Toyota Hyryder SUV: சிக்கிருச்சு..! ஹைரைடருக்கு 7 சீட்டர் ப்ரமோஷன் - ஹைப்ரிட் AWD ஆப்ஷன்? ப்ரீமியம் எஸ்யுவி அம்சங்கள்

Toyota Hyryder 7 Seater SUV: இந்திய கார் சந்தைக்கான ஹைரைடர் கார் மாடலின் 7 சீட்டர் எடிஷனின் சாலை பரிசோதனையை, டொயோட்டா நிறுவனம் அதிகாரப்பூர்வமாக தொடங்கியுள்ளது.

ஆட்டோமொபைல் செய்திகள்

Source : Toyota

Toyota Hyryder 7 Seater SUV: டொயோட்டா  ஹைரைடர் கார் மாடலின் 7 சீட்டர் எடிஷனில் எதிர்பார்க்கப்படும் அம்சங்கள் குறித்த விவரங்களை இந்த தொகுப்பில் அறியலாம்.

ஹைரைடருக்கு 7 சீட்டர் ஆக ப்ரமோஷன்:

இந்திய ஆட்டோமொபைல் சந்தையில் ஜப்பான் கார் உற்பத்தி நிறுவனங்களான மாருதி சுசூகி மற்றும் டொயோட்டா, புதிய 7 சீட்டர் கார் மாடல்களை அறிமுகப்படுத்த உள்ளது குறித்து ஏற்கனவே பல தகவல்கள் வெளியான வண்ணம் இருந்தன. குறிப்பாக அவை குறிப்பிட்ட ப்ராண்ட்களின் க்ராண்ட் விட்டாரா மற்றும் ஹைரைடர் மாடல்களின் மேம்படுத்தப்பட்ட எடிஷனாக இருக்கும் என கூறப்பட்டது. புதிய ப்ரீமியம் மூன்று வரிசை இருக்கைகளை கொண்ட எஸ்யுவி ஆனது, க்ராண்ட் விட்டாரவை சார்ந்து இருக்கும் என்பதை மாருதி சுசூகி ஏற்கனவே உறுதி செய்துவிட்டது. இந்நிலையில், டொயோட்டா நிறுவனம் தனது ஹைரடரின் 7 சீட்டர் எடிஷனுக்கான, சாலை பரிசோதனையை தொடங்கியுள்ளது. இந்த எஸ்யுவி லடாக்கில் சாலை சோதனையில் ஈடுபட்டபோது புகைப்படத்தில் சிக்கியுள்ளது.

ஆல்-வீல் ட்ரைவ் ஆப்ஷன் இருக்குமா? போட்டியாளர்கள்..

சோதனையின் போது காணப்பட்ட மாடலானது, நிலையான ஹைரைடர் காரை காட்டிலும் கூடுதல் நீளம் கொண்டுள்ளது. நீட்டிக்கப்பட்ட பின்புறமானது கூடுதல் இருக்கைகளை பொருத்துவதற்கு போதுமான வசதியை ஏற்படுத்திக் கொடுத்துள்ளது. டிசைன் விவரங்களை ஒட்டுமொத்தமாக மறைக்கும் விதமாக முற்றிலும் மறைக்கப்பட்டு இருந்தாலும், ரியர் ஆக்‌ஷல் ஷாஃப்ட் இருப்பது இதில் ஆல்-வீல் ட்ரைவ் அம்சம் இடம்பெறுவதற்கான சாட்சியாக கருதப்படுகிறது. மாருதி க்ராண்ட் விட்டாராவின் 1.5 லிட்டர் மைல்ட் ஹைப்ரிட் பெட்ரோல் மேனுவல் வேரியண்ட் மட்டுமே, தற்போதைய சூழலில் ஆல்-வீல் ட்ரைவ் சிஸ்டம் அமைப்பை கொண்டிருப்பது குறிப்பிடத்தக்கது. உள்ளூர் சந்தையில் ஹைரைடர் 7 சீட்டரானது விரைவில் சந்தைப்படுத்தப்பட உள்ள 7 சீட்டர் ரெனால்ட் டஸ்டர் மற்றும் மாருதி க்ராண்ட் விட்டாரா ஆகியவற்றோடு சேர்த்து, ஏற்கனவே சந்தையில் உள்ள மஹிந்த்ராவின் XUV 7XO, டாடா சஃபாரி மற்றும் ஹுண்டாய் அல்கசார் ஆகிய மாடல்களுடனும் போட்டியிட உள்ளது.

ஹைரைடர் 7 சீட்டர் - ப்ரீமியம் அம்சங்கள்

டொயோட்டா ஹைரைடர் 7 சீட்டர் கார் மாடலின் உட்புறமானது, அதன் சகோதரரான 5 சீட்டர் எடிஷனின் அம்சங்களை பெரும்பாலும் அப்படியே கொண்டிருக்குமென கூறப்படுகிறது. அதன்படி, எஸ்யுவி ஆனது சிஸ்டல் அக்ரிலிக் க்ரில், மெல்லிய இரட்டை அடுக்கு பகல் நேரங்களில் ஒளிரும் விளக்குகளுடன் கூடிய எல்இடி முகப்பு விளக்குகள், அலாய் வீல்கள், கதவில் ஹைப்ரிட் பேட்ஜ், இரட்டை C - வடிவிலான  எல்இடி எலிமெண்ட்களுடன் மெல்லிய C - வடிவிலான டெயில் லேம்ப்கள் ஆகியவை எதிர்பார்க்கப்படுகின்றன.

கூடுதலாக சேர்க்கப்பட உள்ள மூன்றாவது வரிசை இருக்கைகளை தவிர்த்து, கேபின் லே-அவுட் மற்றும் அம்சங்கள் ஆகியவை 5 சீட்டரிலிருந்து அப்படியே தொடரப்படலாம். அதேநேரம், இதனை தனித்துவமானதாக மாற்றுவதற்காக, புதிய ட்ரிம்கள், அப்ஹோல்ஸ்ட்ரி ஆப்ஷன்கள் மற்றும் புதிய உட்புற தீம் ஆகிய ஆப்ஷன்களை டொயோட்டா முன்னெடுக்கலாம்.

ஹைரைடர் 7 சீட்டர் - ஹைப்ரிட் ஆப்ஷன்

5 சீட்டர் டொயோட்டா ஹைரைடரானது தற்போதைய சூழலில் 1.5 லிட்டர் TNGA அட்கின்சன் சைக்கிள் இன்ஜினை கொண்டுள்ளது. இதன் மூலம் 92bhp மற்றும் 122Nm ஆற்றல் உற்பத்தி செய்யப்படுகிறது. இதோடு, 79bhp மற்றும் 141Nm ஆற்றலை உற்பத்தி செய்யக்கூடிய மின்சார மோட்டாரும் இணைக்கப்பட்டுள்ளது. இதோடு, 1.5 லிட்டர் K15C பெட்ரோல் இன்ஜின் ஆப்ஷனும் வழங்கப்படுகிறது. இதில் 5 ஸ்பீட் மேனுவல் அல்லது 6 ஸ்பீட் டார்க் கன்வெர்டர் ஆட்டோமேடிக் கியர்பாக்ஸ் ஆப்ஷன்களுடன் கிடைக்கிறது. அதிகபட்சமாக 103bhp மற்றும் 137Nm ஆற்றலை உற்பத்தி செய்கிறது. 

ஹைரைடர் 7 சீட்டர் - விலை, வெளியீடு

டொயோட்டா ஹைரைடரின் 7 சீட்டர் எடிஷன் வரும் அக்டோபர் மாதத்தில் இந்திய சந்தையில் விற்பனைக்கு கொண்டு வரப்படலாம் என கூறப்படுகிறது. அப்போது இதன் விலை 21 லட்சத்தில் தொடங்கி 26 லட்சம் ரூபாய் வரை நிர்ணயிக்கப்பட வாய்ப்புள்ளதாக தெரிகிறது. சாலை பரிசோதனை தொடங்கியுள்ளதை அடுத்து, வரும் நாட்களில் கார் தொடர்பான பல்வேறு விவரங்கள் வெளியாகும் என எதிர்பார்க்கப்படுகிறது.