Hybrid Cars: மிரட்டலான ஹைப்ரிட் கார் தான் வேணுமா? பட்ஜெட்டிலும், மைலேஜிலும் அசத்தும் மாடல்கள்- டக்கர் சாய்ஸ்

Hybrid Cars: ஹைப்ரிட் கார் தான் வாங்க வேண்டும் என விரும்புபவர்களுக்காக, இந்திய சந்தையில் கிடைக்கும், மிக முக்கியமான 5 மாடல்களின் விவரங்கள் கீழே பட்டியலிடப்பட்டுள்ளன.

ஹைப்ரிட் கார் மாடல்கள்

Source : Social Media

Show Quick Read

Key points generated by AI, verified by newsroom

• இந்தியாவில் ஹைப்ரிட் கார்களின் தேவை அதிகரித்து, செயல்திறன் மற்றும் எரிபொருள் சேமிப்பை வழங்குகின்றன.
• மாருதி விக்டோரிஸ், கிராண்ட் விட்டாரா ஆகியவை லிட்டருக்கு 28 கிமீ மைலேஜ், 5 நட்சத்திர பாதுகாப்பு தருகின்றன.
• டொயோட்டா ஹைரைடர், ஹைக்ராஸ் கார்கள் 22 கிமீ மைலேஜ், 4-5 நட்சத்திர பாதுகாப்புடன் வருகின்றன.
• ஹோண்டா சிட்டி e:HEV 27 கிமீ மைலேஜ், 900 கிமீ வரை சென்று 5 நட்சத்திர பாதுகாப்பு அளிக்கிறது.

Hybrid Cars: ஹைப்ரிட் கார் வாங்க திட்டமிடுபவர்கள் பரிசீலிக்க வேண்டிய முதன்மையான 5 மாடல்களின் விவரங்களை இந்த தொகுப்பில் அறியலாம்.

அதிகரிக்கும் ஹைப்ரிட் கார்களின் மோகம்:

இந்தியாவில் ஹைப்ரிட் கார் மாடல்களின் பயன்பாடு வேகமாக அதிகரித்து வருகின்றன. ஓட்டுநர்கள் எதிர்பார்க்கும் எரிபொருள் திறன் மற்றும் ஆச்சரியப்படுத்தக் கூடிய செயல்திறன் ஆகியவற்றுக்கு இடையே சரியான சமநிலையை வழங்குகின்றன. இத்தகைய கார்கள் வழக்கமான பெட்ரோல் கார்களுக்கான ஒரு சிறந்த மாற்றாக உருவெடுத்து வருகின்றன. 2026 ஆம் ஆண்டில், பல பிரபலமான மாடல்கள் அவற்றின் மேம்பட்ட தொழில்நுட்பம், ஸ்டைலான வடிவமைப்பு மற்றும் நடைமுறை அம்சங்களுக்காக தனித்து நிற்கின்றன. அந்த பட்டியலில் மாருதி சுசூகி விக்டோரிஸ், மாருதி சுசூகி கிராண்ட் விட்டாரா, டொயோட்டா ஹைரைடர், டொயோட்டா ஹைக்ராஸ் மற்றும் ஹோண்டா சிட்டி e:HEV ஆகியவை வெகுஜன சந்தை பிரிவில் பயனர்களிடையே ஆதிக்கம் செலுத்தி வருகின்றன.

டாப் 5 டக்கரான ஹைப்ரிட் சாய்ஸ்:

1. மாருதி சுசூகி விக்டோரிஸ்

மாருதி சுசூகி விக்டோரிஸின் வலுவான ஹைப்ரிட் வேரியண்ட்களானது ரூ.16.38 லட்சம் (எக்ஸ்-ஷோரூம்) என்ற தொடக்க விலையில் கிடைக்கின்றன. ஹைப்ரிட் ஆப்ஷனானது 1.5 லிட்டர் பெட்ரோல் இன்ஜினிலிருந்து சக்தியைப் பெறுகிறது மற்றும் லிட்டருக்கு 28.65 கிமீ மைலேஜை வழங்குகிறது. இந்த மாடலானது முறையே 170 hp மற்றும் 263Nm ஒருங்கிணைந்த பவர் மற்றும் டார்க்கை உற்பத்தி செய்கிறது மற்றும் இ-சிவிடி டிரான்ஸ்மிஷனைக் கொண்டுள்ளது. 45 லிட்டர் கொள்ளளவு கொண்ட எரிபொருள் டேங்கை முழுமையாக நிரப்பினால், சுமார் ஆயிரத்து 200 கிலோ மீட்டர் தூரம் இடைநிற்றல் இன்றி பயணிக்க முடியும். இது பாதுகாப்பு பரிசோதனையில் 5 ஸ்டார் ரேட்டிங்கை பெற்றுள்ளது.

 

2. மாருதி சுசூகி க்ராண்ட் விட்டாரா

மாருதி சுசூகி க்ராண்ட் விட்டாரா 1.5 லிட்டர் பெட்ரோல்-ஹைப்ரிட் இன்ஜினை கொண்டு, லிட்டருக்கு 27.97 கிமீ மைலேஜை வழங்குவதாக தெரிவிக்கப்பட்டுள்ளது. அதிகபட்சமாக 170 ஹெச்பி பவரையும், 263 என்எம் டார்க்கையும் வெளிப்படுத்தும் e-CVT டிரான்ஸ்மிஷனுடன் பொருத்தப்பட்டுள்ளது மற்றும் இதன் விலை ரூ.18.65 லட்சம் (எக்ஸ்-ஷோரூம்) ஆக நிர்ணயிக்கப்பட்டுள்ளது. 45 லிட்டர் கொள்ளளவு கொண்ட எரிபொருள் டேங்கை நிரப்பினால், ஆயிரத்து 200 கிலோ மீட்டருக்கும் அதிகமாக இடைநிற்றலின்றி பயணிக்க முடியும். இது பாதுகாப்பு பரிசோதனையில் 4 ஸ்டார் ரேட்டிங்கை பெற்றுள்ளது.

3. டொயோட்டா அர்பன் க்ரூஸர் ஹைரைடர்

டொயோட்டா அர்பன் க்ரூஸர் ஹைரைடர் 1.5 லிட்டர் பெட்ரோல்-ஹைப்ரிட் இன்ஜினை கொண்டு, லிட்டருக்கு 27.97 கிமீ மைலேஜை வழங்குவதாக அறிவிக்கப்பட்டுள்ளது. 91.19 ஹெச்பி மற்றும் 112 என்எம் டார்க்கை உற்பத்தி செய்கிறது. ரூ.16.72 லட்சம் (எக்ஸ்-ஷோரூம்) என்ற தொடக்க விலையில், இந்த மாடல் இ-டிரைவ் டிரான்ஸ்மிஷனைக் கொண்டுள்ளது. 45 லிட்டர் கொள்ளளவு கொண்ட எரிபொருள் டேங்கை நிரப்பினால், ஆயிரத்து 200 கிலோ மீட்டருக்கும் அதிகமாக இடைநிற்றலின்றி பயணிக்க முடியும். சர்வதேச பாதுகாப்பு பரிசோதனையில் 4 ஸ்டார் ரேட்டிங்கை பெற்றுள்ளது.

4. டொயோட்டா இன்னோவா ஹைக்ராஸ்

டொயோட்டா இன்னோவா ஹைக்ராஸ் கார் மாடலானது ரூ.26.30 லட்சம் (எக்ஸ்-ஷோரூம்) என்ற தொடக்க விலையில் கிடைக்கிறது. இது 2.0 லிட்டர் பெட்ரோல்-ஹைப்ரிட் இன்ஜின் மூலம், அதிகபட்சமாக 183.7 ஹெச்பி பவரையும், 191 என்எம் டார்க்கையும் உற்பத்தி செய்கிறது. சீக்வன்சியல் ஷிஃப்ட்களுடன் கூடிய இ-டிரைவ் டிரான்ஸ்மிஷனை கொண்டு, லிட்டருக்கு லிட்டருக்கு 22.16 கிமீ மைலேஜை வழங்குகிறது. 52 லிட்டர் கொள்ளளவு கொண்ட எரிபொருள் டேங்கை நிரப்பினால், ஆயிரத்து 200 கிலோ மீட்டருக்கும் அதிகமாக இடைநிற்றலின்றி பயணிக்க முடியும். பாரத் பாதுகாப்பு பரிசோதனையில் 5 ஸ்டார் ரேட்டிங்கை பெற்றுள்ளது.

5. ஹோண்டா சிட்டிe:HEV

ஹோண்டா சிட்டி e:HEV காரில் 1.5 லிட்டர் i-VTEC நேச்சுரலி ஆஸ்பிரேட்டட் பெட்ரோல் இன்ஜின் பொருத்தப்பட்டுள்ளது. அதோடு ஹைப்ரிட் சிஸ்டம் இணைக்கப்பட்டு,லிட்டருக்கு 27.26 கிமீ மைலேஜ் வழங்குவதாக கூறப்படுகிறது. இந்த மாடல் 124 hp மற்றும் 253 Nm பீக் டார்க்கை உற்பத்தி செய்கிறது. விலை ரூ.19.99 லட்சத்தில் (எக்ஸ்-ஷோரூம்) தொடங்குகிறது. 40 லிட்டர் கொள்ளளவு கொண்ட எரிபொருள் டேங்கை நிரப்பினால், 900 கிலோ மீட்டருக்கும் அதிகமாக இடைநிற்றலின்றி பயணிக்க முடியும். பாரத் பாதுகாப்பு பரிசோதனையில் 5 ஸ்டார் ரேட்டிங்கை பெற்றுள்ளது.