Suzuki Across SUV: டொயோட்டாவின் ஜெராக்ஸ்..! சுசூகியின் அக்ராஸ் - ஹைப்ரிட் மாடல், 75Km ரேஞ்ச், 6 நொடிகளில் 100KM

Suzuki Across Hybrid SUV: சுசூகி நிறுவனம் சர்வதேச சந்தைக்கான தனது புதிய ப்ளக்-இன் ஹைப்ரிட் கார் மாடலான அக்ராஸ் எஸ்யுவியை அதிகாரப்பூர்வமாக அறிமுகப்படுத்தியுள்ளது.

ஆட்டோமொபைல் செய்திகள்

Source : Suzuki

Suzuki Across Hybrid SUV: சுசூகி நிறுவனத்தின் புதிய அக்ராஸ் எஸ்யுவி, டொயோட்டாவின் RAV4 மாடலை அடிப்படையாக கொண்டு உருவாக்கப்பட்டுள்ளது. 

சுசூகி அக்ராஸ் ஹைப்ரிட் எஸ்யுவி:

ஜப்பானைச் சேர்ந்த கார் உற்பத்தி நிறுவனமான சுசூகி, சர்வதேச சந்தைக்கான தனது புதிய அக்ராஸ் எஸ்யுவி கார் மாடலை அதிகாரப்பூர்வமாக அறிமுகப்படுத்தியுள்ளது. ப்ராண்டின் முதன்மையான மின்சார ஆப்ஷன் கொண்ட கார் மாடலாக ஐரோப்பா முழுவதும் விற்பனை செய்யப்பட உள்ளது. இந்த கார் தொடர்பான முழு விவரங்களும் கீழே பட்டியலிடப்பட்டுள்ளன.

சுசூகி அக்ராஸ் ஹைப்ரிட் - இன்ஜின் விவரங்கள்:

டொயோட்டா தரப்பில் கடந்த ஆண்டு அறிமுகமான ஆறாவது தலைமுறை RAV4 ப்ளக்-இன் ஹைப்ரிட் கார் மாடலை அடிப்படையாக கொண்டு, அக்ராஸ் எஸ்யுவி உருவாக்கப்பட்டுள்ளது. இது டொயோட்டாவின் TNGA-K ப்ளாட்ஃபார்மில் தான் கட்டமைக்கப்பட்டுள்ளது. 2.5 லிட்டர் 4 சிலிண்டர் பெட்ரோல் இன்ஜின் ஆனது, இரட்டை மின்சார மோட்டார்கள் மற்றும் 22.7KWh பேட்டரி பேக்குடன் இணைக்கப்பட்டுள்ளது. இதன் மூலம் ஒட்டுமொத்தமாக 302bhp ஆற்றல் உற்பத்தி செய்யப்படுகிறது. சுசூகியின் e-ஃபோர் வீல் ட்ரைவ் சிஸ்டம் மூலம் ஆற்றலானது 4 சக்கரங்களுக்கும் பகிர்ந்தளிக்கப்படுகிறது. மின்சார மோடில் மட்டுமே 75 கிலோ மீட்டர் தூரம் வரை எஸ்யுவி பயணிக்கும் என நிறுவனம் தரப்பில் தெரிவிக்கப்பட்டுள்ளது. பூஜ்ஜியத்திலிருந்து 100 கிலோ மீட்டர் வேகத்தை வெறும் 6.1 விநாடிகளில் எட்டும் எனவும், மின்சார ரீதியாக கட்டுப்படுத்தப்பட்டு அதிகபட்சமாக மணிக்கு 180 கிலோ மீட்டர் வேகத்தில் பயணிக்கும் எனவும் அறிவிக்கப்பட்டுள்ளது.

சுசூகி அக்ராஸ் ஹைப்ரிட் - வடிவமைப்பு

சுசூகி அக்ராஸ் காரின் அளவீடுகளானது அப்படியே RAV4 மாடலை பிரதிபலிக்கிறது. அதன்படி, 4,595 தொடங்கி 4,620 மில்லி மீட்டர் வரையிலான நீளம், 1854 தொடங்கி 1880 மில்லி மீட்டர் வரையிலான அகலம், 1680 தொடங்கி 1743 மில்லி மீட்டர் வரையிலான உயரத்தை கொண்டுள்ளது. 2690 மில்லி மீட்டர் வீல்பேஸையும், 190 முதல் 206 மில்லி மீட்டர் வரையிலான க்ரவுண்ட் க்ளியரன்ஸையும் பெற்றுள்ளது. இந்த அளவீடுகளானது வேரியண்ட்களை கொண்டு மாறுபடுகிறது. அதேநேரம், தோற்ற அடிப்படையில் சுசூகியின் அக்ராஸ் எஸ்யுவி மாறுபட்டு உள்ளது. அதன்படி, பெரிய முன்புற க்ரில், கூர்மையான எல்இடி முகப்பு விளக்குகள், செதுக்கப்பட்ட பானெட் மற்றும் புதிய பம்பர் ஆகியவை இடம்பெற்றுள்ளன. 18 இன்ச் அலாய் வீல்கள் வழங்கப்பட்டுள்ளதோடு, சுசூகியின் லோகோ மற்றும் அக்ராஸ் பேட்ஜை தவிர்த்து மற்றபடி பின்புறம் அப்படியே RAV4 டிசைன் தொடர்கிறது.

சுசூகி அக்ராஸ் ஹைப்ரிட் - வசதிகள், அம்சங்கள்

உட்புறத்தில், ஸ்மார்ட்போன் கனெக்ட்ரிவிட்டி உடன் கூடிய 12.9 இன்ச் டச்ஸ்க்ரீன் இன்ஃபோடெயின்மெண்ட் யூனிட், 12.3 இன்ச் டிஜிட்டல் ட்ரைவர் டிஸ்பிளே, டூயல் ஜோன் க்ளைமேட் கன்ட்ரோல் ஆகியவை இணைக்கப்பட்டுள்ளன. மேலும் எலெக்ட்ரிகலி அட்ஜெஸ்ட் செய்யக்கூடிய முன்புற இருக்கைகள், மின்சார டெயில்கேட், வயர்லெஸ் ஸ்மார்ட்ஃபோன் சார்ஜர், ட்ரைவர் இருக்கைக்கான லம்பர் சப்போர்ட் மற்றும் முன்புற இருக்கைகளுக்கான ஹீட்டிங் அம்சமும் வழங்கப்பட்டுள்ளது.

கூடுதலாக இந்த எஸ்யுவியில் ஐந்து C-டைப் யுஎஸ்பி போர்ட்கள், 360 டிகிரி சரவுண்ட் வியூ கேமரா, அடாப்டிவ் க்ரூஸ் கன்ட்ரோல், ஹெட்-அப் டிஸ்பிளே மற்றும் லெவல் 2 ADAS ஆகியவை நிலையான அம்சங்களாக வழங்கப்படுகின்றன. ADAS தொழில்நுட்பத்தில் லேன் அசிஸ்ட், ஆட்டோமேடிக் எமர்ஜென்சி ப்ரேக்கிங் மற்றும் எமர்ஜென்சி ஸ்டியரிங் அசிஸ்ட் உள்ளிட்டவை இடம்பெற்றுள்ளன.

சுசூகி அக்ராஸ் - விலை? இந்தியாவிற்கு அறிமுகம்?

ஐரோப்பா சந்தையில் சுசூகி அக்ராஸ் கார் மாடலின் தொடக்க விலை இந்திய மதிப்பில், சுமார் 62 லட்சம் ரூபாய் வரை நிர்ணயிக்கப்படலாம் என எதிர்பார்க்கப்படுகிறது. ஆனால், இந்த கார் மாடலை உள்ளூரில் விற்பனைக்கு கொண்டு வருவது தொடர்பாக மாருதி சுசூகி இதுவரை எந்தவித தகவலையும் வெளியிடவில்லை. சூசுகி அக்ராஸ் ப்ளக்-இன் ஹைப்ரிட் எஸ்யுவி இந்தியாவில் உற்பத்தி செய்யப்பட்டு வெளிநாடுகளுக்கு ஏற்றுமதி செய்யப்பட்டாலும், தற்போதைக்கு இங்கு விற்பனைக்கு வர வாய்ப்பில்லை என தெரிகிறது.  இதற்கு மாற்றாக இங்கு க்ராண்ட் ஹைப்ரிட் உள்ளிட்ட எஸ்யுவிக்களை களமிறக்க சுசூகி பரிசீலித்து வருகிறதாம்.