Gold Rate 13th May: இப்படி பண்றீங்களே மா, நேத்து 2 தடவை குறைச்சுட்டு, இன்னிக்கு 2 தடவை ஏத்திட்டீங்களே.! தங்கம்

தங்கத்தின் விலை நேற்று ஒரே நாளில் இரண்டு முறை குறைந்த நிலையில், இன்று ஒரே நாளில் இரண்டு முறை உயர்ந்துள்ளது. இன்றைய விலை என்ன என்பதை பார்க்கலாம்.

சென்னையில் ஆபரணத் தங்கத்தின் விலை நேற்று ஒரே நாளில் இரண்டு முறை குறைந்து, சவரனுக்கு 2,360 ரூபாய் குறைந்தது. இந்நிலையில், இன்று இரண்டு முறை உயர்ந்து, சவரனுக்கு 840 ரூபாய் அதிகரித்துள்ளது.

மாறி மாறி ஆட்டம் காட்டும் தங்கத்தின் விலை

இந்தியா-பாகிஸ்தான் இடையே போர் பதற்றம் தொடங்கிய 7-ம் தேதி, தங்கத்தின் விலை கிராம் 9,075 ரூபாயாகவும், ஒரு சவரன் 72,600 ரூபாயாகவும் இருந்த நிலையில், அதற்கு அடுத்த நாளான 8-ம் தேதி சவரனுக்கு 440 ரூபாய் அதிகரித்தது. அதன்படி, ஒரு கிராம் 9,130 ரூபாயாகவும், ஒரு சவரன் 73,040 ரூபாயாகவும் இருந்தது.

பின்னர், 9-ம் தேதி கிராமிற்கு 115 ரூபாய் குறைந்து, ஒரு கிராம் 9,015 ரூபாயாகவும், சவரனுக்கு 920 ரூபாய் குறைந்து, ஒரு சவரன் 72,120 ரூபாய்க்கும் விற்கப்பட்டது. தொடர்ந்து, 10-ம் தேதி கிராமிற்கு 30 ரூபாய் உயர்ந்து ஒரு கிராம் 9,045 ரூபாய்க்கும், சவரனுக்கு 240 ரூபாய் உயர்ந்து ஒரு சவரன் 72,360 ரூபாய்க்கும் விற்பனையானது.

இதைத் தொடர்ந்து, 11-ம் தேதி அதே விலையில் நீடித்த தங்கம், 12-ம் தேதியான நேற்று காலை, மாலை என இரு வேளைகளிலும், 2,360 ரூபாய் குறைந்தது. அதன்படி, நேற்று காலை கிராமிற்கு 165 ரூபாய் குறைந்து, ஒரு கிராம் 8,880 ரூபாய்க்கும், சவரனுக்கு 1,320 ரூபாய் குறைந்து, ஒரு சவரன் 71,040 ரூபாய்க்கு விற்கப்பட்டது.

அதைத் தொடர்ந்து, மாலையில், கிராமிற்கு மேலும் 130 ரூபாய் குறைந்து, ஒரு கிராம் 8,750 ரூபாய்க்கு விற்பனையானது. அதன்படி, சவரனுக்கு மேலும், 1,040 ரூபாய் குறைந்து, ஒரு சவரன் 70,000 ரூபாய்க்கு விற்பனையானது.

தங்கத்தின் இன்றைய விலை நிலவரம்

இந்த நிலையில், இன்று ஒரே நாளில் தங்கத்தின் விலை இரண்டு முறை உயர்ந்துள்ளது. அதன்படி, இன்று காலை கிராமிற்கு 15 ரூபாய் உயர்ந்து, ஒரு கிராம் 8,765 ரூபாயாகவும், சவரனுக்கு 120 ரூபாய் உயர்ந்து, ஒரு சவரன் 70,120 ரூபாயாக விற்கப்பட்டது.

இன்று மாலையில், கிராமிற்கு மேலும் 90 ரூபாய் உயர்ந்து, ஒரு கிராம் 8,855 ரூபாய்க்கும், சவரனுக்கு 720 ரூபாய் உயர்ந்து, ஒரு சவரன் 70,840 ரூபாய்க்கும் விற்பனையாகிறது.

மொத்தத்தில், இன்று ஒரே நாளில் கிராமிற்கு 105 ரூபாயும், சவரனுக்கு 840 ரூபாயும் உயர்ந்துள்ளது தங்கத்தின் விலை. இப்படி, ஒவ்வொரு நாளும் ஏறுவதும், இறங்குவதுமாக இருக்கும் தங்கத்தின் விலையால், பொதுமக்கள் பெரும் குழப்பத்திற்கு ஆளாகியுள்ளனர்.

ஒரு ரூபாய் குறைந்த வெள்ளியின் விலை

வெள்ளியின் விலையை பொறுத்தவரை, கடந்த 8ம் தேதியிலிருந்து கிராம் 110 ரூபாயாக இருந்துவந்த நிலையில், இன்று ஒரு ரூபாய் குறைந்து 109 ரூபாய்க்கு விற்பனையாகிறது. அதன்படி, ஒரு கிலோ பார் வெள்ளி 1 லட்சத்து 9 ஆயிரம் ரூபாய்க்கு விற்கப்படுகிறது.