CNG Cars: காசு இல்லப்பா..! மைலேஜ் தான் முக்கியம் - 78 ஆயிரம் கார்களை விற்று தீர்த்த மாருதி - மாடல்களின் விலை

Maruti Car Sales May 2026: பெட்ரோல், டீசல் விலையேற்றத்திற்கு மத்தியில் கடந்த மே மாதத்தில் மட்டும் மாருதி சுசூகிநிறுவனம் சுமார் 78 ஆயிரம் சிஎன்ஜி கார் மாடல்களை விற்பனை செய்துள்ளது.

ஆட்டோமொபைல் செய்திகள்

Source : Somnath Chatterjee

Maruti CNG Car Sales May 2026 : மாருதி சுசூகி நிறுவனத்தின் சிஎன்ஜி கார் விற்பனை கடந்த மாதத்தில் 40 சதவிகிதம் அதிகரித்துள்ளது.

சிஎன்ஜி பிரிவில் அசத்திய மாருதி:

சர்வதேச அளவில் கச்சா எண்ணெய் விநியோகத்தில் நிலவும் நிலையற்ற தன்மை காரணமாக, பெட்ரோல் மற்றும் டீசலின் விலை தொடர்ந்து அதிகரித்து வருகிறது. கடந்த மாதம் 15ம் தேதி பெட்ரோல் விலை ஒரு லிட்டர் 100 ரூபாய் 80 காசுகளுக்கும், டீசல் விலை ஒரு லிட்டர் 92 ரூபாய் 39 காசுகளுக்கும் விற்பனையாகி வந்தன. ஆனால் இன்று பெட்ரோல் ஒரு லிட்டர் 107 ரூபாய் 74 காசுகளுக்கும், ஒரு லிட்டர் டீசல் 99 ரூபாய் 55 காசுகளுக்கும் விற்பனை செய்யப்படுகிறது. ஏற்கனவே பெட்ரோலில் எத்தனால் கலந்து விற்பனை செய்வதன் மூலம் மைலேஜ் குறைந்துள்ளதாக கூறப்படும் நிலையில், எரிபொருட்களின் விலையும் உயர்ந்து வருவது வாகன ஓட்டிகளிடையே கடும் அதிர்வலைகளை ஏற்படுத்தியுள்ளது. அதன் விளைவாகவே, கடந்த ஒரு மாதத்தில் மட்டும் சுமார் 78 ஆயிரம் சிஎன்ஜி வாகனங்களை மாருதி சுசூகி நிறுவனம் மட்டும் விற்பனை செய்துள்ளது. இதனை முந்தைய ஏப்ரல் மாத விற்பனையுடன் ஒப்பிட்டால் 40 சதவிகிதம் அதிகம் என கூறப்படுகிறது.

மாருதியின் மே மாத விற்பனை

கடந்த மே மாதத்தில் மாருதி சுசூகி இந்தியா லிமிடெட் நிறுவனம் மொத்தம் 2 லட்சத்து 42 ஆயிரத்து 688 யூனிட்டுகளை விற்பனை செய்துள்ளது. இது அந்நிறுவனத்தின் வரலாற்றிலேயே மிக அதிகமான இதுவரை இல்லாத மாதாந்திர விற்பனை அளவாகும். உள்நாட்டில் மட்டுமே ஒரு லட்சத்து 93 ஆயிரத்து 535 யூனிட்டுகள் விற்பனையாகி புதிய உச்சத்தை எட்டியுள்ளன. ப்ராண்டின் சிஎன்ஜி பிரிவு விற்பனை 40 சதவிகிதம் அதிகரித்து சுமார் 78 ஆயிரம் யூனிட்கள் கொள்முதல் செய்யப்பட்டுள்ளன.  கடந்த மாதம் மாருதி நிறுவனம் விற்பனை செய்ய மூன்றில் ஒரு கார் சிஎன்ஜி எடிஷன் என்பது குறிப்பிடத்தக்கது. எரிபொருள் விற்பனை தொடர்ந்து அதிகரித்தால் சிஎன்ஜி கார்கலின் விற்பனை மேலும் அதிகரிக்கும் என கூறப்படுகிறது.

மைலேஜில் அசத்தும் பட்ஜெட் கார்கள்

எண்ட்ரி லெவல் ஹேட்ச்பேக் செக்மெண்டில் மாருதியின் வேகன் - ஆர் மாடலும், மிட்-சைஸ் எஸ்யுவி பிரிவில் விக்டோரிஸ் கார் மாடலும் ப்ராண்டிற்கான சிஎன்ஜி பிரிவு விற்பனைக்கு மிக முக்கிய பங்காற்றியுள்ளன. வழக்கமான இன்ஜின் அடிப்படையிலான வாகனங்களை விட சிஎன்ஜி வாகனங்கள் குறைந்த எரிபொருள் செலவு மற்றும் அதிகப்படியான மைலேஜை கொண்டிருப்பதால், அவை அன்றாடப் பயணங்களுக்கு மலிவு விலைத் தேர்வுகளாக விரும்பப்படுகின்றன. இந்தியாவிலேயே அதிகப்படியான சிஎன்ஜி ஆப்ஷன் கார் மாடல்களை வழங்கும் நிறுவனமாக மாருதி உள்ளது. இந்த பிரிவின் சந்தை பங்களிப்பை 70 முதல் 75 சதவிகிதம் வரை தன்னகத்தே கொண்டுள்ளது. மாருதியின் எண்ட்ரி லெவல் தொடங்கி எஸ்யுவி, எம்பிவி வரையிலும் சிஎன்ஜி ஆப்ஷன்கள் வழங்கப்படுகின்றன. மாருதி மட்டுமின்றி மற்ற நிறுவனங்கள் தரப்பில் இருந்து கிடைக்கும், சிஎன்ஜி மாடல்களும் வலுவான விற்பனையை பதிவு செய்துள்ளதாக தெரிகிறது.

மாருதி சிஎன்ஜி கார் ஆப்ஷன்கள்:

ஹேட்ச்பேக் பிரிவு - ஆல்டோ கே10, செலேரியோ, வேகன் ஆர், ஸ்விஃப்ட்

செடான் - டிசையர்

எஸ்யுவி & க்ராஸ்ஓவர் - ப்ரேஸ்ஸா, ஃப்ராங்க்ஸ், க்ராண்ட் விட்டாரா

எம்பிவி - எர்டிகா, XL6

மாடல்கள்	விலை (எக்ஸ்-ஷோரூம்)	ARAI மைலேஜ் (கி.மீ.,/கிலோவிற்கு)
ஆல்டோ கே10	ரூ.4.82 - ரூ.5.32 லட்சம்	33.85
செலேரியோ	ரூ.5.98 லட்சம்	34.43
வேகன் ஆர்	ரூ.5.89 - ரூ.6.42 லட்சம்	34.05
ஸ்விஃப்ட்	ரூ.7.45 - ரூ.8.39 லட்சம்	32.85
டிசையர்	ரூ.8.03 - ரூ.9.04 லட்சம்	33.73
ப்ரேஸ்ஸா	ரூ.9.17 - ரூ.11.46 லட்சம்	25.51
ஃப்ராங்க்ஸ்	ரூ.7.79 - ரூ.8.46 லட்சம்	28.51
க்ராண்ட் விட்டாரா	ரூ.13 - ரூ.14.75 லட்சம்	26.6
எர்டிகா	ரூ.10.76 - ரூ.11.82 லட்சம்	26.11
XL6	ரூ.12.43 லட்சம்	26.32
மாருதி விக்டோரிஸ்	ரூ.11.50 - ரூ.14.72 லட்சம்	27