எகிறும் பெட்ரோல் டீசல் விலை.. உங்க செலவை குறைக்கும் பெஸ்ட் மைலேஜ் கார்கள்... இந்தாங்க லிஸ்ட்

நடுத்தர வர்க்க குடும்பங்கள் ஒரு காரை வாங்குவதற்கு முன்பு அதன் மைலேஜ் மற்றும் ரன்னிங் காஸ்ட் (பராமரிப்பு செலவு) ஆகியவற்றிற்கு அதிக முக்கியத்துவம் கொடுக்கிறார்கள்.

ஆட்டோமொபைல் செய்திகள்

Source : ABP Live

தற்போதைய காலகட்டத்தில் தொடர்ந்து உயர்ந்து வரும் பெட்ரோல், டீசல் மற்றும் சிஎன்ஜி (CNG) விலை உயர்வு, சாமானிய மக்களின் மாதாந்திர பட்ஜெட்டை கடுமையாக பாதித்துள்ளது.

எகிறும் மைலேஜ்

எரிபொருளுக்கான செலவு நாளுக்கு நாள் அதிகரித்து வருவதால், குறைந்த பெட்ரோலில் அதிக தூரம் செல்லக்கூடிய கார்களை வாங்குவதில்தான் பெரும்பாலான மக்கள் தற்போது ஆர்வம் காட்டி வருகின்றனர். இதனாலேயே இந்திய சந்தையில் அதிக மைலேஜ் தரும் கார்களுக்கான தேவை மிக வேகமாக அதிகரித்து வருகிறது. குறிப்பாக நடுத்தர வர்க்க குடும்பங்கள் ஒரு காரை வாங்குவதற்கு முன்பு அதன் மைலேஜ் மற்றும் ரன்னிங் காஸ்ட் (பராமரிப்பு செலவு) ஆகியவற்றிற்கு அதிக முக்கியத்துவம் கொடுக்கிறார்கள்.

மாருதி சுஸுகி செலிரியோ 

அதிக மைலேஜ் தரும் கார்களின் பட்டியலில் மாருதி சுஸுகி செலிரியோ முதலிடத்தில் உள்ளது. இதன் பெட்ரோல் வேரியண்ட் ஒரு லிட்டருக்கு சுமார் 26 கிலோமீட்டர் மைலேஜ் தருகிறது. அதே நேரத்தில், இதன் சிஎன்ஜி வேரியண்ட் ஒரு கிலோவிற்கு சுமார் 34 கிலோமீட்டர் சராசரி மைலேஜை வழங்குகிறது. சிறிய குடும்பங்களுக்கும், தினமும் நகரத்திற்குள் பயணிப்பவர்களுக்கும் இந்த கார் மிகவும் சிக்கனமான தேர்வாக கருதப்படுகிறது. மேலும் இதன் பராமரிப்பு செலவும் குறைவு என்பதோடு, நாடு முழுவதும் இதற்கான சர்வீஸ் நெட்வொர்க்கும் எளிதாகக் கிடைக்கிறது.

மாருதி வேகன் ஆர்

இந்திய வாடிக்கையாளர்களின் ஆல்-டைம் ஃபேவரிட் காராக மாருதி வேகன் ஆர் திகழ்கிறது. தாராளமான இடவசதி கொண்ட கேபின் மற்றும் சிறந்த எரிபொருள் சிக்கனம் ஆகியவை தான் இந்த காரின் மிகப்பெரிய பலம். இதன் பெட்ரோல் மாடல் லிட்டருக்கு சுமார் 25 கிலோமீட்டர் மைலேஜையும், சிஎன்ஜி மாடல் கிலோவிற்கு சுமார் 34 கிலோமீட்டர் மைலேஜையும் வழங்கக்கூடியது. இதன் காரணமாகவே டாக்சி பயன்பாட்டிற்கும் மற்றும் சொந்த பயன்பாட்டிற்கும் இந்த கார் மக்கள் மத்தியில் பெரும் வரவேற்பைப் பெற்றுள்ளது.

இதையும் படிங்க: Bajaj Chetak 3501 vs River Indie :பஜாஜ் சேத்தக் Vs ரிவர் இன்டி: பெட்ரோல் விலையேற்றத்திற்கு முற்றுப்புள்ளி வைக்கப்போகும் பெஸ்ட் EV எது?

மாருதி ஸ்விஃப்ட் மற்றும் டிசையர் 

மாருதி ஸ்விஃப்ட் மற்றும் டிசையர் ஆகிய கார்களும் இந்த பட்டியலில் இடம் பிடித்துள்ளன. புதிய ஸ்விஃப்ட் கார் லிட்டருக்கு சுமார் 25 கிலோமீட்டர் மைலேஜ் தருகிறது. மறுபுறம், டிசையர் காரின் சிஎன்ஜி மாடல் கிலோவிற்கு 33 கிலோமீட்டருக்கும் அதிகமான சராசரி மைலேஜை வழங்குவதாகக் கூறப்படுகிறது. கூடுதல் பூட் ஸ்பேஸ் (டிக்ஃகி வசதி) கொண்ட ஒரு குடும்ப கார் தேவைப்படுபவர்களுக்கு டிசையர் ஒரு சிறந்த தேர்வாகும். இதனால் தான் டாக்சி பிரிவிலும் டிசையர் காருக்கு அதிக தேவை உள்ளது.

அதிகரிக்கும் சிஎன்ஜி கார்களின் தேவை

சந்தையில் சிஎன்ஜி கார்களுக்கான தேவை மிக வேகமாக வளர்ந்து வருகிறது. இதற்கு மிக முக்கிய காரணம், அதன் குறைந்த இயக்க செலவு (Running cost) ஆகும். பெட்ரோல் கார்களில் ஒரு கிலோமீட்டர் பயணிக்க சுமார் 6 முதல் 8 ரூபாய் வரை செலவாகும் நிலையில், சிஎன்ஜி கார்களில் வெறும் 3 முதல் 4 ரூபாய் மட்டுமே செலவாகிறது. இதன் காரணமாகவே, தற்போது விற்பனையாகும் ஒவ்வொரு நான்கு புதிய கார்களில் ஒன்று சிஎன்ஜி காராக இருக்கிறது.

இவை தவிர மற்ற சிறந்த ஆப்ஷன்கள்

ஹூண்டாய் கிராண்ட் ஐ10 நியாஸ் (Hyundai Grand i10 Nios), டாடா டியாகோ (Tata Tiago) மற்றும் டாடா ஆல்ட்ரோஸ் (Tata Altroz) ஆகிய கார்களும் சிறந்த எரிபொருள் சிக்கனம் கொண்ட வாகனங்களின் பட்டியலில் அடங்கும். ஹூண்டாய் நிறுவனத்தின் சிஎன்ஜி கார்கள் அவற்றின் மேம்பட்ட அம்சங்கள் மற்றும் வசதிகளுக்காக பெயர் பெற்றவை. அதே சமயம், டாடா நிறுவனத்தின் கார்கள் அவற்றின் வலுவான கட்டமைப்பு மற்றும் சிறந்த பாதுகாப்பிற்காக வாடிக்கையாளர்களை வெகுவாக கவர்ந்து வருகின்றன.