Honda Hybrid SUV: ஹைப்ரிட்னா இனி ஹோண்டா தான்..! தரமான 3 எஸ்யுவிக்களுக்கு அப்க்ரேட் - பட்ஜெட் விலை, கூடுதல் மைலேஜ்

Honda Hybrid SUV: இந்திய ஆட்டோமொபைல் சந்தையில் அடுத்தடுத்து 3 ஹைப்ரிட் எஸ்யுவி கார் மாடல்களை அறிமுகப்படுத்த ஹோண்டா பரிசீலித்து வருவதாக தகவல் வெளியாகியுள்ளது.

ஆட்டோமொபைல் செய்திகள்

Source : social media/x

Honda Hybrid SUV: இந்திய ஆட்டோமொபைல் சந்தைக்கு கொண்டு வர ஹோண்டா பரிசீலிக்கும், 3 ஹைப்ரிட் எஸ்யுவி கார்கள் குறித்து கீழே விவரிக்கப்பட்டுள்ளது.

3 ஹைப்ரிட் கார்களை களமிறக்கும் ஹோண்டா..!

இந்திய ஆட்டோமொபைல் சந்தையில் தனது ஹைப்ரிட் போர்ட்ஃபோலியோவை வலுவாக விரிவுபடுத்த ஹோண்டா நிறுவனம் திட்டமிட்டுள்ளது. இதற்காக 2026-27 காலகட்டத்தில் அடுத்தடுத்து 3 எஸ்யுவிக்களை அறிமுகப்படுத்தவும், அதில் ப்ராண்டின் e:HEV ஹைப்ரிட் தொழில்நுட்பத்தை வழங்கவும் பரிசீலித்து வருகிறதாம். இந்நிலையில் வெளியாகியுள்ள தகவல்களின் படி, எலிவேட், CR-V, ZR-V ஆகிய கார்கள் ஹைப்ரிட் ஃபார்மில் சந்தைப்படுத்தப்பட உள்ளனவாம். இந்த மாடல்கள் குறித்து இதுநாள் வரை வெளியாகியுள்ள விவரங்கள் கீழே பட்டியலிடப்பட்டுள்ளன. 

ஹோண்டாவின் புதிய ஹைப்ரிட் கார்கள்:

1. ஹோண்டா ZR-V ஹைப்ரிட்

நடப்பாண்டின் இறுதியில் ZR-V ஹைப்ரிட் கார் மாடலை ஹோண்டா அறிமுகப்படுத்தும் என எதிர்பார்க்கப்படுகிறது. சர்வதேச சந்தையில் விற்பனையில் உள்ள தனது மாடல்களை இந்தியாவில் அறிமுகப்படுத்தி உள்ளுரில் தனது இமேஜை வலுப்படுத்தும் ,ப்ராண்டின் புதிய திட்டத்தின் ஒரு அங்கம் இதுவாகும். ZR-V எஸ்யுவியில் 2.0 லிட்டர் பெட்ரோல் இன்ஜின் ஆனது இரண்டு மின்சார மோட்டார்கள் உடன் இணைக்கப்படுகிறது. இதன் மூலம்  184 bhp மற்றும் 315 Nm ஆற்றல் உற்பத்தி செய்யப்படும் என கூறப்படுகிறது. இந்த எஸ்யுவி ஆனது லிட்டருக்கு 22.2 கிலோ மீட்டர் மைலேஜ் வழங்கும் என நிறுவனம் தரப்பில் உறுதியளிக்கப்பட்டுள்ளது.

டிசைன் அடிப்படையில் ZR-V எஸ்யுவி ஆனது தனித்துவமான ஓவல் வடிவிலான முன்புற க்ரில், பகல் நேரங்களில் ஒளிரும் விளக்குகளுடன் கூடிய எல்இடி முகப்பு விளக்குகள் மற்றும் 19 இன்ச் அலாய் வீல்கள் ஆகியவற்றை கொண்டுள்ளன.  உட்புறத்தில் 9 இன்ச் டச்ஸ்க்ரீன்,  இன்ஃபோடெயின்மெண்ட் சிஸ்டம், வயர்லெஸ் சார்ஜிங் மற்றும் போஸ் சவுண்ட் சிஸ்டம் ஆகியவை இடம்பெற்றுள்ளன. மேனுவல் மற்றும் ஆட்டோமேடிக் என இரண்டு கியர்பாக்ஸ் ஆப்ஷன்களிலும் வழங்கப்படுமெனவும், பூஜ்ஜியத்திலிருந்து 100 கிலோ மீட்டர் வேகத்தை 7.8 விநாடிகளில் எட்டும் என்றும் கூறப்படுகிறது. இதன் விலை 25 லட்சம் முதல் தொடங்கலாம் என கூறப்படுகிறது.

2. ஹோண்டா எலிவேட் ஹைப்ரிட்

உள்நாட்டு சந்தையில் ப்ராண்டின் பிரபலமான எஸ்யுவி மாடலாக உள்ள, எலிவேட்டின் ஹைப்ரிட் எடிஷனை தயாரிப்பதிலும் ஹோண்டா தீவிரமாக உள்ளது. நடப்பாண்டின் நடுப்பகுதியில் சந்தைப்படுத்தப்பட வாய்ப்புள்ளதாக தெரிகிறது. ஹோண்டா சிட்டி e:HEV மாடலில் உள்ள அதே பவர்ட்ரெயினை பயன்படுத்தும் என எதிர்பார்க்கப்படுகிறது. அதாவது 1.5 லிட்டர் 4 சிலிண்டர் பெட்ரோல் இன்ஜின் இரண்டு மின்சார மோட்டர்களுடன் இணைக்கப்படும். உள்ளூரிலேயே பெரும்பாலான வேலைகளை செய்து, எளிதில் அணுகக் கூடிய விலையில் காரை சந்தைக்கு கொண்டு வர நிறுவனம் பரிசீலித்து வருகிறது. லிட்டருக்கு 26 கிலோ மீட்டர் வரையிலும், எரிபொருள் டேங்கை முழுமையாக நிரப்பினால் ஆயிரம் கிலோ மீட்டர் வரையிலும் மைலேஜ் அளிக்கும் வகையில் எலிவேட் வடிவமைத்து வருகிறதாம். இதன் மூலம் மலிவு விலை ஹைப்ரிட் கார் என்பதோடு, எரிபொருள் செலவை கணிசமாக குறைக்கும் மாடலாகவும் எலிவேட்டை முன்னிலைப்படுத்த ஹோண்டா முனைப்பு காட்டுகிறது. இதன் தொடக்க விலை 18 முதல் 20 லட்சம் ரூபாய் வரை நிர்ணயிக்கப்படலாம்.

3. ஹோண்டா CR-V ஹைப்ரிட்

ஹோண்டாவின் CR-V கார் மாடலானது ஹைப்ரிட் வெர்ஷனில் வரும் 2027ம் ஆண்டு ஜுன் மாதத்தில் மீண்டும் இந்தியாவிற்கு வருகை தர உள்ளது. கடந்த 2020ம் ஆண்டு இந்த காரின் வழக்கமான எடிஷனின் விற்பனை உள்நாட்டு சந்தையில் கைவிடப்பட்டது குறிப்பிடத்தக்கது. புதிய ப்ரீமியம் ஹைப்ரிட் எஸ்யுவி ஆனது முற்றிலும் கட்டமைக்கப்பட்ட யூனிட்டாக விற்பனைக்கு கொண்டுவரப்பட உள்ளது. எனவே இதன் விலை ரூ.40 முதல் ரூ.45 லட்சம் வரை நிர்ணயிக்கப்படலாம். 2.0 லிட்டர் பெட்ரோல் ஹைப்ரிட் பவர்ட்ரெயினை கொண்டு, எலெக்ட்ரிக் ஆல்வீல் ட்ரைவ் அம்சத்தை பெற உள்ளது. 

காரின் உட்புறத்தில் பெரிய 15 இன்ச் டச்ஸ்க்ரீன் இன்ஃபோடெயின்மெண்ட் சிஸ்டம், பாதுகாப்பை மேம்படுத்த லெவல் 2 ADAS, அடங்கிய நவீன கேபினை பெற உள்ளது. ப்ராண்டின் இந்த முதன்மையான எஸ்யுவி ஆனது, உள்நாட்டு சந்தையில் ஸ்கோடா கோடியாக் மற்றும் ஹுண்டாய் டக்சன் மாடல்களுடன் போட்டியிட உள்ளது.

ஹோண்டா ஹைப்ரிட் கார்களின் விவரங்கள்:

கார் மாடல்	உத்தேச வெளியீடு	இன்ஜின் விவரங்கள்	ஆற்றல்	உத்தேச  விலை
எலிவேட் ஹைப்ரிட்	2026ன் நடுப்பகுதி	1.5 லிட்டர் 4 சிலிண்டர் பெட்ரோல் இன்ஜின்	125 bhp, 253 Nm	ரூ.18 -20 லட்சம் (தொடக்க விலை)
CR-V ஹைப்ரிட்	ஜுன், 2027	2.0 லிட்டர் பெட்ரோல் ஹைப்ரிட் இன்ஜின்	204 bhp	ரூ.40-45 லட்சம் (விலை வரம்பு)
ZR-V ஹைப்ரிட்	2026ம் ஆண்டு இறுதி	2.0 லிட்டர் பெட்ரோல் இன்ஜின்	184 bhp மற்றும் 315 Nm	ரூ.25 லட்சம் (தொடக்க விலை)