இன்ஃபோசிஸ் நிறுவனம் தனது ஊழியர்கள் இனி வாரத்தில் 4 நாட்கள் கட்டாயம் அலுவலகம் வந்து பணிபுரிய வேண்டும் என்று உத்தரவு பிறப்பித்துள்ளது. அதேபோல சிலிண்டர் தட்டுப்பாடு எதிரொலியால், அலுவலக கேண்டீன்கள் மூடப்படுவதாகவும் இன்ஃபோசிஸ் தெரிவித்துள்ளது.
கொரோனா காலத்தில் வொர்க் ஃப்ரம் ஹோம் எனப்படும் வீட்டில் இருந்தே பணிபுரியும் கலாச்சாரம் பரவலாக அறிமுகம் ஆனது. தொடர்ந்து பல்வேறு ஐ.டி. நிறுவனங்களும் செலவைக் குறைக்கும் வகையில், வொர்க் ஃப்ரம் ஹோம் வேலை நடைமுறையைக் கொண்டு வந்தன.
இந்த நிலையில் தற்போது பிரபல ஐ.டி. நிறுவனமான இன்ஃபோசிஸ், தனது ஊழியர்கள் அனைவரும் இனி வாரத்தில் 4 நாட்கள் கட்டாயம் அலுவலகம் வந்து பணிபுரிய வேண்டும் என்று உத்தரவு பிறப்பித்துள்ளது. முன்னதாக வேலை லெவல் 7 ஏ-க்கு மேற்பட்ட (டெலிவரி மேலாளர்கள், மூத்தல் மேலாளர்கள், திட்ட இயக்குநர்கள்) மூத்த ஊழியர்கள் அனைவரும் வாரத்தில் 4 நாட்கள் வர வேண்டும் என்று தெரிவிக்கப்பட்டு இருந்தது.
ஊழியர்கள் அனைவரும் கட்டாயம் அலுவலகம் வர வேண்டும்
இந்த நிலையில், வேலை லெவல் 6 ஏ-க்கு மேற்பட்ட நிலையில் உள்ள ஊழியர்கள் அனைவரும் கட்டாயம் அலுவலகம் வர வேண்டும் என்று தெரிவிக்கப்பட்டு உள்ளது.
இதுகுறித்து வெளியிடப்பட்டுள்ள சுற்றறிக்கையில், ‘’ஹைப்ரிட் முறை, சுய முன்னேற்றம், கூட்டு முயற்சி, கண்டுபிடிப்பு மற்றும் வணிக மேலான்மை ஆகியவற்றை ஊக்குவிக்கிறது. அதே நேரத்தில் பணியில் எல்லோருக்கும் முன்னுதாரணமாக நாம் விளங்கி, வேலையில் கவனம் செலுத்த வேண்டும்’’ என்று இன்ஃபோசிஸ் அறிவுறுத்தி உள்ளது.
வாரத்துக்கு 4 நாட்கள்
முன்னதாக மாதத்துக்கு 10 நாட்கள் அலுவலகம் வந்தால் போதும் என்ற நிலை இருந்த சூழலில், இப்போது வாரத்துக்கு 4 நாட்கள் வர வேண்டும் என்ற அறிவிப்பு, ஐ.டி. ஊழியர்கள் மத்தியில் அதிர்ச்சியை ஏற்படுத்தி உள்ளது.
அதேபோல இஸ்ரேல் – ஈரான் இடையிலான போர் காரணமாக, சிலிண்டர் தட்டுப்பாடு ஏற்பட்டுள்ளது. இதனால் இன்ஃபோசிஸ் அலுவலகத்தில் உள்ள கேண்டீன்கள் குறைந்த அளவிலான உணவுகளையே கொண்டுள்ளன. சில சமயம் எந்தப் பொருட்களும் இருப்பதில்லை.
வீட்டில் இருந்தே மதிய உணவு
இதனால் ஏற்படும் சிரமங்களையும் அதிருப்திகளையும் தவிர்க்க, வீட்டில் இருந்தே மதிய உணவை எடுத்து வருமாறும் ஊழியர்களை இன்ஃபோசிஸ் அறிவுறுத்தி உள்ளது. இந்தத் தகவல் ஐ.டி. ஊழியர்கள் மத்தியில் பெரும் அதிர்ச்சியை ஏற்படுத்தி உள்ளது.