பிப்ரவரி 1 ஆம் தேதி 2026-27 ஆம் ஆண்டுக்கான மத்திய பட்ஜெட்  தாக்கல் செய்யப்பட உள்ளது. இப்படியான நிலையில் இந்தியாவைப் பொறுத்தவரை விவசாயத் துறை மிகப்பெரிய வர்த்தமாக திகழ்கிறது. கிட்டத்தட்ட பாதி பணியாளர்களைப் பணியமர்த்தி, 1.4 பில்லியன் மக்களுக்கு உணவுப் பாதுகாப்பை உறுதி செய்யும்  இந்த துறை பொருளாதாரத்தின் முதுகெலும்பாக உள்ளது. ஆனாலும் காலப்போக்கில் காணாமல் போகும் விளை நிலங்கள்,  நீர் நெருக்கடி, அறுவடைக்குப் பிந்தைய இழப்புகள் மற்றும் பின்தங்கிய விவசாயி வருமானம் போன்ற பிரச்னைகளால் விவசாயத்துறை கடுமையாக பாதிக்கப்பட்டுள்ளது. 

குறிப்பாக கடந்த 2020- 2021 ஆம் ஆண்டில் மூன்று வேளாண் சட்டங்கள் அறிமுகப்படுத்தப்பட்டு பின்னர் ரத்து செய்யப்பட்ட காலத்தில் இருந்து விவசாயத்துறை மிகப்பெரிய நெருக்கடியை சந்தித்து வருகிறது. இந்த நிலையில் மத்திய பட்ஜெட்டில் இந்த துறையில் என்னென்ன அறிவிப்புகள் வெளியாகலாம் என்பது பற்றி கணிக்கப்பட்டுள்ளது. அது குறித்துக் காணலாம். 

விவசாய துறையின் நிலை

இந்த பட்ஜெட்டில் விவசாயிகள் குறைந்தபட்ச ஆதரவு விலை உத்தரவாதங்கள், உள்கட்டமைப்பு மேம்பாடுகள் மற்றும் வருமானத்தை மீட்டெடுக்கவும், விவசாயச் சட்டங்கள் திரும்பப் பெறப்பட்ட பிறகு நம்பிக்கையை மீட்டெடுக்கவும் துணிச்சலான சீர்திருத்தங்களை எதிர்பார்க்கின்றனர். 

வர்த்தகம், விலை நிர்ணயம் மற்றும் சேமிப்பு ஆகியவற்றை தாராளமயமாக்குவதை நோக்கமாகக் கொண்ட இந்த 3 வேளாண் சட்டங்கள் ரத்து செய்யப்பட்ட பிறகு பிரதமர் மோடி தலைமையிலான நிர்வாகம் விவசாயத்தில் தீர்க்கமான தன்மையைக் கொண்டிருக்கவில்லை என்றும், விவசாயத்தில் புரட்சிகரமான சீர்திருத்தங்களை விட உள்கட்டமைப்பு மற்றும் உற்பத்திக்கு முன்னுரிமை அளித்துள்ளது என்றும் விமர்சனங்கள் முன்வைக்கப்பட்டு வருகின்றன.

2020 ஆம் ஆண்டில் ரூ. 1 டிரில்லியன் கடன்களுடன் தொடங்கப்பட்ட வேளாண் உள்கட்டமைப்பு நிதி (AIF) போன்ற வசதிகள் இருந்தபோதிலும், தனியார் முதலீட்டை விவசாயிகள் எதிர்ப்பதால்  விவசாய விளைபொருள் சந்தைப்படுத்துதல் என்பது மிக கடினமாக உள்ளது. பொருளாதார ரீதியாக, 2025-26 ஆம் ஆண்டில் விவசாயத்தின் 3.1% வளர்ச்சி ஒட்டுமொத்த மொத்த உள்நாட்டு உற்பத்தி இலக்கை விட பின்தங்கியுள்ளதாக தெரிவிக்கப்பட்டுள்ளது. 

எதிர்பார்க்கப்படும் அறிவிப்புகள்

குறைந்தபட்ச ஆதரவு விலை மற்றும் மாநில சலுகைகள் மூலம் தானியங்களுக்கு அதிக முக்கியத்துவம் அளிப்பது

விதைகள், உரங்கள் மற்றும் பூச்சிக்கொல்லிகள் போன்ற வேளாண் உள்ளீடுகளுக்கான மாநில வாரியான ஒப்புதல்களை நெறிப்படுத்த ஒரே நாடு ஒரே உரிமம் வழங்குவது 

 PM-KISAN கொடுப்பனவுகளை மேம்படுத்துதல், வலுவான விதைச் சான்றிதழ் மற்றும் மேம்படுத்தப்பட்ட கிராமப்புற உள்கட்டமைப்பை ஏற்படுத்துவது 

மண் பரிசோதனை, நுண் நீர்ப்பாசனம், ட்ரோன்கள், சென்சார்கள், பண்ணை இயந்திரங்கள் மற்றும் அறுவடைக்குப் பிந்தைய தொழில்நுட்பங்கள் போன்ற சிறப்புகளில் கவனம் செலுத்தி, ஐந்து ஆண்டுகளில் மூன்று மில்லியன் பண்ணை தொழில்நுட்ப வல்லுநர்களை உருவாக்க ஒரு தேசிய திட்டம் வகுப்பது

போலி மற்றும் தரமற்ற விதைகளின் புழக்கம் அதிகரித்து வருவதை தடுக்க திட்டம் வகுப்பது

தன்னிறைவு மற்றும் விவசாயிகளின் செழிப்பில் கவனம் செலுத்துதல், பயிர் பல்வகைப்படுத்தல் கொள்கை , காலநிலைக்கு ஏற்ற விவசாயம் மற்றும் வேளாண் தொழில்நுட்ப மேம்பாடு போன்றவை தொடர்பான அறிவிப்புகள் பட்ஜெட்டில் வெளியாகும் என கூறப்படுகிறது.