980-ஆம் ஆண்டு பாஸ்போர்ட் விதிகள் திருத்தப்பட்டுள்ளன. அதன்படி, அத்தியாவசிய பயண ஆவணமான பாஸ்போர்ட்டிற்கான கட்டண முறை மாற்றியமைக்கப்பட்டுள்ளதுடன், புதிய பாஸ்போர்ட்கள் மற்றும் தட்கல் சேவை ஆகிய இரண்டிற்குமான கட்டணமும் அதிகரிக்கப்பட்டுள்ளது. புதிய கட்டண அமைப்பு ஜூலை 1 முதல் அமலுக்கு வரும்.

பாஸ்போர்ட்டிற்கான புதிய கட்டண விவரம்:

36 பக்கங்கள் கொண்ட புதிய அல்லது மீண்டும் பெறப்படும் (ReIssued) பாஸ்போர்ட்டிற்கான கட்டணம் ரூ.1,500-லிருந்து ரூ.2,500 ஆக உயர்த்தப்பட்டுள்ளது. தட்கல் பாஸ்போர்ட்டிற்கான கட்டணம் ரூ.3,500-லிருந்து ரூ.5,000 ஆக உயர்த்தப்பட்டுள்ளது. புதிய பாஸ்போர்ட் அல்லது 60 பக்கங்கள் கொண்ட மீண்டும் பெறப்படும் பாஸ்போர்ட்டிற்கான விண்ணப்பக் கட்டணம் ரூ.2,000-லிருந்து ரூ.3,500-ஆக உயர்த்தப்பட்டுள்ளது. தட்கல் சேவைக்கு, விண்ணப்பதாரர்கள் முன்பு ரூ.4,000 செலுத்தியதற்கு பதிலாக இனி ரூ.6,000 செலுத்த வேண்டும்.

முழுமையான புதிய கட்டண விவரங்கள்:

1. 36 பக்கங்களை கொண்ட பாஸ்போர்ட்

வழக்கமான கட்டணம் - ரூ.2,500
தட்கல் கட்டணம் - ரூ.5,000

2. 60 பக்கங்களை கொண்ட பாஸ்போர்ட்

வழக்கமான கட்டணம் - ரூ.3,500
தட்கல் கட்டணம் - ரூ.6,000

18 வயதை கடந்தவர்களின் பாஸ்போர்ட் தொலைந்து/சேதமடைந்தால்

3. 36 பக்கங்களை கொண்ட பாஸ்போர்ட்

வழக்கமான கட்டணம் - ரூ.5000
தட்கல் கட்டணம் - ரூ.7,500

4. 60 பக்கங்களை கொண்ட பாஸ்போர்ட்

வழக்கமான கட்டணம் - ரூ.6000
தட்கல் கட்டணம் - ரூ.8,500

18 வயதுக்கு குறைவான விண்ணப்பதாரர்கள்

5. புதிய பாஸ்போர்ட்/ மீண்டும் பெறுதல் (36 பக்கங்கள்)

வழக்கமான கட்டணம் - ரூ.1,750
தட்கல் கட்டணம் - ரூ.4,250

6. தொலைந்து போவது/சேதமடைந்த பாஸ்போர்டிற்கான மாற்று (36 பக்கங்கள்)

வழக்கமான கட்டணம் - ரூ.4,250
தட்கல் கட்டணம் - ரூ.6750

சான்றுகளுக்கான கட்டண விவரங்கள்:

பாஸ்போர்ட் அடிப்படையில் வழங்கப்படும் காவல்துறை அனுமதிச் சான்றிதழ் (PCC), ஒப்படைப்புச் சான்றிதழ், உலகளாவிய நுழைவுத் திட்டச் சரிபார்ப்பு மற்றும் இதர சான்றிதழ்களுக்கான கட்டணம் இந்தியாவில் ரூ.750 ஆகவும், வெளிநாடுகளில் $40 ஆகவும் நிர்ணயிக்கப்பட்டுள்ளது. சிறப்புப் பயண ஆவணங்களைப் பொறுத்தவரை, அவசரகாலச் சான்றிதழ் வெளிநாடுகளில் $15 கட்டணத்தில் தொடர்ந்து வழங்கப்படும். அதேசமயம், அடையாளச் சான்றிதழுக்கு இந்தியாவில் ரூ.1,000 மற்றும் வெளிநாடுகளில் $50 கட்டணம் வசூலிக்கப்படும் என தெரிவிக்கப்பட்டுள்ளது.

இதையும் படியுங்கள்: CM Vijay: திடீரென மெரினாவில் இறங்கி மாரத்தானில் ஓடிய முதலமைச்சர் விஜய்..! போதைப்பொருள் விழிப்புணர்வு

பாஸ்போர்ட்டிற்கான காலாவதி தேதி

திருத்தப்பட்ட அட்டவணை IV-இன் படி, வயது வந்தோர் பிரிவின் கீழ் விண்ணப்பதாரர்களுக்கு வழங்கப்படும் பாஸ்போர்ட்கள் 10 ஆண்டுகள் வரை தொடர்ந்து செல்லுபடியாகும். அதேசமயம் சிறார்களுக்கு வழங்கப்படும் பாஸ்போர்ட்கள் ஐந்து ஆண்டுகள் அல்லது விண்ணப்பதாரர் 18 வயதை அடையும் வரை, இவற்றில் எது முந்தையதோ அதுவரை செல்லுபடியாகும். அந்த குறிப்பிட்ட காலத்திற்கு பிறகு பயனர்கள் மீண்டும் உரிய அதிகாரிகளை அணுகி நடைமுறைகளை பின்பற்றி பாஸ்போர்டை அப்டேட் செய்ய வேண்டும்.

EPFO 3.0 Launch: சம்பளதாரர்களுக்கு குட் நியூஸ்.! இனி UPI, ATM-ல ஈசியா PF பணத்த எடுக்கலாம்; விரைவில் வருது EPFO 3.0

ஸ்ரீராம் ஆராவமுதன் — Fri, 19 Jun 2026 15:52:41 +0530

PF Withdrawal Rules: வருங்கால வைப்பு நிதி கணக்கு வைத்திருப்பவர்களுக்கு குறிப்பிடத்தக்க நிவாரணத்தை அளிக்கும் செய்திகள் வெளிவருகின்றன. ஒவ்வொரு மாதமும் ஊழியர்களின் சம்பளத்திலிருந்து கழிக்கப்படும் வருங்கால வைப்பு நிதியிலிருந்து (PF) பணத்தை எடுப்பது இனி சுலபமாக மாறும். தற்போது, பணம் எடுக்க ஆன்லைன் மூலம் கோரிக்கை விடுக்க வேண்டியுள்ளது. ஆனால், வருங்கால வைப்பு நிதியில் இருந்து பணம் எடுக்கும் முறையில் விரைவில் மாற்றங்கள் வரவிருக்கின்றன என்பது உங்களுக்குத் தெரியுமா.?

நிறுவனம், ஊழியரின் சம்பளத்திலிருந்து பிஎஃப் நிதியை பிடித்தம் செய்து, அதனை அவர்களின் PF கணக்கில் செலுத்துகிறது. ஊழியர் தேவைப்பட்டாலோ அல்லது வேலையை விட்டு விலகிய பிறகோ இந்த தொகையை திரும்பப் பெற்றுக்கொள்ளலாம். தற்போது, புதிய EPFO அமைப்பின் கீழ், UPI மற்றும் ATM மூலம் பிஎஃப் நிதியை திரும்பப் பெறும் வசதி செயல்படுத்தப்படும் என எதிர்பார்க்கப்படுகிறது.

EPFO 3.0-ல் என்னென்ன வசதிகள்.?

EPFO 3.0-ன் அறிமுகம் உங்களுக்கு பல நன்மைகளை கொண்டுவரும் என எதிர்பார்க்கப்படுகிறது. இதில் மிக முக்கியமான மாற்றம், UPI மற்றும் ATM-கள் மூலம் PF நிதிகளை எளிதாக பெற முடிவதே ஆகும். இது, ஆன்லைனில் PF நிதிகளை பெறுவதில் உள்ள சிரமங்களையும், நீண்ட காத்திருப்பு நேரங்களையும் கணிசமாக குறைக்கும். இதன்மூலம், தனிநபர்கள் PF நிதிகளை பெறும் செயல்முறை வேகமாகவும், எளிதாகவும் மாறும் என எதிர்பார்க்கப்படுகிறது.

இந்த செயல்முறை எப்போது தொடங்கப்படும்.?

கிடைத்த தகவல்களின்படி, EPFO 3.O-வின் சோதனைகள் நிறைவடைந்துவிட்டதாகவும், அது இந்த ஜூன் மாதம் வெளியிடப்படலாம் என்றும் கூறப்படுகிறது. இருப்பினும், அதிகாரப்பூர்வ வெளியீட்டுத் தேதி இன்னும் அறிவிக்கப்படவில்லை.

புதிய அமைப்புமுறை செயல்படுத்தப்பட்டவுடன், EPFO இணையதளம் அல்லது அதிகாரப்பூர்வ செயலி மூலம் உங்கள் கணக்குத் தகவல்களை நீங்கள் அணுக முடியும். அதில் இரண்டு வகையான இருப்புகளை காண்பீர்கள்: ஒன்று நீங்கள் எடுக்கக்கூடிய தொகைக்கானது, மற்றொன்று உங்கள் PF கணக்கில் நீங்கள் பராமரிக்க வேண்டிய தொகைக்கானது.

PF பணத்தை எப்படி எடுக்கலாம்.?

புதிய முறை செயல்படுத்தப்பட்ட பிறகு, ஆரம்பத்தில் உங்கள் PF இருப்பில் சுமார் 75 சதவீத தொகையை உங்களால் எடுக்க முடியும். ஆனால், மீதமுள்ள 25 சதவீத தொகையை உங்கள் PF கணக்கில் வைத்திருக்க வேண்டியிருக்கலாம். இதற்குப் பிறகு, எடுக்கப்பட்ட தொகையை UPI ஐடியை பயன்படுத்தி உங்கள் வங்கிக் கணக்கிற்கு மாற்றிக்கொள்ளலாம். பின்னர், இந்த பணத்தை நீங்கள் UPI அல்லது ATM மூலம் அணுக முடியும். இருப்பினும், EPFO-வின் அதிகாரப்பூர்வ அறிவிப்புக்குப் பிறகே இறுதி விதிகள் மற்றும் நடைமுறைகள் தெளிவாகத் தெரியவரும்.